2018年1月2日 星期二

飛髮

細個時,最唔鍾意嘅其中一件事,就係由老豆帶往飛髮舖剪髮。老豆唔會等我剪完先至走,一去到就會交帶飛髮佬:「師傅,個細路剪陸軍裝。」講完之後,俾低錢就鬆人。

我唔鍾意飛光頭,因為除咗俾同學仔笑之外,啲街坊一見到我,就會摸摸我個光頭,又搣下我塊面,好鬼討厭!
 
大家睇下我當時個頭就係飛成咁
 
睇唔清等我放大小小
 

嗰陣時冬天好涷,刮起大北風時,個頭吹到赤赤痛。可能就係咁,涷壞咗個腦,結果讀唔成書。

老豆話光頭容易打理,查實佢想慳錢就真,因為等頭髮完全生齊,需要一段時間。鏟光曬的話,咁就有排都唔駛去飛髮舖。

嗰陣時去飛髮,師傅例牌會問你剪乜野髮型?

當時髮型分四大類:

第一類叫陸軍裝,即係將所有頭髮刮光。
 
球星朗拿度嗰個河童裝,靈感應該嚟自陸軍裝,只不過將前額執頭髮留得較誇張吧!

 
第二類叫紅毛裝,頭髮比陸軍裝長少少,有啲師傅故意喺前額留番一執頭髮,當年算時髦架喇。

第三類係遊水裝,頭髮比紅毛裝長減啲啲咁多;
 
最有型嘅梗係花旗裝喇,話明花旗,梗係由花旗流入。頭髮比較厚同長,額前部份用髮蠟蠟起,再用風筒吹吹,形成波浪狀,十分有型。

 
不過話時話,如果個人無型,剪乜髮型都係假!

雖然我唔係咁鍾意飛髮,但又唔抗拒去飛髮舖喎,皆因嗰度有我最鍾意睇嘅公仔書。好似儍偵探,財叔,老夫子,鐵甲人,超人呢類連橫圖,老豆平時唔俾我同大佬睇架,話會睇壞腦,但去到飛髮舖就可以大睇特睇。
 

到咗七八十年代,潮流興留長髮。大部份男仔都長髮披肩,如果仲剪短髮? OUT! 當時男又長髮,女又長髮,喺背後睇真係好難分。尤其係喺開Party嘅時候,如果唔趁住有燈光嘅時候望清楚,熄咗燈後,分分鐘請錯男仔跳舞架!

大個咗,老豆已經管我唔到,嗰陣時我好少去飛髮,有時自己對住塊鏡剪,或者揾細佬幫手。雖然老豆成日哦,話成個長毛賊咁,想做飛仔呀?不過我就借咗聾耳陳隻耳,乜都聽唔到。老實講,我自己剪得都唔差。
 
到咗出嚟做野,唔可以再頭髮長長咁唔修邊幅。我先至開始去剪番髮。當其時唔係叫飛髮舖,係叫髮型屋。

改咗名之後,價錢都幾級跳,一般都要5-60蚊,如果指定髮型師嘅話,盛惠多20,換句話講,飛一次髮,差唔多成7-80蚊。過年前一個月又話加二加三,所以咪話唔乸利!

收得咁嘅錢,梗係要俾番咁上下服務。剪髮之前要洗頭,我嘅印象就係洗完又過水,過完又再洗,重覆幾次,然後開始到按摩。有啲人話享受,但我就覺得係活受罪,因為有啲洗頭妹亂咁用力扲,我好多時俾佢哋扲到頭都痛埋,所以洗完頭之後,一到按摩我就耍手擰頭。

嗰陣時去飛髮例要等,無個零鐘你都唔洗旨意離開。洗完頭之後坐喺張椅度發呆,終終輪到我剪頭髮。
 
通常髮型師會一路剪一路話你啲頭髮好唔掂,最好做啲乜乜護理,物物療程等等,跟住嚇下你,話如果唔保養一下,唔夠幾年頭髮就會甩晒。如果見你仲無反應,佢就會俾幾幅相你睇。啲頭髮變成咁,睇你怕唔怕!
 
 

甩頭髮我都唔怕,我最怕佢一路剪,一路吚吚哦哦。我試過買佢怕,參加咗一個十次嘅護髮療程,療程完咗之後,我覺得做同唔做都差唔多。唯一分別,就係無端端無咗千幾銀。

最斃十次療程之後,師傅話要繼續護理,又向你推銷一啲護髮用品,否則前工盡癈咁話喎! 佢又試開始一路剪,一路哦你參加下一個療程,總之沒完沒了。

每次去飛都咁麻煩,又嘥成粒鐘時間,結果喺十年前,我轉去幫襯一啲齋剪髮嘅一人舖,快捷妥當,既無人哦,收費又便宜,只係髮型屋嘅一半,真係抵到爛!

但好景不常,我幫襯開嗰間飛髮舖因為加租摺埋,我唯有轉去幫襯另類連鎖店。

最終揾到一間單剪只係收40大元嘅連鎖店,跟髮型屋比較,慳成半有多。呢間仲有會員制,如果一次過交200蚊,就可以成為VIP永久會員,每次收費平10蚊,即30有交易,張咭仲可以借俾人用。

我一年剪12次髮,每次慳10蚊,即120蚊,年零就返本,諗落有著數,故即時入會。

不過返到屋企坐低靜落嚟諗深一層,如果間舖執咗笠,咁我咪大拿拿無咗二舊水? 我愈諗愈老襯,唯有喺頭嗰一年,日日拜神拜佛,祈求呢間飛髮舖千祈咪執住!可能拜得神多自有神疪祐,過咗二年,間舖仍然健在。

我依家每次飛髮,都有一個進入收成期嘅感覺,就係贃咗10蚊。依家物價比幾十年前翻咗幾個翻,但我剪髮就愈嚟愈慳,唔多唔少反影到呢個行業嘅收入,真係每況愈下!查實唔單只剪髮,好似開貨櫃車,的士等等,收入都俾以前少成截。貧者愈貧,富者愈富,唔少人揾嘅錢,仲少過十幾年前!貧富嘅差距,肯定愈嚟愈大!

最後提提大家,如果有興趣的話,可以隨時問我借張咭用用!

37 則留言:

  1. 我記得七十年代去理髮廳還有男界女界之分,那時男人入到飛髮舖,通常都會遽支煙仔給你(除非你唔抽),呢啲唔知算唔算服務?
    也記得有一次,跟女朋友鬧意見,谷氣之下就飛咗個差佬裝,諗係紅毛裝啩?而且我又咁啱著住件短袖獵裝,咁就得意啦,我喺旺角花園街行,個啲蠱惑仔一見到我就即時閃開,你話好笑嗎?

    回覆刪除
    回覆
    1. 短袖獵裝,我當年曾替男友買黃太斜布做過啦!!

      刪除
    2. 原來做Stella男朋友咁好…
      哈哈,點解當年我搵唔到?

      刪除
    3. 恕兄,喺新界呢啲地踎舖冇煙仔送,可能你去嗰間高檔次,所以剪髮有煙送。
      我估你當時係想刮光頭,扮出家,嚇下女朋友。
      短頭髮加埋套獵裝,又幾似差佬Look喎!

      刪除
    4. 火姐,我有唔少同事都係著獵裝上班,後尾我都買咗一套返工。

      刪除
  2. 貧者愈貧,富者愈富!
    貧富嘅差距,肯定愈嚟愈大!

    回覆刪除
  3. 現在可能很多人唔知飛髮舖是乜冬冬!!
    世伯個花旗裝就型曝啦!
    家父開士多店,隔籬是街邊飛髮舖,有時的媽媽帶小朋友黎飛髮,喊聲嘈到我頭都痛埋,我睇公仔書是免費。
    天寒地涼飛個陸軍裝真係陰功豬咯,你做細路個陣肥嘟嘟又幾得喎!

    回覆刪除
    回覆
    1. 哈哈!火姐你誤會咗喇!
      嗰個係我姑丈嚟架,跟住係姑媽,大家姐同二家姐,第二排係我大哥同表妹。
      你講起我又記得,啲細路俾老豆老母挾去剪髮,好多都喺一路剪喊,可想而知,小朋友係唔鍾意剪髮嘅。
      飛光頭,夏天就幾好,冬天真係幾難捱架。

      刪除
  4. 我都好怕飛髮, 又係短到好核突.
    大左未有隱形眼鏡之前, 剝左眼鋼, 唔知自己剪成點, 好驚.
    我而家都好中意去$40齋剪, 又快, 又方便.

    回覆刪除
    回覆
    1. 我諗你父母唔會叫你剪短髮啩?
      依家開髮型屋真係好惡做,因為有唔少齋剪店,又平又快,搶咗髮型屋唔少客仔。

      刪除
  5. 我以前好怕去剪頭髮,同一個師傅,間中都有剪得合心水,但試過一次過年前去剪頭,竟然剪到成個任劍輝咁樣!人人問我做乜剪到咁短?我話過年加價兩倍收費,剪短D抵D。自從幾年前開左好多齋剪飛髮舖,終於搵到個合心水師傅,入到去坐低吾使講野,已經剪得好合我心意,真係平靚正。

    回覆刪除
    回覆
    1. 以前一到過年,剪髮就會加價,所以我都計住日子剪髮,務求過咗年先至剪。
      估唔到原來咁多網友都已經轉咗幫襯呢類齋剪店,我前日經過一間髮型屋,貼咗個牌出嚟,新增齋剪,都係收40元,睇嚟呢行競爭愈嚟愈大。

      刪除
  6. 你頭髮咁濃密,嗰髮型師應該嚇你唔到,你細過都似龍虎門個光頭星。你大個同貓王都有得揮喎!

    回覆刪除
    回覆
    1. 都唔係架,佢話我啲頭髮開始稀疏,過幾年就會變地中海,所以我都驚驚地,加上佢不斷吚吚哦哦,最後我都參加咗個十次療程,仲幫佢買咗幾百銀護髮用品添。

      刪除
    2. 其實唔駛買乜產品,買個上海舖啲頭刷,每次沖涼刷刷個頭,按摩一下啲頭皮及髮郎,包你變得濃密。我聽電台節目,都係話時不時按摩頭皮就搞掂架勒!

      刪除
    3. 我唔係好相信,甩頭髮係由於頭皮及髮囊缺乏按摩所致,我估係同遺傳,內分泌失調及疾病有關。

      刪除
    4. 或者你講得啱,不過我用咗這個方法,覺得自己的頭髮多得滯啫!

      刪除
    5. 哈哈!咁洗唔洗考慮一下,用另類方法減低頭髮生長?

      刪除
    6. 都有架!不過萬一第日又少得滯,咁咪棧揾黎搞,至少依家頭髮多咪唔會俾佢吚吚哦哦都好。

      刪除
  7. 飛獵兄、就咁被你一講、就將港人數十年來嘅「飛髮」歷程和變化一吓子講晒出嚟。諗起嚟、原來時代已經轉變咗好多喇!

    回覆刪除
    回覆
    1. 咁唔知域兄係咪仲幫襯緊髮型屋抑或上海舖呢?

      刪除
    2. 在下曾紅幫襯過廣東飛髮鋪、上海鋪、髮廊、但現在幫襯不設洗頭(五十元一次)嘅日式快剪。

      刪除
    3. 個個都幫襯快剪店,睇嚟髮型屋生意真係岌岌可危!

      刪除
  8. 原來以前係咁樣理髮,好得意。uncle細個時個光頭仔樣,好可愛呀~當然多人搣啦…咭!

    回覆刪除
    回覆
    1. 係呀!以前入飛髮舖,師傅會問你剪乜髮型架!我仲記得每年姑媽嚟拜年,追住話要搣我,嚇到我捐入床下底。

      刪除
  9. Philip, 我細路嗰陣時都喺飛光頭,後來讀小學先飛陸軍裝。以前飛髮都喺 "打巷戰" ,我都好鍾意睇飛髮舖啲公仔書。
    70、80 年代我响上海理髮舖飛髮,全套要成 $40 ,歲晚重雙計,超貴;衣家我响深水埗齋剪祇 $20 ,抵到爛!

    回覆刪除
    回覆
    1. 咦?原來好多老友都好似我咁愈剪愈平喎! 我以為30蚊剪個髮已經係最低紀錄,估唔到威哥你仲勁!

      刪除
  10. 現在單剪店越來越多,都搶了髪型屋不少生意,特別是男士方面的生意。至於女仔,就難搶D,女仔多數都會幫襯返剪慣剪熟果位,有信心D。

    回覆刪除
    回覆
    1. 除了剪髮,還有時裝及護膚品,都是女仔啲錢易贃啲。

      刪除
  11. 諗起細時剪頭髮,剪髮師傅用手動鏟髮尾嘅工具就好驚,因為佢夾住D頭髮會好痛架!

    回覆刪除
    回覆
    1. 我記得間中師傅剪髮用具用鈍咗,顧客就當災,部份頭髮俾鏟髮器扯住,真係痛到飛起。

      刪除
  12. Hello Philip, 請問你有沒有兒時在飛髮舖飛髮的照片可以分享嗎?謝謝!

    回覆刪除
    回覆
    1. 不好意思,我沒有你所講的照片。那些年,即1950-1970,相機是偖侈品,擁有照相機的人不多,幸好姑丈是影相發燒友,故此我才擁有幾張兒時的照片。

      刪除
    2. 原来如此!謝謝你分享!有一兩幅相片已經很好了。家母的親戚從前沒有相機,不太記得小時候的樣子,她經常感到可惜!

      刪除
    3. 客氣客氣,舊照片十分難得,正如你所講,可以從照片中知道自己年幼時的模樣。

      刪除
  13. 作者已經移除這則留言。

    回覆刪除

不一樣的渣馬(21/1/2024)

  後天便是一年一度的渣打馬拉松,但兩星期前的意外,不得不令我再三考慮應否退出是次賽事。我衡量過目前狀況,右腳跟已消腫,雖有少少痛,但跑十公里應可應付。最大的問題是右手不能活動自如,若出賽的話,需用左手托著來跑,否則右手會變成條條揈。 發生意外日期: 4/1/2024 ...