2013年12月31日 星期二

聖基道兒童院

時間又撥回1982年,我每星期有3日,朝早喺沙田工作,到中午12點收工之後,會搭老細私家車返番大埔寫字樓。跟住就各適其適,我會同大埔同事一齊食午飯,但後來嚟咗個新老細,佢姓程,我叫佢程蛇。佢做野好軍真,喺咁多我共事過嘅朝庭嘅官員中,佢屬於公正嗰一類,不過就估唔到佢連愛心都爆棚。
佢第一日上班就同我講,每次返大埔寫字樓前,會順路去聖基道兒童院,



探吓啲小朋友,如果我唔願意跟佢去嘅話,會喺火車站放低我,自己搭火車返寫字樓。我起初覺得呢個老細都好過份,工餘時間,你唔應該拖埋我落水嘛,加上我習慣咗同班同事一齊食午飯兼吹吹水,佢咁做法,將我平時嘅生活習慣改變。講真
,我真係唔多高興架。不過,我又懶得自己要再搭火車返寫字樓,唯有同佢講: 是但喇!
聖基道兒童院位於沙田同大埔之間,近住松仔園,




嗰陣時重未有吐路港公路,所以大埔公路係唯一選擇。



第一日收工,搭住程蛇架車,直接駛去聖基道兒童院,一路開車,程蛇一路同我講話佢去兒童院有成
3年,間中會帶啲小朋友出嚟玩吓,佢話啲小朋友好可憐,


想帶啲歡樂俾佢哋,睇嚟程蛇都幾有愛心喎!
我哋去到嘅時候,見到有幾間院舍。剛停低車,就有位小姐出嚟接待我哋,程蛇話佢叫吳姑娘,係嗰度嘅社監。吳姑娘都係個二十出頭嘅後生女仔,佢認識程蛇有成一年,所以幾熟絡 。佢知我第一次去,略略講解聖基道兒童院嘅角色俾我聽。佢話兒童院主要嘅使命係收容社會上孤兒,提供近似家庭模式嘅24小時住宿服務,同埋幫助佢哋喺健康嘅環境成長,等佢哋長大咗可以溶入社會。裡面除咗提供住宿,重附設有幼兒服務。到咗適齡返學嘅時候,會安排喺附近學校上課,不過如果到咗18歲,就要遷出搵地方住。
吳姑娘跟住帶咗我哋去其中一間課室,我見到大約有20個小朋友,都係46歲左右,得4個男仔,其餘係女仔。佢哋一見到程蛇,有幾個小妹妹已經走出嚟攬住佢雙腳,佢哋好開心重猛咁叫APPLE,原來程蛇個英文名叫APPLE


佢哋好似見到自己嘅親人一樣,非常開心!吳姑娘同我講,話佢哋好慘架,細細個就俾父母遺棄,起初對陌生人存有介心,無咗父母嘅愛,佢哋嘅性格變得孤僻,但好彩有一啲好似程蛇咁嘅善心義工,周不時嚟探望佢哋,先至見到呢班小朋友臉上出現番笑容!

我見到程蛇唔知幾時帶咗個膠袋,跟住拎咗啲文具好似鉛筆,



顏色筆,擦膠



同埋單行薄等等,然後派俾啲小朋友。有個小妹妹好得意,肥嘟嘟,眼仔睩睩,佢走埋我身邊側起個頭,好奇怪咁望住我!可能平時得
APPLE嚟探佢哋,今日點解會多咗個人呢?佢面上嘅充滿疑惑嘅表情!

喺呢個時候,吳姑娘向啲小朋友講,從今日開始,會有多一個哥哥嚟探佢哋,吳姑娘細細聲問我有無英文名。 吓?英文名?我心諗對住班小朋友要改個好特別嘅名,我同吳姑娘講:叫佢哋嗌我做BANANA喇!



吳姑娘跟住向班小朋友宣布,我叫
BANANA,以後一有時間就會嚟探望佢哋,問佢哋開唔開心?佢哋反應好熱烈,我有少少受寵若驚嘅感覺。

個英文名對於班小朋友嚟講可能長咗啲,佢哋讀我個名讀得幾得意,班班難!

我原先諗住跟程蛇嚟玩吓嘅啫,最多咪一次起,兩次止,點知呢次真係俾吳姑娘擺上枱,我唯有擠出勉強嘅
容,


同班小朋友講,話我一得閒就會嚟探佢哋。

吳姑娘話依家啲小朋友開始食午飯,佢嗰度有飯堂,問我叫唔叫飯,我話都好呀,費事趕頭趕命返大埔食。結果我就喺嗰度同班小朋友一齊食飯。同一班唔認識嘅小朋友一齊食飯嘅感覺好得意,我坐喺張櫈仔度,跟住對住一張又長又窄嘅枱仔,好似去咗小人國咁,班小朋友好好奇,一路食飯一路望過嚟,結果食到通口通面都係飯。

 
時間過得好快,食完飯無幾耐,程蛇就同班小朋友話別,我估唔到有啲小朋友竟然眼濕濕,

唔捨得我哋離開,佢哋當咗我哋係佢親人。呢次探訪,我始料不及,喺返大埔途中,竟然希望快啲再去探班小朋友。原先有啲抗拒,諗住去一兩次當俾面程蛇,點知去咗之後,我竟然有一百八十度轉變,你話世事嘅野係咪難料呀!
好快趣到咗另一日,收工後程蛇同我一齊又去探訪啲小朋友, 呢次吳姑娘介紹晒佢哋啲名我知,不過大部份姓名都唔記得,印象深刻嘅只有嗰幾個活潑啲嘅小朋友!好似娟娟,雯雯,蛋撻仔等等,重有些少印象。班小朋友見過我一次,無開始時咁陌生。娟娟係最唔怕醜嘅一個,吳姑娘話佢一個月大個就俾父母遺棄,



喺間唐樓嘅梯級俾人發現,輾轉送咗嚟聖基道兒童院,依家
5歲,讀緊幼兒園。聽完之後,以為係粵語殘片橋段,諗唔到現實世界都有咁嘅慘事,查實娟娟肥嘟嘟好得意,又好聽話,真係唔知點解俾父母遺棄!

跟住吳姑娘又講咗幾個小孤兒嘅故事我聽,有啲父母或因病,或因意外去世,有啲父母離咗婚,



跟住揼抵個小朋友喺警署門口,結果最後輾轉就送咗嚟聖基道兒童兒院。總之每個孤兒背後都有個悲慘故事,而佢哋喺咁嘅環之下,亦有自強不息,苦學成材嘅例子,好似
1975年港姐冠軍張瑪琍咁,



佢係喺保良局成長,重拾做人嘅信心,最後成為港姐冠軍,實屬難能可貴!

我望番班小孤兒,有邊個夠胆講裡面無未來港姐呢!我聽過有啲同事抱怨,話點解買極六合彩都唔中頭獎,上天對佢真係唔公道!我面對班孤兒,心諗上天對佢哋又公平咩?自細缺乏父母之愛,又無兄弟姐妹一齊成長,究竟佢哋生存喺世上嘅義喺乜呢?我突然覺得佢哋真係好凄涼!
今次我都買咗啲顏色筆比小朋友,佢哋收到之後都好高興。我細個都鍾意畫公仔,尤其係畫一啲卡通動物。我一邊畫一邊問佢哋估唔估到我畫緊啲乜?



起初佢哋唔知我畫乜傢伙,到完成得七七八八嘅時候,佢哋先至知道我畫嘅係白兔或者獅子。







佢哋睇住隻動物逐漸出現,覺得好新奇同開心! 我畫完之後俾佢哋填顏色,時間過得特別快,眨吓眼我同程蛇又夠時間離開,佢哋每次到我離開時都唔捨得!


自此以後,我哋每個星期有三日去探訪班小朋友。有次我見到程
蛇架車頂踩滿泥腳印,有成十幾隻,程蛇話剛過去嘅周末,帶咗三個小朋友喺佢屋企寄宿,加埋佢兩個小朋友,咪搞到架車咁囉!佢真係愛心爆棚,睇嚟佢做社工合適啲喎!

吳姑娘一有時間就會帶我四圍去參觀,原來有部份比較大啲嘅孤兒,性格比較孤癖,自卑感較一般正常家庭嘅小朋友重,唔喜歡外人探訪。基於呢個原因,吳姑娘儘量唔騷擾佢哋。由於兒童院並沒有設立小學,佢哋到咗適齡讀小學嘅時候,要喺附近小學上課。吳姑娘話佢哋自己曉行路返學,放學之後自己會返番院舍,唔可以喺外邊渡宿。

我最印象深刻嘅係有一對孖生兄弟,佢哋兩個都細細粒,性格馴品,好少出聲講野。但透過佢哋幽鬱嘅眼神,我似乎感受到佢哋內心孤寂嘅世界。佢哋父母先後因病離世,聽講無乜親戚,過時過節從來無人嚟探過佢哋。吳姑娘話佢哋讀書算係咁,年年考試都喺十名之內,雖然同級別不過就唔同班。佢哋由3歲開始住喺院舍,住咗有成十年。每日兩兄弟一齊返學放學,雖然係孤兒,但比較其他孑然一身嘅孤兒叫做好得多,起碼都叫做有個照應!
有一日,我同程蛇如常到兒童院探望班小朋友,我見到吳姑娘眼紅紅,似乎曾經喊過,我雖然好奇,但覺得如果佢唔講,我都係唔好問佢。
到食飯嘅時候,佢話一陣間會拎啲飯俾大孖,睇佢食唔食,



我覺得奇怪!乜呢個時候大孖唔係返咗學咩?吳姑娘按奈不住,一路流淚一路講
: 佢兩兄弟上星期五喺放學返院舍途中遇到交通意外,大孖無事,但細孖就不幸身亡!由上星期五到依家,大孖就無再出過聲,又無食飯…….講到呢度,吳姑娘再講唔落去。

我當時聽到呢個不幸嘅消息,覺得上天實在太狠,我都有鼻酸酸嘅感覺,
但唔想喺吳姑娘面前眼紅紅咁丟臉,唯有側側膊行出院舍透透氣!我覺得喺呢啲地方做,好影响個人情緒,對住啲可憐嘅小朋友,人生觀都比較灰啲。

我同程蛇去探望班小朋友維持咗不到一年,一日收到上頭通知,下星期要調去其他部門。當聽到呢個消息嘅時候,心裡有啲失落,因為以後唔會有機會去探啲小朋友!
到最後探訪嗰日,我同吳姑娘講:呢次係我最後一日嚟探啲小朋友,佢好詫異,我講原因佢聽, 同埋示意佢唔好話俾班小朋友知,我見到吳姑娘同我一樣有少少無奈。
我嗰日同班小朋友相聚時竟然患得患失,心不在焉。到佢哋送我同程蛇離開嘅時候,我擰返轉頭望咗班小朋友幾次,內心祝福佢哋有個美好將來。我喺程蛇架車上面,低頭不語,沿途沒有出聲。當我諗起班小朋友問我下次畫乜野動物俾佢哋填色嘅時候,我雙眼已經充滿淚水,


我儘量將面孔移向窗外,唔想俾程蛇見到。
眨吓眼又過咗幾年,我調咗去某邊境管制站工作,有一日,見到有個著咗製服嘅女仔同我點頭,我覺得好面熟,諗咗好耐先至知道佢係吳姑娘!原來佢喺聖基道兒童院做咗幾年,程蛇問佢有無興趣投考入境處,佢都覺得喺兒童院工作會影响佢對人生嘅睇法,加上皇家工比較安穩,最後聽從程蛇建議,投身政府。

Nobody's Child 係我喜愛嘅一首民歌,我探訪完聖基道兒童院之後,再聽這首歌的時候,多了一份感觸!我在此將這首歌獻給所有孤兒以及同網友分享,希望大家喜歡!


Nobody's Child
(Words/Music: Cy Coben and Mel Foree)

As I was slowly passing
An orphan's home one day,
I stopped there for a moment
Just to watch the children play.
Alone a boy was standing,
And when I asked him why,
He turned with eyes that could not see
And he began to cry.

I'm nobody's child,
I'm nobody's child,
Just like the flowers
I am growing wild.
no mammy's kisses,
and no daddy's smile.
Nobody wants me,
I'm nobody's child.

No mammy's arms to hold me
Or soothe me when I cry,
'cause sometimes I feel so lonesome,
I wish that I could die.
I´d walk the streets of heaven
Where all the blind can see,
And just like all the other kids
there'd be a home for me.

I'm nobody's child,
I'm nobody's child,
just like the flowers
I'm growing wild.
no mammy's kisses
and no daddy's smile.
Nobody wants me,
I'm nobody's child.
 

完)

2013年12月24日 星期二

聖誕節

細個時除咗農曆新年之外,聖誕節係另一個我喜歡嘅節日。由於我讀嘅係教會小學,每年聖誕節都會舉行慶祝及表演。每當我聽到悠揚聖誕音樂嘅時候,都會有一種詳和同埋喜悅嘅感覺!而聖誕節令我感到最開心嘅,當然就係有聖誕禮物派喇!

我間學校位於山腳之下,校長每年會向當地村長申請斬一棵松樹做聖誕樹。依家為咗環保,已經再無呢支歌唱喇!至於斬樹呢啲粗重功夫,會由老師帶領高年班同學負責,我都曾經跟過佢哋上山斬樹,幾好玩架。
斬咗聖誕樹之後,每班要派幾位同學幫手佈置,通常喺樹身掛啲彩色紙,五顏六色嘅玻璃球同埋其他小飾物點綴一下,



樹腳放堆禮物,通常都係包裝得好似禮物嘅空盒,做吓樣嘅啫!喂,唔好鬆人住,重未搞掂呀!樹頂要擺番粒大星星先至似樣嘛!
好喇,佈置完棵聖誕樹,就輪到禮堂,因為喺聖誕節當日會有表演慶祝。聖經記載,當耶穌降生時,幾個博士東方見伯利恆方向天空上有一大星,於是跟着嗰粒星去到耶穌基督出生地。



佢哋為咗表示敬意,斷不可能空手而去,根據聖經記載,佢哋分別黃金乳香同埋沒藥朝拜耶穌基督。故此東方三博士喺聖誕表演中,成為不可缺少嘅人物!而搭建馬槽,亦成為指定嘅工作之一。

喺聖誕前嘅一個月,學校會舉行一連串活動,好似有班房佈置,聖誕咭設計等比賽等等。我自問都畫得一兩筆,但始終唔及班上有位女同學畫得咁靚,佢畫得仔細又有心機,所以年年都攞獎。

每個班主任都希望自已教嗰一班可以攞獎威番下,所以老師好多時都參與佈置。佈置物品有汽球,彩紙,聖誕花環等等。最常見嘅就係喺課室中間位置,將一條條嘅彩紙,向班房四個牆角拉去,再用膠紙黐穩。彩紙嘅交滙地方,即課室中間就掛上大大小小嘅汽球,課室佈置叫做完成,跟住到壁報板,平日貼堂嘅文章或學校規則,要通通讓路,取而代之嘅係聖誕裝飾。較有心思嘅同學,會喺玻璃窗上,黐上金色反光紙造嘅天使或者星星,或將兩條唔同顏色嘅彩紙扭埋一齊,效果俾單一彩紙鮮艷得多!佈置大致完成,班房即時充滿節日氣氛!班房大門掛埋個聖誕鐘就大功告成!
吓?賣晒咗聖誕鐘? 無問題,聖誕花環效果都唔錯!

至於同學之間,就興互相贈送聖誕咭為咗買聖誕咭,我要死慳死抵,將啲早餐錢慳慳埋埋,用嚟購買聖誕咭。所以我讀小學時,已經明白乜嘢叫人情緊過債!

聖誕咭分好多類,有聖誕雪景,


有耶穌故事,

有可愛小鳥或純聖誕飾物,


好似聖誕鐘,聖誕花等等沾有金粉嘅聖誕雪景較受人歡迎,之後又推出一種用膠造嘅立體聖誕咭,價錢較貴,但我卻喜歡以下的一種。

依家已經無人會寄聖誕咭咁老土,改由電腦下載嘅會郁動嘅閃咭,然後透過衣貓傳過去,省時又慳錢!雖然比我以前寄嗰啲生動同靚好多,但缺乏了一種心意,所以我認為科技雖然進步,但傳統聖誕咭有佢嗰種令人懷念嘅地方!

一個人兩條心唔係多,我會買唔同價錢嘅聖誕咭,自己友或者靚女同學梗係送張省鏡啲嘅咭喇!有啲同學好醒目,會送埋俾老師,喺呢方面,我就鈍好多喇,所以到考試唔合格,要罰打手板時,老師對我特別認真!

咦?我好似漏減啲嘢無提喎?就係聖誕老人!

我哋以前好少肥仔肥妹,所以搵個有份量嘅同學扮聖誕老人都唔係咁易,個個都了了廋廋,著起紅袍都唔似聖誕老人。高我3年級嘅,有個同學叫肥佬望,佢成隻豬咁肥,扮聖誕老人維肖維秒。佢畢咗業之後,搵人替佢個位置就唔難,但要有番咁上下嘥屎嘅同學,真係難搵咯!唯有將個枕頭綁係個同學條腰度,先至著番件聖誕老人袍喇!

至於牧羊人同東方三博士都係搵同學仔扮,


咁聖嬰耶穌又點搞呢? 好簡單,搵個膠公仔咪得囉!
我相信教會學校會較為重視聖誕節,至於非教會學校,聖誕節是否會失色好多呢?我就真係唔知喇!話咁快聖誕節就到,我喺呢度祝各位網友聖誕快樂!開開心心!


不一樣的渣馬(21/1/2024)

  後天便是一年一度的渣打馬拉松,但兩星期前的意外,不得不令我再三考慮應否退出是次賽事。我衡量過目前狀況,右腳跟已消腫,雖有少少痛,但跑十公里應可應付。最大的問題是右手不能活動自如,若出賽的話,需用左手托著來跑,否則右手會變成條條揈。 發生意外日期: 4/1/2024 ...