危機四伏 (中)

京城調派一位林先生嚟接替梁先生嘅崗位，林書記較為年青，佢有個花名叫粗口林，因為佢講說話時，每每夾著一兩個粗言。相比梁書記，林書記無咁進取，但很容易相處，日常公事，沒有太多要求，凡事以搞掂為準則。

梁書記調職後無耐，二主管正式退休。而接替羅先生的是一位洋名叫海倫的女士，聽聞海倫跟五短高官私交甚篤，跟其他好多大老爺都稔熟，屬於擦鞋一族！



在海倫到任前，我相信五短高官已經就我嘅背景，同佢單咗一聲。故此，海倫一到，就向我施展下馬威，說為了方便管理，將我工作嘅部門，從4樓搬到2樓大房。佢嘅講法無可厚非，出乎佢意料之外，我沒有為此和她斤斤計較。

海倫調任前已申請咗大假去旅行，佢唔想我喺佢放假期間，署任佢個崗位，驚死益咗我！呢啲吃力不討好嘅工作，做嗰十幾日得雞碎咁多！你話邊有人肯制？所以其他五個同我職級嘅小頭目，個個都耍手擰頭話唔好預佢哋!海倫廹於無奈,唯有叫我幫手，我無托佢手踭，費事佢難落台。

海倫上任後無耐，就同我講話為咗提高團隊精神，每個月最尾嗰個星期五收工後，會聚餐聯歡，希望所有部門嘅同事都參加！海倫以提高團隊精神為由，實則係想睇吓有幾多下屬想埋佢堆！



下屬問我去唔去？我話第一次會去，算係俾面佢，但不代表以後都會參加。我同佢哋講，呢個並唔係一項工作，大家有自由選擇去定唔去！下屬見我去，佢哋都跟我一齊出席。我清楚海倫希望透過呢啲大食會，睇吓邊啲係自己友，邊啲唔係！

好快趣又到咗下一個月，有一日，海倫行埋嚟通知我周五收工飯聚，我話有約推咗佢，而我嘅下屬最後都無去。自此以後，海倫嘅每月周五飯局無再預我哋幾個。

我每朝早返工嘅時候，差不多日日都見到海倫拎住大包細包嘅衣物，去巡理府隔離嘅酒店乾洗。



我開頭感到奇怪？好少有衙差喺屋企拎埋啲汚漕衫返寫字樓，然後再拎去乾洗咁麻煩。後來才知道，原來海倫每日係幫某幾個官拎啲衫去乾洗，然後臨放工前，將啲衫送番俾啲大老爺！呢啲咁貼身服務，確實唔係人人都可以做得到！由此可見，海倫同啲大老爺嘅關幾咁密切！

我當時工作嘅部門，工作量頗大，而其中一個同事較為大意，好多時都出現錯漏情況，雖然只是無關痛癢嘅小錯，但對於其中一個官嚟講，似乎難以容忍！自從海倫嚟咗之後，我好多時都被呢個狗品官召入內庭質問。每次出現錯漏，佢都問我係邊個犯錯？我回應狗品官話，無論邊個犯錯，都係主管負責！狗品官好唔滿意我嘅答覆，但奈我唔何！我感到奇怪，我跟狗品官共事咗有成幾年，之前佢無就呢啲小事表示過不滿，但依家就突然之間認真起上嚟，究竟係乜野原因呢？我諗極都諗唔通！

海倫未嚟嘅時候，大主管林書記間中會出大房傾閒偈，但自從海倫嚟咗之後，我就好少再見林書記出現。有一日，我喺走廊踫見林書記，我就問佢呢排好少見佢出嚟傾閒偈喎！係咪好忙碌呢？估唔到林書記話，海倫叫佢以後唔駛出大房，有乜野事佢會搞掂！吓？咁都得？我同林書記講，你先至係呢度嘅大主管，連行出大房睇睇下屬嘅工作都唔俾？佢有乜權呀？林書記話佢郁吓就搵官嚟壓佢，所以無謂得罪佢喇！多一事不如少一事，咪少啲出嚟囉！呢啲情況，真係講出嚟都無人相信！海倫好明顯想架空大主管林書記，到時佢就可以玩弄權術。

嗰陣時有個女仔Amy，佢喺庭上工作，已經有好幾年，佢做野 好爽快，但係就有辣椒仔脾氣。每日返工都化晒裝，挽住個名牌手袋，加上青春無敵，屬返工買花戴一族！



海倫叫佢去飯局，佢就啋你都儍，所以成為海倫嘅另一眼中釘。結果過咗無幾耐，佢就被調離法庭，去咗做另一個死位。側聞海倫話Amy嘅職級唔可以處理庭上工作，但Amy已經做咗成4年，老爺都無投訴，依家先至話唔適合？

Amy條氣唔順，去問老爺係咪佢做錯野，點知老爺話佢嘅調職唔係佢主意，而行政方面佢唔方便插手咁講喎！Amy之後搵工會出頭，件事搞到都幾大，但海倫勝在後台夠厚，Amy結果最後調 離沙田。

海倫野心勃勃，佢想將佢所有分佈喺唔同巡理府嘅心腹，安插番係自己身邊，咁做起事上嚟，就唔會有後顧之憂！另一方面，佢同啲官關係良好，有乜事都有老爺出頭，大主管已經架空咗，好多由大主管負責嘅工作，都落到佢手中，佢鍾意點做就點做，心謀遠慮，簡直現代版武則天！

自從Amy單野平息咗之後，佢借故話為咗加強部門之間嘅溝通，每朝開工前，會同所有主管開會，不過就無我份！唔通我跟其他同事已有足夠溝通？我知道海倫美其名話開會，查實就諗吓點樣將異己排戚，以後就可以閉門一家親！大房開9點，啲巿民嚟到都要等佢哋班友開完會，起碼到9時30分，所以佢同我講，如果櫃位有人，叫我幫幫手，所以唔駛我開會咁講！哦！原來唔需 要我開會係咁原因！我好想問佢究竟有也野重要嘅會，要每朝早上開成半粒鐘？睇吓佢俾啲也野藉口我？不過，我最後都係決定保持沉默，費事嘥口水！

喺2002年某日，我收到一封信，內裡附上一張傳票同埋支票寄到法庭，由於我負責傳票組，張傳票就轉交咗俾我跟進。我見到傳票上面寫咗PG兩個字，我估到係Plea Guilty，即係認罪咁解！但由於當事人曾經選擇抗辯，之前判罰嘅款額會自動作癈，喺咁嘅情形之下，就算認罪，都要上庭！而支票就唔到我處理，所以交咗去會計部。

會計主任睇完嗰張傳票之後，佢嘅見解同我一樣，最後將張傳票與及支票，連同一封拒收罰款信，一併寄回俾當事人。

大約過咗一個禮拜，有一日，有位阿姐走到櫃位前拍枱拍櫈，好大聲咁話要投訴！



原來較早前張傳票同支票係由佢寄出，佢大聲質問點解唔收佢張支票？因為我對呢單CASE仍有印象，所以答佢話張傳票就算認罪都要上庭，故此張支票不獲接受！點知佢話：「你哋有無搞錯！我張傳票寫上PG即係表示在上庭嗰日會認罪，但張支票係繳交另一張傳票嘅罰款，乜你哋無睇支票背後寫咗另一個案件號碼咩？ 」我話如果你將張支票連同傳票一齊寄入嚟，好易令到我哋誤會，以為支票係用嚟繳付該傳票嘅罰款!

點知佢話唔滿意我嘅解釋，堅持要投訴！呢個投訴，假如要負責，我同會計主任都有份。況且張支票係由會計主任退回，斷估佢無理由唔需要解話！但事情發展,就真係無人估得到！

.........