絕世好工

最近鬧得滿城風雨，相信唔駛多講，大家都知道係邊倆位仁哥仁姐，我唔再喺度多費唇舌。

「佢哋係選民選出嚟，有代表性嗰喎！所以佢哋有權進入立法局！」以上言論，似有理據！但從另一個角度睇，佢哋兩個只不過係喺某地區，得到大多數票而當選，兩個加埋都唔過七萬票,相對以七百萬港人比較,只佔一小部份。

我又諗起黃之峰，佢曾就立法會候選人嘅最低年齡提出覆核，建議由21歲降到18歲，由此可見，立法局議員呢個肥缺，由18歲至80歲嘅港人，都虎視眈眈。無它嘅，因為月入唔包津貼都成十皮野，連埋一份四年合約，你話唔吸引就假。如果有公司俾出以上嘅OFFER，肯定要求多多，就算唔做到PK都會做到你殘！

 

做議員吸引之處，除咗薪酬，就係佢嘅工作性質。每日唔駛交QUOTA，又無上司監管，十分自由。鍾意可以擲吓蕉，玩厭咗，又可以拉吓布！有得出位，有得玩，又可以自我感覺良好，化身成正義之師！呢啲筍工，你話去邊度搵喇！

 

我當年去葵涌搵份署期工，日薪雞碎咁多，個管工都問我有無工作經驗？但係依家當議員，無需學歷，亦唔駛經驗，只要有人選你出嚟，咁就掂過碌蔗！睇番轉頭，做個文員，都話要有工作經驗，而監管政府施政，竟然乜經驗都唔駛，諗落係咪有少少本末倒置哩!

 

政府之內，不乏大內高手。所制訂嘅政策，都係經過資料搜集，有根有據，再花一段長時間，精心研究得出嘅結果。好似每年嘅財政預算案，係一份用咗幾個月時間，由政府內部不同範疇嘅專業人士, 嘔心瀝血所寫成嘅報告。呢份報告，對於不學無術嘅青年新政嚟講，點會睇得明。好話唔好聽，呢班友仔，連自己日常生活起居，可能都要靠屋企人,你話旨意佢哋監管政府，真係嘥鬼氣喇！

 

呢兩位仁兄仁姐，能夠當選議員，唔係靠實力，只不過係時勢做英雄，借住佔中上位。佢哋屬於「少年得志大不幸」嘅一個好例子，結果勝利沖昏了頭腦，以為藉住宣誓時出位，就可以更上一層樓。

 

曾在宣誓時玩過野嘅議員，首推癲狗同長毛，但佢哋知道遊戲規則，適可而止，所以可以順利過到關。但呢兩個新貴，學藝不精，結果玩出禍，得罪全球華人，重洋洋得意。

 

女新貴被傳媒追訪時，重振振有詞，話唔會同共產黨道歉！大姐呀！你連得罪咗乜人都唔知!唔係共產黨呀！而係曾經受過日本仔廹害嘅老人家，包括所有黨派以及全球華人！

 

佢哋响事發後重喺度死撐，又話英語唔好，又話鴨脷洲口音，總 之就藉口多多,講得出又唔敢認，一啲吉屎都無，以後講野重有乜鬼公信力呀?之後佢哋重高調應邀去台灣，出席台獨交流心得，呢啲咪正白痴行為囉！

 

話說回頭，我估班青年新政倡議港獨，未必係嘩眾取寵，佢哋同埋班支持者，真係以為香港獨立係有可能發生。所以話呢班人幼稚就係咁解，因為佢哋只係單一諗問題，完全無諗過獨立最低限度要其他國家承認，更遑論獨立後要組軍隊，中國容唔容許等隙手問題！假如你問佢哋，有無諗過邊啲國家會支持同承認香港獨立？我包保佢哋唔識答。

 

不過，我哋又唔可以怪呢啲年青新貴，佢哋只有二十零歲，欠缺人生經驗，閒時打下機，思想簡單，唔知乜叫避忌。佢哋今日能夠當選，主要係靠出位言論，但就唔懂得適可而止。

 

西方嘅民主選舉制度，喺香港未必全部適用，尤其係喺選舉議員方面。監察政府施政，必需有番咁上下人生閱歷同經驗。後生仔太衝動，心思唔得慎密，佢哋嘅決定往往得出一啲反效果。大家唔信嘅話，可以睇下北韓領袖金正恩，佢就係欠缺人生經驗嘅一個好例子，加上剛愎自用，結果受到聯合國制裁，重將國家置於戰爭邊緣。

 

故此，我建議當議員嘅年齡，起碼要提升到三十歲以上，先至可以有資格報名！我呢個建議，唔知有無藉得討論嘅空間呢？