香港故事

喺兩年前有一日我收到個留言，開頭以為有網友同我開玩笑，但嗰陣時唔識得KAKA，又唔識費師奶，斷估無網友咁得閒同我玩啩？不過，睇真啲，段留言附有電話號碼，似乎又唔似玩喎！ 唔信大家睇吓!

 2010-11-18 16:23

《過氣年青人》網主您好，我是香港電台電視節目《香港故事》的編導麥XX（Exxx），現正為新一輯的內容蒐集資料，誠邀　閣下協助。

閱讀你的「想當年系列」，細說當年點滴，既珍貴又精彩，如你能親身分享舊時情懷及借出照片，想必能令節目生色不少。

《香港故事》自2006年開始播映，新一輯主題之一為「我們的歷史」，以口述歷史方法，讓來自不同階層、不同背景的市民，說出他們各自的香港故事，重構香港的民間歷史。

相關資料可參閱節目網頁.......

我喺好奇心驅使之下，根據帖子上嘅電話，致電俾麥編導。跟麥編導通過電話之後，証實並唔係惡作劇。不過要我對住鏡頭分享昔日嘅情懷，真係好大壓力！ 一來我講野同唐唐差唔多咁屎，二來無CAMERA飛屎！兩範都無，點上鏡呀？你話喇？

我曾經喺1978年拍過政府宣傳片《奉告》而上過鏡。嗰輯介紹流動出生及婚姻註冊處，拍攝地點係沙田鄉事委員會。我負責喺地下同對新人辦完登記手續之後，帶佢哋上二樓做簽發証書儀式。我嗰次唔駛講野，剩係喺地下行上二樓咁簡單啫，都《NG》咗成20幾次，換句話講，即係話我由地下行上二樓超過20次！拍完之後，雙腳都有啲軟。

所謂前車可鑑，嗰次剩係上樓級都拍咗咁多次，咁呢次如果要我對住鏡頭講野咪重困難？我諗咗一陣就同麥編導講：我都係唔掂喎！你搵過第二個喇！

隔咗二個星期，我收到麥編導嘅電話，佢話好簡單架咋,當普通傾偈咁就得架喇。重話可以將就我,喺佢哋架流動錄影車拍攝添，而架車會停喺元朗。唉！麥編導盛意權權，我唔好意思再推，心諗死就死喇！惟有硬住頭皮答應！

你睇我細個時好大胆，但對住鏡頭就騰晒雞，所以我叫埋細佬一齊去壯壯胆。去到元朗西菁街，真係見到架香港電台嘅專車，車身油咗《香港故事》幾個大子。

我同細佬講應該係呢架車喇，咁喺邊處錄影呢？

當時喺架車附近擺咗張枱同埋幾張椅，我見到一個戴咗眼鏡斯斯文文嘅後生仔，就行過去道明來意，原來佢就係麥編導。趁住佢重未出名之前影番張相留念！

唔好意思，佢根本好出名，不過我唔知道啫！喺呢度要向佢沙個冧先！敬禮！

我同麥編講，對住鏡頭我驚震到唔記得晒啲台辭咪斃傢伙！麥編導話唔駛緊張，當作傾閒偈咁就得架喇！到時都係問番你寫過嘅野，好隨意架渣！跟住同我講：一陣間我安排放好會叫你上車，然後開始錄影。

我喺嗰個時候諗起一句歌詞：要退後，也恨遲！呢次想縮沙都嚟唔切！過咗無幾耐，編導就叫我上車，我坐喺一張椅上面，身後掛咗塊藍布做背景，工作人員話第日啲背景會變成活動嘅圖片，跟住話我唔可以著件白色衫，因為其中個圖案帶有藍色，影出嚟藍色嘅部份會俾光線穿過，個人就好似穿咗個窿咁。為咗呢個原因，佢俾咗件黑色外套我臨時穿上。

 

喺嗰個時候工作人員開咗兩盞水銀燈，燦到我雙眼好唔舒服，重感到啲燈光有啲慶慶哋添！工作人員見到我坐得唔係好自然，就話唔習慣係咁架喇！話都無咁快就開始錄影，好彩都係問番我細個嘅時候，喺新界過年有啲乜野有趣嘅習俗；另一個話題就係我嘅年代潮流興啲乜野娛樂等等。我雖然有啲口窒,不過都講到出嚟，發揮得就真係麻麻哋。錄咗大約30分鐘就大功告成，我舒咗口氣為咗答謝我幫忙，港台送咗隻杯俾我留念！

重有隻CD添!

香港故事
http://programme.rthk.org.hk/rthk/tv/player_popup.php?pid=5227&eid=&d=2012-01-18&player=media&type=archive&channel=tv&part=1

節目播出之後,有一日我去街市買餸,點知賣菜阿嬸認得我,問我點解可以上電視? 我話你認錯人喇, 嗰個唔係我嚟嘅! 菜檔阿嬸話:你唔駛唔認喇! 你日日嚟買菜,我點會認錯呀! 老老實實,你喺咪識得人先?我就解釋話寫BLOG,我都未講完,佢就問乜野卜呀? 我再解釋即係網誌? 佢重係唔明.我真係唔知點講! 算喇心諗! 我唯有同佢講,我有個朋友喺港台做編導嘅............咁咁咁咁,跟住咪上咗電視囉!賣菜阿嬸好得戚咁同對面賣蕃茄個阿姐講:我一早都話佢識得人架喇!你重同我拗!依家信未!

(完)

渣打馬拉松2012

今早3點10分起身,睇吓天氣都唔錯,16至20度,濕度85%,非常適合跑步.搵咗2粒古力食,心理好過啲,感覺有啲野到肚.實則幫助唔大.跟住出門搭西鐵去尖東.起步點已經封晒路.



我竟然見到幾個街坊,先至知道佢哋都係跑友,重同埋我嗰組添!咁一定要影番張相留念喇!


我約咗慣常跑友阿陳喺清真寺門口等, 我哋驚住第日有老人痴呆症,唔記得咗曾經喺2012參加過渣馬,所以影番張相留念.


呢度唔係起跑點,只不過預先截住一啲參賽跑友,唔好俾佢哋霸佔預留俾種籽運動員嘅起步前列位置.


5點30分正式開跑,



路段同往年有少許改動,話無咁多上斜路段,比較上無咁辛苦咁講,但我跑完之後,覺得分別唔大,可能自己平日練得少啩!

就到終點前1公里,嗰種跑到想死嘅感覺又開始湧現,



我又試同自己講:咁鬼辛苦,玩埋今年算喇! 總算到終點喇!捱埋佢喇!







過咗終點之後,跟住攞行李,途中聽到救傷車聲音,以為有跑手不適送院啫,點知其後証實有跑友不幸逝世.

有專家指出,經過2個鐘頭不斷跑步,體能已經用得七七八八,臨到終點前,千祈唔好死谷,因為分分鐘導致心臟衰竭,非常危險!但佢哋唔明一個跑手嘅心理,如果當時有機會破自己以往紀錄嘅話,必定全力以赴.加上終點前賽道傍企滿打氣嘅市民,嗰種氣氛會令到跑手無得選擇,必定死去完成賽事!有記者提問主席,有無考慮日後報名跑步,須要醫生証明?我覺得如果要驗身先至可以參賽,真係唔駛預我嗰份喇!

呢度係行李攞放區.


攞完行李影番張相,睇吓個樣係咪死吓死吓咁先!

之後見到網友JOJO,好高興佢可以克服腳傷問題.雖然首次參加,但成績不俗.
我今年嘅時間同往年都係差唔多,遲啲睇吓成績先至知.
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
成績公佈咗,認真失禮,衰過往年,時間係2小時9分31秒.

XTEP 15 KM 2011挑戰賽

 

鈴鈴.............今朝一早被鬧鐘嘈醒，原來已經6點鐘，我同自己講，天寒地涷，跑乜鬼野步呢！正一有自唔在，攞苦嚟辛，出年唔駛預我，咁辛苦！查實呢句說話講咗好多年，但一年之後又唔記得咗，見到有比賽，又手痕去申請。

嗱嗱聲刷牙洗面，塞咗二隻蕉，再啪多粒朱古力，夠喇啩，今日都係跑15公里啫，應該夠晒能量。係咁姿姿整整，話咁快就到6點半，即刻出門口。

落到街先知道又大風又冷，好彩喺車站等咗10分鐘就上到車。喺架車度瞌番陣先，皆因禽晚又支持愛隊阿仙奴，睇波睇到成1點鐘。好彩雲佩斯生勝，整咗個世界波，如果唔係都幾難嬴到愛華頓。

去到上水火車站係早上7時10分，呢次約咗2個同事一齊跑，跟住齊齊行去攞號碼布。


沿途見到幾個跑友,以為今日咁涷,一定會少減啲人參加.


但去到集合地點,發覺原來好多跑友都唔怕涷嘅!


開跑前同同事影番張相先


天氣寒冷，得大約攝氏10度左右，不過都有超過成千跑手參加，場面都幾熱鬧！

呢度係頒獎地點

起跑地點.



終點.

比賽準時8點開始，天氣雖然寒冷，但我最喜歡喺呢啲天氣作賽，最後用咗1小時24分完成15公里賽事。
跑完之後再影番張相留念

然後攞番件紀念T裇,但我覺得呢件T裇設計得唔係咁靚,你話係咪哩?

我今朝發誓出年唔會報跑，但...................嘻嘻！出年啲朋友叫到, 可能又唔記得咗囉！依家先知道,  點解戒煙同戒酒咁難, 原來跑步都好難戒嘅!

成績公佈咗，我用咗1小時22分31秒完成15公里，總成績1015參賽者排531。

2011北區豐盛人生健樂長跑比賽

由於有區議會津貼，呢個比賽好經濟，只收50蚊報名費。禽晚捧英超阿仙奴場，睇到成1點鐘先至瞓覺，今朝6點俾鬧鐘鬧醒嗰一刻，個心有少少後悔，心諗呢次又係有自唔在，攞苦嚟辛。同以往一樣，跑步最辛苦係起身個一殺那．烏吓烏吓咁6點半出門口，跟住搭車去上水，喺巴士上面瞌咗幾個字。去到上水約莫7點左右，然後行去集合地點  : 北區運動場。

跟住去攞號碼布同埋紀念T裇一件

號碼布

開跑前先至開始封路同整番個吹氣標誌。


指定動作，就係喺標誌前影相。

 

跟住行入運動場，都係影相，再影相。





喺開跑前影多一張。

今日天氣非常好，早上大約15度，唔係太涷，結果我用咗54分幾鐘完成10公里賽事。