佔中? 我撐硬!

我姓陳名大文，我曾經係一個叱吒風雲嘅人物，因為好多衙門嘅宣傳海報，都採用我嘅名字！

我係地道嘅三無人士，租住劏房，上個月租約到期，包租婆話要加租，由4K半加到5K，我問包租婆可唔可以通融一下，涷結一年租金？點知包租婆彈咗句出嚟：「依家乜都加，我通融你，咁邊個通融我呀？」大家萍水相逢，為乜要通融我？包租婆咁講不無道理，有錢唔贃到盡，分分鐘俾雷公劈個喎！

無計，唯有到處岳吓，睇吓有無平啲嘅單位出租，最後先至知道我住嘅劏房租金，係全港最經濟，莫非天亡我也？我之前响九龍住，為咗慳錢，已經搬到無雷公咁遠嘅屯門！真係無得再搬咯喎，莫非真係要搬入深圳？

左計右計，每個月得嗰雞碎咁多，真係好難唧多五舊水出嚟！悶悶地，唯有行去商場睇吓電視新聞，唉！又係佔中，又係黃之瘋！又係佔中三子！睇睇吓......咦？突然間靈光一閃，唔通真係船到橋頭自然直？呢次俾我諗到條絕世好簥！

我同包租婆攤牌，話未到期都搬，益吓佢！隨即收拾細軟，哈哈!查實幾件衫同幾條褲，已經係我所有嘅細軟。所以唔駛幾分鐘，我就執拾妥當，開始上路。我跟住買咗個營，有理無理，直踩出金鐘。一個鐘頭之後，我已經到達龍和道天橋，場面噓冚，四圍都係營幕。我揀番個單邊位置，Set好個營，喺營幕表面，黐番條黃絲帶，加多幾條類似符咒嘅「支持真普選」黃紙，咁就大功告成！一於加入佔中爭取真普選行列！所以話：窮則變,變則通!機會永遠留俾食腦嘅人!

光陰荏苒，屈指一數，我住咗喺度已經有成大半個月，租金加埋車費，計計埋埋都慳到4，5千蚊架！我粗略計計，一個月慳返大大話話6K有多，住得一年半載，咪可以儲到8皮幾野！諗落都開心！

依家住咗响巿區，返工慳番成粒幾鐘時間，所以老闆叫我OT，我唔會托手踭！自從搬咗去金鐘之後，同老闆嘅關係都改善咗！佔中嘅好處，即時顯現！而我嘅生活，同以前比較有天壤之別！以往收工，我通常會匿埋响屋企上網打機，不問世事，成為宅男中的宅男！但依家生活就變得多彩多姿，得閒喺佔領區睇下人演講；或者去對峙區，睇吓班營友點樣衝擊同挑釁班差佬，都幾過癮架！

諗落佔中既可以儲到錢，又可以爭取崇洋高嘅普世價值，站立在道德高地，真係一舉兩得！所以我覺得反對佔中嘅人士，可以用Myopia,目光短淺嚟形容！

飲水思源，我之有今日，全賴有佔中三子，所以我借呢度少少嘅篇幅，鄭重向戴教授，陳教授同埋朱牧師表達最高謝意，佢哋放心離開，一路好走，呢度有我撐住，唔駛擔心！

今天夜裡，秋涼如水，我坐在營前，看見一輪明月掛金鐘！我突然詩興大發，李白上身，立即動筆，在營幕上，寫上以下數句，因為讀得書少，有點兒狗屁不通，各位網友，多多包涵，請勿見笑！

「紥營金鐘一角，心系旺角V殺！」

「大文無三子，無以有今日；三子無大文，難以續餘威！」