黃金海岸15公里2011

諗唔到踏入十一月，早上氣溫仍然徘徊喺25至30度之間。今日一早出發，到達深井未夠8點．早知咁快，瞓多半粒鐘先至出發都未遲。禽晚因為要捧愛隊阿仙奴場，睇到成1點先至瞓．所以個人好似重未瞓醒咁。

 

不過早到都唔係唔好，可以有時間周圍影吓相。

呢度就係行李擺放區。

 

呢位跑手一睇就知猛料，影番幅相先！結果無估錯，佢喺呢次賽事好似係第5名過終點！

四圍岳下，似乎唔係太多跑友參加喎！

睇怕如果唔趁開跑前上台影番張相先，呢世都唔駛旨意有機會企上頒獎台！

我最唔明點解大會要搞到成9點咁遲先至開跑，我諗當時氣溫有成27度，我未跑已經標晒汗，咁嘅狀態，捱唔捱到終點都成問題。如果夾硬嚟，分分鐘會抬上白車，所以都係唔好搵命搏，慢慢跑算喇！

開始頭1公里上斜路，到達引水道傍嘅路開始平坦番，但陽光普照，我由於操練少，感到頗吃力，有幾段路熱到我幾乎唔想展步，我呢幾年跑咗都有幾十個賽事，點辛苦都捱返終點，無理由呢次咁衰仔吖！好彩最後都返到終點，時間比08年慢咗足足15分鐘．跑完之後，見到新地兄，佢問我跑成點？我都唔好意思話啲咁屎嘅時間佢知！所以話一分耕耘，一分收穫，練得少自然跑得差，跟住重有幾個比賽嚟緊，希望可以跑番好啲喇！