香港故事

喺兩年前有一日我收到個留言，開頭以為有網友同我開玩笑，但嗰陣時唔識得KAKA，又唔識費師奶，斷估無網友咁得閒同我玩啩？不過，睇真啲，段留言附有電話號碼，似乎又唔似玩喎！ 唔信大家睇吓!

 2010-11-18 16:23

《過氣年青人》網主您好，我是香港電台電視節目《香港故事》的編導麥XX（Exxx），現正為新一輯的內容蒐集資料，誠邀　閣下協助。

閱讀你的「想當年系列」，細說當年點滴，既珍貴又精彩，如你能親身分享舊時情懷及借出照片，想必能令節目生色不少。

《香港故事》自2006年開始播映，新一輯主題之一為「我們的歷史」，以口述歷史方法，讓來自不同階層、不同背景的市民，說出他們各自的香港故事，重構香港的民間歷史。

相關資料可參閱節目網頁.......

我喺好奇心驅使之下，根據帖子上嘅電話，致電俾麥編導。跟麥編導通過電話之後，証實並唔係惡作劇。不過要我對住鏡頭分享昔日嘅情懷，真係好大壓力！ 一來我講野同唐唐差唔多咁屎，二來無CAMERA飛屎！兩範都無，點上鏡呀？你話喇？

我曾經喺1978年拍過政府宣傳片《奉告》而上過鏡。嗰輯介紹流動出生及婚姻註冊處，拍攝地點係沙田鄉事委員會。我負責喺地下同對新人辦完登記手續之後，帶佢哋上二樓做簽發証書儀式。我嗰次唔駛講野，剩係喺地下行上二樓咁簡單啫，都《NG》咗成20幾次，換句話講，即係話我由地下行上二樓超過20次！拍完之後，雙腳都有啲軟。

所謂前車可鑑，嗰次剩係上樓級都拍咗咁多次，咁呢次如果要我對住鏡頭講野咪重困難？我諗咗一陣就同麥編導講：我都係唔掂喎！你搵過第二個喇！

隔咗二個星期，我收到麥編導嘅電話，佢話好簡單架咋,當普通傾偈咁就得架喇。重話可以將就我,喺佢哋架流動錄影車拍攝添，而架車會停喺元朗。唉！麥編導盛意權權，我唔好意思再推，心諗死就死喇！惟有硬住頭皮答應！

你睇我細個時好大胆，但對住鏡頭就騰晒雞，所以我叫埋細佬一齊去壯壯胆。去到元朗西菁街，真係見到架香港電台嘅專車，車身油咗《香港故事》幾個大子。

我同細佬講應該係呢架車喇，咁喺邊處錄影呢？

當時喺架車附近擺咗張枱同埋幾張椅，我見到一個戴咗眼鏡斯斯文文嘅後生仔，就行過去道明來意，原來佢就係麥編導。趁住佢重未出名之前影番張相留念！

唔好意思，佢根本好出名，不過我唔知道啫！喺呢度要向佢沙個冧先！敬禮！

我同麥編講，對住鏡頭我驚震到唔記得晒啲台辭咪斃傢伙！麥編導話唔駛緊張，當作傾閒偈咁就得架喇！到時都係問番你寫過嘅野，好隨意架渣！跟住同我講：一陣間我安排放好會叫你上車，然後開始錄影。

我喺嗰個時候諗起一句歌詞：要退後，也恨遲！呢次想縮沙都嚟唔切！過咗無幾耐，編導就叫我上車，我坐喺一張椅上面，身後掛咗塊藍布做背景，工作人員話第日啲背景會變成活動嘅圖片，跟住話我唔可以著件白色衫，因為其中個圖案帶有藍色，影出嚟藍色嘅部份會俾光線穿過，個人就好似穿咗個窿咁。為咗呢個原因，佢俾咗件黑色外套我臨時穿上。

 

喺嗰個時候工作人員開咗兩盞水銀燈，燦到我雙眼好唔舒服，重感到啲燈光有啲慶慶哋添！工作人員見到我坐得唔係好自然，就話唔習慣係咁架喇！話都無咁快就開始錄影，好彩都係問番我細個嘅時候，喺新界過年有啲乜野有趣嘅習俗；另一個話題就係我嘅年代潮流興啲乜野娛樂等等。我雖然有啲口窒,不過都講到出嚟，發揮得就真係麻麻哋。錄咗大約30分鐘就大功告成，我舒咗口氣為咗答謝我幫忙，港台送咗隻杯俾我留念！

重有隻CD添!

香港故事
http://programme.rthk.org.hk/rthk/tv/player_popup.php?pid=5227&eid=&d=2012-01-18&player=media&type=archive&channel=tv&part=1

節目播出之後,有一日我去街市買餸,點知賣菜阿嬸認得我,問我點解可以上電視? 我話你認錯人喇, 嗰個唔係我嚟嘅! 菜檔阿嬸話:你唔駛唔認喇! 你日日嚟買菜,我點會認錯呀! 老老實實,你喺咪識得人先?我就解釋話寫BLOG,我都未講完,佢就問乜野卜呀? 我再解釋即係網誌? 佢重係唔明.我真係唔知點講! 算喇心諗! 我唯有同佢講,我有個朋友喺港台做編導嘅............咁咁咁咁,跟住咪上咗電視囉!賣菜阿嬸好得戚咁同對面賣蕃茄個阿姐講:我一早都話佢識得人架喇!你重同我拗!依家信未!

(完)