非常任務

對一般打工仔而言，如果老闆俾個任務你做，就算完成唔到，後果唔會太嚴重，頂多係少減升級機會！但喺某啲情況之下，如果唔能夠完成任務嘅話，分分鐘人頭落地!最極端嘅一類，就係無論你完成與否？結果都一樣，壯烈犧牲！人肉炸彈就係一個極佳例子！

雖則話牛唔飲水唔撳得牛頭低，你唔加入IS，又遠離塔利班，照道理你接到嘅任務，危險極有限！但假如你生長喺北韓嘅話，又唔同咁講法囉！

上個月喺南韓非軍事區，有兩位南韓士兵在巡邏時被地雷炸死，南韓指摘北韓在非軍事區埋地雷及開火，要求北韓道歉並承諾不再作出挑釁。北韓否認指控，南韓政府一怒之下，對北韓恢復中斷多年的反平壤擴音廣播。

肥仔恩為咗顯示強勢領導，警告南韓及設下期限，如不在限期前停止廣播，北韓將會以武力還擊。但南韓總統朴槿惠睇穿肥仔底牌，知道佢根本唔夠軍力，只不過响度靠嚇。論武器，論靠山，遠遠及不上南韓！故此，朴槿惠喺限期屆滿後繼續廣播，肥仔果然不敢輕舉妄動，但騎虎難下，肥仔深知絕對不能在國民面前示弱，唯有擺出強硬姿態,出動五十艘潛艇佈防，暗地裡卻安排對話，務求達成協議。

肥仔委派軍方總政治局長黃炳誓同勞動黨對韓秘書兼統一宣傳部長金養建作為談判代表，據小道消息透露，肥仔下達命令，是次會談，只許成功，不許失敗！接到這個非常任務，兩位代表話唔驚就假喇！因為先前已經有案例，如果肥仔唔滿意嘅話，連姐夫都可以痛下殺手；而人民武力部長玄永哲，喺開會時太攰頂唔順恰咗眼瞓，最後俾肥仔用高射炮將佢處死。前車可鑑，呢兩位代表，接下呢個名副其實嘅死亡任務，真係有得震無得瞓架！

查實朴槿惠都唔想同肥仔開戰，所以條件十分簡單，只要平壤對埋設地雷一事作出道歉，加上承諾不再作出挑釁，南韓就會即時停止於邊境用擴音器作反擊平壤廣播。

作為平壤代表，確實唔易做！如果道歉嘅話，就算南韓停止廣播，佢哋返到平壤，肥仔都可能以喪權辱國罪將佢哋處死！但如果唔道歉嘅話，最後談判告吹，佢哋兩個亦難逃一死，呢次可謂進退兩難！我估呢兩個代表，會向南韓談判代表打溫情牌，講出佢哋嘅處境，希望南韓體諒！或者將一啲重要軍事情報向對方透露，以換取達成協議，結果南韓代表最後接納平壤以「遺憾」取代「道歉」二字。

平壤封鎖新聞，在國內可能有另一版本，國民未必知道有談判呢回事，還以為南韓喺平壤嘅武力威攝之下，乖乖就範。肥仔藉住呢次事件，將自己嘅威望又再推高一層！故此，有理由相信肥仔日後仍會不斷向南韓作出挑釁，再從中建立威信。這類「非常任務」將會綠續有來，平壤代表唯有自求多福！