校園風雲錄

AXA安盛香港街馬10公里@九龍東2014

問米

究竟呢個世界有無鬼神嘅呢？我雖然未見過，但傾向相信有。



我二個家姐嘅睇法同我一樣，佢哋除咗信之外，重透過問米婆，



將先人請上陽間，親自了解佢哋嘅陰間嘅生活狀況，睇吓夠唔夠錢洗？需唔需要燒啲衣物落去俾佢哋等等。我大哥係虔誠基督徒，佢話鬼神係屬於墮落嘅天使，叫我兩個家姐唔好同佢哋接觸!

我細佬就唔相信，佢覺得問米婆講嘅野，只不過係呃神騙鬼，係我二個家姐咁蠢先至會信。

有一次飲茶，講開問米嘅話題，我細佬叫家姐搵一次帶埋佢上去，等佢見識吓個神婆有幾犀利！佢會搵吓有乜破綻,有機會問到佢口啞啞。家姐終於揀咗一日，原本我都打算一齊去，點知到咗臨去嘅前一日，神婆話有事做,唔得閒要遲多一日，咁啱係星期六，我要返工，結果去唔成，但細佬短週，所以可以同大家姐一齊去。

我以為神婆梗係住喺陰深嘅村落，方便施法，但原來佢住喺元朗市中心某唐樓嘅六樓，即最高嗰層。我家姐約好咗喺嗰日朝早11點上去搵個神婆，我細佬揸車接埋大家姐，喺附近泊好架車，跟住一齊撐上6樓。

細佬話上到去，先至知道神婆原來唔係好大年紀，約莫40歲左右，佢話要煮飯俾啲小朋友食咗返學，起碼要等成個幾鐘頭，如果唔想等嘅話，第日再嚟。我細佬好慶，


心諗約好咗時間喎，乜咁無信用架？但佢係區內最勁嘅問米婆,係咁寸都無佢辦法,加上一場嚟到，無奈都要等喇。只見神婆你急佢唔急，攪咗成粒鐘先至煮好餐飯，



食完飯差唔多成個半鐘，等啲小朋友出埋門口返學己經接近兩個鐘。我細佬望吓個錶，突然醒起泊車咪錶差唔多夠鐘，即刻拿拿臨走落樓入錶！

就喺我細佬落樓入錶嘅時候，神婆就帶我家姐沿石級上天台,佢話喺屋裡面做嘅話，陰氣太重，對家宅唔好，但又唔可以上天台,因為太過日光日白,所以選擇喺接近天台嘅後樓梯作法。神婆去到彎角平台,就燃點香燭,

跟住瞌埋雙眼, 念念有詞..........

我細佬入完咪錶，拿拿臨衝上樓，唔知係咪心急過頭，幾乎蹉錯腳撻咗落梯級度！ 雖然跑到上氣唔接下氣，但都好快趣上到頂樓梯級平台。

平台可以窺見部份天空，佢啱啱入錶時，重好猛太陽，



但當神婆施法時，突然間烏雲蓋頂，



我細佬個心打咗個突！咦? 唔通真係有料到！

神婆整個過程都係垂低頭，合埋對眼，唔係好似扮演問米婆嘅甘草明星羅蘭咁，



雙眼反白，成身震晒。佢只有微微震動,約莫3分鐘左右,突然間開聲:我嚟咗喇! 你想問我乜野呀？當時佢把聲變咗，好似嫲嫲把聲。

大家姐問佢，知唔知同佢一齊嗰個係邊個？佢好慢咁話：佢咪孫仔囉！

家姐問知唔知佢係第幾個孫？神婆握住一個拳頭，喺突起嘅手指骨一路數，一路喃喃自語，大嘅喺好遠嘅地方，要搭飛機嘅！佢又無講錯喎, 我大哥移咗去加拿大都有成十幾年喇!


靜咗一陣間，佢就指住拳頭上面突出嘅第三節,我細佬喺男孫中排第三,佢見到神婆指向第3節嘅時候,呆咗一呆。

家姐又問:你知唔知有幾多個孫？佢諗咗一陣就舉起8隻手指！

細佬沾沾自喜，以為佢答錯咗，我吔得7兄弟姐妹，何來8個呢? 後尾先至知我哋有個大佬，喺3歲時因病過身。

神婆又同家姐講: 你嚟搵過我,我知道架! 但係個阿姑唔夠道行,你以為佢呃你!重同佢嗌交添! 事實上佢已經請咗我上嚟,不過唔夠法力,我上唔到佢身,唯有企咗喺大門側邊,不過你睇唔到我!有無老作呢?我哋無聽家姐講過!

問完米之後,家姐先至講,大約喺二個月前,有個朋友介紹佢去咗流浮山芒井,話有個問米阿姑好靈,我家姐咪去試吓囉!個阿姑作咗法無幾耐,就示意阿嫲己經嚟咗,叫家姐有野即管問.家姐第一句就問佢知唔知佢係邊個嘅時候?阿姑話係親人!家姐問乜親人,阿姑噏唔出,剩係話係親人,我家姐咪即時話佢無料到,懶得再問其他問題.重不歡而散添! 呢件事我家姐從無對人講過,咁除咗嫲嫲,真係無人知嗰喎! 你話神婆佢勁唔勁喇!


神婆繼續講: 我知道點解個孫仔會嚟，因為佢唔相信你真係會搵到阿嫲，所以嚟睇睇！你曾經同佢講過搵我,但佢唔信不特只,重話你俾人呃!孫仔,你記唔記得講過呢句話?細佬無奈點頭!我今日會令你大開眼界！我細佬開始手心有啲冒汗!

神婆個頭仍舊垂低,移向細佬方向，跟住講 ：你記唔記得啱啱跑上梯級嘅時候，幾乎跌親，阿嫲一路喺你側邊，用手托一托你先至無事喳！ 細佬聽完之後，毛管直豎，因為幾乎仆親嘅事，剛剛發生，未有時間向任何人講！

我家姐跟住問：咁你收唔收到我哋喺清明燒俾你嘅金銀衣紙？神婆話：收就收到，不過你哋將啲名寫埋喺啲衣紙度，燒落嚟俾我就唔係咁吉利，陽間嘅姓名唔好燒落嚟陰間，對你哋唔好架!以後剩係寫眾孫兒我就知架喇！

家姐又問：咁老豆老母佢哋點呀？神婆話：佢哋喺下面嘅環境唔係咁好，唔夠錢駛，我大把錢,駛唔晒,俾減啲過佢哋！你下次記得燒多啲金銀衣紙俾佢哋喇！

神婆又同我細佬講：孫仔，你都好有阿嫲心，日夜裝香，



不過你趕時間都唔好用口吹熄啲香，因為吹過陽氣嘅香，就算燒咗落嚟我都食唔到！記住以後搵手撥熄啲火，唔好再用口吹喇！我細佬呆咗一呆，因為趕時間,佢習慣用口吹熄啲香！

神婆又同講 ：廳裡面打橫張梳化，



我好多時都坐喺度，但你一入門口就 《得》落去，有幾次我走唔切，幾乎俾你坐親!你知唔知道呀？以後返入屋時，慢少少，咁我先至有時間走開,你就唔會責親我！

細佬話嫲嫲去世時，都未買張梳化，佢依家唔單只知道有張梳化，重清楚張梳化擺放嘅位置，你話係咪有啲不可思議呢！

我家姐重想問嘅時候,阿嫲話:我依家要走喇! 話口未完,只見神婆慢慢張開雙眼.

自從親歷嗰次問米之後，細佬對於呢個世界有無鬼神呢個問題,都無以前講得咁肯定同大聲！

我將呢件事同大哥講嘅時候, 佢話家姐同細佬見到嗰個唔係嫲嫲,而係邪靈透過神婆扮演嫲嫲嘅啫! 我問大哥有乜野可以証明佢嘅論點! 佢舉咗個例子, 一個先人過咗身,之後有個靈魂,咁由陰間請上嚟陽間,喺邏輯上可以講得通! 但我哋睇神打表演時,間中會請齊天大聖上身,



唔好忘記,齊天大聖只係小說人物,根本無靈魂,但都可以上到身,証明邪靈可以演譯你腦海中所期待嘅人物! 咁聽落似乎又有道理, 各位網友又點睇呢?

(完)

衙差百態

話說喺幾年前,正值沙屎肆虐嘅時候,喺某個衙門，有個女衙差據說為咗市民著想，要求上級添置一啲大型同埋有感應自動開蓋嘅垃圾桶，

等啲市民唔需要用手拉開，都可以揼垃圾，減少細菌感染咁話喎。查實原有嘅垃圾桶，啲市民平時都好少用。講真，去辦手續嘅市民有幾可揼垃圾呀？
衙門買野有一定準則，以實用為主，直屬上司梗係唔批喇，點知佢一個屈尾十，入咗大老細房，無幾耐，大老細叫上司入房，要求買嗰類垃圾桶，上司有備而來，拎出皇法指引，指出衙門只可以買一啲實用同埋唔可以太貴嘅用品,否則必須得到京官批准先至可以購買.

老細無可奈何，但都要求換個大一啲嘅垃圾桶。跟住攞咗張紙出嚟，上面有齊晒嘥屎，睇啲數字，出自女衙差之手。

好喇，買咗返衙門唔夠一個禮拜，個新嘅垃圾桶就俾人擺咗落士多房，而舊嗰一個又拎返出嚟用。上司奇怪之餘，追問原因，女衙差話個新嘅垃圾桶大得濟，阻住市民，所以用返舊嗰個。上司差少少爆粗，質問佢: 乜你之前無度清楚嘅咩？女衙差覺得被上司羞辱，即刻入大老細房告狀。過咗無幾耐，大老細召上司入房，曉以大義，叫佢對下屬要以體諒同寬恕態度，維持良好工作關係,加強團隊精神。上司離開老細房之後，一臉屁咁得返落自己個位度。

衙門每月例會就快舉行，京城下達召書，提醒衙差要慎防沙屎病毒，所有枱櫈，開會前必須用消毒葯水徹底清潔。上司叫女衙差去高層會議室，預備文房四寳之餘，



同時將枱櫈消毒。

距離開會時間尚餘15分鐘，上司仍未見女衙差出現，問其他同僚，佢哋話女衙差上咗樓上會議室，有成半粒鐘，上司大驚，以為發生意外，二話不說，直奔會議室。入到會議室，見女衙差正在將消毒葯水溝稀，只見佢用個杯蓋，盛滿消毒葯水，然後倒落個膠桶度，跟住又小心奕奕，用同一個杯蓋，盛載清水，然後逐次將清水溝落啲消毒水度，上司問佢點解唔一次過倒啲水落個桶度，要逐少逐少加落去,嘥晒啲時間。女衙差振振有詞，根據指引，要用一比九十九濃度嘅葯水消毒先至有效，所以咪要逐次加落去,倒九十九次囉！上司為之氣結，對女衙差話：呢度無你嘅事，你返落寫字樓做你嘅野喇！

有啲朋友唔明，以為呢個女衙差好蠢，做野唔識執生！查實佢係精甩尾。喺衙門做野，如果你又勤力，又做得嘅話，上司乜都搵你做；倒返轉頭，你做野求求其其，拖泥帶水，一啲責任感都無，係老細嘅，都驚咗你喇，有乜野做都唔敢搵你，咁咪正中下懷囉！

呢類衙差，有共通之處，就係識得馬住啲大老細，知道邊啲受擦，邊啲唔受擦，佢哋嘅目的係最好乜都唔駛做，返寫字樓發吓白日夢，行行企企又一日！

再講返呢個女衙差先，過咗無幾耐，佢又走去同大老細講，話想買一把鋁製嘅摺梯，


大老細即刻召上司入房商討。上司話寫字樓已經有一個約莫1呎高嘅金屬櫈，方便同事將啲檔案擺上高一啲嘅位置，點解重要買摺梯呢？老細話有啲同事投訴，企住嚟存檔好辛苦，想買一種頂部可以坐喺度嘅摺梯，咁就會舒服啲，唔會整傷條尾龍骨咁話喎！上司好想講話擺個快佬駛幾多時間，駛唔駛坐喺度filing呀？最後諗通咗，都係慳番啖氣，同大老細講：是旦喇！

買咗把鋁梯返衙門之後有成個月，上司問其他同事張摺梯好唔好用，佢哋話好少用把鋁梯，多數都係好似以前咁用番張金屬櫈，因為方便好多。上司跟住問女衙差有無用把鋁梯呢？佢哋話好似用過一次咁大把，之後都係擺番喺士多房。上司搖搖頭，自言自語：有咁嘅老細就有咁嘅衙差！

沙屎期間，京城印咗好多海報，提醒衙差要做好個人衛生，如果有唔舒服嘅話，千祈唔好勉強返工，以免將病菌傳俾同事；喺公共場所，要戴番個口罩，


以免病菌傳播出去；另一方面,去完洗手間要勤啲洗手，



京城會安排定時送啲洗手同消毒葯水到各衙門。

有日上司收到由京城送達嘅海報，於是叫女衙差將啲海報貼喺衙門嘅告示板，呢啲工作濕碎到唔濕碎，上司亦無將呢啲小事放在心上，直至收到京城來電，詢問有無收到啲關於沙屎嘅海報，同埋有無貼喺告示板度。 上司立即四處巡一巡，點知出乎意料之外，一張海報都睇唔到！上司有啲奇怪，即刻搵女衙差，質問佢點解成幾粒鐘都重未貼好啲海報！女衙差好委屈咁話，佢搵唔到鎚仔將啲海報釘上告示板喎，上司有啲水滾，



即刻帶佢去其中一個告示板，拎咗十幾口大頭釘，


唔駛1分鐘，就將啲海報釘晒咗上告示板度。

女衙差喃喃自語：我邊有你咁大力啫！呢次上司連頭都費事搖，乜都無講，逕自返番自己個位。自此以後，上司唔敢再叫女衙差做野。

大家唔好以為我作古仔，以上係真人真事，邊個衙門就無謂講喇！至於上述嘅女衙差，你話屬於第幾類喇?

好喇，我又講吓另一個衙差，係咪咋儍扮懵就由各位網友判斷喇！

話說某個衙門設有高官車位，



間中有送貨司機，貪圖方便泊咗高官個車位。有一日，有部中型貨車停咗喺個位度，高官咁啱返到停車場，見到佢嘅車位俾人佔用咗,佢唯有將架車停喺其他空位度，當然心中唔多高興！

佢返到寫字樓，同主管咋型，主管即時搵個衙差，到停車場貼紙，警告胡亂泊車嘅司機，等佢以後醒定啲，唔好再泊呢個位！

主管喺電腦印咗張告示，大意係《請泊回指定貨車位，若果再有類似情況發生，會向你公司投訴！》。印好咗之後，主管問個衙差，知唔知邊個車位係老細嘅？衙差答: 唔知喎！主管話：7號位！記住唔好貼錯！

過咗幾分鐘，衙差拎埋張紙返寫字樓搵主管，主管好奇怪，跟住問衙差：點解你重唔貼紙？衙差話佢搵唔到7號位喎！主管話：無理由架！唔通個車位有腳會走咗去第二度？衙差話，個個位都泊滿晒車，得2號同3號車位睇得到個編號！其餘啲號碼全部俾車遮住晒，我點知邊個係7號位喎？主管幾乎吐血身亡！

過咗幾日，主管收到投訴，話某個厠格棟門爛咗，



佢即時叫衙差貼張紙喺門口，通知啲市民使用其他厠格。過咗一粒鐘，主管走去巡視，點知睇唔到任何通告,即時搵衙差問佢原因? 衙差話: 你都未俾膠紙我!


點貼呀？

以上並非故事，而係真實個案，問你哋服未？

飲宴

我收到朋友女兒出嫁的請柬，故此在上星期回鄉 飲宴。現在內地年青人對婚禮 也很講 究，但過大禮及接新娘的習仍然保留，還較香港傳統。大禮 包括米酒，生雞，椰子，被褥，甚至LCD大電視等等。



接過新娘子之後，拜過祖先

開始敬茶給長輩。








 

飲過新娘子親自奉上的茶之後，當然要有所表示，至親長輩通常會送贈手飾金器，以示心意。

小心啲呀，唔好拮親我呀！








 

係囉！咁戴就啱喇！








 

戴完金飾之後，成個人都唔同晒，唔單只佛靠金裝,人都要靠金裝 ,你哋話我講得啱唔啱喇！


















  

敬茶完畢後,開始將啲禮物帶回新居.

呢啲重任,當然落在兄弟身上喇!唔該借借！

花車佈置也不算老土吧！

婚宴跟香港一樣，通常會在酒樓擺設，但近年已經改往酒店，因為酒店的環境始終較酒樓優勝，既幽雅又舒適。

跟香港唯一不同的，就是沒設麻雀耍樂！

咦？原來太太的死黨朋友比我們還早到,她很喜歡麻雀耍樂,莫非以為今天會有雀局?！




 

酒店一角





















 


在開席前，會播放新娘子及新郎的兒時照片以及一起旅行的片段。朋友當晚聘請了珠江電台，一個名為夜傾情的節目主持DJ做司儀。

他除了安排及跟進所有工作流程之外，還要唱歌搞戲氛，這些錢真的不容易贃。

內地開席較香港為早，7時開始進行儀式。我想不到儀式中竟帶有點西洋味道，就是由父親牽著女兒的手進場，然後親手將女兒交給新郎！跟著新人上台，分別講述自己感受，認識的經過及向父母致謝等等！然後到父母上台，向新人祝福及向出席的親朋戚友致謝。

儀式在7時30分完成，開始上菜，不過跟香港不同，不是吃完一個到另一個，而是在短時間內，將所有菜式端上枱面，大家吃過不亦樂乎！約莫一個鐘頭後，我也吃得差不多了，是時間離開了！

原來我的表姪女也是賓客之一。

這次婚宴，給我一個啟示，內地跟香港的距離，就以婚禮來看，範圍開始收窄，且愈來愈接近了！唯一感到欣慰的，是內地靠過來，而不是香港靠過去！

 

代言人

幾個月前,我收到個電話,有個女仔一聽到有人應電話,就

一輪咀咁講：

你好呀，先生，我係乜乜天體公司打嚟嘅！我想問你今年幾多歲？有幾高同埋幾重？月入幾多？

吓？乜野天體公司呀？

都未講完，電話就傳嚟咭咭笑聲：

唔係天體，係纖體公司！我哋想搵代言人，代表公司宣傳，喺咁多個客戶中揀中咗你！

哦！……但我無參加過纖體課程喎!點解會係你哋嘅客戶呢？

你唔一定參加過我哋啲課程先至係我哋客戶嘅！我哋透過一啲公司咪攞到你啲資料囉，所以俾電話你！

吓？咁都算係客戶呀！咁做代言人駛唔駛出鏡啫？

梗係要喇！

我好怕醜喎！又滿面暗瘡,點出鏡呀？

先生你講得好啱，成為代言人之前，公司會安排個訓練課程俾你。

唔好住先，我個樣同身裁都唔得，點訓練呀？

咁你又唔駛自悲，8両金都做明星喇！我哋公司好專業，同你包裝過之後，成個人唔同晒！唔怕靜雞雞話你知，依家好多姐仔，未化裝之前，係人見到都彈開，不過化咗裝之後，就星味十足！係喎，你都未答我你今年幾多歲，有幾重同埋幾高？

我二十三歲，250磅，5呎差吋半！

咁即係………

4呎10吋半！

唔！身裁肥就肥咗少少！

咁即係唔掂咯喎！

梗係唔係喇！先生，你放心，我哋公司好專業，包保你一個月可以瘦番二三十磅！

吓？有無咁神奇呀？我之前幾乎剩係飲水都減唔到一二磅喎！

吓？乜我無話你知咩（係度扮野），我公司用最新嘅納米技術幫客人減肥！

納米技術減肥呀？我真係未聽過喎!

呢啲先進技術好鬼複雜，我講你都唔會明！總之信我喇！我唔會點條黑路你行嘅，依家剩係美國先至用咁先進嘅儀器同客人減肥！我嗰間係東南亞唯一用呢種先進嘅科技嘅公司！（講到真嘅一樣）

哦…………

係喎！你都未答我每個有月有幾多收入？

做代言人關收入乜事呀？

無！公司規定要問，用嚟做統計啫？

唔………咪住先！阿媽話如果有人問你幾錢收入，呢啲公司多數都係呃人嘅！

啲老人家思想係保守啲架喇，你咁大個仔，出嚟搵食,唔駛吓吓都要問過阿媽嘅！你信我喇！我呢間公司係做正行生意，主要唔係為咗贃錢，係想訓練多啲呢方面嘅人材，造福模特兒界！（講到似層層）好多名人好似鄭瘦民，輸奇都係我公司代言人！

話時話喎,我都唔識你，點解要信你？

……….（無言以對有成幾十秒）。你聽吓我把聲都知我老實架喇！我呃你有乜著數!
……….咁都得（我心諗,呃到我咪有人工收囉!點會無著數?）

我唔會呃你嘅！你都未講幾多錢一個月？

我依家做臨時工，收入唔穩定喎！

…………咁你有無咭？

信用咭？得一張咁大把！

哦，咁就得架喇！我依家暫時幫你做個登記先！

都係咪住，我禽日睇報紙，見到好多人俾嗰啲模特兒公司呃錢，叫佢哋參加啲乜乜課程，物物課程，搞到簽咗十幾萬咭數！跳樓都唔掂！

哦！………..我哋呢間同嗰啲模特兒公司唔同嘅，你都知架喇，樹大有枯枝，我都好憎佢哋整衰晒我哋呢一行架！唔好講咁多喇！你下個星期或者呢幾日收工之後，邊日有時間上嚟我公司見見面？

………唔好意思（我故意壓低聲線）我老細見我講咗咁耐電話，望緊過嚟，燶起塊面，遲啲再同你傾！

喂喂喂………先生……

我無回應佢，跟住乘機收線。嘻嘻!呃完偈傾重唔收線咩! ^^

 

衙差簡介

好多未喺朝庭做過野嘅朋友，對朝庭工作未必認識。一般人嘅印象，打朝庭工，做又三十六，唔做又三十六，求求其其又一日，加埋糧期準，福利佳，不求無功，但求無過，到時到候，黃袍加身，



自動升級，無風無浪，所以俗稱為鐵飯碗！

睇起上嚟，做朝庭工咪好正！不過，我認識有啲朋友，佢哋話 朝庭工做懶人，缺乏挑戰性，所以佢哋唔吼咁話喎。咁又係，當年喺出邊打私人工，又雙糧又津貼，加加埋埋，人工分分鐘多過朝庭成倍有多。朝庭工除咗穩定之外，真係無乜吸引力。所謂人望高處，無人咁蠢重加入朝庭做衙差！

朝庭官員分等級，咁等我粗略分一分喇！狗屎垃圾都要做嘅同文職屬於八九品，首長級屬一二品，其餘嘅衙差要以專業資格嚟再細分。

咁朝庭做野會唔會大公無私呢？我話會就呃你！有人嘅地方就唔會有公正。你唔擦老細鞋，獨行獨斷，清高呀嘛！好!有吉屎,不過就分分鐘做到退休都係嗰個位，睇你清高得幾耐！

我識得有個女同事，一到假期，就同老細約腳打麻雀，咁都未算，重要做埋阿四，

賣埋餸煮埋飯，重使開老細嘅工人，由佢貼身服侍斟荼遞水，服侍周到，結果真係有回報，成功升級上位。

擦鞋仔或者擦鞋女喺任何衙門都存在，你又唔可以怪得晒佢哋嘅，因為有鍾意受擦嘅老細，先至會有佢哋嘅出現啫！

擦鞋仔或者擦鞋女有一個共同特徵，就係無乜料到，做野點當，喜愛弄虛作假，狐假虎威，收靚埋堆，講是講非，玩忽職守，排擠非我族類！老細講一啲唧都唔識笑嘅笑話，佢哋會即時擠出擦鞋嘅笑容；老細喺工作上提少少意見，佢哋即拍爛手掌，大讚老細英明神武，嗰種擦鞋咀臉，令你骨痺同反胃！

一啲管理崗位，落喺呢啲擦鞋仔手中，朝庭嘅工作效率同質素，大家可想而知!

好在唔係所有朝庭官員都係咁嘅素質。基本上朝庭官員可以分為五大類；第一類佔最多數，約70巴仙，勞勞碌碌，唔偷唔搶，夠鐘收工，唔係好聰明,但亦唔係太蠢,做番自己本份；

第二類佔15個巴仙，做事有交帶，不辭勞苦，有效率，話頭醒尾，唔駛老細成日督住都會自動做野, 好似上咗練嘅耕牛,任勞任怨；

第三類屬於精英，佔３個巴仙，大部份係管理階層，有魄力，有承擔，有品德，處事公正嚴明，知人善任，好受下屬歡迎，將部門管理得頭頭是道；

第四類，都屬於精英，工作同管理能力無可置疑。但擺款，格衰，要求多多，貪小便宜，鍾意下屬擦鞋，見高拜，見低踩，神憎鬼厭，係人都想質佢一鎚!


呢類佔５個巴仙；

最後嗰類屬最差嗰類，佔７個巴仙，佢哋練精學懶，專搵著數，利用所有灰色地帶，例如長假期之前同之後，例必打電話返寫字樓,話唔舒服要求放病假；叫佢哋做野，奉旨唔會做得妥妥當當，周不時斤斤計較，話呢樣唔關佢事，嗰樣唔係佢負責,又或者推話上手無交帶！總之就藉口多多!

佢哋周不時唔喺位度，唔係去咗隔離部門講是非，就係喺厠所洗杯洗手！好喇！當佢哋出現喺寫字嘅時候，又多多事幹，吚吚哦哦,好似水煲殘舊，冷氣唔夠，電腦過時等等，總之有正經野唔做，喺度搞搞震！呢類員工, 有共通之處,就係對一啲關於自己利益嘅條例非常熟悉,隨時可以背俾你聽。最令人無耐嘅,就係其中有啲重係幾個衙差嘅主管!自己都管唔掂自己,點去管人!你話死未！

依家講吓工作，唔同嘅衙門有唔同性質嘅工作，有負責民生，住屋，教育，康樂，個人身份紀錄，出入境，生死，稅收，規劃，法治以至懲教等等。而職級有分紀律衙門同一般衙門，紀律衙門嘅糧餉比較高啲，因為要輪班工作,加上工作性質帶有危險性,



由於紀律部隊人多勢眾,對於爭取較高薪酬,自不然有事半功倍之利!

到番文書衙差，做嘅工作範圍分<會計>，<人事>，<公共服務>。除咗上述所提的三項，所有屬於<其他性質>。有啲崗位做死,


有啲就嘆死，

都係嗰句，睇你好唔好彩數！

朝庭衙差質素同工作介紹都差唔多有七七八八，相信大家都有少少概念！但有樣野值得一提,所有入職衙差都經過嚴格篩選, 照道理唔會咁差個喎! 事實上,初入職嘅衙差都好拼搏, 但有啲拼極都上唔到位, 結果咪<判啤>囉!

 間中主考官亦會睇錯人,所以做部門主管要睇運, 派咗個好員工梗係正喇, 倒返轉頭俾個問題員工你就頭都痕埋!最慘重要揞住良心,寫好佢個考勤報告,因為如果報告太差,邊有部門收留? 咁你就要一世對住呢口頂心槮,問你死未! 相對而言,一啲做得嘅員工,求神拜佛都唔好UNDER啲無料嘅上司, 因為就算你做到曉飛,佢哋都無料寫好你!

一命二運三風水,喺衙門做過事嘅朋友,必會認同以下呢句說話:叻叻都無用,最緊要夠運!