颱風溫黛

依家啲人一聽到打風就開心，因為可以有一日額外假期，做學生嘅唔駛番學，大部份打工仔都唔駛番工。你想話趁機去嘆吓早茶咩？唔好想創你個心喇！去到茶樓，你就知乜嘢叫做人山人海，慢慢等吓位喇，老友！如果天文台預測個台風要到黃昏先至會落波，咁就正晒，即刻約埋班豬朋狗友打番幾圈 。所以依家一到夏天，如果天文台預測有台風喺香港附近形成嘅話，好多人會求神拜佛 ，希望佢吹埋嚟，因為有可能唔駛番工。

但喺我細個嘅時候對打風有另一種睇法，嗰個年代嘅社會重係好貧窮。喺香港，九龍及新界，好多人嘅居住環境好差，大部份人都係住喺木屋區，一到打風，大家都好担心 ，唔係去約腳打麻雀，唔係去排隊飲茶，而係去做好防風措施，包括去附近嘅舖仔買定啲罐頭以便打緊風嘅時候可以有餸煮飯，我老豆最鐘意買梅林牌嘅梅菜豬肉，紅燒肉，午餐肉，而豆豉鯪魚同埋炸菜肉絲都好好味架 ！

買完罐頭之後，趁住啲風未吹到之前，四圍睇吓間屋，由於我住嘅係木屋，屋頂係用臘青紙舖嘅，我老豆叫我哋幾兄弟執啲大舊啲嘅石頭，沿住屋簷邊擺放，壓住啲臘青紙，等啲風唔會咁輕易將個屋頂掀起吹走。

我記得細個嗰陣時啲風係好強勁嘅，甚至大到好得人驚 ，連啲大洋船都可以吹上岸，依家啲風同以前啲比較，簡直係《蚊脾》同《牛脾》。其中最強勁嘅就係喺52年前嘅今日,即1962年8月27日吹襲香港嘅颱風溫黛。

喺1962年8月27日那天,有一股熱帶低氣壓，喺香港東南面，菲律賓以東嘅太平洋形成，嗰陣時距離香港有成千幾浬，距離咁遠，驚都未驚過，點會有人諗過佢會直吹香港?

點知過咗3日左右 ，中心風力已經增強至80浬，距離香港東南偏東約400浬，天文台懸掛1號戒備信號，由於溫黛來勢洶洶，第五日即8月31日，天文台經已改掛3號強風信號。天文台更預測溫黛會繼續增強，可能係有史以來吹襲香港最強嘅颱風，同埋依照佢嘅移動途徑，會直吹香港。嗰陣時啲人開始識得驚 ，大部份嘅漁民亦已經將船泊番晒喺避風塘。

我嗰個時候雖然好細個，得幾歲大，但已經感覺到呢個風好可怕。我老豆除咗揾磗頭外，重加多幾塊木板擺喺屋頂上面，再加啲石頭喺上面，以防屋頂被巨風吹走。喺9月1日零晨，啲風愈嚟愈勁，成間屋吹到左搖右擺，有幾舊磚頭同埋木板更加被強風吹走，我哋成家人都驚到唔敢瞓覺 ，加上成間屋都漏水，連床都濕埋，根本就冇地方瞓！嗰陣時收音機就係我哋唯一可以知道風暴消息嘅工具。我哋幾兄弟姐妹驚到一味喺度震，我感覺到生命好脆弱，我哋除咗聽天由命之外，根本就冇乜嘢可以做到。

到咗深夜

3，4點，天文台已經改掛8號强烈烈風訊號，溫黛直趨香港，根據電台報導，颱風喺港九新界造成嚴重破壞，尤其係喺沙田區，情況非常惡劣 。

我重記得啲風係一陣一陣咁吹嚟，天文台所講嘅陣風就係呢啲喇。通常陣風嘅風速係好勁同埋具有極大破壞力。我望見部份屋頂己經掀起，我哋雖然喺屋裡面，但喺嗰個時候完全無安全感，我驚到成個人震晒！我哋踎晒喺塊長木板度，用幾張櫈乘高，因為地下己經浸滿晒水。我嗰陣時知道乜嘢叫做渡日如年，時間過得好慢。

我感覺啲風速有增冇減，果然喺5點左右，天文台宣佈轉掛9號風球，表示香港正遭受烈風至暴風吹襲。當其時，屋企嘅窗門玻璃應聲破裂，狂風夾雜住雨水，同埋好多樹枝加上吹爛咗嘅樹葉，橫掃屋內每一處地方。到咗早上6點鐘，天文台宣佈溫黛中心位於天文台東南約50浬，進一步接近香港。天文台喺嗰個時候改掛10號颶風訊號，中心風力238公里。

  溫黛的移動途徑圖

喺呢度可以俾啲資訊大家參考。溫黛中心風力最高時速238公里，喺我有生以來，風力排名第二；而1979年嘅荷貝，中心風力接近240公里，居首位。之後訪港颱風嘅風力，只係徘徊喺120 至180公里左右，加上大部份嘅木屋已經拆晒，由石矢森林取代，故此打風對香港造成嘅破壞力相對細咗。

講番喺嗰個時候，成間屋被颶風吹至搖搖欲墜，啲風好似想將間屋連根拔起先至安樂，我感覺到如果啲風繼續係咁吹，遲早間屋會被吹冧

。嗰陣時已經開始天光，成間屋佈滿樹葉，部份屋頂掀起咗，我見到啲雲移動得好快。強風至疾風程度嘅風速不斷蹂躝全港，直至朝早11時，突然短暫風平浪靜，原來風眼喺嗰個時候經過香港。但香港好多地方已經滿目蒼然！



   在彌敦道上，汽車也吹至反肚

     近海的木屋大部份被吹毀

之後啲風力雖然强勁，但比較之前已經冇咁得人驚。溫黛移入內陸並開始減弱。到晏晝2點左右，天文台改掛6號烈風或暴風信號。我哋到嗰個時候先至舒一口氣，間屋雖然嚴重受損，可幸冇被吹冧，有驚無險 。天文台喺晚上7點鐘改為3號強風信號，到零晨所有風球除下。

喺嗰次風災，本港共錄得259.8毫米雨量。有130人喺風暴中死亡 ，當中127人係喺沙田同埋大埔區受吐露路港風暴潮襲擊時身亡；另外53人失踪，

超過72000人無家可歸。700多艘小艇受損，500多艘沉沒；24艘遠洋船擱淺，12艘出現碰撞。

  沙田為重災區。


飛機也吹到重疊在一起


新界農作物損失嚴重，沙田及大埔約869頃農田被海水淹浸，沙田約有3000家木屋損毀。同其他人比較，我屋企嘅損失叫做不幸中之大幸 !