電話推銷

禽晚約莫8點鐘左右，個手機突然响起。我望吓來電顯示，又係2字頭嘅號碼，通常都係叫你借錢嗰一類！我無理佢，通常呢啲電話响大約一分鐘左右就會自動收線，但呢個電話足足响咗成分半鐘都唔捨得收線，我感到奇怪？在好奇心驅使下，接聽咗呢個電話。

「請問邊位？」

「請問你係咪X先生呀？我係乜乜乜公司嘅鍾生呀！」

「邊位鍾生呀？」

「你唔記得咗我咯咩？幾個月前曾經同你傾過電話嗰個呢！」

「哦！可能年紀大，記性唔好，無乜印象！」

「哦！你貴人事忙啫！」

「唔好講咁多，你搵我有乜事？」

「我之前咪介紹你投資買賣黃金嘅？依家啲金真係好低買，係入貨好時機！」

「你講開黃金，我有番少少印象！我記得你响二年前曾經叫我買金個喎？你當日都話啲金價好低，係入巿良機！點知之後啲金就一路係咁跌！好彩我無聽你點！」

「唉吔X生，你可能記錯咗呀？我嗰次無叫你買金，可能之後有同事叫你買啫！」

「吓？我記錯？如果你打電話俾我，又唔係叫我買金，咁打俾我做乜？」

「………(停頓片刻，無詞以對，即轉話題)…呢次你大可放心！你有無聽過路透社？」

「我話未聽過就係呃你！咁同買金有乜關係？」

「梗係有關係喇！因為關於黃金嘅需求，路透社有第一手資料！我間公司俾咗成四十幾萬買料架！」

「咁咪即係賄賂？」

「唔算係！我哋公司只不過係買個service啫!我哋收到最新消息，瑞士會喺年底大量買金，到時金價就會上漲，所以依家入貨就係最好時機！」

「我依家斗零都唔駛俾,你就話晒我知就呢個內幕消息,咁你公司咪蠢咗，使咁多錢買料？」

「…(無聲出)……」

「咁即係搵你公司買金，就一定贃硬,唔會蝕本咯喎！」我繼續講。

「咁又唔係一定！」

「算你坦白，我覺投資黃金買賣，同賭搏無乜分別，有一定風險！你話係唔係喇?」

「唔……….但我公司有好多資深投資分析員，佢哋二十四小時睇住個巿，好少輸架！前年有個物流公司老闆，佢搵我哋公司幫佢投資黃金，結果贃咗成百萬！」

「咁呢個老闆都幾特別，佢做開物流，所謂唔熟唔做，就算發展，都應該向物流方面，好少唔會做一啲自己唔熟識嘅投資！」

「有乜出奇啫?佢想搵多啲快錢嘛!佢重話贃多啲錢,儲夠就俾個仔買 樓！錢無人會嫌多嘅！」

「你呢舖話法要戒喇！做人要知足常樂，錢係搵唔晒嘅! 夠駛就算架喇,多咗唔帶得入棺材嘅！我當然明白你嘅立場，如果遊說到我幫襯，你會有佣金收嘛！日後買賣愈多，你嘅收入會愈多！你話我講得啱唔啱喇？」

「係！我哋係靠佣金收入，但公司規定唔可以立亂同客人利用一買一賣嚟贃取佣金嘅！」

「公司規定還公司規定, 我唔信你有錢唔搵喇! 老老實實！你哋呢類投資公司，十居其九都係呃呃騙騙！一提起倫敦金三個字，已經俾人一個唔好印象！好似我呢類做公職嘅，有退休金，又有醫療保障，我駛乜傷腦筋冒投資風險? 所以你好難說服到我哋呢類人幫襯。我係你就會將公務員列入黑名單，因為公務員又孤寒又怕死, 你向我哋推銷,真係嘥你時間架！」

「哦！都無所謂，大家咪當做個朋友囉！」佢無可奈何之下，唯有死撐！

(我心諗,三唔識七,點解要識你呢種人做朋友?)

「好喇，鍾生，你話嗰位物流老細透過你哋投資黃金賺過百萬,有嬴亦有輸，你剛才話過唔係嬴梗嘅，咁有無一啲投資輸到要跳樓嘅個案呢?」

「…(無詞以對)……」

「算喇!你第日諗到先至答我都未遲！我依家要食飯，唔得閒同你講落去！」

我講完之後即收線，呢條友算唔好彩，無端端俾我教訓咗一餐，怕且以後都唔敢再打電話嚟煩我啩？