我在1977年的9月5日加入公僕行列，一晃39年！今天對我來說，別具意義，因為我將在年底退休，明年的9月5日，我已經不在公僕行列了。在同一機構做了這麼長的時間，我相信只有當公僕，才有這個情況出現。像我這類沒有專業技能，缺乏冒險精神，只求一份安穩工作的人，當公僕是不二之選。
我當年在上水區讀書，每天放學後，要乘18號巴士回家。在巴士站的對面，是上水出生及婚姻註冊處。我在等候巴士時曾呆想過，如果能夠在那裡上班多麼好！因為離家不算太遠，乘車方便，加上我有五年時間在上水區，那裡的飯好吃，那處的飯便宜，我可謂瞭如指掌。
那天早上，我抵達中環雪廠街政府總部辦理入職手續，原先担心不知會派到什麼地方工上班，結果夢幻成真，我竟然派到上水出生及婚姻註冊處工作，登時如釋重負。
曾幾何時，我是該處最年青的員工，我什麼工作也樂意去做，很快便跟同事打成一片。有位同事姓文，英文名Shirley，大家都匿稱她沙利文。有一天沙姐跟我說：「老朱，你嘅衣著好老土，白裇衫灰褲，你估返學咩？」沙姐無講錯，我真的穿著校服上班，想落又幾老土！
寫字樓隔鄰是新龍運酒樓，同事跟酒樓的老闆很熟落，每天都到那裡午饍。老闆對同事特別優惠，每人收四元一餐，三個人就兩餸一湯，四個人就三餸一湯，白飯任裝，如此類推。上司沒有徵得我同意就說每天預我一份，我當然不會抗拒！
第二天上班，同事眼前一亮，因為我改穿了一條全新黑色西褲上班。白裇衫黑西褲，夠時尚吧！只見同事笑不攏嘴，我不明所以。到中午往酒樓用饍時，才發覺酒樓侍應的制服是白衫黑褲！自從那天之後，我又改穿回灰色西褲上班！
我的公僕生涯中，在註冊處期間是最開心的。大老闆鍾太最令我懷念，她不拘小節，出錢出力，在周末時請我們到九龍塘會打桌球，亦曾去尖沙咀海城夜總會聽羅文演唱等等。她人面廣，認識不少食肆東主，最經典的，要算在上村金壘餐廳包場攪PARTY！同事之間沒有爾虞我咋，大家做妥工作就齊齊去玩，多開心的生活！
我相信在有生之年，往後的9月5日，仍會帶給我一份溫馨的回憶！
不知怎的…看不了幾句我就感到有些傷感。
回覆刪除39年真不是個短日子，而我，只在之前那公司工作8年多，這之後的10多年都像抽離不到，很多時候還會夢發那些年工作情境……
突然間我又想起這一句成語：悲歡離合……哈哈！我是否很好笑呢？
最令我感慨的，就是在二十多年前聽聞鍾太突然辭職，她最要好的同事其後跟她失去聯絡，有傳言她受到離婚及兒子攪基的打擊而辭職。好人原來不一定有好報的！
刪除你的感慨，我身同感受，並不可笑。
飛獵兄、能夠獲分派到得心儀嘅辦公地點工作已經很幸運、加上遇到嘅都是傾得埋嘅同事就更加開心。這種經驗在下也曾有過、到了退休之後仍然是津津樂道的。
回覆刪除我係鄉下仔，平日甚少出城，所以如果叫我在港島區或者九龍區上班，我要花時間摸索。當年交通唔發達，屯門公路還在興建中，到九龍上班，只有兩條巴士線，經大霧山的26號或經青山公路的16號，早上六點前必需到達元朗總站等頭班車，因為繁忙時間，總站已經上滿客，中途站只有望車興嘆。政府重有一樣不平等條文，由新界出九龍或者香港上班，沒有車費津貼，但新界返新界上班反而有，所以你話可以喺新界上班係咪開心好多呢！
刪除我最開心喺頭嗰十年，之後進入抗爭年代，所以對開心的日子特別懷念！
當公人有時都幾諷刺架！當我住在香港島時、政府調我往新界、當我遷入新界之後、政府又調我出九龍。公人生崖就係咁過咗三十幾年了！
刪除域兄,當年交通唔發達,你嘅情況比我好得多,早上入新界及黃昏出九龍都唔會擠廹,上班及下班相對比我輕鬆得多!但好似你咁,為咗工作而搬遷,都算罕見.
刪除1977年的9月5日加入公僕
回覆刪除上水出生及婚姻註冊處工作
上水出生及婚姻註冊處工作量不多，加上同事相處融洽，真係好開心架！
刪除那些年，特別在新界和離島區，人是純樸得多，真的值得懷念！
回覆刪除祝賀你榮休之喜！
會計畫再去探你哥哥嗎？！
你講得啱，當年啲村民好友善，尤其係對長途跋涉到偏遠地區工作嘅政府人員，會特別客氣。
刪除多謝祝福！
大姪女現在溫哥華工作，大哥在上星期剛在溫城買了屋，他會由加拿大中部搬去西岸，以後我往探望他方便得多了，因為無需再轉機，退休後一定會去逛逛。
一晃就39年...有冇覺得似是昨天的事！
回覆刪除我也恭喜Philip榮休之喜！恭喜！恭喜！
榮休之後，天空海闊任你飛！
是的！時光飛逝，39年前的事，晃如昨天發生！
刪除多謝 KAKA！
不過任憑海濶天空也沒有用，因為我都唔懂得飛！
揾日和Kaka來
刪除上水出生及婚姻註冊處
探下你
你要乘時光快車，回到過去先至得喇！請早揚聲，因為我都要BOOK番張時光快車車飛，先至可以返回1977年！到時响註冊處門口恭迎你同KAKA！
刪除夢會上水出生及婚姻註冊處
刪除何必尋夢，夢裡甘苦皆空，勸君他朝醒覺，自當恩惠無窮！
刪除Philip, 時光飛逝，一年時間好快過，明年今日，您便可享受優哉游哉的退休生活。
回覆刪除哈哈！明年今日，可能又要出番嚟捱世界都未定！
刪除你而家都係白衫灰褲，閒時著體育衫，真係長情！
回覆刪除就讓那些年的快樂心情，再為你的退休生活延續下去吧！不過我稔你係個唔鍾意坐住嘅人，或許你會將生活安排得更忙碌都未定(成日唔知去咗邊!)
我依家著T裇牛仔褲返工，加埋對美津濃波鞋，係今年最時尚嘅運動LOOK！我估退休後可能重忙碌，又要執紙皮，又要執報紙，茅錢交租時又要客串頂番更的士........到時真係上BLOG都無時間！
刪除時間過得快, 可以慢活享受人生, 欣賞大自然都好開心.
回覆刪除當回憶往事時，才驚覺時間飛逝！四處遊玩，到處見識，退休人士都會朝呢個方向出發，相信我也不會例外。退休後的第一個行程，就是台灣半馬。
刪除聽到Philip提及的上司與下屬情誼，今時今日很多上班族應該好羨慕，流晒口水。
回覆刪除但好景不常，開始的十年是蜜月期，往後的三十年，則變成戰國時代！
刪除睇到UNCLE LI篇，令我想...我GE工作經驗唔多，只有喺中大的一份工，而且做咗唔係好耐，但都好開心，同教授同事相處融洽，E＋都時時見面。
回覆刪除工作上留有美好GE回憶，係好好GAR，喺我D同學當中，不乏對工作抱怨，或者做得唔開心GE．
嗯~突然諗起你鄰居的貓貓，佢哋好嗎？
退休後，你可能發現你身邊，更多有趣同可愛的人物事^^
潔潔，你沒有機心，加上性格溫純，所以無論去到任何地方工作，都好容易被同事或者上司接受。
刪除無論工作怎樣繁忙或辛苦，也應在預計之內，期望工作會是舒服的，是脫離現實。
那些貓貓，有兩隻每晚都潛入我的園內睡覺。當有朋友來探訪我時，牠們又急急走上圍牆，好奇地探頭觀望，朋友問那些貓是不是我養的？
好奇問句，D貓有冇响你前園放低幾両？！……我後園久不久會有來歷不明的肥田料！！
刪除你後園係泥地，會吸引啲貓貓嚟施肥，加上佢哋無喺嗰度休息。但我園內係石矢地，佢哋鍾意入嚟休息，貓好貪乾淨，唔會喺嗰度瞓嗰度疴嘅！
刪除初出茅廬既年代，樣樣都有新鮮感，要求又低，所以好易開心，就算當年係俾人洽果D(例如我)，回想起來，都不失為笑料一堆，都變成美好回憶啦。
回覆刪除你講得啱，當年我住錦田，去離島工作，每天長途跋涉，一早由新界搭車同乘小輪到中環，再搭港外線碼頭渡輪往離島，時間十分趕。但老闆叫我，去港外線碼頭前，到李寳椿大廈總部帶官印同冊薄，然後先至去搭渡輪。我嘅時間已經好趕，但又唔會咋形話點解唔叫住喺九龍或者港島區嘅同事去攞！我當時無感到唔公道或者有被人洽嘅感覺，只係覺得新人係咁架喇！
刪除接續先享受$2搭車船，再攞生果金，都唔錯㗎。我試過就知。
回覆刪除預祝退休愉悅。
哈哈!幾好福利喎!多謝華師伯!
刪除70年代，小弟也在Philip兄工作地方的附近返學。
回覆刪除70號巴士總站在學校附近。
好似仲有一間臨時圖書館，旁邊是一間傳統式米鋪。
咁我估到堂主可能同過氣港姐鄭文雅讀同一學校喇。70號應該 係出九龍嘅吧士路線。圖書館我無乜印象，但上水有兩間算出名食肆，就係陳六記同關溢記，陳六記我最有印象，因為有次我食菜薳牛腩飯，食咗幾啖先至發覺喺菜葉裡面有六隻蟑螂！
刪除看畢全篇有一感想，就是怎樣說以前的人也是比較有人情味，現在流行速食文化，say hi say bye實屬等閑事，所以我都很懷念剛剛出來工作的日子，至少那時候每一個同事給我的感覺都比較真誠。
回覆刪除你說得對!當年衙差間甚少勾心鬥角,是非無依家咁多.工作完就齊齊搵節目.我算幸運,上司肯做主導,又出錢出力,結果令到同事間更和諧.
刪除