颱風荷貝

1979年7月25日，即35年前嘅今日,一個尋常嘅日子，喺關島西南面，靜悄悄出現咗一個熱帶低氣壓，呢種情況喺夏天好常見。嗰個低氣壓其後增強成為熱帶風暴，雖然曾經一度減弱，但三日後再度增強，中心風力約每小時130公里，屬於稍強颱風，個英文名都幾好聽 叫做HOPE，而中文名則叫荷貝。

荷貝之後移動速度逐漸加快，喺7月30日（星期一）迅速增強，到咗31日朝早7點半，中心風力增強到每小時157公里。之後喺短短5個鐘頭內，荷貝中心風力竟然驟增至240公里！美國聯合颱風警報中心大為震驚，即時將荷貝升格為超級颱風，呢種情況實屬罕見！

其後的10個鐘頭之內，中心風力不斷增強，最高陣風竟錄得高達295公里，天文台鑒於事態嚴重，雖然荷貝跟香港仍有一段距離，但依照佢嘅移動途徑，有機會直撲香港，故此提早向全港發出超級颱風警告。當年香港仍有好多寮屋，



所以市民都非常緊張，買備木板鐵釘，準備防風。

8 月1日下午，荷貝經過台灣及呂宋海峽，風力稍為減弱，最後喺台灣以南80公里掠過，陣風錄得每小時159公里。當時天文台舒一口氣，以為荷貝進入南中國海時，風力都唔會點增強。

而荷貝進入南中國海之後採偏西方向移動，並進一步加快移動速度，而中心風力竟再度增強至每小時205公里左右，直吹香港。天文台在下午3時30分首度發出1號戒備訊號。嗰個時候啲風同雨都幾大吓!

我有個同事對風雨好敏感，一個星期前佢已經話會有大風雨！因為佢感到周身骨痛，以前從未試過咁辛苦！所以佢話 呢場風唔簡單！
 

我當時番緊工，不過都好關注颱風嘅動向，梗係喇，如果打風嘅話 ，聽日就唔駛返工咯喎！按天文台預測，荷貝會直吹香港！聽到呢個利好消息，我即刻打電話約埋啲老友，嗰晚一於食飯聽歌！

收工後即揸車往元朗小西樓餐廳，班老友已經到晒，我柯打咗個晚餐，然後一路聽歌一路吹水。睇怕聽日都唔駛返工，心諗玩夜啲無妨。

點知到咗晚上10點，天文台改掛3號強風訊號，餐廳通知客人因為打風關係，要提早收舖，吓？咁掃興！不過無辦法，因為如果掛咗8號風球，啲的士就會收海鮮價同埋有權拒載。當時新界啲交通無家咁方便，所以我幾辛苦都要養番部錢七！雖然舊啲，但好過無！

睇吓個錶，得嗰10點零鐘咁早，聽日又唔駛返工，不如揸架車同班朋友遊吓車河，順便睇吓啲風係咪真係咁勁！一於係咁話，我車住班朋友就四圍去，喺途中陣風陣雨，到11點左右，有朋友話咁大風好危險，提議不如返我宿舍開枱，

我嗰陣時一個人住喺坳頭宿舍，覺得呢個提議非常之有建設性。

返到宿舍，開始感覺到荷貝嘅威力，啲風將樓下嘅花盆吹翻晒，有啲樹枝吹到折斷。雨點挾住強風將玻璃窗打到啪啪作响，我同班朋友即刻將啲膠紙黐喺玻璃窗上面，增強拉力，就算俾雜物撞擊都減低破壞力。

扭開電視，畫面震嚟震去，原因係條電視天線俾風吹到左搖右擺，睇到我哋眼都花，都係唔好睇喇，一於開枱喇！一路打一路感覺啲風力好強勁，有增無減。查實打風時打麻雀都幾好架，因為啲風吹到屋外雜物呯呯嘭嘭，俾你都瞓唔得著覺喇！

到咗早上6點幾，我哋已經打咗成晚通宵麻雀，真係有啲攰，但啲風好似愈嚟愈勁，我哋驚到連倦意都消失埋。

去到8月2日早上7點鐘，天文台發出8號東北烈風訊號，話時話喎，當時我哋感覺到啲風突然細咗好多，唔通天文台攪錯咗？啲風似乎同平日無大分別，根據天文台所講 ，由於地形關係，大部份地方感覺唔到大風，不過天文台話雷達已清楚見到荷貝嘅雙風眼。根據資料,擁有雙層風眼嘅颱風,特點係結構緊密同破壞力強!

我個心諗，唔理雙風眼定單風眼，千祈唔好晏晝掛番3號波，要返工就真係無癮！好彩知去到12點，啲風力突然增強至烈風程度，比之前重勁得多，我哋開始識得驚。到咗12點半，天文台改掛9號風球，唔夠半個鐘頭，風力急劇加強至風程度，天文台改懸10號風球！

就喺嗰個時間，我開始感覺到氣壓驟增，同埋雙耳嗡嗡作响，我未試過有咁嘅情況出現，我問班朋友，原來佢哋都有相同感覺，大家一齊話唔好打住先，試吓擘大個口睇吓會唔會好啲！就喺嗰個時候，我聽到玻璃窗破裂聲，只見對面宿舍有幾戶嘅玻璃窗爛咗，初時以為俾啲雜物打中，後來先知係被空氣壓爆，我都係第一次見咁嘅情況，好彩我啲玻璃窗黐咗膠紙，托賴無事！

啲風真係好強勁，我咁大個仔都係第一次感受到乜野叫風，我住嘅宿舍樓高4層，但都俾啲風吹法吹到有搖擺感覺，而氣壓令到我哋好唔舒服！

終於去到晏晝2點，荷貝喺大鵬灣登陸。到咗3點半鐘，風眼到達大帽山，令人詫異，近住風眼嘅屯門，元朗，石崗同荃灣一帶，有成15分鐘一滴風都無，重見到藍天白雲添！但喺其他地方就錄得強勁陣風：天星小輪碼頭，最高陣風每小時200公里；大老山229公里；亦鱲角204公里，而長洲都185公里。當風眼移離香港時，我又感覺到強風嘅威力。幸好荷貝來去嘅速度好快，減低咗佢嘅破壞力。天文台喺4點9改懸8號風球，到晚上10點再改掛3號強風訊號。荷貝喺香港造成12人死亡超過260人受傷，陸上交通大受影响,



有9艘船吹到擱淺,有隻大洋船幾乎吹咗上岸



碼頭損毀嚴重,但無乜人嚴重受傷，算係不幸中之大幸！

一般嚟講，颱風一旦進入中國大陸會迅速消散，但荷貝嘅殘餘部份繼續向西移動，跟住穿越越南，寮國，緬甸，孟加拉之後再進入海面，喺孟加拉灣再增強為一熱帶風暴。喺8月7日在印度加爾各答再次登陸，最後喺印度北部消散，距離佢發源地足有6份之1個地球，係戰後侵襲香港及華南沿岸最強嘅颱風之一。

荷貝締造嘅紀錄到依家重未有颱風打破：

1．     懸掛時間最短的9號風球：25分鐘；

2．     唯一一個颱風令天文台需要在24小時內將一號風球逐級提升至十號風球信號；

3．     自二次大戰以來,荷貝襲港天文台錄得第2低最低瞬時及每小時氣壓(僅次於1962年颱風溫黛)；

4． 自二次大戰以來,以最高時橫過南海的熱帶氣旋。(與荷貝移速相近的是1996年颱風莎莉)

（完）