2015年7月30日 星期四

蠢人當政?

日前曾局長被炒魷,在社會上引起不少迴響,皆因曾局長代表老愛國!局長在1967年於港大校園內派傳單被捕,因為他不肯認錯而被判入牢獄。辜不論你是否認同他的政治理念,但他的愛國心是肯定的!他們這類「搞事份子」,在港英政府時期,連投考公務員的資格也被禠奪!
同一時間,有人選擇為了前途而遠離政治,愛國的吸引力遠遠比不上真金白銀。結果在植民政府統治時,搵個盤滿砵滿。有了利,當然想出名,97回歸後,對這一小撮牆邊草來說,是一個當官的好機遇。野心小一點的,撈個一官半職已心滿意足,野心大一些的,當然覷覷特首這寳座。
這類「忽然愛國」的投機者雖然當了特首,但他明白難以令巿民信服!由於從政的基礎薄弱,又缺乏社會支持,他唯有盡量討好中央,及用強權肅清異己,但這種做法卻適得其反!
就以上述事件為例,有人希望藉強權來樹立威信,但卻得到反效果。立法局主席曾鈺成痛斥這種做法愚蠢,更加多一句,蠢人永遠只會做蠢事,蠢人究竟所指是誰?大家似乎心中有數!翌日民建聯立法會議員譚耀宗記者問到曾鈺成口中的「蠢人」指是誰時,他說自己都是「蠢人」,所以不會估但認為有人「懶醒」。譚耀宗的說話可堪玩味,究竟他口中「懶醒」的是誰?曾鈺成抑或他曾說過的「蠢人」
有小道消息指,CY往北京述職時,被問及「佔中」事件及年青人缺乏愛國思想時,他曾向領導作出承諾,有官員會因為以上事件問責及辭職。他述職回港之後,即時公布兩位局長辭職的消息。兩位當事人被記者問及辭職的原因時,他們的回應頗為特別,曾德成說他「樂意辭職」,鄧國威則說自己熱愛工作,但因為「無法預計的家庭理由而要退下」!
「樂意辭職」以及「無法預計的家庭理由」也可以成為辭職的理由?我還以為只有在周星馳的戲裡,才會見到這麼無厘頭的回應!
曾德成曾在公開場合與CY不咬弦,例如CY在施政報告點名批評港大學生會刊物《學苑》有港獨思想,當時曾德成回應,沒看過《學苑》的有關論述,不便評論。他又曾經批評CY的一封公開信,用「年青」是語病,應寫「年輕」或「青年」才對。處處與CY對著幹,我相信這才是曾德成被炒的真正原因!
這事件發生後,民建聯主席李慧琼在出席電台節目時,指梁講話總會引起矛盾,政府免兩位局長職責時,可以在溝通上做得更好!而梁愛詩在接受記者訪問時表示:「無人同我講過話佢連任。」由此可見,特首似乎低估了曾德成的影响力。假如得不到民建聯的支持,在內憂外患的夾擊下,我相信CY連任的機會等於零,大家不妨拭目以待。

2015年7月24日 星期五

WhatsApp

禽日收咗同事一個WhatsApp: 內容是這樣的:
「各位小心, 這是我今朝的親身經歷:我屋企剛剛收到個無來電顯示的電話,一拎起是普通話錄音,通知我話有份文件擺喺中聯辦,叫我按2字與職員聯絡 。按後有一大陸男人問我攞姓名,我唔敢俾,問佢咩事?佢話無名CHECK唔到,於是我問佢攞低電話號碼,話會打返俾佢。佢俾咗21009004呢個電話過我。我唔知好唔好打番去?但老公話好大機會係騙案,叫我唔好理佢!」
睇完呢段Apps後,撩起咗我嘅好奇心,順便學吓野,睇吓究竟啲騙徒用乜手法呃人?我即時打電話去了解一下!第一次打去,無人接聽,轉咗去留言服務,我霎時間唔知噏乜?唯有求其問係咪大快活?我想落二份早餐柯打,第一份要五香肉丁湯粉,煙肉炒蛋,涷奶茶少甜多冰,第二份要麥皮,餐肉炒蛋,鴛鴦走糖多奶。大家記住,千祈唔好用自己手機打去,因為俾對方知道你個手機號碼,分分鐘玩返你轉頭,每晚深夜三點,依時依候收到電話叫你起身疴尿,咁就真係偷雞唔到蝕揸米!
我用公司電話打去,所以無有怕!到咗下晝,我又再打去試試 ,呢次竟然有個女仔接聽,我問係咪中聯辦?佢話我今日唔係第一個打去問呢個問題,我應該收到騙徒電話。咁我問佢間係乜公司?佢話係工聯會,我扮野話:我以為真係中聯辦有緊要野搵我添!我收線之後,跟住喺網上用呢個電話search,睇吓係咪工聯會,但係搵唔到,如果大家有時間的話,麻煩幫手核實一下呢個電話!

2015年7月22日 星期三

書法機構

中國人社會最忌嘅就係家醜外傳,但係好多時候,如果你投鼠忌器,唔將件事揚開去,以為可以得到內部平反嘅話,你就大錯特錯!衙門為求向公眾交差,會將隻死貓塞落你個口度,要你監生吞!你咪以為吞咗隻死貓,朝庭會念在你抵得諗,喺考勤報告裡面,俾番多個LIKE你。倒番轉頭,由於老頂唔LIKE你,喺人事快佬裡面,自此以後多咗隻黑豬,雖不致永不超生,但就肯定前途似「咁」!
日前有位青天大老爺,拒絕給予一個積犯保釋外出候審,但由於書記粗心大意,填漏咗拒絕保釋原因,結果引起軒然大波!
呢個積犯受到咗白鴿黨大狀嘅薰陶,覺得自己雖然犯法,但仍享有個人權利,故抱住一試心態,往上級法院提出上訴。怎料上訴庭竟接納其申請,將大老爺撤保嘅命令撤銷,疑犯可以保釋候審。
根據判決書的內容,上訴庭用「明目張胆,濫權,令司法機構蒙羞」等等字眼來批評青天大老爺,用字十分嚴厲,令人覺得青天大老爺知法犯法,肆意踐踏人權!
究竟青天大老爺是否真的隻手遮天,恣意妄為呢?原來這件事件發生之前,大老爺曾應疑犯要求請律師而將案件押後,但疑犯最終沒有兌現承諾,故此被撤保!
上訴庭判決書向公眾發出後,大老爺不甘被屈,覺得上訴庭未深入了解整件事,就貿然對外公佈,令佢聲譽受損,故此向天朝提出不滿,希望上大人還給他一個公道。
大老爺完成狀紙之後,按照規矩,先行給上司過目,但上司卻認 為大老爺的措詞欠妥,如不修改,很難獲得平反。跟著上司給 了大老爺一封據說由「高人」撰寫嘅狀書,叫大老爺只須在狀紙上簽名便成。但大老爺見到其中內容,要自願向上訴庭長道歉一點,覺得難以接受!大老爺不甘一再受辱,故此將此句刪去。結果申請平反一事,不獲上大人接納。
整件事件,上司有妨礙書法公正之嫌,大老爺有鑑於此,結果往衙門告狀!這次事件,只是冰山一角。欺凌之事,在衙門屢見不鮮,只不過這次的主角,不是職位低微嘅衙差,而是鐵面無私,高高在上的青天大老爺吧!
公道自在人心,這件事件,誰是誰非?一目了然,我撐青天大老爺!最危險嘅地方,就係最安全嘅地方!莫非處理書法嘅衙門,就係最無書法嘅地方?

2015年7月1日 星期三

爛搔


依家本港有唔少黨派,好似民建聯,街工,自由黨,民主黨,人民力量等等,雖然黨派繁多,但總括嚟講只係分兩派,即保皇黨同反對黨。保皇黨即是逢政府政策必定舉腳支持,而反對黨則逢政府政策必投反對票。

目前的立法局 ,已淪為政棍表演場地,由擲蕉開始,到擲水杯,拖篋,跟住撐黃傘!對於呢啲小學雞行徑,大部份巿民已經睇到生厭,但班政棍仍樂此不疲,皆因為他們還以為這類表演仍有巿場!


最近保皇黨嘅政改投票甩轆事件,成為巿民茶餘飯後嘅笑柄,政改三人組經過兩年部署,動用大量人力物力宣傳,希望盡最後努力,期望有泛民轉呔支持。結果宣傳愈多,支持率愈低!官員難道不知道,他們給巿民的形象並不討好嗎!

雖然保皇議員佔大多數,但比例上仍未達到通過議案的人數要求。政改不獲通過乃意料中事,但起碼支持及反對的票數會旗鼓相當,怎知最後得出來的結果卻只有8票支持,28票反對!最富戲劇性嘅原因係「等埋發叔!」!眾所周知,發叔只係掛名議員,平時開會甚少露面,故此,可以話多他一票唔嫌多,少他一票唔嫌少!不知是誰的鬼主意,話要等埋發叔?
呢次事件,又間接摑咗泛民一巴!之前長毛喺度老作,話有人用成億港元收買佢嘅一票,真係信不信由你?泛民周不時都言之鑿鑿,話北京喺背後發功。假如泛民所講嘅說話屬實,北京一早部署好,就肯定唔會出現呢次嘅甩轆事件喇!
葉劉為無投票而瞓唔著覺,翌日面對傳媒時,梨花帶雨,以示懊悔!


明眼人都知,佢當年甘願冒住被巿民上街遊行反對喝倒啋嘅聲音,力排眾議,倡議立法23條,已經為當特首鋪路。佢呢次無投支持票,京官對佢肯定有睇法,佢嘅仕途或有負面影响!故鏡頭前洒淚,不難理解,但林健峰卻人喊佢又喊,莫非佢收到料,自己有機會角逐未來特首?
 


講真,無論反對派或保皇黨議員,都係為咗自身利益而埋堆!你睇吓泛民就清楚,目前已經分裂成激進同保守兩派,原因係如果唔分裂出去,好多二三線嘅領袖,永遠要等班大佬退下,先至可以上位。所謂急功利,分裂出去,可以即時自立門戶,名成利就,亦唔需要睇大佬面口,何樂而不為?
至於保皇黨,大家都係既得利益者,所以無需要分裂出去。但利益有分大同小,所以暗地裡還是各懷鬼胎。日前有保皇黨群組 WhatsApp對話外洩,我一點也不覺詫異!只要那些資料可以賣到好嘅價錢,任何一位都有嫌疑,反正大家都是烏合之眾,當然以個人利益行先!
曾主席出身民健聯,去到利益關頭,會唔會幫番自己友呢?等於當年有位英超球証,聞說佢係曼聯擁躉,如果曼聯落後嘅話,佢嘅補時特別長,真至曼聯追平為止。一個人兩條心唔係多!泛民質疑曾鈺成偏幫民健聯,有乜出奇?反而泛民覺得曾主席處事大公無私,我先至覺得出奇!
終於又到七月,過埋七一遊行之後,班政棍忙於安排暑期活動,唔再噏三噏四。我哋普羅大眾,樂得耳根清靜,唔知大家有無呢個感覺呢?

不一樣的渣馬(21/1/2024)

  後天便是一年一度的渣打馬拉松,但兩星期前的意外,不得不令我再三考慮應否退出是次賽事。我衡量過目前狀況,右腳跟已消腫,雖有少少痛,但跑十公里應可應付。最大的問題是右手不能活動自如,若出賽的話,需用左手托著來跑,否則右手會變成條條揈。 發生意外日期: 4/1/2024 ...