我唔鍾意飛光頭，因為除咗俾同學仔笑之外，啲街坊一見到我，就會摸摸我個光頭，又搣下我塊面，好鬼討厭！
大家睇下我當時個頭就係飛成咁
睇唔清等我放大小小
嗰陣時冬天好涷，刮起大北風時，個頭吹到赤赤痛。可能就係咁，涷壞咗個腦，結果讀唔成書。
老豆話光頭容易打理，查實佢想慳錢就真，因為等頭髮完全生齊，需要一段時間。鏟光曬的話，咁就有排都唔駛去飛髮舖。
嗰陣時去飛髮，師傅例牌會問你剪乜野髮型？
當時髮型分四大類：
第一類叫陸軍裝，即係將所有頭髮刮光。
球星朗拿度嗰個河童裝，靈感應該嚟自陸軍裝，只不過將前額執頭髮留得較誇張吧！
第二類叫紅毛裝，頭髮比陸軍裝長少少，有啲師傅故意喺前額留番一執頭髮，當年算時髦架喇。
第三類係遊水裝，頭髮比紅毛裝長減啲啲咁多；
最有型嘅梗係花旗裝喇，話明花旗，梗係由花旗流入。頭髮比較厚同長，額前部份用髮蠟蠟起，再用風筒吹吹，形成波浪狀，十分有型。
不過話時話，如果個人無型，剪乜髮型都係假!
雖然我唔係咁鍾意飛髮，但又唔抗拒去飛髮舖喎，皆因嗰度有我最鍾意睇嘅公仔書。好似儍偵探，財叔，老夫子，鐵甲人，超人呢類連橫圖，老豆平時唔俾我同大佬睇架，話會睇壞腦，但去到飛髮舖就可以大睇特睇。
到咗七八十年代，潮流興留長髮。大部份男仔都長髮披肩，如果仲剪短髮? OUT喇! 當時男又長髮，女又長髮，喺背後睇真係好難分。尤其係喺開Ｐａｒｔｙ嘅時候，如果唔趁住有燈光嘅時候望清楚，熄咗燈後，分分鐘請錯男仔跳舞架!
大個咗，老豆已經管我唔到，嗰陣時我好少去飛髮，有時自己對住塊鏡剪，或者揾細佬幫手。雖然老豆成日哦，話成個長毛賊咁，想做飛仔呀?不過我就借咗聾耳陳隻耳，乜都聽唔到。老實講，我自己剪得都唔差。
改咗名之後，價錢都幾級跳，一般都要5-60蚊，如果指定髮型師嘅話，盛惠多20，換句話講，飛一次髮，差唔多成7-80蚊。過年前一個月又話加二加三，所以咪話唔乸利！
收得咁嘅錢，梗係要俾番咁上下服務。剪髮之前要洗頭，我嘅印象就係洗完又過水，過完又再洗，重覆幾次，然後開始到按摩。有啲人話享受，但我就覺得係活受罪，因為有啲洗頭妹亂咁用力扲，我好多時俾佢哋扲到頭都痛埋，所以洗完頭之後，一到按摩我就耍手擰頭。
嗰陣時去飛髮例要等，無個零鐘你都唔洗旨意離開。洗完頭之後坐喺張椅度發呆，終終輪到我剪頭髮。
通常髮型師會一路剪一路話你啲頭髮好唔掂，最好做啲乜乜護理，物物療程等等，跟住嚇下你，話如果唔保養一下，唔夠幾年頭髮就會甩晒。如果見你仲無反應，佢就會俾幾幅相你睇。啲頭髮變成咁，睇你怕唔怕!
甩頭髮我都唔怕，我最怕佢一路剪，一路吚吚哦哦。我試過買佢怕，參加咗一個十次嘅護髮療程，療程完咗之後，我覺得做同唔做都差唔多。唯一分別，就係無端端無咗千幾銀。
最斃十次療程之後，師傅話要繼續護理，又向你推銷一啲護髮用品，否則前工盡癈咁話喎! 佢又試開始一路剪，一路哦你參加下一個療程，總之沒完沒了。
每次去飛都咁麻煩，又嘥成粒鐘時間，結果喺十年前，我轉去幫襯一啲齋剪髮嘅一人舖，快捷妥當，既無人哦，收費又便宜，只係髮型屋嘅一半，真係抵到爛!
但好景不常，我幫襯開嗰間飛髮舖因為加租摺埋，我唯有轉去幫襯另類連鎖店。
最終揾到一間單剪只係收40大元嘅連鎖店，跟髮型屋比較，慳成半有多。呢間仲有會員制，如果一次過交200蚊，就可以成為VIP永久會員，每次收費平10蚊，即30有交易，張咭仲可以借俾人用。
我一年剪12次髮，每次慳10蚊，即120蚊，年零就返本，諗落有著數，故即時入會。
不過返到屋企坐低靜落嚟諗深一層，如果間舖執咗笠，咁我咪大拿拿無咗二舊水? 我愈諗愈老襯，唯有喺頭嗰一年，日日拜神拜佛，祈求呢間飛髮舖千祈咪執住!可能拜得神多自有神疪祐，過咗二年，間舖仍然健在。
我依家每次飛髮，都有一個進入收成期嘅感覺，就係贃咗10蚊。依家物價比幾十年前翻咗幾個翻，但我剪髮就愈嚟愈慳，唔多唔少反影到呢個行業嘅收入，真係每況愈下!查實唔單只剪髮，好似開貨櫃車，的士等等，收入都俾以前少成截。貧者愈貧，富者愈富，唔少人揾嘅錢，仲少過十幾年前!貧富嘅差距，肯定愈嚟愈大!
最後提提大家，如果有興趣的話，可以隨時問我借張咭用用!
我記得七十年代去理髮廳還有男界女界之分，那時男人入到飛髮舖，通常都會遽支煙仔給你（除非你唔抽），呢啲唔知算唔算服務？
回覆刪除也記得有一次，跟女朋友鬧意見，谷氣之下就飛咗個差佬裝，諗係紅毛裝啩？而且我又咁啱著住件短袖獵裝，咁就得意啦，我喺旺角花園街行，個啲蠱惑仔一見到我就即時閃開，你話好笑嗎？
短袖獵裝，我當年曾替男友買黃太斜布做過啦！！
刪除原來做Stella男朋友咁好…
刪除哈哈，點解當年我搵唔到？
恕兄，喺新界呢啲地踎舖冇煙仔送，可能你去嗰間高檔次，所以剪髮有煙送。
刪除我估你當時係想刮光頭，扮出家，嚇下女朋友。
短頭髮加埋套獵裝，又幾似差佬Ｌｏｏｋ喎！
火姐，我有唔少同事都係著獵裝上班，後尾我都買咗一套返工。
刪除貧者愈貧，富者愈富!
回覆刪除貧富嘅差距，肯定愈嚟愈大!
成個世界嘅情況都係咁。
刪除現在可能很多人唔知飛髮舖是乜冬冬！！
回覆刪除世伯個花旗裝就型曝啦！
家父開士多店，隔籬是街邊飛髮舖，有時的媽媽帶小朋友黎飛髮，喊聲嘈到我頭都痛埋，我睇公仔書是免費。
天寒地涼飛個陸軍裝真係陰功豬咯，你做細路個陣肥嘟嘟又幾得喎！
哈哈！火姐你誤會咗喇！
刪除嗰個係我姑丈嚟架，跟住係姑媽，大家姐同二家姐，第二排係我大哥同表妹。
你講起我又記得，啲細路俾老豆老母挾去剪髮，好多都喺一路剪喊，可想而知，小朋友係唔鍾意剪髮嘅。
飛光頭，夏天就幾好，冬天真係幾難捱架。
我都好怕飛髮, 又係短到好核突.
回覆刪除大左未有隱形眼鏡之前, 剝左眼鋼, 唔知自己剪成點, 好驚.
我而家都好中意去$40齋剪, 又快, 又方便.
我諗你父母唔會叫你剪短髮啩？
刪除依家開髮型屋真係好惡做，因為有唔少齋剪店，又平又快，搶咗髮型屋唔少客仔。
我以前好怕去剪頭髮，同一個師傅，間中都有剪得合心水，但試過一次過年前去剪頭，竟然剪到成個任劍輝咁樣！人人問我做乜剪到咁短？我話過年加價兩倍收費，剪短D抵D。自從幾年前開左好多齋剪飛髮舖，終於搵到個合心水師傅，入到去坐低吾使講野，已經剪得好合我心意，真係平靚正。
回覆刪除以前一到過年，剪髮就會加價，所以我都計住日子剪髮，務求過咗年先至剪。
刪除估唔到原來咁多網友都已經轉咗幫襯呢類齋剪店，我前日經過一間髮型屋，貼咗個牌出嚟，新增齋剪，都係收４０元，睇嚟呢行競爭愈嚟愈大。
你頭髮咁濃密，嗰髮型師應該嚇你唔到，你細過都似龍虎門個光頭星。你大個同貓王都有得揮喎！
回覆刪除都唔係架，佢話我啲頭髮開始稀疏，過幾年就會變地中海，所以我都驚驚地，加上佢不斷吚吚哦哦，最後我都參加咗個十次療程，仲幫佢買咗幾百銀護髮用品添。
刪除其實唔駛買乜產品，買個上海舖啲頭刷，每次沖涼刷刷個頭，按摩一下啲頭皮及髮郎，包你變得濃密。我聽電台節目，都係話時不時按摩頭皮就搞掂架勒！
刪除我唔係好相信，甩頭髮係由於頭皮及髮囊缺乏按摩所致，我估係同遺傳，內分泌失調及疾病有關。
刪除或者你講得啱，不過我用咗這個方法，覺得自己的頭髮多得滯啫！
刪除哈哈！咁洗唔洗考慮一下，用另類方法減低頭髮生長？
刪除都有架！不過萬一第日又少得滯，咁咪棧揾黎搞，至少依家頭髮多咪唔會俾佢吚吚哦哦都好。
刪除飛獵兄、就咁被你一講、就將港人數十年來嘅「飛髮」歷程和變化一吓子講晒出嚟。諗起嚟、原來時代已經轉變咗好多喇！
回覆刪除咁唔知域兄係咪仲幫襯緊髮型屋抑或上海舖呢?
刪除在下曾紅幫襯過廣東飛髮鋪、上海鋪、髮廊、但現在幫襯不設洗頭（五十元一次）嘅日式快剪。
刪除個個都幫襯快剪店，睇嚟髮型屋生意真係岌岌可危!
刪除原來以前係咁樣理髮，好得意。uncle細個時個光頭仔樣，好可愛呀～當然多人搣啦…咭！
回覆刪除係呀!以前入飛髮舖，師傅會問你剪乜髮型架!我仲記得每年姑媽嚟拜年，追住話要搣我，嚇到我捐入床下底。
刪除Philip, 我細路嗰陣時都喺飛光頭，後來讀小學先飛陸軍裝。以前飛髮都喺 "打巷戰" ，我都好鍾意睇飛髮舖啲公仔書。
回覆刪除70、80 年代我响上海理髮舖飛髮，全套要成 $40 ，歲晚重雙計，超貴；衣家我响深水埗齋剪祇 $20 ，抵到爛！
咦?原來好多老友都好似我咁愈剪愈平喎! 我以為30蚊剪個髮已經係最低紀錄，估唔到威哥你仲勁!
刪除現在單剪店越來越多，都搶了髪型屋不少生意，特別是男士方面的生意。至於女仔，就難搶D，女仔多數都會幫襯返剪慣剪熟果位，有信心D。
回覆刪除除了剪髮，還有時裝及護膚品，都是女仔啲錢易贃啲。
刪除諗起細時剪頭髮，剪髮師傅用手動鏟髮尾嘅工具就好驚，因為佢夾住D頭髮會好痛架！
回覆刪除我記得間中師傅剪髮用具用鈍咗，顧客就當災，部份頭髮俾鏟髮器扯住，真係痛到飛起。
刪除Hello Philip, 請問你有沒有兒時在飛髮舖飛髮的照片可以分享嗎？謝謝！
回覆刪除不好意思，我沒有你所講的照片。那些年，即1950-1970,相機是偖侈品，擁有照相機的人不多,幸好姑丈是影相發燒友，故此我才擁有幾張兒時的照片。
刪除原来如此！謝謝你分享！有一兩幅相片已經很好了。家母的親戚從前沒有相機，不太記得小時候的樣子，她經常感到可惜！
刪除客氣客氣，舊照片十分難得，正如你所講,可以從照片中知道自己年幼時的模樣。
刪除作者已經移除這則留言。
回覆刪除