北區豐盛人生健樂長跑2012

ASICS 10公里香港挑戰賽2012

ASICS 10公里香港挑戰賽2012

2012年11月1日上午11:14公開累積瀏覽 208 7

成績公佈咗: 晶片時間: 00:56:37
------------------------------------------

呢件藍色嘅係今年跑衫
.

今日天氣好好,朝早有風,適宜跑步,

沿途有跑友熱身.

 

 

跑完之後再影多張

今年時間都係差唔多咁渣,喺一個鐘頭左右完成!

2012歐化寳十公里賽

次次跑步前一晚都咁啱播英超賽事，重係愛隊阿仙奴添，終於睇到2點幾先至瞓。攤低無幾耐閙鐘就响，望吓個鐘，咦？ 5點9嗱！即時彈起身梳洗。出門口前睇吓天氣報告，天文台話密雲有雨，心中暗自高興，起碼唔駛咁辛苦，因為今年賽事喺馬料水近科學園做起點，成段路都無乜大樹遮蔭。如果風和日麗的話，肯定曬到燶！我試過喺咁嘅環境下跑步，結果幾乎要Call白車！

我喺7點40分去到現場，先至知道文台嘅預測完全唔準確，成段路都好曬。



呢個比賽好特別， 唔係跑10公里，係跑4份1馬拉松，即10 公里多少少。 據講今年有個新警司上任， 佢話點解咁<了能>跑4份1馬拉松，所以唔批準咁話喎，結果今年同往年唔同，跑番傳統嘅10公里。我唔明呢個女警司， 跑多少少關你乜事？ 所以有時個老頂上司係女性嘅話，真係好鬼麻煩!...........修正，我係指少部份女上司！

睇吓賽道都知有幾曬喇！

趁住未跑前，同朋友映番張相留念。


趁住無人，映吓個終點先。


呢個係過終點時嘅時間顯示器！


8時30分正式開跑， 我諗當時有成30度，好彩起跑時背住陽光， 同埋有少少風，不致太辛苦。但跑返轉頭就對住個太陽，簡直收買人命！ 我今次學精咗，戴番個黑超，有啲天陰嘅感覺，勉強完成賽事，時間就要成個鐘多少少，睇吓日後公佈先知道正確時間。
如果可以企喺呢個頒獎台上面就威囉！


其中有個跑友林先生，上面幅圖最右手邊戴黃帽，著背心白飯魚嗰個，佢今年６０幾架喇！結果用咗４4分幾完成賽事，喺佢嘅組別奪取亞軍，認真唔簡單！

我都滔吓光同佢映番張照片留念！


------------------------------------------------------------------------------------------------------

成績公佈咗, 我嘅完成時間係 1:02:24, 完成賽事人數:832 ,名次659

Circle Game

CIRCLE GAME 繞圈游戲

年少時，我喜歡到山野 間遊玩。

Yesterday a child came out to wonder

補捉蜻蜓是我其中一種喜愛的遊戲。
Caught a dragonfly inside a jar

祖母話我百厭唔聽話， 會激怒雷神，所以一聽到雷聲時，我會十分驚恐。
Fearful when the sky was full of thunder

我相信天上繁星，其中有一粒代表著我的生命。如果命星殞落，意味我生命的完結。故此當我看見流星墬下，恐怕是自己的命星而淚流滿臉。
And tearful at the falling of a star

*季節不停地轉動。
And the seasons they go round and round

正如五色繽紛的木馬繞圈起伏。
And the painted ponies go up and dawn

我被束縛在時光的旋轉 木馬上。
We're captive on the carousel of time

我不能回到過去， 只能回望自己過往的日子。
We can't return we can only look behind from where we came

繼續不停地在生命的旅程上轉圈
And go round and round and round in the circle game.

轉眼間，我已經渡過十個寒暑。

Then the child moved ten times round the seasons

跨過十條結冰的溪流。
Skated over ten clear frozen streams

當我聽 到等你長大時的類似說話時會感到欣慰。
Words like, when you're older, must appease him

對前景充滿期昐成為我的夢想。
And promises of someday make his dreams

眨眼間，又過了十六個寒暑。
Sixteen springs and sixteen summers gone now

街上穿梭的交通工具，已經由馬車變成汽車。
Cartwheels turn to car wheels through the town

長輩對我說：珍惜你的時間，人生苦短！
And they tell him, take your time, it won't be long now

切勿去到人生的盡頭，你的步伐開始減慢時,才驚覺光陰的寳貴。
Till you drag your own feet to slow the circles down

歲月消逝，一瞬間我已經二十歲了。
So the years spin by and now the boy is twenty

雖然我的夢想在人生旅途上失去了部份顏色，但整體 來說都能夠實現。
Though his dreams have lost some grandeur coming true

我還有更多及更好的夢想，
There'll be new dreams, maybe better dreams and plenty

在我生命完結之前。
Before the last revolving year is through.

這是我非常喜愛的一首歌，歌詞十分有意思，以環繞一個圈代表一年，在人生的旅程中，我們不能返回起點，只能回望輕嘆！時間飛逝，珍惜人生！

請注意,中文並非翻譯.只是我憑歌舒懷心中感受.

香港故事

喺兩年前有一日我收到個留言，開頭以為有網友同我開玩笑，但嗰陣時唔識得KAKA，又唔識費師奶，斷估無網友咁得閒同我玩啩？不過，睇真啲，段留言附有電話號碼，似乎又唔似玩喎！ 唔信大家睇吓!

 2010-11-18 16:23

《過氣年青人》網主您好，我是香港電台電視節目《香港故事》的編導麥XX（Exxx），現正為新一輯的內容蒐集資料，誠邀　閣下協助。

閱讀你的「想當年系列」，細說當年點滴，既珍貴又精彩，如你能親身分享舊時情懷及借出照片，想必能令節目生色不少。

《香港故事》自2006年開始播映，新一輯主題之一為「我們的歷史」，以口述歷史方法，讓來自不同階層、不同背景的市民，說出他們各自的香港故事，重構香港的民間歷史。

相關資料可參閱節目網頁.......

我喺好奇心驅使之下，根據帖子上嘅電話，致電俾麥編導。跟麥編導通過電話之後，証實並唔係惡作劇。不過要我對住鏡頭分享昔日嘅情懷，真係好大壓力！ 一來我講野同唐唐差唔多咁屎，二來無CAMERA飛屎！兩範都無，點上鏡呀？你話喇？

我曾經喺1978年拍過政府宣傳片《奉告》而上過鏡。嗰輯介紹流動出生及婚姻註冊處，拍攝地點係沙田鄉事委員會。我負責喺地下同對新人辦完登記手續之後，帶佢哋上二樓做簽發証書儀式。我嗰次唔駛講野，剩係喺地下行上二樓咁簡單啫，都《NG》咗成20幾次，換句話講，即係話我由地下行上二樓超過20次！拍完之後，雙腳都有啲軟。

所謂前車可鑑，嗰次剩係上樓級都拍咗咁多次，咁呢次如果要我對住鏡頭講野咪重困難？我諗咗一陣就同麥編導講：我都係唔掂喎！你搵過第二個喇！

隔咗二個星期，我收到麥編導嘅電話，佢話好簡單架咋,當普通傾偈咁就得架喇。重話可以將就我,喺佢哋架流動錄影車拍攝添，而架車會停喺元朗。唉！麥編導盛意權權，我唔好意思再推，心諗死就死喇！惟有硬住頭皮答應！

你睇我細個時好大胆，但對住鏡頭就騰晒雞，所以我叫埋細佬一齊去壯壯胆。去到元朗西菁街，真係見到架香港電台嘅專車，車身油咗《香港故事》幾個大子。

我同細佬講應該係呢架車喇，咁喺邊處錄影呢？

當時喺架車附近擺咗張枱同埋幾張椅，我見到一個戴咗眼鏡斯斯文文嘅後生仔，就行過去道明來意，原來佢就係麥編導。趁住佢重未出名之前影番張相留念！

唔好意思，佢根本好出名，不過我唔知道啫！喺呢度要向佢沙個冧先！敬禮！

我同麥編講，對住鏡頭我驚震到唔記得晒啲台辭咪斃傢伙！麥編導話唔駛緊張，當作傾閒偈咁就得架喇！到時都係問番你寫過嘅野，好隨意架渣！跟住同我講：一陣間我安排放好會叫你上車，然後開始錄影。

我喺嗰個時候諗起一句歌詞：要退後，也恨遲！呢次想縮沙都嚟唔切！過咗無幾耐，編導就叫我上車，我坐喺一張椅上面，身後掛咗塊藍布做背景，工作人員話第日啲背景會變成活動嘅圖片，跟住話我唔可以著件白色衫，因為其中個圖案帶有藍色，影出嚟藍色嘅部份會俾光線穿過，個人就好似穿咗個窿咁。為咗呢個原因，佢俾咗件黑色外套我臨時穿上。

 

喺嗰個時候工作人員開咗兩盞水銀燈，燦到我雙眼好唔舒服，重感到啲燈光有啲慶慶哋添！工作人員見到我坐得唔係好自然，就話唔習慣係咁架喇！話都無咁快就開始錄影，好彩都係問番我細個嘅時候，喺新界過年有啲乜野有趣嘅習俗；另一個話題就係我嘅年代潮流興啲乜野娛樂等等。我雖然有啲口窒,不過都講到出嚟，發揮得就真係麻麻哋。錄咗大約30分鐘就大功告成，我舒咗口氣為咗答謝我幫忙，港台送咗隻杯俾我留念！

重有隻CD添!

香港故事
http://programme.rthk.org.hk/rthk/tv/player_popup.php?pid=5227&eid=&d=2012-01-18&player=media&type=archive&channel=tv&part=1

節目播出之後,有一日我去街市買餸,點知賣菜阿嬸認得我,問我點解可以上電視? 我話你認錯人喇, 嗰個唔係我嚟嘅! 菜檔阿嬸話:你唔駛唔認喇! 你日日嚟買菜,我點會認錯呀! 老老實實,你喺咪識得人先?我就解釋話寫BLOG,我都未講完,佢就問乜野卜呀? 我再解釋即係網誌? 佢重係唔明.我真係唔知點講! 算喇心諗! 我唯有同佢講,我有個朋友喺港台做編導嘅............咁咁咁咁,跟住咪上咗電視囉!賣菜阿嬸好得戚咁同對面賣蕃茄個阿姐講:我一早都話佢識得人架喇!你重同我拗!依家信未!

(完)

渣打馬拉松2012

今早3點10分起身,睇吓天氣都唔錯,16至20度,濕度85%,非常適合跑步.搵咗2粒古力食,心理好過啲,感覺有啲野到肚.實則幫助唔大.跟住出門搭西鐵去尖東.起步點已經封晒路.



我竟然見到幾個街坊,先至知道佢哋都係跑友,重同埋我嗰組添!咁一定要影番張相留念喇!


我約咗慣常跑友阿陳喺清真寺門口等, 我哋驚住第日有老人痴呆症,唔記得咗曾經喺2012參加過渣馬,所以影番張相留念.


呢度唔係起跑點,只不過預先截住一啲參賽跑友,唔好俾佢哋霸佔預留俾種籽運動員嘅起步前列位置.


5點30分正式開跑,



路段同往年有少許改動,話無咁多上斜路段,比較上無咁辛苦咁講,但我跑完之後,覺得分別唔大,可能自己平日練得少啩!

就到終點前1公里,嗰種跑到想死嘅感覺又開始湧現,



我又試同自己講:咁鬼辛苦,玩埋今年算喇! 總算到終點喇!捱埋佢喇!







過咗終點之後,跟住攞行李,途中聽到救傷車聲音,以為有跑手不適送院啫,點知其後証實有跑友不幸逝世.

有專家指出,經過2個鐘頭不斷跑步,體能已經用得七七八八,臨到終點前,千祈唔好死谷,因為分分鐘導致心臟衰竭,非常危險!但佢哋唔明一個跑手嘅心理,如果當時有機會破自己以往紀錄嘅話,必定全力以赴.加上終點前賽道傍企滿打氣嘅市民,嗰種氣氛會令到跑手無得選擇,必定死去完成賽事!有記者提問主席,有無考慮日後報名跑步,須要醫生証明?我覺得如果要驗身先至可以參賽,真係唔駛預我嗰份喇!

呢度係行李攞放區.


攞完行李影番張相,睇吓個樣係咪死吓死吓咁先!

之後見到網友JOJO,好高興佢可以克服腳傷問題.雖然首次參加,但成績不俗.
我今年嘅時間同往年都係差唔多,遲啲睇吓成績先至知.
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
成績公佈咗,認真失禮,衰過往年,時間係2小時9分31秒.