開燒臘舖

想當年,我有個朋友屋企係開燒臘舖嘅，仔乸生意，無請伙記。佢負責斬賣燒臘。平時得一條友企喺舖頭度，有顧客嚟幫襯都重好啲,起碼有啲勢藝。遇啱水靜鵝飛，拍烏蠅多過賣野嘅時候，真係會悶死架！呢個朋友係我同學嘅表弟，佢企舖企得耐，無人傾偈，久而久之，個人變得木訥，平時可以一句聲都唔出，好多街坊以為佢啞嘅。俗語話齋，唔怕生壞命，最怕改壞名，佢個花名叫福頭，呢個唔知係咪導致到佢唔出聲嘅原因喇！除咗呢樣，佢個人重好鬼孤寒，我哋間中去佢燒臘舖陪佢兼吹水，佢係咁意整舊义燒我哋嘆吓都未試過。
佢啲燒臘燒得好唔好食就唔清楚，因為無食過，不過我見到都有好多街坊幫襯，質素有番咁上吓啩？咦?開燒臘舖都幾發喎！
 

我心諗。佢間舖頭，除咗賣燒肉，义燒，燒鴨同埋油切雞之外，重有滷水豬肚，雞腳雞翼等等。我好細個已經識煮飯同埋煮餸，我相信滷水食物唔係咁難整啫，只要將啲豬肚，雞翼烚熟，跟住放晒落啲滷水汁度，咁咪搞掂囉！但燒味呢家野就真係考起喎！我去問福頭，可唔可以教番我一兩度散手，燒燒鴨同埋义燒，點知佢話啲燒味由佢老豆親自泡製，佢都唔係好識，同埋佢老豆唔會將啲技術外傳咁話喎，即係話想去偷師都無得傾。福頭跟住話，如果同佢一齊開燒臘舖嘅話，咁就有藉口搵佢老豆教授燒臘，所以人不可以貌相，咪睇佢儍頭儍腦，心水唔知幾鬼清！呢啲屎橋我都有得出賣，嘥鬼氣，唔教咪唔教囉！駛乜係度噏咁多癈話呢！
工字不出頭，如果想搵大錢，


梗係要做生意喇。呢句話無乜點錯，睇吓香港好多有錢佬都係做靠做生意起家嘅。我有個死黨叫阿貴，佢老豆有間舖位係元朗，咁啱租約期滿，佢問我有無人想租舖？我諗起福頭嘅燒臘舖提議，即刻問阿貴有冇興趣玩吓開燒臘舖？阿貴問我係咪講笑，我問佢我個樣似講笑咩？佢話：你成日都講笑架喇！佢講得無錯，不過我話呢次係認真嘅。阿貴話燒嘢食就識，燒臘呢家嘢就真係唔曉個喎！我話我諗過呢個問題架喇，福頭做咗燒臘呢行成十年，唔識多都識少喇，一於搵埋佢做《拍拿》咪得囉！是鬼但喇，阿貴話：總之你搞掂晒就通知我喇！

我開始搜集資料，原來開間燒臘舖頭要辦好多手續嘅，好似商業登記証，售賣熟食牌照，舖頭裝修要按食環署同埋消防署要求等等。另一方面，有好多《架撐》要添置，好似刀，枮板，掛燒臘用嘅鋼鈎，大冰櫃，燒臘鐵爐，打氣火水爐等等。最後埋數，發覺要成十皮嘢先至可以開張。如果三個人夾份，即係每人約莫３萬鬆啲，我挖埋啲神沙數數,好彩勉強夠數。我列好晒啲支出俾阿貴睇，佢睇都唔睇就話無問題，我即刻飛車去搵福頭，俾佢睇吓我要準備嘅嘢有冇遺漏,佢同平時一樣，既無反對又無異議，所以有時覺得問佢都係多餘嘅，我唯有開始籌備工作。

講真，同熟人一齊做生意係有啲著數。我同阿貴講：我哋可唔可以唔俾上期租金同按金你老豆？阿貴話是但喇。我話重有，可唔可以唔起租住，等裝修好先至正式起租，掂唔掂？阿貴話無乜所謂，點話點好！嗱，呢啲先至係死黨嘛！

眨吓眼我已經將啲申請表攞晒番嚟，其中一欄要填舖頭名稱，係喎！我哋間燒臘舖重未安名喎！我同幾個老友即刻坐低商量一下。大家度吓有冇好嘅名。有人提議《平霸》，嘩！你估賣電器咩？又有人提議《雙喜》，唔得，個名好煙仔；《好美味》，都係唔係咁好，好似即食麵。估唔到諗個招牌名都咁困難。最後諗到一副對聯嘅下款:財源廣進達三江。一於攞第三同埋第五個字，即廣達，好！財源廣進發大達，就叫廣達燒臘。

舖頭開始裝修，個陣時我日頭返工，夜晚同星期日一有時間就去買架撐，真係好忙，呢啲叫有自唔在，攞苦嚟辛！但諗到第日搵到大把錢嘅時候，成個人即刻充滿動力。

買嘢同埋裝修都要錢，我唯有搵阿貴同埋福頭攞住部份錢先，阿貴好爽快，即刻將佢嗰份錢全部拎晒出嚟；輪到福頭，佢一時話啲錢擺咗入定期，一時又話借咗俾人未收得番!講吓講吓,佢突然間話老豆要佢睇舖，根本無時間出嚟搞生意，所以佢打算退出。吓？乜話？咁你唔早啲出聲！呢舖真係俾佢繞起！我一輪星星月亮太陽之後,就面左左咁走咗，好彩最後搵咗另一個朋友入股，咁先至無咁惆悵。

但福頭唔嚟幫手就真係問題多多。喺咁嘅環境之下，我哋唔請個燒臘師傅都唔得。最頭痛嘅地方就係根據法例，我哋必須提供一個有牌嘅燒臘供應商，先至符合攞牌條件。唔講都唔知，原來全香港大約得二十個有牌嘅燒臘供應商。當然，你可以同呢啲供應商攞燒好嘅义燒，燒鴨同燒肉賣，不過如果咁做，你就要將價錢提高先至可以維持運作。而燒臘送到嚟嘅時候，已經冇咗新鮮出爐香噴噴嘅氣味，又貴又唔得新鮮熱辣，你話點同其他行家揮！

一般嚟講，如果你無燒臘牌嘅話，唯一方法就係俾錢嗰啲有牌嘅供應商，攞個証明嚟申請售賣燒臘牌，實際上啲燒臘都係自己燒嘅。我透過朋友問，攞個証明要幾多銀，吓？要二萬幾蚊？食咗我隻<居>咩！貴啲喎!之後知道福頭間燒臘舖係有牌嘅，無辦法, 硬住頭皮都要做一次，唯有扮死狗咁，死死地氣走去問福頭，點知佢話個舖頭圖章俾佢老豆喼住，想<給>個証明我哋都唔得，唔通個圖章鎖喺夾萬度咩？聽完之後真係屎都滾埋，我同佢講以後都唔會再煩佢！大家從此無FRIEND ！

喺呢度奉勸各位，如果要同老友一齊做生意，一定要好清楚佢嘅為人，最好佢係未結婚嘅，何解？因為就算佢本身好信你，但佢嘅另一半未必同佢嘅諗法一樣，咁嘅情形下，分分鐘連朋友都冇得做！

講番我哋呢壇嘢先，商業登記証攞咗，架撐買晒，連紙袋都印好埋，雖然售賣燒臘牌暫時攞唔到住,不過既然浸濕咗個頭,騎虎難下,唯有頂硬上,無牌都做住先。我哋當務之急就後要請個燒臘師傅，結果由阿貴嘅大佬介紹，據聞呢位師傅大有來頭，曾經係深井裕記嘅首席燒臘師傅，不過佢同老細唔啱，所以劈炮唔撈喎。佢嘅背景資料，係真定係假呢？真係唔知！我當時以為執到筍嘢！但知道佢要求月薪4千大元，我就《唧》都笑唔得出聲喇！我嗰陣時都係二千幾蚊月薪咋！但係無辦法，我同阿貴商量之後，卒之請咗佢。

佢叫江師傅，講嘢帶有好重嘅鄉音，開口埋口都《之之》聲，開頭唔知佢噏乜？原來佢將《豬》讀成《之》，《燒之》即係等於《燒豬》,你話死未！初嚟報到都叫做盡責，喺開張之前嚟舖頭睇吓有乜野地方要執執。佢睇完枮板同埋把刀之後話：你估自己屋企用咩？個枮板咁鬼薄，把刀唔夠厚，點斬燒豬骨呀！所以唔係嗰行即係唔係嗰行。師傅跟住問我哋邊個識得斬料？吓？無呀？阿貴同佢講，一路斬一路學掂唔掂？佢話咁你哋《聽》執笠喇！嘩！有冇咁嚴重呀？阿貴跟住同江師傅講，叫佢燒完嘢之後出嚟幫幫手。


佢解釋話：做燒臘分二輪，咁先至夠新鮮。第一輪朝早5點就要燒，喺7點就要有燒臘賣；跟住到晏晝3點半，然後先至開始燒第二爐，通常燒臘舖會喺晏晝5點開市。燒完第一輪之後，要醃定啲鴨同义燒，咁晏晝先至有嘢燒。剩係燒嘢我都已經踢晒腳，無時間兼顧售賣燒臘。重有喎，你唔好以為斬燒臘好簡單，好似斬雞咁，首先要將雞嘅脊骨，脾骹骨起晒出嚟先，咁斬出嚟嘅雞至唔會骨槮槮。企係燒臘舖度,除咗識斬料外,重要識得睇秤同埋收錢！你話我知你哋掂唔掂喇？真係唔講都唔知，斬料都咁鬼繁複，同埋我哋識鬼睇秤咩！我望住阿貴，攤攤手，無計，唯有聽師傅講，請多個幫手。

江師傅話有個同鄉，都係做開呢行嘅，做嘢好有交帶，應該幫得手。二千蚊月薪，有冇問題？我哋有得選擇咩？我心諗。結果請多個斬料師傅，支出又大咗。不過總算搞掂，鬆一口氣。

我有個死黨，佢對風水命理有啲研究，


據佢所講,佢係賴布衣嘅N代傳人喎! 信住先喇!佢話開張好緊要，一定要揀個吉日，咁先至可以一本萬利！我講笑話我唔貪心，一本千利已經好滿足囉！佢攞咗本通勝出嚟，睇咗一陣間，就揀咗個日子。唓！我都識揀喇，原來喺通勝裡面，每一日都註明宜乜宜物嘅，就係咁揀個宜開張嘅日子，咁就話叫做識睇風水？佢跟住話開張要拜神，祈求大吉大利，重要喺舖頭門口貼副對聯，咁先至夠殺食。吓？對聯？無問題，好彩我過年嘅時候，屋企買多咗一對，等我攞番嚟用咪得囉。

點知個死黨話過年啲對聯唔啱嘅，要另外作一副有意思先至得，佢叫我哋唔駛担心，因為佢已經幫我哋諗咗一副架喇。呢個死黨算係咁架喇，不過我睇完副對聯之後，忍笑忍得好辛苦，見佢一番誠意，我唔忍心掃佢興。嗰副對聯以<廣>字同<達>做開頭,都幾搞笑,唔信大家睇下:

上聯:廣大街坊嘗燒臘;下聯:達官貴人來幫襯。


棋額：客似雲來。

你哋話係咪勁好笑呢! 我同阿貴講,平時日頭要返工,收工之後至可以嚟舖頭幫手,周末周日先至會成日嚟睇舖，阿貴話無乜所謂。嗱！呢啲先至係真真正正嘅老友，你哋話係咪呀？嘩！你都好市儈啫,或者你會咁話，有你著數你就話老友。不過如果你硬要咁講，我都唔會否認嘅！

冇幾耐江師傅帶咗個後生仔嚟，佢介紹俾我哋識：呢個就係我講嘅斬料師傅，佢叫阿鍾，你哋叫佢<打靶鍾>就得架喇。咦？個花名改得好別緻喎 ！我哋同江師傅講已經擇好吉日開張，佢話剩番嘅時間唔係好多嗰喎!你哋攪掂晒啲嘢未？有乜嘢要準備？我哋唔係好知喎！江師傅話：好似要去搵定間舖頭入貨，例如肉食同醬料等等；

我打蛇隨棍上，即刻話:啱喇,師傅,唔該你講聲我哋聽,睇吓重有乜嘢須要準備!

江師傅大致講講點樣運作間燒臘舖，我哋聽完之後，先至知道义燒係用急涷嘅梅頭豬肉，經解涷之後，再用醬料醃半個鐘先至可以入爐燒；而雞分開白切同埋豉油兩種，啲雞買番嚟之前己經劏乾淨，

烚熟咗之後，開始《啤水》，乜嘢叫《啤水》呢 ？就係將啲烚熟咗嘅雞放入個膠盤度，然後開水喉用水浸住隻雞，水喉唔好關晒佢，留番一條絲咁細嘅水，等佢不斷咁注入個盤度，保持啲水流動，咁隻雞至唔會變壞，大約半個鐘頭之後，《琼》乾水，再用生油將隻雞全身掃渾，隻雞個外表就變得擸擸令，咁至吸引到顧客。《啤》過水嘅雞啲肉特別滑 ，不過，由於用水喉水，所以唔係咁衞生，我知道咗製作過程之後，好少食出面嘅白切雞。

而豉油雞係將賣剩嘅切雞，再用秘製嘅豉油醃製，所以大部份地踎舖所賣嘅豉油雞都係由隔夜賣剩嘅雞嚟做原材料。師傅話燒隻豬嚟賣非常唔化算 ，加上我哋舖頭地方唔夠大,根本無辦法燒豬。所以燒肉就喺附近嘅燒臘舖攞，每日二十斤左右就夠架喇。至於燒鴨就比較覆雜，首先要去揀鴨，每個月逢初3，初6同初9 係墟期，元朗雞地會有雞同埋鴨賣。買鴨係以每手計嘅，即500隻一手，頭担鴨價錢貴啲，乜嘢叫頭担鴨呢？即係大隻啲同埋皮下脂肪比較少啲，我記得曾經有隻頭担鴨超過十斤重，好鬼誇張。每次嘅《喊欄》價都唔同，睇下你好唔好彩。以我哋間蚊型燒臘舖，每次買2手已經差唔多喇。
嗰陣時我哋每次買成1000隻鴨 ,平均每隻要11到13蚊。買完之後就要運去劏，1蚊雞劏1隻，不過，啲鴨毛可以賣番錢，所以劏房唔收劏工費,但鴨毛歸佢哋所有，算係扯個平喇！

如果喺我嗰個年代出生嘅朋友，相信好多人都試過親自劏雞同劏鴨。唔知大家重有冇印像，有啲阿叔會逐家逐戶去收鵝毛同鴨毛。佢哋一路行一路嗌：《鵝毛鴨毛對火柴》，我哋一聽到佢哋嘅嗌聲，就會將過時過節剩番嘅鵝毛同埋鴨毛，拎出去換火柴。

講起我細個嘅時候，最鍾意郁手劏雞同劏鴨，嗰陣時唔知乜嘢叫做殘忍，重覺得好過癮添。所謂樂此不疲,每次劏雞殺鴨，我都爭住去做，直至到有一次,我捉住隻鵝，坐咗喺張櫈仔度，跟住用手掹甩佢條頸嘅一執毛，然後一手用力將佢條頸向後屈，喉嚨向出，另一隻手用把刀割佢喉嚨，唔知係咪把刀太過鈍，我鋸咗成幾分鐘先至將佢條頸割開，重割到血肉蕪糊添。我用隻碗裝住啲血，滴到隻碗差唔多滿晒嘅時候，見隻鴨己經唔識掙扎，我就將佢擺埋一邊，跟住劏雞，我照板煮碗，跟住將啲雞血滴落隻碗度，突然間我感到有嘢撞我背脊，我下意識用手向後面撈，咦？乜毛茸茸嘅？我擰返轉頭一望，見到隻鵝企咗起身，成條頸都係血，唔知係咪我捏得佢條頸太緊，佢雙眼充晒血，碌到大大隻望住我，真係好得人驚！我咁大胆都嚇咗一跳，自此以後，我都唔敢再劏鵝囉！

劏完雞鴨或者鵝之後，要淥一淥佢哋先至可以掹毛，你唔好以為啲功夫好簡單呀！因為淥雞淥鴨同淥鵝嘅水，熱嘅程度係唔同嘅。如果啲水太熱，會淥甩晒啲雞皮，咁就大件事喇；如果啲水唔夠熱，啲毛又會黐住隻雞，一掹之下,連皮都扯甩，你話死未！好彩阿嫲教咗個口訣俾我，就係：

雞〈滋〉 水接近滾嘅時候  

鴨〈滾〉     開始滾嘅時候

鵝〈泙澎〉。     水大滾嘅時候


吓?講乜呀?以上三個詞查實係用嚟形容水滾嘅程度。<滋>係啲水開始流動，接近滾嘅時候;<滾>係有水泡從水底冒上水面嘅時候;而<泙澎>則形容啲水大滾嘅時候。接近滾嘅水用嚟淥雞最好；剛剛滾嘅水淥鴨最正；而大滾嘅水淥鵝就無得頂！

講番我哋間燒臘舖先，我哋聯絡咗一個雞販，每日送10隻劏好嘅新鮮雞嚟。咦？你或者會問點解唔一次過好似買鴨咁買一大批呢？因為新鮮嘅鴨同冰鮮嘅鴨燒出嚟係無分別嘅，所以一次過可以買一大批，但啲雞急涷過就無咗份鮮味，所以嗰陣時嘅燒臘舖都係用新鮮雞。

有話則長，無話則短。好快趣就到開張嗰日，我哋就喺舖頭門口擺咗啲西餅同飲品招呼啲街坊,我有好多朋友都嚟捧場,場面相當熱鬧.



白色衫呢位就係拍檔嘅大哥森記,

嗰日真係好忙碌,好多街坊都嚟試新嘢,我哋個個做到踼晒腳,到收舖嘅時候,江師傅話如果日日都係咁嘅環境,真係有得做。

呢個就係請返嚟嘅江師傅,人工重多過我!

,

開張踏入第3日，就有事發生。嗰朝早一開舖，就有三條友仔走入嚟，叨住枝煙，非常樣衰。我哋以為係嚟幫襯，問佢哋要啲乜？點知其中一條友仔擸起衫袖，SHOW咗啲紋身出嚟，



跟住話：《你哋生意唔錯喎！我哋係呢區嘅陀地，有我哋喺度，冇人敢胆嚟搞搞震嘅。》講咁多癈話，無非係想收保護費，阿貴見勢色唔對，走去隔離搵佢大哥出馬。
 

佢大佬喺嗰區開士多有成十幾年，叫森記士多，個個街坊都叫佢做森記,由於做得耐，佢都識得唔少區內嘅有勢力人士。

森記知道有人嚟收陀地，即刻走過嚟同班友仔講：《呢檔嘢係我細佬搞嘅，我同你吔大佬大麻繩好熟，俾吓面好喎！》班友仔話佢哋出嚟行，都係想搵餐晏仔啫！森記問佢哋想要幾多？利利是是，就一仟蚊喇！森記話呢啲小本經營舖頭仔，贃得雞碎咁多，一仟蚊脷啲喎，五佰喇！班估惑仔諗咗一陣間就話，好！當俾面你。咪住！森記話，係咪一次過收先？如果第日又有人嚟話收陀地，咁我哋點搵你？其中一條估惑仔用張紙仔寫咗個電話號碼同埋佢個名，佢可能幼稚園都未畢業，啲字寫到鬼五馬六，跟住遞俾森記，好有義氣咁講：《如果有人嚟收陀地，你就話阿雞照嘅！如果搞唔掂，俾電話我，我哋出嚟行係講義氣嘅！》呢啲叫破財擋災，估唔到開間舖頭仔都要交保護費！

打從舖頭開張嗰日，我就開始人生中最艱苦嘅日子。每朝我要四點鐘起身，然後落舖頭幫江師傅手燒燒鴨同埋义燒，天氣好都無乜所謂，遇啱狂風大雨嘅時候，真係後悔開咗呢間舖頭。我哋喺燒臘舖附近，大約一百碼左右嘅一間廟嘅隔離，租咗一笪好細嘅地方嚟烤製燒鴨同义燒，一百蚊月租。我每朝要推啲醃好咗嘅鴨同梅頭豬肉到個爐度等江師傅燒，之後到7點零鐘攪得七七八八，我就返工，嗰陣時有車，所以時間都唔算趕。收工之後，到6點鬆啲鐘，又要返番舖頭幫手，一路做到差唔多12點先至返屋企，瞓唔到幾個鐘又要起身返舖頭幫手，你話我係咪有自唔在，攞苦嚟辛呀！

幾經辛苦先至捱到周末，諗起未開舖頭之前，一到星期六就會同班FRIEND去燒野食，踩單車或者開PARTY，幾鬼開心。依家認真折墮，放假都要倒屎咁早起身。所以人嘅一生，好多時會作出錯誤嘅抉擇，由出嚟做野，投資以至到婚姻，都有機會揀錯。如果你到依家都無後悔過，即係話你所作出嘅抉擇完全正確，真係要恭喜你喇！

呢個係開張嘅第一個周末，我唔駛返工，我將燒好嘅义燒同埋燒鴨推咗入舖度，跟住留咗喺度學嘢。《打靶鍾》遲咗成十幾分鐘先至返燒臘舖，好彩阿貴已經喺度打點一切。我好留心阿鍾點樣秤燒味，收錢同埋斬燒肉，江師傅講得無錯，如果俾我哋做，真係唔掂，有時人影無隻，有時就人山人海，所以唔熟手嘅話，莫講話斬燒味，單係叫你揸住個秤條繩仔,



然後撥個鉈，睇吓有幾重，然後再用心算計吓幾多錢，真係會手忙腳亂。我同阿鍾講：你都好醒喎，啲义燒一擺上個秤度，你就即刻計到個價錢出嚟！阿鍾話梗係唔係咁計喇，查實賣野之前，心裡面已經計好數，好似一隻燒鴨，由買返嚟到劏乾淨要13蚊，去到燒好出嚟成本大約18蚊。我要將隻鴨賣60蚊先至有利潤，咁一邊咪要賣30蚊囉，鴨分上裝同埋下裝，上裝即鴨翼部份，下裝係鴨脾部份。上裝冇咁多肉，所以賣13-14蚊，下裝則賣16-17蚊。如果隻鴨細啲,驚唔夠秤嘅話,咪畢多幾売汁落去囉。如此類推，每一樣燒味喺我心目中都已經有個價錢，睇秤只不過係整色整水嘅唧！哦！依家明白晒囉！唔怪得知我以前買燒味，次次個價錢都差唔多喇！

嗰朝學咗唔少野，講落你可能唔相信，原來如果要啲滷水汁唔變壞，就要加多隻蛤蚧頭落去同埋啲葯材一齊煲，你話係咪好神奇哩！


我哋每日返舖頭將啲汁煲滾，再將啲烚熟咗嘅雞潤，雞腎，鴨腳鴨翼，豬脷，豬肚等等，放入滷水汁滾番吓，就可以賣架喇！大約2個月左右，我哋又要買過個新嘅蛤蚧頭擺落去，因為先前嗰隻蛤蚧頭已經溶晒，如果你見到啲滷水汁面有個蛤蚧頭浮吓浮吓，我諗你可能唔敢再食滷水食物。滷水汁愈耐啲味愈正，為咗保持滷水嘅水準，個桶唔會洗同埋啲滷水唔會更新。

到咗晏畫3點鐘左右，阿貴跟阿鍾學企檔斬料，我就去幫江師傅手，睇吓點樣醃义燒。佢首先將啲解涷咗嘅梅頭豬肉，用义燒粉醃半個鐘，义燒粉查實係由糖，鹽，味粉加埋花紅粉混合而成嘅。之後將啲梅頭用條义燒針穿成一排排，


每條針大約可以串10條豬肉，江師傅跟住用水整濕啲報紙，撕到同鐵枝咁長，大約3吋濶，然後《鋪》喺近住鐵枝穿住嘅梅頭位置，江師傅話近住鐵枝位置嘅火力最猛，如果唔用啲濕紙遮住，會燒燶晒，咁啲义燒嘅賣相就無咁好睇喇！我問江師傅，咁報紙啲油墨可會甩落啲义燒度喎，怕唔怕呀？師傅話通行都係咁做，你話怕唔怕喇！我覺得自討沒趣，唯有轉話題：咦？啲燒鴨今朝早已經整好晒，究竟點整呢？江師傅話:駛唔駛咁急呀你?今晚你跟住我做，整定等第二朝燒,好快趣就識架喇。

臨去燒之前，師傅用一隻細嘅匙羹，喺個膠桶仔度，《畢》咗一PAT嘢出嚟，嗰PAT嘢發出剌眼嘅熒光，只見江師傅將PAT嘢撈落去啲墨魚同埋雞腳度，一細PAT已經可以將一大膠盤肉染成橙色，嘩！呢啲係乜野料呀？咁勁嘅！師傅話呢啲係工業染料。唔係啩？容乜易食壞人架？江師傅話食少少無事嘅，跟住又係嗰句：呢行個個都係咁做架喇！我喺呢度奉勸各位，喺街邊見到橙色嘅墨魚同埋雞腳或者生腸，千祈唔好買嚟食，因為肯定對人體有害而無益。

差唔多４點鐘，我同師傅推啲嘢去燒。個爐成5呎高，用鐵蓋蓋住，鐵蓋上面有一個可以開關嘅窗口仔。


江師傅首先將啲炭用水沖一沖，原來要將啲炭粉沖走，以防止啲炭一路燒一路啪啪聲,將啲炭粉變成炭屎,彈到四圍都係，部份會黐喺啲义燒或者燒鴨度，咁就唔係咁好睇。佢倒啲火水落啲炭度，一點就著，不過要燒一陣間，等啲火水味燒走晒先至好掛啲肉入個爐裡面。個爐裡面有個鐵圈，江師傅掛大約十隻鴨入個爐度，佢話記住鴨肚向住中間嘅爐火，因為肚腩肉厚,受火多啲。



佢跟住再加上兩排用义燒針穿好嘅义燒，然後冚好個蓋，咁就大功告成。一爐炭可以燒15分鐘，換句話講，15分鐘就要加炭，通常义燒15分鐘就燒好;鴨就要20-25分鐘,如果燒過龍嘅話,啲肉就好似<趙>柴皮咁,你話好唔好食喇？但如果燒得唔夠時間,就會血淋淋，啲客見到會走夾唔透!所以掌握時間好緊要。

义燒喺加完炭嘅時候要拎出嚟，跟住將冚喺面頭嘅報紙拎走，然後成抽浸落預先準備好嘅糖水度，嗰啲糖水係由麻糖加水開稀造出嚟。浸完糖水之後，跟住《擎》乾，再掛番入個爐度慶大約5分鐘，啲义燒會變得立立令，睇見都流口水；至於啲鴨，一般要焗住燒20幾分鐘，如果喺嗰個時候拎出嚟，你會呆一呆，因為啲鴨皮唔單只唔脆同埋重係保持入爐之前白嘥嘥嘅顏色。我之前提過話個鐵蓋上面有個窗口仔，查實頭嗰20分鐘主要係將隻鴨焗熟，跟住將個窗口仔打開，由於有空氣對流，你會見到啲火舌喺個窗口仔度飈出嚟，3分零鐘左右，啲火會將鴨皮扯到變成火紅色同埋脆卜卜，



喺呢個時候，要將啲鴨拎出嚟，如果唔係，就會燒燶晒。啲鴨掛喺度燒嘅時候係頭向天，拎出嚟之後要將個鴨頭向下，咁鴨肚裡面嘅醬料先至會由個肚流返去鴨頸度，經過個鴨肺嘅時候，由肺部嘅微絲血管，一路滲透全身，隻鴨先至有香味。我係度講就好似好容易，之不過要將隻鴨燒到成隻卜卜脆，控制個火同埋幾時拎啲出嚟幾考功夫架。我試過用個勾將隻燒好嘅鴨喺個爐度拎出嚟,點知隻手腕掂到個爐邊,痛到我一縮手,成隻燒好嘅鴨咁就跌咗落爐底,結果臨尾香,江師傅見到都禁唔住搖搖頭!

差啲唔記得講，喺個爐嘅底部有條槽，當啲鴨同义燒喺燒緊嘅過程中，有好多油會滴落條槽度，條槽有個出口，江師傅預先擺咗個大鐵罐喺個出口度，用嚟收集啲油。每日會收集到三分一油罐嘅燒臘油，啲油會有人嚟收，如果無記錯，可以賣2蚊一罐。有乜嘢用呢 ？我問師傅，

原來啲油用嚟做腸粉同埋河粉，
唔怪得知啲腸粉咁滑喇！照咁睇，啲腸粉同河粉食得多真係冇乜益喎！

好喇，燒好啲鴨同义燒，就推返舖頭賣。阿鍾同阿貴負責企檔，我同江師傅就休息吓先。我之前講過，我地間燒臘舖隔離右手邊係森記士多，再隔一間喺正CORNER位係華記大牌檔，間舖頭大過我哋間燒臘舖少少，不過就佔用咗一大片行人路，擺咗有成十幾二十張枱，粥粉麵飯，小菜等等,

應有儘有，每晚都高朋滿坐，由黃昏7點開到深夜2點先至收舖。啲野食唔係好差，不過貴咗少少，咁點解重有咁多人幫襯？原因係位置方便，你可以將架車泊到埋枱嘅側邊，一路食一路睇住部車，唔駛四圍搵位，所以成功除咗天時同人和之外,地利都好重要！

睇吓個錶,重有大把時間先至夠鐘學整燒鴨，我見無乜勢藝,咪走過華記同嗰班伙記吹吹水。喺舖頭側邊見到祥哥,佢係華記嘅淥麵師傅, 見佢將條魚乾喺個炭爐上面烘完面又烘底，我問佢喺度做乜?佢話喺度煨緊左口魚乾，煨到咁上下條魚就會脆，跟住將佢磿粉，然後溝埋啲鮮蝦同冬菇度，用嚟包雲吞，



咁就會惹味好多。唔怪得知佢啲麵咁好賣喇！一於記住，有朝一日開雲吞麵檔，可以照板煮碗。查實做生意咁鬼辛苦,搵到錢都無命享喇,但個心重有咁嘅念頭,你話係咪好居吖! 行過少少,見到另一個伙計喺度攪緊煲粥，我就哄埋去學吓野，原來啲粥煲得咁《綿》係有啲繞妙嘅！我見到個伙記喺啲粥滾番有咁上下時間，竟然落咗成大碗豬油，



原來落豬油喺煲粥度，啲粥會滑好多，又食唔出有油嘅味道。有啲人去大排檔，諗住清清地，健康啲食碗明火白粥，點知啱啱相反，估都估唔到會食咗咁多油落肚。

睇到咁上吓，聽到江師傅嗌開工，嗱嗱聲返舖頭，預備泡製燒鵝，查實一般燒臘舖燒嘅都係鴨，不過鴨鴨聲唔好聽，加上鵝貴過鴨，故統一叫燒鵝，當然間中都會整啲燒鵝出嚟賣，不過價錢貴好多。江師傅喺下晝已經將啲鴨喺個冰箱拎咗出嚟，放咗落個膠盤度解涷。我哋首先將啲鴨洗乾淨，然後將花椒，八角，



葱頭撈埋落啲鴨粉度，鴨粉係由味精，糖，鹽按比例溝成嘅。隻鴨由個肚下部正中央位置劏開約6吋，只見師傅將啲料用手塞晒入個鴨肚度，跟住搽渾隻鴨肚每一個角落，師傅問我有冇留意隻鴨個肺係無掹走到，原因係啲醬料溶咗後，會沿住鴨肺，滲入鴨嘅不同部位，咁隻鴨先至夠味。所以第日收啲鴨返嚟嘅時候，千祈唔好投訴話劏得唔乾淨，連個肺都懶得掹走！

入晒啲料落個鴨肚之後，再用一條大約7吋長嘅鐵枝,俗稱鴨針,將隻鴨肚連埋，

再用水沖乾淨。跟住師傅咗鑊熱水，用手揸住條鴨頸，擺落啲熱水度拖一拖，將黐喺鴨身上面嘅醃料沖淨。我依家喺度交代吓隻剛鴨劏完咗之後，劏鴨師傅會利用氣泵將啲氣打入鴨皮同埋肉嘅空間，廹駛皮同肉分開。所以當師傅用熱水拖拖隻鴨嘅時候，喺冷縮熱脹嘅原理下，隻鴨會變成漲卜卜。師傅唔知幾時預備咗一桶帶有酸味嘅液體，佢話要將啲液體小心淋落隻鴨身度。唔可以翻淋，即淋完再淋，因為如果某部份淋多咗，嗰部份燒出嚟就會比較深色同埋燶啲。所以淋得唔均衡嘅話，隻鴨燒出嚟嘅顏色就唔會一笪深一笪淺，個賣相認真無得頂！

我即刻問師傅嗰啲液體點溝出嚟嘅？點知師傅剩係肯講由糖水同醋溝出嚟，至於份量比例係幾多比幾多呢?師傅就咋咋啼啼話遲啲先至教。呢啲咪中國嘅傳統智慧囉 - 教曉徒弟無師傅！
好啦，淋完啲鴨之後，就好似《浪》衫咁, 用個鈎
將啲鴨逐隻逐隻掛起，之後開大兩把牛角扇，牛角扇喺當時嚟講係最勁嘅風扇,

因為如果啲風唔夠勁,啲鴨分分鐘會變壞。我哋將兩把扇向住啲鴨不停咁吹，吹足一晚，到第二朝燒嘅時候，你會見到啲鴨嘅皮乾到好似塊油紙咁，重鬼咁《鞋》手，而出現格仔紋啲鴨皮表示夠乾身，燒出嚟嘅皮特別脆！

咁過咗無幾耐,有一次啲鴨燒完出嚟有啲唔係好妥,其中一隻白嘥嘥嘅? 江師傅話你班友仔一路做野一路發夢,話咗你哋架喇！嗰隻鴨無淋到糖醋囉！你搵鬼買喇!死人江師傅，幸災樂禍，窒頭窒勢,我都唔示弱咁話：你信唔信我可以賣咗佢呀？師傅話:好呀!賣到我就切個頭俾你當櫈仔坐。嗰日我同阿貴一齊企檔，有啲客見到隻咁嘅鴨都好奇問係點解？我就解釋話呢隻鴨係我哋嘅新嘗試，因為有啲人鐘意食燒鴨，但又怕熱氣,我哋就專登唔燒到啲皮咁脆,迎合一啲客人嘅口味。今日試燒一隻咁大把，買就趁手!又真係估唔到喎,有個阿伯話想試下,要咗個下裝，有幾個客都唔執輸，結果唔駛一陣間就賣晒！我好得戚咁同師傅講：做生意講食腦嘅！日本仔將啲爛鬼飯團炸脆,加啲糖，然後包裝得靚一靚，貴貴都大把人搶住買。啲野嘅質素唔得嘅話，用銷售技巧搭夠咪得囉！江師傅你明唔明呀?我故意大大聲咁講。師傅俾我吹到碌大雙眼！我話:執到喇你!好彩我對你個頭無乜興趣,費事坐汚漕我個籮友!
 
過咗成個月，開始習慣呢種非人生活，我同拍檔阿貴喺呢段時間學咗唔少嘢，由醃製义燒，燒鴨到燒出嚟賣，都叫做學得七七八八；阿貴由於成日留喺舖頭幫手，佢已經可以單獨企檔斬燒臘同埋收錢。佢同我講話依家搵埋搵埋，都唔夠俾啲師傅人工，如果要有錢贃，一定唔可以請伙計，所以要快啲學識晒佢哋啲嘢。阿貴講得好有道理，故此我一得閒就同阿鍾傾偈,順便睇佢點斬料。佢同我講，切嘢嘅時候，千祈唔好伸啲手指出嚟，如果唔係，分分鐘手指都無埋。跟住話我知，工多藝熟，佢一拎上手就知舊燒臘有幾重同埋收幾多錢，如果吓吓要睇個秤嚟收錢嘅話就蚊都瞓。大家可以睇吓去開街市買餸嘅阿嬸，佢哋一拎起啲餸菜，就知夠唔夠秤，所以千祈唔好呃佢哋。查實評估啲燒味價錢唔係好難嘅啫，例如一隻鴨要賣60蚊，咁半邊咪賣30蚊囉，上裝同下裝就14蚊同16蚊囉，如此類推，雞同义燒都係咁計。

我見到阿鍾收完錢之後,無洗到手就繼續斬燒味,嘩!好唔衞生啫,啲錢咁汚漕!咁重未算,斬完燒味之後,佢跟住喺枮板隔離個水桶面,拎咗條布出嚟扭一扭,就用嚟抹乾淨把刀同埋個枮板。我等個客走咗之後就同阿鍾講,我話佢收完錢應該抹吓雙手,咁斬料先至衞生,重有呀,嗰桶洗潔精水撻撻,抹過個枮板同把刀之後,應該要用清水過一過啲洗潔精,先至好切嘢俾啲客。打靶鍾平時都幾好老脾架,點知嗰朝好似食咗火葯咁,一句質埋嚟:係咁架喇,唔滿意咪炒我囉!咁啱江師傅入嚟打圓場,佢叫我得閒去其他燒臘舖睇吓!個個師傅都係咁做架喇!所謂形勢比人弱,我即刻沙冧話我只不過提少少意見啫,阿鍾唔駛咁勞氣喎!老實講,我條氣都唔係好順,專登搵一日去附近嘅燒臘檔睇吓,發覺打靶鍾真係無講錯,個個師傅都係收完錢就斬料,而抹嘢嗰塊布都係長期浸喺啲洗潔精水度。自此以後,我買燒臘會揀一啲有專人收錢嘅燒臘舖先至買,同埋唔駛佢哋斬,我會成舊义燒或者成隻鴨拎走,情願返屋企辛苦啲自己斬比較穩陣啲。

我好快趣就已經搞掂收錢嗰PART，開始學斬料。嗰把刀比我喺屋企用嘅重得多同大得多，雖然我斬得唔係好快，但都叫做可以做到呢份工，阿鍾見我話想學野，即刻話俾機會我，實則乘機走去隔離森記打牙骹，佢話如果人多搞唔掂，大聲嗌佢就會即刻彈番嚟架喇。嗰日生意一般，我斬咗半朝，開始覺得都唔係好難啫，呢啲手作野，好快趣就上手。為咗喺啲客面前搔下QUALI，我開始玩吓花款技巧，咁就瀨嘢喇！記得其後有個阿嬸嚟買义燒，諗住用最短嘅時間切好包俾佢，即時使出連橫刀切法，突然感覺到隻手指尖有少少麻木，大鑊，原來一吓唔覺意，將隻食指頂部嘅一塊肉連部份手甲一齊削甩咗，我唔可以俾個客知我咁屎，惟有忍痛用條抹枮板布住隻手指，嗱嗱聲將啲义燒草草包好，個客一走我就大嗌阿鍾返嚟頂住，阿鍾見到我住隻手指塊布索滿血，知到我切親隻手，跟住幸災樂禍咁話：切親手係表示你重未夠班,切多幾次先喇！唔好以為做啲哋呢行好容易。正打靶鍾！老細都敢窒！我都死雞撐飯蓋，話啲义燒唔夠鮮色，所以咪加啲血落去等啲义燒靚啲囉！之後諗起都有少少唔安樂，啲义燒都唔知有冇沾咗我啲血，不過應該無害啩！

自從開咗燒臘舖之後，平時玩開嘅朋友，又多咗一個好去處，一有時間就會嚟燒臘舖飲吓酒食吓燒鴨吹吓水。我同阿貴都好豪爽，唔靚嗰隻都唔俾班FRIEND食。班友仔除咗食之外，又鍾意玩吓斬燒臘。有一次，賣剩咗一隻鴨嘅上裝同埋一隻雞嘅下裝，師傅交帶，隻鴨嘅上裝賣14蚊而雞嘅下裝賣20蚊，點知個朋友攪錯咗，將隻鴨嘅下裝賣20蚊，由於個街坊識得森記，向佢投訴話我哋賣得貴，以後都唔會再幫襯！又有個街坊話我哋好似玩玩吓咁，將啲义燒切到一粒粒，都唔知係咪出嚟搵食嘅！我發覺我哋間燒臘舖似娛樂中心多啲，好多老友有一時間就會嚟打吓躉食吓嘢或者斬吓燒味。

眨吓眼又過咗成四個月，有一晚收工返舖頭幫手，阿貴話嗰朝有個衞生幫嚟過查牌，跟住話我哋觸犯衛生條例，要傳我哋公司上庭。吓？乜咁大鑊要上法庭！阿貴重話個幫辦臨走時話要搵個代表，帶埋公司授權信，早啲到庭應訊，如果唔出席嘅話，分分鐘俾法庭通緝！嘩!好大件事喎！我同阿貴講，唔駛坐監啩？阿貴話問過森記，無牌剩係罰錢嘅啫，定啲嚟！

好快趣去到上庭嗰一日，我同阿貴整定份公司授權信，睇清楚張傳票，應訊時間係早上10點半鐘，地點係粉嶺法庭4號庭。我預早攞咗假，嗰朝我哋叫阿鐘同江師傅睇檔，我哋就上庭應訊。前人講得好啱，所謂生不入官門，死不入地嶽。我哋兩個咁大個仔第一次上法庭，我話唔驚就真係呃你。

我哋去到4號庭，見到門口有好多人出出入入，時間剛剛好，10點15分，我哋兩個戰戰競競咁進入法庭，原來入庭嘅時候要鞠躬 。個庭幾乎坐滿被告人，我哋剛搵到位坐低，就聽到個法官問被告人：你認唔認帶咗3 隻烏蠅入境？

被告人係個中年男人，佢同法官講：我承認！依家罰你9千蚊，即每隻罰3千！吓？呢個官有冇搞錯？入境嘅時候點會留意有冇烏蠅黐喺自己件衫上面啫？如果一吓唔好彩，黐咗唔止3隻，咁咪好大鑊？真係離晒譜喎！你話啲食物裡面有烏蠅要罰都講得過去，但喺黐喺件衫度跟埋入境要罰，就都幾寃枉！呢啲係乜鬼法例呀！咁我哋單畸士照睇唔會輕得去邊？呢次真係唔走佬都唔得！

個官跟住問嗰被告人有冇其他野想補充？個男人話:法官大人,我哋啲小市民好多時唔知邊啲合法同邊啲唔合法？咁咪對我哋好唔公道！

正癈話!烏蠅都唔識分?我心諗。跟住個官喺枱側邊拎咗一張彩色嘅POSTER出嚟，上面印咗十幾種動物同飛禽，列明受保護嘅動物同禽鳥，未經許可帶入境，會遭受檢控。法官指住一隻黑鷹咁話：你唔須要識佢哋，只要對吓個樣就知道乜野可以帶，乜野唔可以帶，嗱！呢種烏鷹係受保護鳥類，未經授權攜帶入境就觸犯法例，明唔明白！吓？原來自己擺緊個大烏龍,攪錯咗添！法庭審緊嘅係《烏鷹》

而唔係《烏蠅》！

雖然重未輪到審我哋單畸屎，不過聽吓審案都幾過癮。下一個被告係被控亂丟垃圾，我心諗應該無得拗啩。點知呢位大叔同個官講：我無亂揼垃圾，我只不過將個汽水罐擺咗喺欄杆上面，所以唔算揼垃圾！但係法官話：欄杆唔係放置垃圾嘅適當地方，你對於控罪毫無悔意，依家罰多你100蚊堂費，總共450蚊，如果你唔認罪，我會將案件押後排放期再審，你認唔認罪？大叔俾法官教訓一輪,死死地氣咁話:認罪。

跟住輪到審交通案件,被告係個後生仔，佢被控揸車《咳雙白線》。法官問佢認唔認罪，佢話唔認，因為佢感覺前面架車好似想死火，所以被廹超越嗰架車。官問：咁嗰架車最後有無死火呀？後生仔答：我爬咗佢頭，唔係好清楚，可能之後死咗火都唔定。咁你即係唔認罪喇？法官話：我依家將你件案押後到8月11號審訊。

我個心諗,低你死!唔遵守交通標誌重死撐!隨後突然聽到書記嗌出一個熟識嘅名稱：廣達燒臘！吓?乜咁快輪到我單畸屎!我即刻起身答：到！有無帶公司授權書？有！我跟住拎出去俾個書記再轉俾法官睇。個檢控官話告我哋無牌經營熟食檔。法官問我哋認唔認罪，我就解釋攞熟食牌係好困難，個法官問：咁你即係唔認罪囉喎！我連忙否認，跟住大聲話：法官大人，我認罪,請求從輕發落！法官跟住判罰款1千元。好彩唔係太貴啫！法官跟住話：如果再犯，會重判！快啲申請番個牌喇！有頭髮邊個想做癩痢？鬼唔知阿媽係女人咩！不過，我揞住良心答：知道喇法官大人。

上完庭一身鬆晒，同阿貴一路食飯一路講番間燒臘舖，覺得檔生意真係前途似《咁》，既無前景又無近景！呢幾個月連皮費都搵唔夠，重要每個月倒貼幾千蚊添！我同阿貴講，一日最衰都係嗰個福頭，如果唔係佢，我哋唔駛今日咁折墮！阿貴話江師傅都同佢講過，話我哋呢檔野好難做，人流太少。如果唔請伙記，自己做番，仲可以捱番一年半載。佢見到我哋依家咁嘅環境,都唔好意思再做落去。我同阿貴講，睇落《源》就無得開，唯有節流，一於炒咗阿鐘，以後由你担大旗做企檔師傅。

炒咗阿鐘之後，皮費輕咗，但生意依然無乜起色。所謂屋漏更兼逢夜雨，有一朝我好似平時咁返燒臘舖幫手，去到閣樓正想將吹乾咗嘅鴨拎去燒嘅時候，發覺有部份鴨嘅表皮，俾野咬到溶溶爛爛，數一數，有成6到7隻，我即刻講俾江師傅聽，佢睇完之後話係啲老鼠嘅傑作。


老鼠？係真唔係呀?啲鴨用條幼繩掛起晒，照計隻老鼠咁肥，無乜可能可以沿住條咁幼嘅繩，爬上爬落隻鴨度噃？我半信半疑，師傅話唔信你搵晚伏吓佢哋喇！

到咗第二晚收舖之後，我一於同阿貴匿埋喺閣樓度，通宵吼吓係咪有老鼠作反。雖然己經凌晨12點幾，但閣樓仍然充滿陣陣熱氣，我哋冇開燈，屏息以待，我揸住棍，準備同啲老鼠搏過，替啲鴨報仇！不過周圍又焗又熱，都幾辛苦。等咗成半個鐘都唔見有乜動靜，我望吓阿貴，佢嘅眼神話俾我知，千祈唔好發出任何聲音，以免功虧一簣。

如是者又等咗半粒鐘，我開始覺得眼瞓，就喺呢個時候，我聽到有啲吱吱吱喳喳嘅聲音，成個人醒晒，望吓阿貴，嘩！乜野人嚟架，見到佢仲係金睛火眼，望實啲鴨。我開始有啲緊張，揸緊棍，就喺嗰個時候，喺黑暗之中見到幾點紅光，沿住條繩一路爬埋啲鴨度，喺微弱嘅光線之下，嚇然見到有成隊老鼠，約莫5至6隻，喺條繩上高爬行。

阿貴向我示意，一齊撲上去抽啲老鼠，我將呢幾個月屈埋屈埋嘅怨氣,用盡九牛二虎之力,一棍向其中一隻肥老鼠毆落去，佢應聲撻咗落地，七孔流血。其餘老鼠發覺被伏擊，即時雞飛《鼠》走。

有兩隻慌不擇路，竟然走咗入厠所，阿貴同我即刻衝入去，跟住關埋棟門，然後開燈，作困獸鬥，舊式唐樓嘅厠所幾大吓，阿貴衝入厠所嘅時候，連棍都跌埋。佢隨手住個膠袋套咗喺隻手度，就喺厠所面狂追隻老鼠，嚇到隻老鼠亂鬼咁跳,重彈到成3，4呎高添，我都被佢嚇親，幾驚佢跳上我個身度。阿貴真係好野，趁住隻老鼠再彈高嘅時候，一手用將隻老鼠抓住，監生將佢《練》死。跟住佢再追另外嗰隻。嗰隻老鼠眼見同伴遭逢不幸，更加驚慄，亂衝亂撞，阿貴不斷咁追，點知一吓唔小心，成個踎厠踩爛咗，隻老鼠就喺個缺口度走甩咗，算佢命大！

經過呢次教訓，阿貴搵咗幾個老鼠籠番嚟，一於要班老鼠《鴨》債血償，結果晚晚都發市，好過我哋檔生意。

最近次次都買剩野，蝕到阿媽都唔認得！相融約莫一個月，又收到傳票上庭，起初以為罰錢搞掂，點知呢次除咗罰錢之外，主控向法庭申請多一項禁制令。我哋返去同江師傅講，佢話出咗禁制令就唔可以再開舖，佢都打算同我哋講，佢會搵過份新工，而我哋呢間舖周圍嘅環境，唔適宜做燒臘舖。就算江師傅唔講，我都做到無晒癮，反而知道將會執笠嘅時候，我同阿貴覺得一身鬆晒，嗰晚走過去華記擦咗餐勁嘅，跟住《光榮結業》！

雖然我哋蝕咗有限錢，不過就嘥咗好多時間，作為人生嘅一種體驗，有啲朋友安慰我哋，話呢啲經歷，用錢都未必買得到！呢種講法，就真係見仁見智！估唔到喺幾十年之後，嗰次嘅經歷竟成為我呢次網誌嘅主題，咁係咪真係值得呢？你哋話喇！

(完)