婚宴

飲宴分多種，好似結婚，生日，滿月同埋升職等等。我哋去得最多嘅首推結婚飲宴。婚宴分中式同西式，中式婚宴，多數選擇喺酒樓擺番幾圍；而西式嘅婚禮，會選址喺教堂或者酒店舉行。

俗語有話，人情緊過債，故此請柬又名紅色炸彈。

出席飲宴，如果無帶入場卷嘅話，咁就認真失禮。人情分公價同埋友情價，我剛出嚟做野嘅時候，即1977年，公價人情由100大元起，到200大元止。人情大封定細封，視乎交情而定，有啲人就拎埋計數機出嚟，幫主人家計計數。如果係名牌酒樓，就做多少少，否則，做番公價就算。如果唔得閒去飲嘅話，人情都唔可少，一般做法係將銀碼減半。

隨住物價通漲，入場費亦不斷提高，依家起碼要做800至1000大元，否則，會唔係幾好意思。

「5時恭候，8時入席」,即係5點就可以進場。以前有朋友請飲，第一時間反應就係約腳開枱，趁開席前打番幾圈。為咗爭取時間，好多時酒樓都重未清場，連主人家都未到，我同班朋友已經到咗。

我見過賓客當中，如果多老粗三行嘅話，佢哋又煙又啤牌，有啲更老實不客氣，整碗蟹肉伊麵打打底，全部簽賬都入主人家數，真係睇見都戥主人家肉赤！

以前去飲，通常都會執得四正啲，起碼著番件裇衫同西褲，甚至打埋呔。但依家就求其得多囉，T裇加牛仔褲就算數咯。

大家有無發覺，每次飲宴，菜式都大同小異，原來每道菜式都有佢嘅寓意。首先上枱嘅係乳豬全體，寓意「如意吉祥」；跟住係兩大熱葷，蟹鉗同埋瑤柱甫，「甜甜蜜蜜，團團圓圓」；翡翠炒雙喜，「雙星齊報喜」；竹笙燴雞絲翅，「鵬程大展翅」；碧綠金錢扣鵝掌，「大富大貴」；清蒸大海斑，「年年有餘」；當紅炸子雞，「喜鵲報佳音」；富貴炒飯，「榮華富貴」；幸福伊麵，「延年益壽」；蓮子糖水，「年生貴子」；美點鴛鴦，「有情人終成眷屬」。

上菜都有一定次序，翅通常擺喺第五位置，因為到食翅嘅時候，一對新人就開始逐枱敬酒。敬完酒後，啲兄弟就開始玩新郎同新娘，乘機將佢灌醉。報紙曾經賣過，喜宴變武鬥，就係玩得太過份，大家飲大咗，各不相讓，結果日後分分鐘連朋友都無得做！所以凡事都係要適可而止。

依家啲後生仔女，唔鍾意去酒樓，因為唔夠浪漫。改為去酒店，酒店嘅收費當然跟酒樓相差好大喇！不過結婚係人生大事，對後生仔女嚟講，情願慳啲駛，都唔想個婚禮搞到無厘色彩。

唔講都唔知，原來依家有啲專幫人辦喜事嘅專業婚宴統籌團隊公司，即係話如果你想婚禮搞得有聲有色嘅話，只要肯使錢，隨時有公司幫拖。

呢啲公司裡面僱有婚禮統籌師，佢哋係專業人士，要有CWP國際認可資格才可以擔任。究竟CWP係乜專業資格？無謂嘥時間去研究！總之呢啲統籌師，會為新人度身設計每一個環節，將佢哋嘅成長過程，到認識拍拖等等片段，撮成短片，喺婚禮當晚播出。婚宴流程，由專業司儀負責，例如安排一對新人出場，由新郎及新娘發表感受，再由雙方家長致謝詞，總之，務求喺整個飲宴過程中，唔會有冷場出現。由婚宴公司安排嘅婚宴，都係依循一個模式進行，雖然去唔同嘅婚宴，但流程都熟口熟面，唔知大家有無類似嘅感覺呢？

依家啲後生仔女結婚，唔單只係佢兩個人嘅事，連帶佢哋老豆同老母都要採排，因為要向來賓致謝詞。如果平日唔善於詞令，面對一大群賓客講野，都咪話唔大壓力！

我最近有幸出席同學嫁女婚宴，婚宴嘅地點都算特別，既非酒樓，又唔係酒店，而係位於尖沙咀嘅三軍會所。而擺酒嘅地方，係喺一個好巨大嘅帳幕裡面。

帳幕面積唔細，可以容納二三十圍酒席。裡面嘅天花，採用銀白色嘅絲綢布匹做裝飾，中間掛上一排水晶燈，兩者十分配合，同金碧輝煌嘅酒樓相比，卻另有一番風味。

同學嘅千金，係喺英國土生土長，女婿係澳洲人。嗰晚嘅賓客，中國人同外藉人士嘅數目，應該打成平手，各佔一半。宴會7時入席，我因為唔熟路，遲咗二十分鐘先至抵達，結果錯過咗一對新人入場嘅儀式。

剛坐低，已見到新娘及新娘致詞。所以話，依家如果唔識講野，莫講話難搵野做，分分鐘連婚都結唔成！食到咁上下，到家長上台致賀詞，同學率先上台，首先用廣東話多謝出席來賓，然後再講番話。

呢啲場合，講野切忌拘束沉悶。之前有個朋友嫁女，佢太太站台分享感受，話當知道個女出嫁時，喊咗幾場，因為佢太過開心喇！原因係個女終於有人肯要，加上每日唔駛同佢整早餐！

中國人含蓄，鬼佬奔放，嗰晚可以睇到呢兩種極端嘅性格。食咗幾道菜之後，班鬼佬已經HIGH到跳上張枱。去到食魚嘅時候，班鬼佬鬼妹已經跳舞跳到不亦樂乎，又house of the rising sun， 又有比知嘅Night fever！幾杯落肚，我都有少少HIGH，仿佛置身於四十幾年前嘅
PARTY一樣！

 

我離開時，仍然有唔少賓客喺度載歌載舞。呢次婚宴，好有特色，我係第一次參加咁樣形式嘅婚宴！唔知大家又有無一啲難忘嘅飲宴經歷呢？