ASICS 10公里香港挑戰賽2011

今日一早起身，換咗跑步裝束，6點45分出門。天氣唔差，有陽光，溫度21度，濕度78％，非常適合跑步。

我沿住天水圍外圍小路，緩跑去起步點。

經過濕地公園門口


沿途見到唔少參賽跑友。

到咗起步點，只見人山人海，



我同幾個朋友趁起跑前映番啲相留念。


跟住去行李擺放區擺抵行李。

比賽準時8點在一片倒數聲中正式開始，雖然操練得少，幸好仍喺1小時內完成。在中途見到一個跑友仆到滿臉血，希望佢無事喇。

下一次賽事會在12月份舉行，希望加強操練，時間會好啲喇！

跑完之後，再嚟幅大合照。

 

呢套運動裝都幾省鏡，大家有興趣不妨諗諗佢!

 

賽果公佈咗, 成績倒退,4803人跑第2872, 時間57分55秒.

2011歐化寳 1/4 馬拉松

今日第一次跑多過10K但又少過15K嘅賽事，有少少騎呢。由樂華會主辦，喺大埔海皇廟跑去科學園，然後折返。今日天氣都有啲熱，我跑步最怕熱，如果得十度八度就最正。查實我無報名，不過有個朋友個肚唔係幾妥，所以搵我頂上，我都無吞卜，儘力去跑架喇。跑咗4K之後，太陽叔叔鬼咁八啩，間中伸個頭出嚟裝裝，我真係見光死，覺得都幾熱，唯有跑慢啲喇。折返之後，背住陽光嚟跑，比較無咁辛苦，最後喺一個小時內完成，叫有交代喇！

整定行裝，準備出發去起步點。

做少少熱身先。





跑完之後，有啲跑手連衫都唔著，就知氣溫都幾熱。

 

好頭好尾，我都喺幅  Poster 前面映番張相先。

曲終人散。

可口可樂健跑樂2011

今個星期日係可口可樂健跑樂擧辦日子，我遲咗報名，所以無得參加。唯有到埸同啲friend打打氣。

我6點離開屋企，去到馬鞍山7點半鐘，點知班friend都重未到．好似我重緊張過佢哋咁。

到8點14分，我個電話突然响起，咦？呢個號碼未見過嘅？唔通打錯電話？一聽之下，原來係Blogger新地兄，佢話已經到咗現埸，著住件藍色衫同三個骨褲，揸住部長火，照睇好易搵啫！我哋喺網上都算熟噃，之不過從來未見過面啫！

諗番起啲粵語殘片，我係咪應該帶朶紅色襟花喺件衫度會易搵啲呢？講出嚟好似好好笑，實際上當我落到運動埸，搵嚟搵去都搵到，唔係講笑！所以你哋第日如果約人第一次見面，真係要插朶花喺件衫度易認好多架！

結果都係搵唔到，最後要用電話聯系先至見到新地兄，聞名不如見面，新地兄穏重謙厚，我真係要多多學習。隨即嚟張合照，以作紀念。

如果真係有咁大罐可樂就有排飲囉！

埸面都算熱鬧，有樂隊表演添！

比賽正式開始！

呢位黑人跑手係呢次賽事嘅冠軍,而外藉人士跑第三.



好多跑手都想佔番個前啲嘅位置

一如過往，跑第一名都係黑人，而新地兄公子跑得好快，喺前列份子，我班friend就玩玩吓，要過咗一個鐘先至返終點。

我之前報名參加，主要原因係我以為可口可樂讚助嘅比賽，應該以可樂為主，跟一般跑步比賽唔同，沿途水站會有可樂或者檸樂供應，你話幾咁正吖！點知我啲
friend話水站供應嘅，全部都係蒸餾水嚟嘅。之前我報唔到名有少少失落，以為損失咗一次咁有特色嘅比賽，一路跑一路有冰凍嘅可樂飲，原來我諗多咗，咁都無咁傷！

屎坑

用屎坑嚟形容厠所，雖然唔係咁好聽，之不過我覺得呢個詞形容得好貼切。而一個地方文唔文明？睇吓個厠所乾唔乾淨就知架啦！如果返過大陸，相信大家都有咁嘅經驗。印象最深刻嘅一定係內地嘅厠所，啲人好似唔識得乜嘢叫做自律，個厠口咁大都會疴到四圍都係，我唔知你哋明唔明？我就唔明喇！佢哋亦都冇沖厠嘅習摜，整到個厠所臭氣沖天，《黃金》滿地，呢啲情況，見怪不怪。去完之後，分分鐘可以慳番一餐，因為你已經揾唔番你嘅胃口。不過，係嗰句講嗰句，依家文明咗好多架啦，我近排發現喺內地嘅厠所裡面，多咗二行字：《前行一小步，文明一大步。》你話喺咪好精景呢 ！

我嗰個年代嘅厠所，講你都唔信，同依家大陸嘅有過之而無不及，我係講嗰種落後同埋衛生程度。嗰陣時啲厠所有幾種，最正嗰種就係起喺魚塘上面 。我有個同學屋企係開魚塘嘅，個厠所係用木搭建喺魚塘上面，然後用木做一條通道，喺塘邊連接埋個厠所。故此去厠所時要格外小心，一吓唔覺意，分分鐘跌落個塘度。個厠所嘅設計係非常環保，好似大澳嘅棚屋，地板之下就係魚塘。只要喺中間嘅木板鋸個窿，咁就大功告成。

 

當你去厠所嘅時候，你就會覺得好鬼爽

，因為唔單只無臭味，重風涼水冷添。由於成間厠所搭建得好簡陋，啲風由木罅吹入嚟，簡直透心涼，尤其係喺夏天嘅時候。去完厠所唔須要沖厠，因為有好多對眼已經喺水裡面虎視眈眈，等緊開大餐 ，一聽到《噗嗵》一聲，就一湧而上，只見到魚身不斷係水面打滾，唔駛一陣間，你啲排泄物已經成為魚大哥嘅點心。嘩！啲魚咁唔合衛生，揾鬼食囉？但係喺嗰個年代個個都係咁養魚架啦，大家習以為常，完全冇諗到合唔合衞生。表面上你會覺得以前養魚唔得衛生 ，查實依家養魚嘅衛生程度分分鐘差過以前。家吓喺大陸養魚或者養蝦，為咗增加產量，喺水裡面加入大量嘅激素，嗰啲魚同埋蝦，根本係喺個化學池度長大。故此養魚嘅人唔敢食魚，養蝦嘅人唔敢食蝦，呢啲已經唔係秘密。我睇過一啲養大閘蟹嘅圖片，啲池水因為落咗好多激素，加速藻類嘅生長，變成墨綠色同埋《杰撻撻》，跟住重見到啲死狗浮喺個池面，啲蟹就爬上啲腐爛咗嘅肉度開大餐。我睇過相關圖片之後，就算揾把槍指住我，我都唔會再食大陸出產嘅大閘蟹 ！

唔好意思，明明主題係屎坑，點知講咗養魚。標叔有句成日掛喺口邊嘅說話，《屎坑同厠所》，意思係話屎坑等於厠所，用嚟形容有啲嘢外表雖然唔同，但實質一樣。好喇，講番屎坑先。我住喺新界，啲厠所清一色係踎厠，由於無水沖厠，所以有另一個名叫旱厠。當啲坑開始滿嘅時候，會有車按時嚟泵走啲屎。嗰陣時大部份喺新界嘅屋都係無厠所設備嘅，當人有三急嘅時候，只有幫襯公厠。

我屋企附近有一間公厠，去厠所之前要有充分準備。記住一定要拎盒火柴同埋一叠報紙。咦？你都幾識嘆喎，一路去厠所一路睇報紙，不過，點解要拎埋盒火柴呢？我相信你會覺得有啲奇怪，唔通喺屎坑度唔夠光？或者我粗略形容吓當時嘅屎坑俾各位認識，先至交代啲火柴有乜嘢用喇！嗰陣時啲屎坑只有三格，每格都有一扇婑鐵門，每格厠所幅牆對上都有一個細嘅窗口，所以空氣唔係咁流通，加上成個月先至有車嚟泵走啲屎，嗰啲屎臭味真係好難頂。但有啲人就唔認同我嘅說話，佢哋覺得啲氣味一啲都唔難頂，所以喺屎坑裡面嘅牆壁寫滿字句，呢啲叫做屎坑文章，唔知大家有冇見過？

如果碰啱泵完屎之後，個厠窿會乾淨好多 ，之但係過咗約莫一個星期之後，啲糞便就會堆積如山 ，嗰啲夜香味對烏蠅嚟講，就真係非常之吸引，隻隻烏蠅剩係聞到陣味都已經口水流埋 ，仲唔拿拿聲飛入屎坑度飽餐一頓咩！我仲記得嗰啲烏蠅好大隻同埋有金綠色嘅外穀，外觀唔錯，或者呢啲叫做好眉好貌生沙蟊。

 

 

 

個屎坑就係佢哋嘅天堂，飽食之後，就不斷繁殖，一隻烏蠅閒閒地可以生幾百甚至幾千條蛆蟲。喺好短時間之內，成間厠所嘅地下，牆壁上面，甚至天花都佈滿屎蟲，非常之得人驚 。

得人驚還得人驚，屎始終要去疴。喺入去之前要作深呼吸，因為一入到屎坑裡面要儘量閉氣，減少吸氣，如果唔係嘅話，會分分鐘俾啲臭味攻死。然後數三聲，一衝入去就要點著啲報紙，啲火要夠大，要喺好短嘅時間，用火《譚》吓幅牆，重有地下，最緊要天花，將喺上面嘅屎蟲，用火燒到跌晒落嚟為止，因為驚疴疴下嘅時候，剩番嗰啲屎蟲會跌落個頭同埋個身度，就真係邊度都唔駛去。啲報紙唔夠一分鐘就燒完，啲火有少少嘅阻嚇作用，之後喺地下嘅屎蟲就會好快趣咁躝埋嚟，爬上你隻腳度，所以你最好喺二分鐘之內辦好大事，然後迅速逃離現場。走慢少少嘅話，真係一身都係。

但如果你喺夜晚去厠所，除咗帶備火柴同埋報紙之外，重要帶埋蚊香，因為啲蚊都知道喺厠所裡面容易揾食，佢哋潛伏晒喺度，伺機偷襲 。喺夜晚去厠所必須依足程序，首先將個點著咗嘅蚊香擺入其中一個厠格，等佢燻走啲蚊先，最好燻五分鐘，等啲蚊暈佗佗嘅時候，先至燒著張報紙，重覆以上嘅動作，《譚》死啲屎蟲，先至可以安心去厠所 。如果唔記得帶蚊香嘅話，肯定蘿友開花。嗰陣時有啲靚仔好鬼百厭，揼個電光炮落個厠坑度，將啲屎爆到通處都係，唔該你想像一下嗰個屎坑嘅環境，除咗佈滿屎蟲之外，仲黐滿晒屎漿，喺咁嘅環境下辦大事，你話係咪好富挑戰性呢 ！

END

渣打馬拉松2011

日期：2011年2月20日

呢次係我第一次跑咁晏嘅馬拉松，如果太陽高照，氣溫又超過二十幾度嘅話，我諗我會棄權居多，因為我試過二次喺咁氣溫之下，幾經辛苦先至完成賽事，唔中暑真係算好好彩。

周日天公造美，氣溫介乎13至17度，密雲清涼，非常適合跑馬拉松。

我從未試過七點鐘咁遲先至出門口搭車去跑步，重有時間食早餐添。去到現場，氣氛比往年遜色，冇咁熱鬧。

主要原因係賽事分得太散。二組全馬同埋挑戰組半馬喺7點前已經開跑咗，之後要到8點45分先至跑半馬嘅第二組，而最後嗰組要到9點15分開始。由於每組開跑時間相隔太遠，好處係無咁擠擁，空間多咗，壞處就係無咗嗰種人山人海，熱烘烘嘅感覺。


喺比賽之前，我同幾個朋友映番張相留念，其他啲朋友跑全馬，所以佢哋冇份映喇！



呢隻鞋幾CUTE，映埋佢！

嗰日天陰密雲，氣溫約13度，比賽開始時氣氛算唔錯。清真寺前面過啲嘅交通燈係賽事起點，接近8點45分，所有跑手一齊展開跑前倒數，10，9，8，7，6，5，4，3，2，1。倒數完畢，喺一片掌聲中，我開始跟住大隊移向起步點。我踏過計時電子地氈後，正式開始賽事。望望手表，計算吓自己會用幾多時間完成賽事。

沿途有好多由大會安排嘅喇喇隊搖旗納喊，亦有途人圍觀拍掌鼓勵同埋拍攝。喺咁熱鬧嘅環境之下，所有跑手都跑得特別起勁。我都係用自已平時嘅跑步速度，好用心咁去跑好每一公里。渣馬水站安排好好，整段賽程有成五個水站。除咗蒸溜水之外，重有寳礦力同埋抹汗嘅海棉。沿途路段，亦有工作人員手持松節油，俾一啲有須要嘅跑手使用。

我跑咗五公里，睇睇時間，用咗三十分鐘，時間偏慢，但我又唔想太辛苦，唯有繼續保持速度。沿途有好多市民擧手向我哋喝啋同示意，亦有人影相，我一路跑一路向佢哋揮手以作回應。眨吓眼又跑到十公里指示牌，吓？有冇搞錯？乜跑得咁慢？用咗成個鐘頭！算喇，我心諗，都係唔好發力住，如果唔係，後段分分鐘無以為繼。

冇幾耐我已經到達西隧入口，進入管道之後，我感覺裡面嘅空氣比出面焗少少，但由於天氣清涼，故此影响唔大。沿途我只係見過幾個跑手出現抽筋，要停低楂油。我雖然跑得唔快，不過沿西隧出口，我都冇停過。經過順德中心嘅時候，有多人喺樓上欄河向我哋揮手打氣，我原本跑到死吓死吓，霎時間又充滿動力。跟住經過中環 ，金鐘，過彎仔，沿住軒尼詩道，一直跑去維園終點。就喺呢個時候，我個老友喺後面嗌我，佢話不如一齊拍住衝過終點。呢個提議又幾新鮮喎，我哋最後一鼓作氣，攜手過終點。結果齊齊用咗2小時08分完成整個賽事。

完成賽事人數（三小時內）：8,869
我的總名次：1265

Over-all Pos-ition

Gen-der Pos-ition

Cate-gory Pos-ition

Cate-gory*

Race no.

English Name

Chinese Name

Country

Official Time

Net Time

10km Time

Half Way Time

30km Time

1265

1171

1171

HMR1

H1498

CHU TING KAI

Hong Kong

02:08:32

02:08:00

00:40:53

沙田城門銀河皇者之戰半馬2010

由於愈跑愈差，從今日開始，我已經將分類名稱：《馬拉松》修改為《馬拉蟲》，表示我嘅速度只達到蟲級。






嗰日開頭跑嘅時候幾清涼，點知去到最後2K直路，陽光普照，

熱到我完全唔想跑，喺直路前嘅彎位，我見到有個水站，即刻衝埋去，諗住飲番幾杯同埋淋吓個頭降溫，點知原來啲水已經派晒，我由充滿希望轉為極度失望，因為我好怕熱嘅天氣，幾年前嘅10K賽事，我亦係喺呢段路幾乎中暑，記憶猷新，我諗住慢慢跑，捱返終點，但始終敵唔過不斷上升嘅體溫，我最後唯有踄步返終點。

結果用咗成二個鐘頭二十分鐘先至完成賽事。