電話

778084，唔好會錯意，呢個唔係我嘅銀行提款咭密碼，不過咁啱你係用同一組號碼嘅話，咁就真係唔好意思，多多見諒。查實呢個係我第一個電話號碼嚟嘅!

我細個嘅年代，啲書友仔都係住喺附近，如果我哋想一齊去旅行或者去玩，大家三口六面約定就得架喇。到小學畢業後，勞燕紛飛，升學嘅升學，做野嘅做野，部份同學搬咗出九龍同埋香港住, 無以前咁易見到面，唯一嘅聯絡方法就係寫信



或者直接去屋企搵佢哋。

喂！老友，打電話咪得囉！你可能會咁講。唉！你有所不知喇！嗰個年代唔係家家戶戶都有電話，就算想安裝電話都要睇吓你嗰區有冇電話線。我住喺新界，屬於偏遠地方。我曾經問過電話公司關於安裝電話嘅申請，個職員咁回覆我：電話線未鋪到，唔好意思，想較電話呀？等吓先喇！

嗰陣時屋企養咗幾隻雞同埋白鴿，我突然間諗起飛鴿傳書，寫張字條，綁住喺白鴿隻腳度，跟住命令佢飛去目的地，你話幾咁方便呢！我一路諗一路望住隻白鴿。點知喺嗰個時候，見到隻白鴿側起個頭，碌大隻眼望住我，仲不時發出咕咕聲嘅聲音，好似同我講：喂!有冇搞錯呀你? 唔係派信呢味野都要我做埋啩? 當我係信鴿咩！我超返隻白鴿轉頭,跟住同佢講：諗吓都唔得咩！咁招積，遲啲劏咗你！

如果屋企無電話嘅話 ，想打電話就要去公眾電話亭。當時無電話咭咁方便，打電話要入碎銀，然後撥號碼。如果電話接唔通嘅話，啲錢會退番俾你。不過踫啱個電話神神地，咁你就唔好彩囉！佢唔識將啲錢退番出嚟，入一次吞一次，結果俾人當沙包咁打，




甚至連聽筒都扯甩埋。所以你未入去個電話亭之前都唔好開心住，因為個電話分分鐘連個聽筒都無埋。

我哋細個嘅時候可以用精歸咗嚟形容，乜野叫精歸呢？就係利用一啲小聰明去搵著數。我個死黨問我識唔識打電話唔駛俾錢? 我話乜有咁筍嘅野咩！唔識喎！佢帶我去咗附近嘅公眾電話亭，跟住搔俾我睇個電話聽筒，係<浪>咗喺一枝鐵嘅椏义上邊，佢話只要連續不停咁輕輕力按動條鐵义，就可以撥通電話架喇。咦？咁神奇？佢話：譬如我想打778084呢個電話，首先我要連續輕按條义7次，咁就成功打咗第1個號碼；稍停一下，再連續輕按條义7次，咁就打咗第2個號碼，如此類推，就可以撥通電話而唔駛俾錢。吓？遇啱0字點撥喎？哦！好簡單嘅啫，用番搞盤撥番0字咁就得架喇！由於唔駛錢，我哋一得閒就入去電話亭玩電話。

到我讀初中嘅時候，電話線終於鋪到入村，我就拿拿聲申請較番個電話。嗰陣時香港得一間電話公司，張表格上面有分商業同埋住宅兩種，一般唔係做生意都屬於住宅電話。而本地同埋長途嘅收費係唔同嘅，本地就俾月費，但長途就因不同地方有不同收費。

我大哥移居加拿大，我記得打電話去加拿大要13蚊一分鐘，我嗰陣時都係千零蚊一個月，如果同大佬傾10分鐘就要130蚊，認真脷。所以每次打電話之前，都要做定一啲準備工夫。首先要將講話嘅內容用張紙寫低，然後再睇吓可唔可以刪減啲無謂嘅字眼。完成之後，開始練習，直至講到流利為止，務求用最短嘅時間將要講嘅野講晒出嚟。啲收費只對電話公司有利，何解？因為收費以每分鐘計，就算你打咗10秒都當1分鐘，所以時間掌握得好，就可以慳番唔少！

嗰陣時電話公司將香港島，九龍同埋新界分為三個區域，如果喺新界打去九龍，要喺打之前加多個3字；打去香港加個5字；倒返轉頭，如果喺香港島同埋九龍打返新界，就要撥個0字先。啲人好多時唔記得自己身處打電話嘅區域，將字頭撥錯咗，結果打成日都唔通，以為電話壞咗，查實自已唔記得撥個區域字號。

早期嘅電話得6個號碼,之後愈嚟愈多用戶,唔夠號碼俾新客戶,電話公司就加多一個數字變成7個。當時用戶數目增加迅速,可快趣又飽和,電話公司唯有再加多一個數目字,變成8個。但同時有大嘅改革,再無分香港九龍新界區,話之你喺邊個地區,剩係撥嗰8個數字嘅電話號碼就可以接通架喇!嗰陣時電話號碼頭嘅數目字代表地區,好似元朗區就7字頭,沙田區就6字頭.電話號碼唔可以由一區搬去另一區.例如我住元朗區嘅,如果搬去大埔,咁就要用過另一個新嘅電話號碼。
喂!大佬呀!我個電話號碼好靚個喎,加上我啲朋友都熟晒呢個號碼,有無其他折衝方法用番舊號碼呢? 有!咪唔好搬屋囉!

嗰陣時較咗電話真係好威，無電話嘅隔離鄰舍間中會過嚟借電話。以前啲全部係攪盤電話，即係要用手撥嘅，得一千零一種顏色：黑色。過咗十年左右, 開始有其他顏色出現，之後再轉為音頻電話，而撥號亦改為按扭。

街上有啲商舖，為咗方便市民，將個電話擺喺當眼嘅位置，不過就寫明打電話唔好超過3分鐘，否則面斥不雅。

之後有第一代嘅手提電話，叫大哥大，成個水壺咁大個。一般人無能力購買，通常係一啲社團大佬先至有資格用，喺講數嘅時候棟喺枱上面，重可以作為武器用添！你話幾咁威喇！其後手提電話嘅晒屎無咁大，不過月費都唔平，2-300分鐘要400蚊一個月。如果你用手電煲粥嘅話，真係幾和味，我指嘅係找數嘅時候。

自從手電普及化之後，月費大幅度回落。依家差唔多人人都有部手機，有啲重唔只一部添！但有啲野我到依家都重係好明？以前啲人用書信嚟溝通，自從有咗電話之後，我哋梗係打電話喇,唔通重咁居嘥時間寫信同寄信咩!但依家有好多人鍾意返番轉頭，選擇以短訊嚟溝通，人嘅行為就係咁得意架喇！無嗰陣時就渴望得到，當擁有嘅時候又鐘意返番轉頭。

 (完)