2018年2月14日 星期三

舊曆年


狗年將至,在此祝大家新春大吉,心想事成,身體健康!

年紀愈大,新年的感覺愈趨平淡,年幼時的農曆年,令我畢生難忘,雖是五十多年前的往事,現回想起仍歷歷在目!

雖是冷飯一碟,希望大家不會嫌棄!

時間過得好快,眨眼之間,又蛇去馬來,係呢度祝大家


  但做事切勿

我細個嗰陣時,喺咁多節日之中,最鍾意嘅就係農曆新年。有假放,有新衫著,有利是重有大魚大肉食添!由年頭盼望到年尾,終於等到新年嘅來臨!但開心日字過得特別快,年三十晚到年初一,初二,初三,眨吓眼就去到初七。心情由興奮到依依不捨,跟住到失落。絢爛過後,又開始盼望另一年嘅來臨!但隨著年紀愈嚟愈大,我開始覺得過年熱鬧嘅氣氛愈嚟愈少,我只能喺回憶中,先至可以搵番嗰份開心嘅感覺

記得學校喺年二十八開始放寒假。老師準備晒啲功課俾我哋做,好似寫毛筆字,做雜作等等,老師嘅原意係希望我哋每日做一篇,一路喼住唔好心散,番到學校都重可以記得番啲功課。但我就唔似得我最細個嘅細佬咁,次次都係差唔多到番學之前一日先至博命趕晒啲功課。我啱啱相反,鍾意將啲功課喺放假嘅頭一日一次過做完,咁就冇後顧之憂,玩都玩得開心啲!查實喺老師心目中,兩種做法都唔啱。


過年之前有好多嘢做,首先將間屋大掃除,將啲無用嘅嘢揼晒,務求將間屋執得企企理理,唔好失禮嚟拜年嘅親戚朋友。跟住要去買啲揮春同埋對聯番屋企。揮春有分好多類,好似〈天官賜福〉要貼喺屋嘅外牆;〈定福灶君〉貼喺厨房;;〈門口土地〉貼喺屋企大門嘅下角;至於〈出入平安〉貼喺每間房嘅門口;而〈新年快樂〉,〈新春大吉〉,〈大吉大利〉,〈百無禁忌〉,〈學業進步〉,〈心想事成〉,〈一團和氣〉,〈事事如意〉,〈迎春接福〉,〈身體健康〉,〈青春常駐〉,〈龍馬精神〉,〈 身壯力健〉
......等等,可以喺屋內任何地方張貼。如果啱啱結婚嘅話,可以貼〈年生貴子〉,(百子千孫),但〈常滿〉就唔可以亂鬼咁貼,一定要貼喺米缸度。

買完揮春重未掂架!重要買埋副對聯,對聯主要貼喺屋企嘅正門兩邊,好似我以前住嗰間屋有個園圍住,個園嘅大門都要貼對聯,所以要買兩副。對聯分上聯同下聯,內容不外乎健康同埋財富。例如(花開富貴,竹報平安),(炮竹一聲除舊,桃符萬戶更新),(天增歲月人增壽,春滿乾坤福滿門),
(爆竹二三聲人間是歲,梅花四五點天下皆春),(千門萬戶曈曈日,總把新桃換舊符),(歲新綿甲子,德厚富春秋),(嘉家喜慶賀新春賢福延歲步步高)等等.




有啲比較進取,乜財都想要晒, 好似(門迎春夏秋冬福,戶納東南西北財),(生意興隆通四海,財源廣進達三江),真係攞到盡!


亦有啲鍾意唱反調嘅,就會貼以下的對聯:(年年難過年年過,處處無家處處家)
貼對聯分左右,千祈唔好貼錯,笑大人個口嘩!差啲唔記得咗,重差個食Q,即係門神,唔係邊個幫你睇門口呀?不過真係好抵喎,幾毫子一對,連最低工資都唔駛俾,你話去邊度搵喇!


貼對聯要用好多漿糊,如果要去買就斃傢伙,分分鐘要幾十蚊。解决方法好簡單,只要用啲豆粉,一路攪一路加水煮,好快趣就變成漿糊。跟住我哋幾兄弟就開始貼揮春同埋對聯。貼完之後,新年嘅氣氛霎時濃厚咗。睇吓隔鄰佐佑,家家戶戶都貼滿對聯,成條村洋溢住新年歡樂嘅氣氛


嗰陣時住喺新界嘅村民,習慣家家戶戶都養幾隻雞仔,等佢哋大咗,就可以喺過時過節用。唔似得住喺城市嘅市民,喺大時大節要去街市買雞。我阿嫲都養咗十幾隻雞,以備節日之用。每年有幾個大節,例如農曆新年,清明,端午,七月十四,中秋,聖誕節等等……唔好意思,記錯咗,聖誕節唔會劏雞拜神嘅,所以冇預留任何雞隻喺聖誕節用。

工欲善其事,必先利其器,我哋搵木方釘咗兩個雞籠嚟養雞,再用鐵絲網釘上啲木方度,咁就搞掂。啲雞仔一部份係買嘅,另一部份係孵化出嚟嘅。我記得阿嫲養咗隻雞乸,我開頭覺得隻雞乸有啲問題,成日係度《咕咕》聲,點知過咗冇幾耐竟然生咗十幾隻雞蛋,原來隻雞生蛋之前會《咕咕》聲。咁就正喇,有雞蛋食!點知阿嫲話啲蛋唔食得喎,係用嚟孵雞仔用嘅。
我個陣時好細個,唔知阿嫲乜!只見阿嫲搵咗啲禾桿草同埋一個鐵嘅沖涼盤番嚟,然後將啲蛋放喺啲禾旱草裡面,自此以後,隻雞乸大部份時間都坐喺個竇裡面,好少行出街啄蟲搵嘢食。所以形容啲人成日唔出街,我哋就會話佢喺屋企《捕竇》。有一日起身,突然見到多咗幾隻雞仔,原來啲雞蛋孵咗雞仔出嚟。佢哋啲毛金中帶銀白,好鬼柔軟,重有少少反光添!啲雞仔真係好得意架,連屋企嗰幾隻貓仔都想搵隻手摸吓佢哋,點知隻雞乸唔知幾鬼惡,嚇到嗰幾隻貓仔走夾唔抖。而阿嫲亦唔俾我哋掂啲雞仔,話佢哋太細隻,驚我哋整親佢哋唔曉大。 

養雞唔係十分困難嘅事,平時俾啲菜頭菜尾佢哋食,得閒放出嚟行吓街啄吓蟲,食得走得,話咁快就變大肥雞。通常阿嫲會養多幾隻,因為有啲會俾老鼠咬死,有啲會俾蛇吞咗,所以唔養多幾隻當士啤,到過時過節時分分鐘唔夠雞用。如果見到啲雞瞌埋眼係度《舂》嘅時候,咦?仲流埋口水添,肯定發雞瘟,時日無多。

吓?揼咗佢?乜咁大嘥呀!我哋會拿拿聲劏咗佢嚟食,所謂食得唔好嘥。如果喺依家就大件事喇!呢隻雞可能帶有禽流感病毒,所有同隻雞有接觸嘅人都要隔離觀察,附近一帶嘅雞要全部銷毀。查實喺嗰個時候,好多街坊都好似我哋咁樣,一見啲雞唔妥,就即刻劏咗佢哋,計埋計埋,都唔知食咗幾多病雞落肚,大家一樣無事!乜嘢叫做禽流感?我哋本字典好似冇呢組字喎!


講番喺年三十晚,食過團年飯之後,依家啲人就會去行花市,買啲靚花番屋企插。但我哋就唔會咁敗家,嘥晒啲錢嚟買花。我哋嗰陣時搵錢艱難,啲錢通常留番嚟買菜《壓年》多過買花。一般會買生菜同勤菜,取其意頭《生財》同埋《勤力》,除此之外,我哋重會買啲臘味番嚟,好似臘腸,臘肉,臘鴨,金銀膶等等,喺過年期間可以加餸煮食。

而大部份小本經營嘅士多老闆,一年做到晚,都會趁住過年,休息十日八日唔開門做生意,除咗肉檔同魚檔初二啟市之外,士多通常初七先至開市,所以我哋喺過年之前亦要買定多啲罐頭食物。唔似得依家既有7仔,又有百佳同埋惠康,一日24小時都有嘢賣咁方便

我哋每年習慣食完團年飯之後,就開爐炸油角同埋煎堆,氣氛嘅熱鬧又好玩。不過唔係用把口講吓咁簡單,首先要預先準備定啲粘米粉,雞蛋,芝麻,碎花生,椰絲,豬油,沙糖等等。我大佬負責搓粉,呢一部份都幾考功夫,首先將攪好嘅雞蛋撈落啲粉度,加埋豬油,一路加水一路攪,直至出現粘性嘅時候就可以開始搓粉架喇。

我負責將搓好嘅粉用圓柱形嘅實心木壓平,跟住用隻碗《吸》出一塊塊圓形嘅粉皮,話咁快就可以開工!我將啲沙糖,椰絲同埋碎花生溝埋一齊做饀,然後將塊粉皮對角摺,變成半月形,然後《筆》一茶匙饀入去,唔好太多,因為落鑊炸嘅時候好容易會爆開,由於有糖,啲油好易變黑。放好咗饀之後,就可以用姆指同埋食指輕輕一壓,除咗將對角嘅粉皮黐埋鎖邊之外,重可以壓出一啲波浪紋。所謂台上一分鐘,台下十年功,少啲功力,都做唔到一隻似樣嘅油角。吓?有冇誇張啲呀?你可能會咁問。嘻!嘻!唔誇張少少點顯出我嘅功架!係咪?之不過老老實實,真係要做番咁上下,先至可以做得出一隻見得人嘅油角。

至於糯米粉,糖水同埋芝麻係做煎堆嘅主要材枓。搓好粉之後,揸成一舊,沾滿芝麻,預備落鑊炸油温約莫160度最好,不過呢啲係理論,求其滾油就得架喇。各位留意,一定要熄火先,呢次唔係講笑,真係要熄火架,信我!然後將煎堆沿住邊放落鑊,當煎堆全部浮起嘅時候先至再開火,跟住用鑊鏟每個襟一下,煎堆會脹一啲,輪流每個都襟,要來回襟到煎堆脹卜卜咁就大功告成。


千祈唔好貪快,一次過擺太多煎堆落鑊,如果唔係就炸得冇咁好。

炸嘢咁鬼好玩,我同大佬都爭住想炸油角同煎堆,點知阿嫲唔俾,因為炸嘢好危險,驚我哋俾滾油整親,都係由佢親自主理好啲。跟住同我哋講,炸緊嘢嘅時候有灶君睇實,唔好亂。如果要講嘅話,都要講啲大吉大利嘅嘢,好似《煎堆轆轆,金銀滿屋》《油角彎彎,家財百萬》呢類說話就無問題。唉!咁鬼麻煩,都係唔出聲好過,一路炸一路食咪重過癮!

好快趣又到
12點,媽媽已經預備好啲雞同埋燒肉,準備拜神。迎接新嘅一年到臨,祈求來年事事順景,大家身體健康。拜神要裝香同埋燒元寳蠟蠋,而須要膜拜嘅地方計有《祖先》《天官》《灶君》同埋《門口土地》等等。遇啱過年要拜埋《當天》。老豆就喺呢個時候,拎〈餅〉炮仗出嚟,由於串炮仗太長,為方便收蕆,捲成餅狀,嗰串炮仗有成七八呎長。我老豆搵個椏义將佢掛喺屋傍嘅老黃皮樹上,等拜完神之後燃放。

由於每家每戶都係喺呢個時候拜神,跟住燒炮仗,炮仗聲喺嗰晚此起彼落,响個不停。附近圍村燒嘅炮仗重犀利,分分鐘有成二十幾呎長,絕對冇誇張。講番我屋企先,我老豆大聲通知隔離佐佑:燒炮仗喇!我哋即刻企遠啲同埋用手指塞住雙耳仔,之不過仍然感受到炮仗爆開嘅威力!之後空氣彌漫住濃烈嘅火葯味同埋拜神嘅香火味,加埋地下滿佈厚厚紅色嘅炮仗衣,呢啲景象只有新年先至會有,而整條鄉村俾熱鬧嘅氣氛籠罩住,我到依家仍然感受得到。

雖然我喺年三十晚幾乎通宵冇瞓到覺,之但係一早就起身都唔覺得眼瞓,可能過年開心啩!換過新衫,著埋對新鞋,個人都零舍醒神。跟住同阿嫲,老豆同埋老母拜年,最重要當然係封利是喇!初一屋企習俗食齋,嗰朝嘅餸菜離唔開發菜,荷蘭荳,豆腐卜,腐竹,金銀菜,雲耳,粉絲,加埋白菓。首先將上面提及過嘅材料用蠔油炆番咁上下,最尾先至落生菜,記住唔好一齊放,因為啲生菜如果煮得太耐會黃,黃咗就唔好食


初一我哋唔興去親友屋企拜年,食完宴晝飯,我梗係出去周圍行吓,一見到隔離鄰舍,就算離開幾哩路咁遠都鬼咁好口,大聲恭喜佢哋發財個心就諗《利是豆來,一蚊唔愛,十蚊袋落袋》。我哋好醒目嘅,心諗啫,唔會講出口嘅!佢哋都話我乖,跟住拎封利是出嚟俾我。我個口就猛話多謝,隻手就揑一揑個利是封,睇吓係硬嘢定軟嘢?唓!硬嘢!肯定唔慌大封得去邊!雖然係咁,我都儘量喺面上擠出一啲笑容出嚟,唔好失禮街坊。試過有一次,踫到村裡嘅一個婆婆,佢居然走埋嚟話新征頭,利利是是,俾張紅紙我喎。又有咁大隻蛤乸隨街跳?唔通真係新年行大運!我用手揑一揑,咦?軟嘢噃,呢次要加多幾錢肉緊喇!即刻向佢買口乖:祝賀婆婆身壯力健,新年快樂,心想事成,兒孫滿堂,財源廣進,出入平安,大吉大利,
青春常駐。一口氣將記得嘅揮春背晒出嚟,婆婆雖然啲牙甩得七七八八,剩番一兩隻,但依然見佢笑到見牙唔見眼。等佢走咗之後,我即刻拆咗封利是嚟睇睇。吓?係真唔係呀?婆婆真係冇講大話喎,裡面真真係得張紅紙喳!呢次真係嘥晒啲口水,以後見到婆婆都要運路行,費事嘥口水。

計一計數,利是已經得七七八八,係時候攞啲錢去買炮仗同埋煙花玩。




炮仗分幾種,最好玩嘅首推《辣椒仔》,因為用手揸住嚟燒都唔會炸親隻手,最多震到隻手彈一彈,一啲都唔痛。其次係《小英雄》,佢嘅嘅爆炸力大好多,我就唔敢揸住嚟燒喇,之但係住喺我隔離嗰位大哥哥叫戲仔,佢喺我哋呢班小朋友面前扮晒大佬,話可以用隻手揸住個《小英雄》嚟燒,未點火之前重好得戚咁話呢啲咁嘅炮仗仔,佢驚都未驚過。佢雖然大過我,不過佢冇留意《小英雄》嘅爆炸威力,係成個炮仗爆到粉碎,唔同《辣椒仔》,剩係喺中間爆開,加上《小英雄》嘅葯引由於比較粗,一點即爆,直頭快到嚇你一驚。我心諗一陣間你就知死!只見佢一點火,個面啱啱擰歪,個《小英雄》就爆,佢隻手指炸到黑咗同埋腫咗,個面好彩擰得快,冇爆親,但係件衫就炸穿咗小小,算佢執到!自此以後,佢都唔敢再牙擦擦。


咁多種炮仗,最勁嘅要數《電光炮》,就算擺喺地下嚟點,我都有啲驚。《電光炮》嘅外衣係棌用花花綠綠嘅紙包裝,爆炸之後,外面層紙會炸到粉碎。威力係《小英雄》嘅幾倍。我試過引爆過電光炮,只見白光一閃,隨後而至嘅係震耳欲聾嘅爆炸聲,隻耳仔被氣流衝激到《溫,溫》聲,只見啲炮仗衣炸到變成粉狀,喺空氣中緩緩飄下,你可以想像爆炸嘅威力。

我哋玩到冇嘢好玩,就玩計時炸彈。乜嘢叫做計時炸彈哩?我哋首先點著支香,然後綁個電光炮上去,記得將炮仗引黐落支香度,當支香燒到葯引嘅時候,個炮仗就會爆。如果想個炮杖快啲爆嘅話,就將支香咳短啲。一切準備妥當之後,我哋將支香插喺舊牛屎度,跟住匿埋一二角,睇吓邊個唔好彩。結果有個阿叔踩單車經過嘅時候,個電光炮啱啱爆炸,啲牛屎炸到四圍都係,點形容當時咁震憾嘅埸面先至貼切呢?可以參考以下兩句:《撒鹽空中嗟可擬》或《未若柳絮因風起》。總之嗰個阿叔就慘啦,一身都係,仲俾個炮仗嚇到半死,呢啲叫將快樂建築喺人哋嘅痛苦身上!不過我哋一啲都唔感受得到,重覺得唔知幾好玩添!

除咗炮仗之外,我鐘意買火箭同埋煙花玩。正常玩火箭喺將火箭腳插喺啲濕泥度,然後點火,睇住支火箭一飛沖天,然後喺空中爆炸,好鬼好玩。不過,都重嫌唔夠剌激喎,點搞呢?有辦法,我哋將支點著咗嘅火箭,用力向上拋,支火箭不斷打轉,當啲葯引燒到火葯部份,而支火箭頭剛剛向上嘅時候,支火箭會飛得更高;但如果支火箭頭向下嘅時候,咁就睇吓你好唔好彩喇,支火箭分分鐘會向住你嘅方向衝過嚟爆炸,你話係咪好剌激呢!重有一種叫《空燈航傘》嘅火箭,射程 比一般火箭更高,爆炸之後,會彈出一個降落傘,吊住一粒發光嘅磷火,緩緩下降,好鬼好睇。
記得有一年,我同隔鄰班小朋友喺村口玩燒煙花,插好咗支《空燈航傘》之後,個個爭住點火,就喺呢個時候,有人推跌咗支火箭同埋唔知邊個將佢點著咗,我哋即刻雞飛狗走。支火箭打橫飛咗入其中一間屋,跟住重發生爆炸。成間屋透出剌眼嘅白光。大鑊!我哋幾驚燒著嗰間屋呀!又驚炸親裡面啲人。個個驚到即刻飛奔返屋企。跟住聽到嗰間屋裡面嘅公公同埋婆婆走出嚟大鬧:邊個揼啲煙花入我間屋?你哋有冇家教架?新征頭都要鬧你哋先至安樂!結果鬧咗好耐先至收聲,好彩老豆同老母唔喺屋企,如果唔係,肯定炳到飛起。我哋嗰晚都唔敢再出去玩

到咗年初二,我屋企真係好熱鬧。舅公,表叔,姈婆,姑姐,姑丈,表妹,叔父同埋已經出嫁嘅兩個家姐帶啲外甥嚟拜年,加埋我哋幾兄弟妹,足足二十幾三十人,真係賓虛咁嘅場面。最開心嘅就係有好餸食,又有利是。不過開心嘅時刻總係過得特別快,而年初二對我嚟講係一年之中最短嘅一日。當啲親朋戚友離開嘅時候,我有一種依依不捨同埋失落嘅感覺


初三赤口,相傳喺嗰日去拜年會好容易嗌交同埋衝突,所以啲人一般唔會喺嗰日去拜年。每年初四我哋一家都會去二家姐屋企拜年。二家姐住喺荃彎,我哋要搭車經過大霧山先至可以出到荃彎。我細個嗰陣時好鬼潺,講你都唔信,我搭親長途車都會頭暈同埋嘔吐,捱到我家姐屋企己經面青青,乜心機都冇,食龍肉都冇味啦!最慘年年都係咁,搭親車都暈車浪,咁嘅身子點出嚟搵食?之後我的起心肝,訓練自已跑長跑嚟鍛鍊身體。

嗰陣時喺過年時候都會有賀歲猛片推出,好似標叔嘅《富貴廹人來》麥嘉嘅《最佳拍檔》同埋許氏兄弟嘅《半斤八両》等等。我同大哥細佬喺初五或者初六都會去睇戲。眨吓眼又到初七人日,農曆新年亦喺呢日之後晝上句號。我都唔知幾辛苦先至收拾好心情番學。


我記得唔係好清楚,究竟喺小學三年班定四年班曾經讀過一課書,呢課書用好簡潔嘅字句,將過年嘅情況,描述得入木三分,我依家就寫番出嚟俾大家分享


一九還如九  家家共飲團年酒 二九一十八  年宵市上花爭發
三九二十七  買得年花香滿室
四九三十六  新年快到忙慶祝
五九四十五  弟弟敲鑼我打鼓
六九五十四  著上新衣迎新歲
七九六十三  糕餅滿盤菓滿籃
八九七十二  一年過去真容易
九九八十一  勤力讀書從今日 

21 則留言:

  1. 飛獵兄、看過你寫的兒時新年回憶之同時、亦勾起我機乎忘記了的兒時回憶。好文章!

    回覆刪除
    回覆
    1. 域兄,農曆年的快樂指數,對我來說,真是一年不如一年。年幼時,一星期前已經有喜慶的感覺,年三十晚則將歡樂的氣氛推到最高峯,現想起仍感到開心。

      刪除
    2. 飛獵兄、祝你財源廣進、龍馬精神。

      刪除
    3. 狗年暢旺!大家咁話!

      刪除
  2. 你玩炮仗的經歷,似乎不似你的年紀呀?因為我記得67年之後就好似禁止咗,而你如數家珍的大殺傷力炸彈,卻多是大哥哥的玩物!
    順此,預祝Philip 兄闔家新年吉祥,萬事如意!

    回覆刪除
    回覆
    1. 如心兄,我在此祝你及家人狗年大吉,身體健康,財源廣進!
      炮竹是在67暴動後才禁燒,這篇帖文是記述我在63-66年這段期間所渡過的農曆新年,我當時介乎7至10歲,已夠胆玩炮竹煙花了。

      刪除
  3. 你個張網上雞仔相,我曾經用作畫稿,去年畫雞全家福中的小雞。
    我過年冇你咁開心,我家小店鋪過年特別忙,我要送汽水和麻雀牌給客人家,雖然有部份客人有利士畀,但我要交番亞媽,真係小富如浮雲。
    我家在舊樓的天井也曾養過一隻母雞,好似話每天下一只蛋,我見過佢在天井急急腳氹氹轉走來走去一陣,佢就下一只蛋了!新鮮蛋只限那些年吃得到!
    祝你闔府安康!新春如意!萬事勝意!

    回覆刪除
    回覆
    1. 每年農曆年,母親會帶我們眾兄弟往九龍親友家拜年。我記得街上商舖大多數休息,平日𤋮來攘往的街道,變得冷清,跟圍村四處炮竹聲的熱鬧氣氛相比,黯然失色,故我還是喜歡鄉村的新年。
      新年前商店較忙碌,街坊趕買年貨,收入增加,你也忙得有價值!
      在此祝你及家人狗年快樂!心想事成!

      刪除
  4. 以前細個都有「幫手」整角仔,但係心態都係當玩居多。

    祝身體健康,長跑長有。

    回覆刪除
    回覆
    1. 估唔到有唔少網友有整角仔經驗。在此祝你及家人新年快樂!身體健康!心想事成!

      刪除

    2. 新春大吉
      身體健康
      闔府平安

      刪除
    3. 大夫,
      祝你及家人新春大吉,身體健康,妙手回春!

      刪除
  5. 恭喜發財!身體健康!萬事勝意!

    回覆刪除
    回覆
    1. 祝你及家人新春大吉,身體健康,狗年暢旺!

      刪除
  6. 祝年青人一家新年心想事成, 身體健康!

    回覆刪除
    回覆
    1. 海怪,祝你及家人新年快樂,身體健康!你長跑長有,步步高升!

      刪除
  7. Philip:
    祝狗年 金銀滿屋 歲歲平安 馬運亨通 龍馬精神!
    我都喺鍾意將啲功課喺放假嘅頭個幾日一次過做完架,
    無咗後顧之憂,真喺玩都玩得開心啲架!哈哈哈...

    回覆刪除
    回覆
    1. KaKa,祝你來年事事如意,工作順,利身體健康!
      原來你同我的想法一樣,情願開頭辛苦一點,將功課做完,才玩得安心。

      刪除
  8. 祝波馬齊中,年年順景,萬事如意!好似仲有好多炮仗你都冇講喎!有啲手拉炮,有啲擦地炮,仲有七龍吐珠添!我哋細過,好鐘意隔住條馬路,將的火箭射黎射去。仲有啲係呌時炸彈,將的香放在藥引上,待他慢慢燒到藥引,用金屬蓋蓋上,燒到時成個蓋或鑵彈起。

    回覆刪除
    回覆
    1. 人上人兄,祝你狗年暢旺,萬事亨通,步步高升!
      你說得對,我遺漏了唔少炮仗,好似吐珠,最高去到十龍。
      哈哈!我比你頑皮得多,計時炸彈通常會插在牛糞上!依家諗起,真係過份咗啲!

      刪除
  9. 祝你旺旺年:事事如意!身體健康!

    回覆刪除

不一樣的渣馬(21/1/2024)

  後天便是一年一度的渣打馬拉松,但兩星期前的意外,不得不令我再三考慮應否退出是次賽事。我衡量過目前狀況,右腳跟已消腫,雖有少少痛,但跑十公里應可應付。最大的問題是右手不能活動自如,若出賽的話,需用左手托著來跑,否則右手會變成條條揈。 發生意外日期: 4/1/2024 ...