2017年6月16日 星期五

誰能明白我


為免讀者誤會我借助呢個Blog搏宣傳,我辜且將我嘅姓名隠去,但又恐怕大家估錯,咁我俾少少牽屎大家。坊間有人稱我為唔得掂,又叫唔黑臉。好明顯,改我花名嘅巿民,係出自「憎人富貴厭人貧」嘅小農心態。我做得局長,點會唔掂?

所謂樹大招風,有部份人唔抵得我做到呢個位,故意將我妖魔化嘅啫! 當年我提出修訂《中學教育課程指引》查實都唔係乜全新概念,我今日能夠上位,主要係得到國家支持,所謂飲水思源,我都要為國家做番啲野。查實我想依家啲年青人,了解多啲國家國情,所以有必要延續國民教育,最後令到學校更有系統教授基本法之嘛!所謂國家好,香港更好,請問有乜唔妥?

我之前講過話每個月睇30本書,不過唔少巿民都話我吹水。查實30只不過係一個數目字,我藉此鼓勵年青人睇多啲書,就算吹水,本意都係良善嘅,你哋話我講得啱唔啱喇?

我相信大家都聽過讀萬卷書,不如行萬里路。我節錄「學問與遊歷」中其中幾句俾各位參考:「是以博學如蘇子,必月夜泛舟,始解石鐘之旨。雄武如趙王,必微服入秦,方知鄰國之情。」故此單憑睇書並唔足夠。我在任期間,不斷外遊,主要係想話俾年青人聽,遊歷嘅重要。查實以我一把年紀,外遊都幾辛苦架! 嗱嗱嗱! 我知又有人話我講風涼說話!唉!真係有苦自己知,啲人可能唔知我有三高,成日葯不離身,外遊勞碌,箇中苦況,實不足為外人道!

泛民政客,批評我有會唔開,成日外遊,浪費公帑。 佢哋聳恿一個婆婆去覆核港珠澳大橋,最後婆婆輸咗,不過佢無錢交訟費,結果要由納稅人埋單,無端端浪費咗七幾千萬,條數又點計先?佢哋事後解釋,話為咗公義同體驗法治精神,用幾千萬係物有所值喎! 呢啲咪叫神又佢,鬼又係佢囉!

我恩師做多一個月左右就無得撈,下屆特首想繼續用我,相信會受到唔少壓力。我知道連任嘅機會唔大,既然係咁,倒不如先發制人,自己宣佈唔撈先,起碼俾人一個錯覺,我無眷戀呢個位,雖然私底下我好想繼坐做呢個筍位。不過,如果到時揾唔到人代替我,要我留任的話,我已準備另一篇講辭: 很高興得到新任政府賞識,經詳細考慮之下,我覺得個人榮辱唔重要,最重要嘅係可以繼續為巿民服務。我有信心將本港嘅教育事業,在未來幾年之間,可以超英趕美!

我希望大家睇咗我呢篇宣言之後,對我有所改觀,支持我繼續出任教育局局長。

21 則留言:

  1. 冇辦法、府衙寧願花銀両去供養那些擅公帑嘅大花筒、都唔願認真去睇察一下實情、咁又點會掂呢?

    回覆刪除
    回覆
    1. 府衙只係喜歡嗰啲聽話局長,有無能力只係次要。

      刪除
  2. 西環特產
    蝦米
    唔得掂

    回覆刪除
  3. 唔怕生壞名,至怕改壞名,呢句話真係冇錯!
    好彩他只係做到局長,如今就只叫「唔得掂」,如果再做高級的,咁就弊過弊傢伙,到時個名分分鐘變咗做「唔掂得」,又或「掂唔得」,咁仲有王管嗎?

    回覆刪除
    回覆
    1. 局長職位都唔算低架喇!如果唔係佢恩公要落台,我諗佢重會做多五年。

      刪除
  4. 最近睇到另一位高官阿高佬文,趕大校長馬仔森,春大校長沈老堯出席公眾場合,幾條友好明顯係喜上眉梢,因為就快甩難。

    回覆刪除
    回覆
    1. 未當過官個個都想過吓做官癮,但估唔到做官要連娘親都帶埋返工,成日被人問候,依家有機會走,重唔喜上眉梢咩!但對吳局長,流肛華之流,水鬼升城隍,每月幾十萬,俾人鬧吓算得係乜?

      刪除
  5. 我以前公司同呢個唔得掂開左會, 佢份人的確衰, 好懶使又中意著數.

    話時話, 我真係識人睇書一年超過300本.

    回覆刪除
    回覆
    1. 查實每月睇30本書唔算多,但出自呢位仁兄把口,就會令人反感咁解啫!你睇佢個樣,都估到佢為人係點架喇!一句講晒,擦鞋仔一名!

      刪除
  6. 唓!一日睇三十本書容乜易呀,成本偵探小說,我都係咁…先睇頭幾頁,然後中間又睇吓,最後睇埋個大結局,咁睇法三十本書好容易就睇晒喇!哈哈哈…
    唉!香港啲教育局長真係不敢恭維!朝令夕改,
    誤人子弟!
    如果有錢的話,真係去外國讀書好過。
    而家返內地讀書可能仲好過係香港讀書。

    回覆刪除
    回覆
    1. 都要睇吓本書厚定薄,我曾經最快係用咗3日睇晒徐速嗰本星星月亮太陽,真係連瞓都無瞓,先至勉強完成。佢做得好就唔使成日被人鬧喇!我相信由CY提攜嘅局長,好極都有限。你講得啱,如果有機會的話,留學外國係明智之選。

      刪除
    2. 手誤!應該是“一個月”才對!:P

      刪除
  7. 哈哈!唔怕生壞命 最怕改壞名!

    回覆刪除
    回覆
    1. 中國傳統民間智慧係有根據嘅! 唔怕生壞命,最怕改壞名,真係唔到你唔信架!

      刪除
  8. 7月1日有新面孔,我估林鄭的班子都會好過CY的。如果陳茂波留任,我倒有興趣看看下份財政預算案會點寫。(上份他匆匆上任,好與壞都當與他關係不大吧)

    回覆刪除
    回覆
    1. 在香港從政有不少制肘,巿民都樂於見到新班子比舊班子優勝!

      刪除
    2. 新班子比舊班子更老化......

      刪除
    3. 家有一老,如有一寳.......如此類推,我好新班子了!

      刪除
  9. 佢最大問題係啲學生每發生不幸事件後,佢嗰幅死人嘴臉真係衰到冇朋友……

    回覆刪除
    回覆
    1. 哈哈! 我以為剩係我佢有成見添!

      刪除

不一樣的渣馬(21/1/2024)

  後天便是一年一度的渣打馬拉松,但兩星期前的意外,不得不令我再三考慮應否退出是次賽事。我衡量過目前狀況,右腳跟已消腫,雖有少少痛,但跑十公里應可應付。最大的問題是右手不能活動自如,若出賽的話,需用左手托著來跑,否則右手會變成條條揈。 發生意外日期: 4/1/2024 ...