用屎坑嚟形容厠所，雖然唔係咁好聽，之不過我覺得呢個詞形容得好貼切。而一個地方文唔文明？睇吓個厠所乾唔乾淨就知架啦！如果返過大陸，相信大家都有咁嘅經驗。印象最深刻嘅一定係內地嘅厠所，啲人好似唔識得乜嘢叫做自律，個厠口咁大都會疴到四圍都係，我唔知你哋明唔明？我就唔明喇！佢哋亦都冇沖厠嘅習摜，整到個厠所臭氣沖天，《黃金》滿地，呢啲情況，見怪不怪。去完之後，分分鐘可以慳番一餐，因為你已經揾唔番你嘅胃口。不過，係嗰句講嗰句，依家文明咗好多架啦，我近排發現喺內地嘅厠所裡面，多咗二行字：《前行一小步，文明一大步。》你話喺咪好精景呢 ！
我嗰個年代嘅厠所，講你都唔信，同依家大陸嘅有過之而無不及，我係講嗰種落後同埋衛生程度。嗰陣時啲厠所有幾種，最正嗰種就係起喺魚塘上面 。我有個同學屋企係開魚塘嘅，個厠所係用木搭建喺魚塘上面，然後用木做一條通道，喺塘邊連接埋個厠所。故此去厠所時要格外小心，一吓唔覺意，分分鐘跌落個塘度。個厠所嘅設計係非常環保，好似大澳嘅棚屋，地板之下就係魚塘。只要喺中間嘅木板鋸個窿，咁就大功告成。
當你去厠所嘅時候，你就會覺得好鬼爽
，因為唔單只無臭味，重風涼水冷添。由於成間厠所搭建得好簡陋，啲風由木罅吹入嚟，簡直透心涼，尤其係喺夏天嘅時候。去完厠所唔須要沖厠，因為有好多對眼已經喺水裡面虎視眈眈，等緊開大餐 ，一聽到《噗嗵》一聲，就一湧而上，只見到魚身不斷係水面打滾，唔駛一陣間，你啲排泄物已經成為魚大哥嘅點心。嘩！啲魚咁唔合衛生，揾鬼食囉？但係喺嗰個年代個個都係咁養魚架啦，大家習以為常，完全冇諗到合唔合衞生。表面上你會覺得以前養魚唔得衛生 ，查實依家養魚嘅衛生程度分分鐘差過以前。家吓喺大陸養魚或者養蝦，為咗增加產量，喺水裡面加入大量嘅激素，嗰啲魚同埋蝦，根本係喺個化學池度長大。故此養魚嘅人唔敢食魚，養蝦嘅人唔敢食蝦，呢啲已經唔係秘密。我睇過一啲養大閘蟹嘅圖片，啲池水因為落咗好多激素，加速藻類嘅生長，變成墨綠色同埋《杰撻撻》，跟住重見到啲死狗浮喺個池面，啲蟹就爬上啲腐爛咗嘅肉度開大餐。我睇過相關圖片之後，就算揾把槍指住我，我都唔會再食大陸出產嘅大閘蟹 ！ 唔好意思，明明主題係屎坑，點知講咗養魚。標叔有句成日掛喺口邊嘅說話，《屎坑同厠所》，意思係話屎坑等於厠所，用嚟形容有啲嘢外表雖然唔同，但實質一樣。好喇，講番屎坑先。我住喺新界，啲厠所清一色係踎厠，由於無水沖厠，所以有另一個名叫旱厠。當啲坑開始滿嘅時候，會有車按時嚟泵走啲屎。嗰陣時大部份喺新界嘅屋都係無厠所設備嘅，當人有三急嘅時候，只有幫襯公厠。
我屋企附近有一間公厠，去厠所之前要有充分準備。記住一定要拎盒火柴同埋一叠報紙。咦？你都幾識嘆喎，一路去厠所一路睇報紙，不過，點解要拎埋盒火柴呢？我相信你會覺得有啲奇怪，唔通喺屎坑度唔夠光？或者我粗略形容吓當時嘅屎坑俾各位認識，先至交代啲火柴有乜嘢用喇！嗰陣時啲屎坑只有三格，每格都有一扇婑鐵門，每格厠所幅牆對上都有一個細嘅窗口，所以空氣唔係咁流通，加上成個月先至有車嚟泵走啲屎，嗰啲屎臭味真係好難頂。但有啲人就唔認同我嘅說話，佢哋覺得啲氣味一啲都唔難頂，所以喺屎坑裡面嘅牆壁寫滿字句，呢啲叫做屎坑文章，唔知大家有冇見過？
如果碰啱泵完屎之後，個厠窿會乾淨好多 ，之但係過咗約莫一個星期之後，啲糞便就會堆積如山 ，嗰啲夜香味對烏蠅嚟講，就真係非常之吸引，隻隻烏蠅剩係聞到陣味都已經口水流埋 ，仲唔拿拿聲飛入屎坑度飽餐一頓咩！我仲記得嗰啲烏蠅好大隻同埋有金綠色嘅外穀，外觀唔錯，或者呢啲叫做好眉好貌生沙蟊。
個屎坑就係佢哋嘅天堂，飽食之後，就不斷繁殖，一隻烏蠅閒閒地可以生幾百甚至幾千條蛆蟲。喺好短時間之內，成間厠所嘅地下，牆壁上面，甚至天花都佈滿屎蟲，非常之得人驚 。
得人驚還得人驚，屎始終要去疴。喺入去之前要作深呼吸，因為一入到屎坑裡面要儘量閉氣，減少吸氣，如果唔係嘅話，會分分鐘俾啲臭味攻死。然後數三聲，一衝入去就要點著啲報紙，啲火要夠大，要喺好短嘅時間，用火《譚》吓幅牆，重有地下，最緊要天花，將喺上面嘅屎蟲，用火燒到跌晒落嚟為止，因為驚疴疴下嘅時候，剩番嗰啲屎蟲會跌落個頭同埋個身度，就真係邊度都唔駛去。啲報紙唔夠一分鐘就燒完，啲火有少少嘅阻嚇作用，之後喺地下嘅屎蟲就會好快趣咁躝埋嚟，爬上你隻腳度，所以你最好喺二分鐘之內辦好大事，然後迅速逃離現場。走慢少少嘅話，真係一身都係。
但如果你喺夜晚去厠所，除咗帶備火柴同埋報紙之外，重要帶埋蚊香，因為啲蚊都知道喺厠所裡面容易揾食，佢哋潛伏晒喺度，伺機偷襲 。喺夜晚去厠所必須依足程序，首先將個點著咗嘅蚊香擺入其中一個厠格，等佢燻走啲蚊先，最好燻五分鐘，等啲蚊暈佗佗嘅時候，先至燒著張報紙，重覆以上嘅動作，《譚》死啲屎蟲，先至可以安心去厠所 。如果唔記得帶蚊香嘅話，肯定蘿友開花。嗰陣時有啲靚仔好鬼百厭，揼個電光炮落個厠坑度，將啲屎爆到通處都係，唔該你想像一下嗰個屎坑嘅環境，除咗佈滿屎蟲之外，仲黐滿晒屎漿，喺咁嘅環境下辦大事，你話係咪好富挑戰性呢 ！
END
