阿Q精神

反對撤消制裁

公義

公義是客觀及被普遍接納的一種道德標準，沒分國界及民族。人類愈文明，社會愈進步，公義理應較易彰顯，但實際情況卻背道而馳。

強國近幾十年發生很多事情，但處理方式強差人意，給人一種沒有公義的印象。事件多不勝數，例如李旺陽事件，一個被囚禁了二十一年的民運人士，在囚禁期間，被施以酷刑，結果導致關節硬死，肌肉萎縮，出獄後已經變成雙目失明的傷殘人士。但最後竟被發現在醫院內，懸樑自盡！

他最後被裁定為自殺！這個結論，全無說服力，只怨他生於一個沒有公義的國家，他的案件只能夠在冤案系列中，再添一宗！

在先進的民主國家中，公義得到彰顯，我相信沒有人會質疑。不過，世事難料！以下事件，發生在數年前的美國阿肯色洲，一個21歲黑人青年，因涉嫌藏有大麻被補，之後竟在警車後座離奇自殺身亡！令人感到奇怪的是，他曾經被警員搜身二次，又被手銬將雙手反鎖背後，他的槍從何而來，如何拔槍，加上他慣用左手，但竟右太陽穴中槍。如果該青年有自殺意圖，為什麼取難不取易？不在扣上手銬前自殺？最令人費解的是全個過程都有錄影，唯獨是最關鍵的開槍自殺一刻的影片卻缺失了！

看寓言故事，從中汲取教訓，可收明哲保身之效！上述的兩件個案，教訓一般平民百姓，無論身處任何地方，與官府抗爭都沒有好下場！公義，已經逐漸變成偖侈品，不是一般平民百姓所能享有！

新九組之風雲再現

相信大家應該記得末代洋總督肥彭，



喺佢任內第一份施政報告中，提出政改方案，建議1995年嘅最後一屆香港立法局選舉，大幅增加直選議席，又新增九個功能組別，叫《新九組》。衙門有內部通告，招請現役衙差，兼職游說小企僱主，登記成為選民。

呢份兼職差事要做兩星期，申請人必須自己攞假去做，雖然我對做兼職興趣唔大，但收咗警告信之後，唔係好想對住大主管，重有嗰啲痺鄙小人，所以入紙申請。人同此心，心同此理，大主管亦覺得我乞佢憎，唔想對住我，即時推薦我嘅申請。

嗰份工作設有幾個工作地區，我揀最近屋企嘅屯門區。喺正常情況下，我嘅申請肯定瓜多過菜，部門九成九唔放人，因為我要負責睇實下屬工作，加上人手掹掹緊，我放咗假之後，要喺其他部門借調人手過嚟，暫補番我嘅位置。但呢次上頭好快趣批準我嘅申請，主要由於我先前單CASE，令到上層頭都痛埋，我呢啲《麻煩友》，就算離開一分鐘，對佢哋嚟講都係好消息。

話咁快，我就開始兼職生涯。嗰朝早我揸住封信，到屯門某衙門報到。



我去到目的地，我跟住箭咀指示，轉咗個彎，見到有位小姐做接待，



佢收咗我封信同核對過我嘅資料後，叫我入一間房坐低，話遲啲會有主任同我講解，點樣展開工作。

來自唔同衙門嘅衙差，綠續抵達，九點十五分左右，所有兼職 衙差都已經到齊，我似乎係年紀最大嘅一個。講起上嚟先至知道，原來各個衙門都人手緊絀，佢哋出嚟做兼職都唔係咁易。

我哋雖然嚟自唔同部門，但大家都想知道對方做緊啲乜工作？老闆好唔好？工作辛唔辛苦？啲同事夾唔夾等等，總之就有好多共通話題。講吓講吓，不經不覺，到咗差唔多10點。我有少少奇怪，點解重未有主任入嚟講解我哋嘅工作呢？

到咗10點15分，終於有位小姐入嚟，佢話主任有啲緊急事去咗開會，要遲少少至有時間入嚟接見我哋！

「吓？」我問嗰位小姐，「乜你哋呢度得一個主任負責我哋工作嘅咩？如果要開會，係咪應該預早安排另一位同事嚟幫佢手呢？」嗰位小姐目無表情咁話唔清楚就離開咗！查實我無乜所謂，話之你無人嚟，我哋咪坐足二個禮拜囉！最緊要到時有糧出！

去到差唔多12點半，終於有位馬主任入嚟，佢同我哋解釋，話佢今朝開咗個緊急會議，同我哋兼職一事有關。大家聽咗，都感到好奇怪！佢跟住講：「我哋搞錯咗！兼職人手已經齊晒，我哋唔再須要額外人手！」大家開始覺得有啲唔對勁，咁即係話我哋呢次嚟做兼職係多此一舉喇！你一言，我一語，議論紛紛！開始有同事鼓躁，情況有啲混亂！

馬主任就話：「唔該靜少少！你哋可唔可以搵個代表發言？」班衙差個個望住我，結果推咗我出嚟做代表,可能喺嗰度，講野最多嗰個係我嘅緣故啩！

我就問馬主任，「你嘅意思係咪已經無工作俾我哋做呢？」佢答話係，但完全無就佢哋嘅失誤作出道歉。我明白，嚟做兼職嘅都係一啲低級職員，佢哋呢啲高官，點會將我哋呢班small potato

放在眼內！我就問佢：「咁你哋開完會之後,有啲乜野決定？」

佢就話：「我哋今朝開會前，盡量睇吓其他地區需唔需要人手,但到散會前重未有回覆，因此我哋都無辦法幫你哋！我知道你哋都已經攞晒假期，查實你哋可以趁機報團去旅行!」

我跟住回應：「如果放假旅行，我哋會預先選擇目的地及作出安排，依家得咁少時間，邊有可能報團成行? 你咁嘅提議，完全係不可行!」

佢回應話：「我相信你哋平日工作都好辛苦,或者趁呢段時間，放假休息一下，留喺屋企充一充電都幾好架，我都唔知幾想有咁嘅機會！」我心諗，你唔駛喺度講埋啲風涼說話！

我跟住問佢：「如果安排唔到工作嘅話,我哋今朝嚟咗呢度，會唔會有工資呢？」

馬主任話：「我哋啲撥款係一次過申請，唔可以撥出部份俾你哋作為今朝嘅工資！」

我就話：「咁你哋今朝開會，有無考慮過，你哋嘅過失要由我哋承担，公唔公道呢？」

馬主任帶有晦氣咁話：「呢啲係意外，無人希望會發生！」

佢跟住講：「你哋依家可以離開！至於是否休假定復工？自己決定！」

我話：「馬主任，我剛剛選出做佢哋代表，完全無機會收集同反映佢哋嘅意見，所以我要求食完飯之後，繼續返嚟商討！」佢不置可否，面燶燶咁走咗！

我同班同事講， 我哋呢個時刻最緊要團結，千祈唔好變成一盤散沙！大家出去食飯，提前15分鍾返嚟，再商量下一步點做！

食完飯之後,我哋返番會議室。我將收集到嘅意見分成幾類：

1.堅持共同進退同以及爭取恢復工作嘅佔大部份。

2.唔想繼續抗爭嘅有兩位同事，佢哋希望我同主任講，俾番一張memo佢哋返寫字樓銷假。

3．另一位同事話唔想搞大件事，無論爭唔爭取到今日嘅薪酬，佢明天都唔會返嚟，好似馬主任咁講，會繼續休假。

我哋喺會議室度傾傾講講，唔經唔覺又到4點30分，就喺呢個時候，有另一位小姐出現，佢自我介紹叫Irene，係馬主任嘅上司。佢首先為佢哋嘅失誤致歉，



呢幅插圖誇張咗少少,查實佢一滴眼淚都無! 佢話會好樂意同埋盡可能幫助我哋！可能食飯前馬主任同佢單咗聲，所以態度都唔同咗！

佢跟住話有個好消息通知我哋，喺觀塘區有九個空缺，如果有同事願意去嘅話，請立即舉手，先到先得！

佢都未講完，就有成十幾隻手遞起咗！人真係好自私，之前話好共同進退，但面對自身利益，竟然有同事見利忘義！我當時嘅面色唔多好睇！

Irene 都算順應《民》意，向兩位同事發出便箋，証明由於佢哋疏忽，錯誤發出聘用信，以便佢哋可以回部門銷假。但當日嘅薪酬就無能為力。最後通知我哋明天無須回去，講完之後就離開咗。

喺嗰個時候，大家面面相覷，不知何去何從！



曾舉手話越區工作都殺嘅落選衙差，佢哋面露尷尬，喺度不斷解釋，我向佢哋講：「算喇，過咗去嘅唔好再提！喺整件事件上，我哋係受害者！佢哋嘅疏忽，無理由要我哋負責。我今晚打算草擬一封信，俾呢個衙門首長，要求復職！如果你哋唔想放棄嘅話，明天繼續返番嚟呢度齊齊爭取！我會盡力去做，但會唔會成功呢? 我真係唔敢担保! 如果有同事唔想返嚟嘅話,我亦唔會勉強,你哋可以好似馬主任咁講，去旅行或者當攞假休息。不過我想知道，在座各位同事，有幾多位明早會繼續返嚟？」結果剩番嘅二十八位同事，齊齊表示會繼續爭取。咁都好啲，起碼都叫人強馬壯！

嗰晚一返到屋企，我立即用電腦打咗封信，重記得嗰陣時用緊部爛鬼80286，24針打印機，




部打印機由於用得少，啲色帶有部份乾咗，印出嚟嘅字,一啲有色,一啲無色,但由於無時間買色帶, 最後唯有用手填返啲色上去，核突啲都唔理喇！

我主要陳述由於人手緊絀,部門放我哋出嚟做兼職要作出好多安排同調動。我哋喺部門嘅空缺，已經安排好人手填補，所有安排已獲得批準及撥款！如果我哋返寫字樓復職嘅話，一定會令到部門行政混亂！對承諾替位嘅同事唔公道。另一方面，我哋嚟呢度兼職，除咗金錢之外，亦想參與由政府推出嘅政策，對社會更有歸屬感等等！

話有歸屬感明顯係老作,我心裡面諗嘅係另一回事!



我參與嘅目的,只係想離開寫字樓靜一靜, 其他同事,我相信都係為咗搵多個錢居多!



幾經辛苦,終於攪掂好封信!完成之後舒一口氣,起碼可以向其他同事交代!做呢啲咁嘅濕濟代表,以後都係唔好搞我!

話時話,有封信揸手,自信心都強好多!好似喺大海中住個水泡咁,瞓都瞓得安樂啲!早抖喇,各位網友,你睇我嗰晚瞓得幾甜就知喇!

第二朝我返番去屯門，負責接待個女仔好奇怪，



話上頭已經通知咗佢，我哋唔會再返去！我話我代表其他同事寫咗一封信俾佢部門首長，



希望首長能妥善解決呢個問題！我更加要求嗰位小姐佢幫我哋傳真封信俾佢大老闆！

個女衙差話要打電話上總部請示，結果擾攘咗成30分鐘，最後都借咗部傳真機俾我！當時我哋二十八個衙差已經到齊，我對個女仔講：如果你安排唔到會議室俾我哋，咁我哋唯有企晒喺門口等消息。

人多勢眾果然有阻嚇作用，個接待女仔話我哋咁企喺度,會阻住其他同事出入,跟住立即打電話向上頭請示。

過咗唔夠5分鐘，就出嚟同我哋講，話安排咗另一間房俾我哋等候！如果一早有咁嘅安排，就少減好多拗撬喇！

我哋喺間房度等咗成個上晝，但都無結果，亦無人入嚟同我哋講野 ，究竟等定唔等呢? 大家意見紛紜！有同事問我,話如果今日無消息，聽日究竟嚟唔嚟？我話等埋下晝無消息先至決定！依家1點，夠鐘食飯!



我同所有人講,食完飯之後，要準時返齊嚟，唔好俾人搵藉口話我哋返唔足時間！

大家都好合作，未到兩點已經返齊。我同佢哋講，只要大家堅持同齊心，佢哋會有壓力，我哋一定可以成功爭取！我表面上就死撐，但心裡面諗嘅卻係另一回事，我之前喺部門被定性為《攪屎掍》，嚟到呢度又攪攪震，所謂棒打出頭鳥，



佢哋第一個對付嘅可能係我！不過已經行到呢一步，預咗俾人打殘架喇,唔諗得咁多！

到咗3點鐘左右，有另一位女長官入嚟，佢並無自我介紹，佢話剛收到上層通知，我哋全部明天可以復工，喺番屯門區工作，呢兩日大家都有人工！今日大家可以走得，明天準時返番較早前嘅會議室報到，有個開工前briefing！雖然發言簡短,但內容卻出人意表,大家聽到都好開心！

之前話唔需要人手，但依家無端端又有番晒啲空缺，究竟乜原因呢？佢並沒有解釋，不過,我相信需要咁大量兼職人手, 一定唔會計錯數,可能係程序出錯!即係應該撥款批準咗,先至可以發出聘用信等等;另一方面,如果我哋全部返番去銷假,部門肯定會向佢哋投訴!兩者取其輕,通知我哋復工係最簡單嘅解決方法!不過既然目的已達，我哋亦無謂深究原因！

唔知邊個同事將呢個消息,輾轉傳咗俾較早時到咗九龍區開工嘅同事，佢哋竟然打電話俾我,希望我幫佢哋爭取返番屯門區工作。我都服咗佢哋,重好意思出聲叫我幫手! 當初一齊進退,咪乜事都無囉! 我同佢哋講,唔好意思,喺呢件事裡面,我已經成為眾矢之的,我幫唔到你哋!你哋試吓同番觀塘區主管講,睇吓佢有無辦法幫你哋喇!最後我都見唔到佢哋返番屯門區工作!

呢次事件,可以見到人性灰暗嘅一面,為咗個人利益,可以將承諾置之腦後!最令我感到意外嘅，就係我一心想離開寫字樓冷靜一下，結果事與願違，莫非是天命不可違？我註定要做一個與朝庭對著幹嘅衙差？

(完)

信任及信心

假如你踫見一個陌生人,你會相信他的說話嗎?當有人問你這個問題的時候，你或會猶疑一下，跟住回答，當然不會！但實際上，我們每天在不知不覺中，都信任了一些從不認識的陌生人！而人與人之間的互信，是令到社會產生最大利益的其中一個因素。

我舉個例說，你每天出外午饍，厨子是一個你從來沒有見過的人，但你會相信他煮的食物，你不會懷疑他烹調的食物不清潔！當你乘搭交通公具時，你不會質疑司機的駕駛技術，你相信他能安全送你抵達目的地！當你調派到一個新的工作環境，你的上司及同事，對你來說，都是陌生人，但你不會懷疑他們的說話。以上事件，說明在我們的日常生活中，必需要信任他人，因為我們沒有選擇！

有些時候，我們為了共同利益，會相信一個陌生人。

有一個實驗，每次揀選兩位互不認識人，面對大堆鈔票。他/她們手中有兩個紙板，分別寫上「均分」及「獨佔」。假如雙方選擇「獨佔」的話，大家都不能獲取分文；假如雙方選擇「均分」，大家可以平分枱上的鈔票；假如一方舉「獨佔」，另一方舉「均分」，鈔票會由選擇獨佔的一方取走。由於是街外錢，雙方會盤算一下，只要不貪心，大家都可以取錢離開。結果顯示，九成以上的參賽者都選擇均分！選擇獨佔的佔很少部分，說明大部份人都採用一個穩健的做法，造成雙嬴的局面。

另一個實驗，是在街上，臨時搭建一個櫃位，將一個放滿紙幣的透明膠箱，放在櫃位上，在顯眼地方寫著：歡迎領取！這個實驗，分三種方式進行！

第一種方式，是安排一位穿著西裝，斯文友善的男士，站在膠箱傍，向途人展示笑容，要請他們取走膠箱內的紙幣。不過很多途人，就算停下來，也不敢伸手進膠箱內取錢！因為經驗告訴他/她們，世界上不會有這麼便宜的事，當中可能存有陰謀！

第二種方式，是在膠箱後的背景，貼上印有一雙大眼睛的設計海報。很多途人經過時，都會駐足觀看，跟著左顧右盼，試圖在那海報上的眼睛，尋找那隱藏著的攝錄機。結果大部份人都不敢觸踫那膠箱，只有少數人用極快的速度，取走膠箱內的部份紙幣。

最後一種是將放滿紙幣的膠箱，擺放在櫃位內，沒有人站立，也沒有大眼睛海報做背景！結果所有經過的途人，都伸手入箱內將錢掏空！

第一及第二種實驗，只要在膠箱後加多一個人物或者海報，就會令到途人產生危機感覺；他/她們根據經驗，判斷不取錢是正確的。不過，這一次他/她們錯了，結果白白浪費了一個可以取錢的機會！

而最後的實驗，在甚麼也沒有加插的情況下，人類的危機意識自動鬆懈，直接增強了取錢的信心！

以上實驗，証明在我們的日常生活中，環境可以令我們信心大增或信心盡失，亦核實了富貴險中求的道理！

必要的沉默

警告信

又到講古時間,約莫二十幾年前, 我剛進入呢個官府大門，就有一種莊嚴感覺. 所謂生不入官門,死不入地獄,講得一啲都無錯! 呢個衙門係負責警惡懲奸，將違反法律嘅黎民百姓，繩之於法！一般大眾，深信呢處係一笪彰顯公義嘅地方。

我初嚟報到，睇到明鏡高懸四個大字,都有一種正氣感,以為喺度做事嘅衙差，都正直不柯！原來只係一場美麗的誤會。

呢度有外藉同本地嘅包青天，當然唔少得王朝同馬漢，亦有巡捕。我調去工作嘅衙門，位於新界，只有四個公堂，每天9點半升堂。

每晚或多或少都有罪案發生，當拘捕咗疑犯之後,巡捕會要求佢哋擺低保釋金，等候翌日上公堂審訊。來自唔同地方嘅巡捕，早上會送保釋金嚟，我嘅工作負責點收。除此以外，亦有被告人前來繳交罰款，所以每天早上我都好忙碌！

我喺呢個衙門，好快趣己經做咗一年，喺會計部做事好困身，咁啱其他部門有空缺，我就即時調離會計部。

調任無耐,有一日，二主管同我講，話總務室女衙差梅蘭，會同我部門嘅女衙差菊竹對調。梅蘭喺總務室管士多，包括上公堂替位，即係大老爺助手放假時，梅蘭會出公堂幫手。梅蘭話調離總務室後，上公堂替位應該由菊竹負責。但二主管唔同意，話菊竹太新，缺乏經驗，要佢繼續幫手！梅蘭話對佢唔公道，最後承諾只做三次,之後由匊竹做番。當時我都在場，大家講得清清楚楚，二主管亦無任何異議。

梅蘭轉咗入我部門之後，短短兩個月已經替咗三次公堂，有一朝二主管入嚟搵我，叫梅蘭出公堂幫手。我同佢講，梅蘭已經替咗三次，依家係時候俾菊竹做番佢嘅份內工作！二主管臉露不悅之色，轉向梅蘭，要求佢上庭。梅蘭望望我，我就話：先前已經講得好清楚，如果你唔願意嘅話，可以唔去！二主管面如死灰,好唔高興咁離開。

呢件事原來未完結，過咗大約一個月，有一日，二主管同我講，梅蘭個考勤報告嚟咗，由於佢之前唔合作，我想你配合我，喺呢方面寫死佢！

我估唔到佢噏啲咁戇居嘅說話，所以無打算回應佢，點知佢重問我究竟聽唔聽到佢講嘅說話！我就好悔氣咁話：我覺得佢無問題，會根據事實寫佢個考勤報告!不如咁呀,你配合我,寫好佢個考勤報告呀!我跟住無理佢,繼續做野。佢見到我咁回應,就二話不說，鐵青著臉返番自己個位度。

我以為呢件事已經告一段落, 點知過咗二個禮拜，有一日，有同事突然走埋嚟同我講，話總部有人要見我，叫我即去會議室。佢跟住同我單咗聲，話呢個高層係二主管嘅死黨，叫我小心啲！

我入到會議室，見到一個身裁矮短，其貌不揚,上咗年紀嘅高級官員。


我敲門入內，佢已經攤咗喺張椅上面，態度傲慢。佢並無叫我坐低,就同我講：「我同你二主管好死黨，我識咗佢好耐，你喺呢度做野，要同佢配合，好好合作！」我原先想講整件事出嚟，等佢評評理，但見佢咁嘅態度，我覺得講都無謂，所以無出聲。

佢跟住又講：「你喺第二個部門嚟，或者呢度嘅做野方式，同你以前做開嘅唔同。你嚟到呢個部門，就要絕對服從上司命令！明唔明白？」我全程並無坐低，佢同我講野時亦無望住我，我無表示亦無出聲。佢感覺到無乜癮，稍為停頓，然後講：「你有無問題？如果無嘅話，我今日所講嘅說話就係咁多，記住要同李生好好合作！」呢啲叫警告定示威? 我心諗:「依家大家打衙門工,支緊納稅人錢,你估你真係老細咩!」

呢件事眨吓眼又過咗二個月，喺呢段時間，有一件事發生，大主管利用權力，喺會計部動用咗一啲唔可以動用嘅款項，結果俾人向廉記投訴！我好奇怪，佢唔係貪汚，係盜用公款,屬刑事案件，應該向警署備案先至啱！

過咗唔夠一個月，大主管就俾廉記召咗去飲咖啡，



我先前講過，佢嘅所作所為，同貪汚完全無關，結果廉記並無立案，跟住將調查終結。但佢違規嘅事，就轉介返俾自己衙門跟進。

為咗家醜不外傳，高層竟將呢件嚴重違規嘅刑事案件，淡化處理！最後定性為：「大主管在未經批準下，用私人支票兌換現金使用，違反內部指引，予以遣責！」

呢件事件，與我毫無關係，但竟然有同事向大主管話我去廉記投訴佢，佢一怒之下，向我及其他6個同事發出警告信。但事不機密，有知情同事，不值佢哋所作所為，在兩星期前已經向我哋通風報訊，說大主管手上有7封警告信會派俾我哋，二主管及其中一個下屬為幕後黑手！

我感到奇怪，既然警告信已經準備好，點解大主管遲遲唔發俾我哋呢？

後來先知道原因，大主管心虛,唔夠胆單獨派俾我哋。佢要等埋幕後黑手一齊至夠胆! 嗰個同事諗得幾絕,故意喺呢段時間放假,俾人覺得警告信呢單野唔關事佢事,佢最後選擇喺我哋要回覆限期前一日先至返工,心諗大主管斷估唔會等埋佢返嚟先至派啩? 佢做戲又唔識做全套,一踏入門口就猛咁問,呢兩個禮拜有無事發生? 我相信佢就係去廉署嘅告密者，亦係作警告信嘅主筆。佢嘅做法，既可整瓜大主管，又可除去我這口眼中釘，一舉兩得！

我對呢件事,記憶尤新!喺1995年10月6日朝早約莫9時30分，當日幕後黑手被廹同大主管，齊齊向我及其他6個同事發出警告信，我打開信封，跟住話：「唔係嘛？我今日收信，聽日係最後限期回覆？信上印有兩星期前嘅日子，我想知點解到依家你哋先至俾我？」佢兩個同時講：「一時唔記得咗俾你哋啫！你哋可以要求延期回覆嘅！」你俾遲咗封信我，要我申請延期交答覆，我都係第一次見咁荒謬嘅野！對於佢哋呢啲人,真係講多句都嘥我啖氣!我懶得再問佢哋，收完信後就返番埋自己個位，開始睇警告信內容。

剛坐低，二主管李生就行過嚟，佢側起個身，用拳頭一邊敲枱，一邊同我講 ：「種!乜!野!瓜!得!乜!野!菓！」即係話我唔同佢配合寫死梅蘭,結果今日收警告信喇!佢半年前確診患癌,喺對上幾個月,差唔多隔二星期就要放一次 sick leave.我之前都有啲同情佢,但經過呢幾個月,我對佢完全改觀. 我原本唔打算回應佢嘅說話，但當時真係忍無可忍，深知以下嘅話好有殺傷力,好唔應該講, 但結果我都講咗:「你今日有cancer，呢啲應該係菓！不過，我真係唔知你之前種過啲乜野瓜？」

佢聽完我所講之後，個面由紅變黑，再由黑變瘀，圓睜雙眼望住我，但一句說話都講唔到！我剩係知道佢跟住返自己個位度，坐咗唔夠十分鐘，話唔舒服就走咗。佢跟住再無返工，隔咗二個月,我睇到部門公告,話佢因病離世！以下是發給我的警信,發出日期為1995年9月29日



但給我的日期卻在1995年10月6日，回覆限期為1995年10月7日。

所以我在回覆信特別註明呢個事實。

由於警告信言之無物，兼且指控錯漏百出！上頭命令將所有警告信撤回，如果未回應嘅同事，可以無需回應！但我就乘機喺回信中,有意無意之間,將佢喺會計部攞錢嘅事,重提一次！原來大主管件事，由五短高官搞掂，但頂爺係完全唔知道！所以當頂爺知悉呢件事之後，大表震怒!




即時要大主管提早退休，隨即有位鍾先生嚟接替佢，成為新嘅大主管。

表面上事件好似告一段落，但二主管嘅京官死黨條氣更加唔順，話我攪完一單又一單，一定唔可以留低！所謂東家唔打打西家，我乘機打紙求去其他衙門。我當時收到風，喺呢個衙門核下嘅部門，為咗唔想得失呢個「高官」，分別表態，話情願少減一個衙差都唔會收我！好！非常好！橫掂我都唔想留番喺呢個鬼衙門，走咪走！我已經執好包袱,分分鐘預備鬆人!

但隔咗約莫二個月，我都未收到調職通知,正感到奇怪之際,就被召上京城，人事科主管要見我。我起初以為申請批核咗,重同班同事 say goodbye 添!

我依期到達京城,去到人事科主管間房,一入門口就見到佢黑起塊臉。我未坐低已經俾佢噴到狗血淋頭! 話有乜事應該預先搵佢商量,唔好亂咁寫信,白紙黑字,出咗街掹唔返架!佢重話我呢次嘅做法，將佢哋擺上對立層面咁講，我一頭霧水，唔知佢噏乜？

原來呢件事發生之後，部門首長發覺人事科同班書記眉來眼去，做事有法不依！好似大主管違規單畸屎，由廉署轉介返嚟，居然頂頭大老細完全不知情！真至睇到我封回覆信裡面其中一段（Your misconduct in the accounts office has undoubtedly ruined and destroyed the respectful and honorable image of……）喺追查之下，先至知道整件事。結果一怒之下，將人事部幾個主管撤換，接見我嗰一個都在遣走之列，唔怪得之佢咁慶喇！

佢發洩完之後，好認真咁同我講：「你知唔知你呢單野累到我《戥》返落嚟！老實講，你喺呢個衙門，已經無晒前途,同埋一定俾人玩殘！咪話我唔提醒你，你快啲打紙申請調走！」我話我都知道，佢哋已經放風話玩死我，我個幾月前已經打咗紙求調，乜你重未收到咩？佢話無收過，跟住問我嗰張 Memo，有無透過現任主管？我話有！

人事科主管即時當住我面前打電話俾現任主管鍾先生，問佢有無見過我份申請？



鍾先生回應話,佢啱啱先至發現我份申請攝咗喺 tray底，正想遞上人事科！你哋信唔信會咁簥喇!人事科主管收線後同我講 ：「佢哋有心玩你，連你想走都故意唔俾你走，留番你喺度慢慢玩!我無辦法幫你短 時間內離開，你要喺呢個衙門捱多一段時期，你自己執生喇！」

(完)

生命無常

在3月14日的早上，有位同事在工作期間，突然從椅子滑跌在地上，其他同事見到這樣子，連忙趕往扶她起身，但發覺她的右邊身已經失去知覺，不能郁動，說話也不清楚。一位有急救經驗的同事，知道她可能中風，問她是否一邊身不能移動？如果是的話，就在地上用手敲兩吓，表示明白，幸好當時她仍有反應。

救護車在十分鐘內抵達寫字樓，將同事送往醫院急救。回想她在病發前的一個星月，大家才興高彩烈地吃午飯，想不到那次已經是我們一起吃的最後午餐。

她送往醫院後的三天，一直在深切治療部。有同事到醫院探望她時，看到她處於昏迷狀態！據她的家人透露，由於有血塊進入了腦部，把其中一條血管塞了，結果造成中風。手術後，醫生叫家人作好心理準備，最樂觀的情況是變成植物人。在25日的早上，她的家人來電，說她在接近早上時過身。

我想起較早前的另一位同事，幾年前確診患癌，往後數年，均需服食標靶葯物作治。但農曆年過後不久，他的身體開始轉壞，需要入院治療，在不足一星期內離世。

我又想起二年前，有位朋友辦理離婚手續，但她不懂得填寫表格，剛巧我有位舊同事叫Joyce，她在家事法庭工作，我便找她幫忙，之後我那個朋友遇有不明白的地方，都會找Joyce幫手。

在舊年的十二月，我想起了Joyce，打算約她一起吃飯，順便答謝她的幫忙！但當我致電她找她時，才知道她因病已經超過半年沒有上班，我感到奇怪？想了解她患了什麼病，便找了一個跟她較熟絡的同事，問她知不知道Joyce的情況。同事才告訴我， Joyce在舊年年初，因頭痛入了醫院，其後証實腦內生了一個惡性腫瘤，情況不樂觀，我聽到這個消息後感到很傷感。

話說三年前，我還在天水圍居住的時候，有一天往常乘邨巴上班，突然見到Joyce上車，我覺得奇怪，跟著問她：你在馬灣居住，為什麼會在這裡上車呢？原來她為了供二個女兒往英國留學，被廹將馬灣的住宅賣了套現。為了慳錢，兩夫婦搬進流浮山的村屋居住！

兩年前的一天，有幾位提早退休的同事，約了我和Joyce 到寫字樓對面的六國酒店吃自助午餐，誰料那次已是最後一起吃的午餐。

知道Joyce 因病提早退休的消息後，我和幾位舊同事原打算在上月25日約她吃飯聚聚，但她在前一天突感不適,跟著送進屯門醫院,其後一路昏迷,最後延至昨天晚上不治!這個消息令人沮喪,我感到生命的脆弱及無奈!在此祝願她一路好走,在天國裡享受永恆的快樂!

旅遊警示