校園風雲錄

316033,呢個係我升中試嘅考生編號。老師話:你哋要死記呢個號碼,如果唔記得帶準考証,監考員或者會俾個人情你考住先,第日補返個正本。就係咁,我個腦就將呢個號碼記到依家,我諗到我死咗嘅時候先至會將個號碼交番俾天主!嗰陣時由小學升中學要考升中試，分中，英，數三科，最好成績係一級。如果你想考上名校，嗰三科你必須攞一或者二級先至有機會。到咗放榜日，要買張報紙返嚟對冧把。啲冧把排到密麻麻，不過好彩係順住次序，唔係咁難核對。如果有冧把，表示你考到政府或者津貼學校，學費象徵式收番十元八塊。如果無冧把，表示名落孫山，你一係出嚟搵工做，




一係讀私校，學費貴不特只，師資相對無咁好。

我讀書唔算勤力，好彩其他啲考生重懶，所以勉強可以掹車邊考上中學。老豆話過，如果考唔到嘅話，咪駛旨意有書讀，要出嚟做野！我嗰陣時重未做過暑期工，所以無有怕，唔讀書咪出嚟做野囉！駛死咩！我心諗！

雖然知道考試合格，但派去邊間學校都重係未知之數。嗰陣時老師話每個同學要衡量自己能力嚟揀學校，如果你選擇頭嗰幾間係名校嘅話，你會冒好大風險。假若成績唔係咁好唔夠其他同學爭，而屬於二線嘅學校又俾其他同學揀咗，咁你分分鐘只可以派去二線以後嘅學校就讀,所以揀學校嘅次序好緊要!

眨吓眼又過咗幾個禮拜，又到返學校攞成績嘅日子。嗰陣時唔係個個同學都有機會派到學位架！我讀嗰間係村校，之前最好成績嗰一屆，都係得二個派到學位咁大把，其中一個就係我大哥！不過我哋好開心，因為對完報紙之後，知道有成二十個同學派到學位，我當時有啲得戚。事緣我哋係學校最百厭嘅一班，校長見到我哋都眉頭緊皺，好多老師一提起我哋就猛咁搖頭！呢次返到學校，重唔俾番啲顏色佢哋睇！我哋嗰次嘅成績，除咗改寫咗學校歷史之外，重將附近二間村校比咗落去，皆因佢哋嗰年都係得一兩個《趴匙》架渣！

返到學校，老師同校長都好開心，因為我哋嘅成績係破咗學校紀錄！我一攞到成績單，即時睇吓派去邊間學校先？吓？係真唔係呀！和尚寺？知道派咗去間男校嘅時候，個人有少少失落，唔好意思,講錯咗添! 係好鬼失落先至啱! 拍住個靚女同學讀書嘅浪漫幻想即時煙消雲散！呢個打擊,對我嚟講咪話唔大!我周不時同人講,我讀書咁屎,皆因揀錯咗間和尚學校喳,等我無晒讀書嘅衝勁同動力!請問喺男女校畢業嘅網友,我講得啱唔啱喇?

一日最鬼衰都係我大佬，猛咁叫我揀埋佢讀緊嗰間學校做第一志願，重同老豆講，話日後我可以用番佢讀過嘅舊書，



慳番啲買書費.依家諗番起，我都死蠢，點會咁戇居聽大佬點架！好彩同班有４個同學都派咗去嗰間學校，叫做有個伴喇！

暑假話咁快就過咗，九月初開學，嗰間學校無指定校服，但我都跟番傳統著番白裇衫灰色長褲。第一日返學，見到學校個草地足球場都算大.


不過清一色係男仔，好鬼無癮。聖約翰喇沙係喇沙會創辦人,之後辦埋學校。


我睇番貼咗出嚟嘅告示，我同兩個同學編咗落Ｂ班，另外兩個分別去咗Ａ班同Ｃ班。

一入班房梗係唔好搵個坐近老師嘅座位喇，費事郁吓就俾老師問野，樁吓眼瞓都唔得方便！我左揀右揀，終於揀咗個中間位坐低，剛坐好就有位年約三十歲穿著旗袍嘅女老師入嚟，佢跟住向我哋講：歡迎各位新同學！我係你哋嘅班主任，我叫揀剩尾…….老師未講完已經引起哄堂大笑，咁又係嘅，老師個樣老老土土，睇怕都未結婚啩！怕且真係揀剩尾喎!老師可能己經習慣咗，佢喺黑版上面寫咗三個字：簡~靜~美。然後問大家笑完未？笑完我就派個上課時間表俾大家。睇嚟老師嘅道行有番咁上下，一啲都無嬲。

佢跟住講一啲有關學校嘅資料，我讀嗰間係教會學校，有四位修士，分別係Brother Felix,

Brother Pius,


Brother Paul


and Brother Hubert.
　
Brother Felix係校長，花名叫大柴, 唔係幾好老脾,有次巡班房,見到有個同學趷張椅,由於個同學坐最後中間嗰排最後嗰個座位,張椅背咪整花咗班房後面幅牆囉!佢見到咁嘅情況,即刻衝入班房,將同學個書包,由三樓擲咗落操場,跟住同嗰位同學講:Take your bag and go home!查實take乜鬼吖!個書包都俾佢揼咗落操場,應該係:find your bag and go home至啱!

咁多個brother, 最和善嗰個就係Brother Pius,佢教我哋英語;而Brother Hubert係我哋嘅化學同音樂老師,佢係德國人,啲英文唔係咁準,water講成what鉈,佢嗰樣真係幾似漫畫裡面個大蕃薯架,所以佢個花名就叫大蕃薯。記得有一次,我哋上音樂課,嗰首歌嘅歌詞中間夾咗幾句中文;唱一句英文Chritmas tree,跟住唱一句中文:聖誔樹!我哋專登大大聲唱:Chritmas tree!大蕃薯!雖然佢唔識聽中文,但啲音有少少唔同,佢聽到側起個頭,但又唔知我哋整鬼佢,我哋一路唱,一路笑,佢就擰返轉頭大聲咁問:What so funny? 你話幾咁過癮喇!

學校分四個社，我哋會編入其中一個，每年運動會會進行各項比賽。咁多個社，最勁嘅係Felix House, 年年都係呢個社攞總冠軍。無他嘅，鬼叫Felix係校長咩！老師識做，所有運動叻嘅學生都編入呢個社，搵食要醒目，擦鞋係其中最基本嘅求生技倆。我就編咗入Hubert House, 屬於運動最屎嘅社。

老師話我哋每個同學都要揀番個英文名，如果唔係，啲鬼佬老師上堂就唔識嗌我哋架喇！坐我隔離嗰同學姓黎，佢好威咁同老師講佢英文名叫Johnny。老師讚佢叻仔有英文名，跟住再問其他同學有無英文名？結果就大家就你眼望我眼，原來其餘全部都無英文名！老師就攞咗張印滿英文名嘅紙俾大家揀，輪到我嘅時候都唔知揀邊個先至好，後面嗰位同學叫牛哥，佢話Albert呢個名正呀，重猛咁叫我揀添，我話是但喇！不過嗰陣時又唔識駁牛哥,個名咁好,點解佢又唔揀? 而Albert係我第一個英文名。

好喇！老師話，依家每個同學都有英文名喇，跟住叫啲同學輪流介紹自己個名俾其他人認識。同學依次序發言，有幾個同學噏完佢哋個名之後，大家都揞住個咀笑。好似生馬騮Simon Lau，晏啲返Andy Fan，破產Paul Chan，裝飯John Fan……….等等。

 

隔離嗰條友仔Johnny Lai官仔骨骨，啲頭髮蠟到立立令，校服衫盪到起晒骨，照睇屋企都有個錢啩！條衰仔睇落都幾型仔嘅！佢學緊功夫，

所以手瓜起蹍，不過有樣唔好，就係成日都想搵人打交。熟咗之後，佢周不時問我前面位嗰個Raymond係咪好寸，如果係嘅話，佢就郁硬佢！我心諗你個衰仔想搵我過蕎，無咁易！老虎都唔出聲，癈鬼事啋佢。

先前講嗰位Raymond，佢除咗讀書叻，打乒乓波都有番咁上下，



最慘就係佢成日都嬴，所以好多同學都唔順佢。坐喺佢後面嗰位叫九叔，佢都唔係好順Raymond！我哋嗰陣時興用墨水筆，九叔就靜雞雞將啲黑水唧落Raymond件衫領上面，我哋坐喺後面睇到晒，但無人出聲，個個心諗抵佢死，平時咁招積！

第二朝返學，Raymond拎住件有墨水漬嘅白裇衫向簡婆（我哋安老師嘅花名）投訴，老師問九叔係咪佢嘅作所為，九叔直認 不違，老師罰佢洗番乾淨件衫。呢次事件之後，九叔俾我哋一個做得出就要認嘅大將之風印象。

雖然話係男校，但有個同學真係好乸型,

講野陰聲細氣，塊面白到好似搽咗粉咁，行步路都扭吓擰吓，大家安咗個花名俾佢叫乜姐。佢去親邊度啲同學都避開佢或者玩吓佢，睇落佢都幾慘！

我返咗學約莫兩個月，學校有大改革。我哋之前連校服都唔駛著，求求其其返學都無人理，有啲高年班學生，著件花裇衫返學，你話係咪好誇張呀！為咗改善形象，Brother Hubert 每朝會企喺學校大門，檢查學生有無遵照規則，著校服返學。假如唔按指示嘅話，嗰日就可以即刻返屋企再瞓過喇！逢星期五下晝，老校(Brother Felix)就會透過課室個咪宣佈:Your attention please, inspect school badge next week!

話明剩係查校章，所以嗰一個星期你著乜都無人理你，最緊要有校章。你或者會有啲奇怪，乜個校章唔係縫咗落件衫度嘅咩？我哋嗰陣時用個萬字夾將個校章夾喺件裇衫度，放咗學去WET嘅時候，就拎走個校章，費事俾人睇到係邊間學校啲學生咁曳！

啲鬼佬做野好得意，會預先宣布每個星期檢查邊一樣野，好似校章，校呔，校褸，白裇衫，灰色長褲等等。檢查校章嗰個星期，話知你乜都唔著呀！最緊要有校章；到檢查校呔嘅時候，最緊要有校呔，就算你無帶校章，佢都唔會趕你走！我都唔知啲鬼佬修士蠢定有原則，抑或知道我哋班友仔做野是是但但，瀨屎瀨尿，咪俾少啲壓力我哋囉！

成班男仔喺埋一齊，我話唔會打架就呃你嘅！就算唔係真正打架,都周不時郁手郁腳喇!

嗱!嗱!嗱!你哋睇吓喇!信未!

通常高年班嘅同學恃住高大身形，蝦蝦霸霸！好多時我哋踼踢吓波，佢哋班友仔都會搶咗個草地埸嚟踢，我哋就好似隻非洲土狼，食緊臘物嘅時候，突然出現咗隻獅子嚟搶食，打又唔夠佢打，唯有走頭囉！
其中有個專蝦我哋嘅學長，後來竟然做咗藝員！

高年級同學恰低年級同學好似係理所當然嘅事，不過同級同學都會分黨分派，最唔公道嘅就係個樣生得鈍嘅同學，會成為大家玩弄對像。我嗰班有個同學肥肥婑婑，剪個平頭裝，口唇特別厚，講說話又帶有口音，典型嘅鄉吓仔。我雖然喺新界長大，不過好彩無佢咁鈍。佢個花名叫肥豬王，有啲百厭同學，一得閒就去攪吓佢，試過放口襟釘喺佢個座位度，佢一吓唔為意坐咗落去，痛到嗌阿媽！班友仔就喺度狂笑。我覺得肥豬王都幾慘，個樣生得鈍唔關佢事，最多咪關佢老豆老母事！但受到直接傷害嘅係佢，所以我唔會好似其他同學咁，得閒就搵佢過吓癮。不過隔咗唔夠半年，有一日，大家都眼前一亮，原來肥豬王戴咗幅黑超返學，聽聞跟咗《大佬》即係入咗黑社會，自此以後,無同學夠胆再玩佢！

至於打架場面周不時都見到，我個班有個同學叫阿松，佢高大有型,住喺元朗區，屋企養咗幾隻狼狗。有次佢嗰幾隻狗俾人落毒整瓜咗，

佢一口咬定係低我哋一班嘅同學所為。終於搵咗一日質咗嗰條友幾拳。

另一件事較為震憾，有個教西史嘅老師，有一日食完飯，喺行返學校途中俾人伏擊，打到成面血，門牙都打甩埋！佢鍾意玩泰拳，聽講喺外面得罪咗有勢力人士，俾人係學校門前教訓，等佢喺學生面前無晒飛屎！

除咗校園暴力之外，班同學都好百厭。有一日，九叔同我講有啲英文佢唔係好明，查實九叔啲英文唔錯嘅，我以為佢想考我，咪跟佢去睇睇囉。去到校長室門口，佢指住門口問我點讀同點解？咦？係喎乜咁得意嘅，點解校長室叫：Principal of ice?後尾先至發覺原來班友將office其中一個f撬走咗! 重未算，唔知邊個又手多多，將Toilet其中個i字撬走,變成To let。總之班友就有破壞無建設。  

我哋12點9食飯，2點上課。學校附近得間舖仔，但只有湯麵賣，



如果要食飯，就要搭車出上水或者古洞。時間己經唔多架喇，點知有啲巴士司機喺途中停低架車，話要查半價証，成架車塞到爆晒，查得嚟重邊有時間食飯呀！我哋成班同學好齊心，一齊喊打個司機，嚇到佢即刻開車。跟住九巴就向學校投訴我哋，由於巴士佬認唔到邊個同學，學校奈我哋唔何！唯有每個星期喺個咪度宣佈，呢個星期又接到幾多單九巴投訴，


呼籲同學自律，以免影响學校聲譽。

明知係學生都查我哋有無帶半價証，啲司機分明喺度玩野！我哋條氣梗係唔順喇！為咗挑戰九巴嘅投訴，我哋啲同學就喺個書包表面寫到花花綠綠，內容都係同打倒九巴有關 ！我個書包都寫到滿晒，我啲藝術字都可以喇，所以好多同學個書包啲字都係我嘅傑作！

查實寫呢啲標語好簡單,求其畫個圖型:

跟住喺上面寫啲字:

如果想有立體感,咪加厚佢囉: 驟眼睇以為係條蟲,查實係英文: DOWN WITH KMB.

寫完英文,當然要有中文喇!不過都係照板煮碗。

咁你呢間學校有無啲好嘅學生架！你或者會咁問

? 有就有，少啲咁解啫！我讀慌溫時,隔離班有個同學叫細路仔,佢真係好細粒，一啲都唔起眼,完全無同學會留意有呢個人存在,直至學期完結時派成績表先至知。我哋嗰陣時派成績表係三班一齊排名次嘅,喺禮堂由老校逐個嗌名,然係上台攞成績表,有A,B,C三班,總共138個同學,考第一梗係威威喇,第一個上台攞成績表喎!之不過考包尾個同學就好無癮,因為一頭一尾最引人注目,反而考中中地就無乜人留意!嗰個細路仔就係考第一嗰位同學喇,由嗰日開始,所有同學都識得佢。我哋後尾先至知佢嘅背景,

原來佢老豆老母係耕菜園,為咗慳錢,佢每日由粉嶺步行成粒鐘返學校,放學又用成個幾鐘行返屋企,咪話呀，條路都唔近架!



啲校服褲爛咗都無錢買,修補到一笪二笪,佢雖然生活清苦,但讀書讀到咁好成績,係我哋所有同學嘅榜樣!喺咁嘅環境之下，都攞到咁好成績,確實好難得,大家都報以熱烈嘅掌聲!

呢個世界不嬲都無公平嘅,有啲同學屋企好窮,但有啲又好有錢! 另有個同學叫阿JACK，喺中三插入我讀嗰一班。佢住喺港島梅道,



後尾先至知係有錢人住嘅地方。佢喺邊間中學讀書就唔多清楚，不過聽講成日同人打架，佢老豆攪佢唔掂，好彩識得教會高層，將佢轉嚟我間學校繼續學業。老校重專登俾佢喺學校寄宿添。佢高大威猛，唔似讀中三嘅學生，我無睇錯，因

為有次見佢揸架紅色嘅電單車返學

，究竟佢揸大胆車定夠咗18歲呢?真係天曉得。到咗換季嘅時候，佢老哥件校褸就真係寧舍不同，我哋一般會去買現成校褸,但佢嗰件就特別度身訂造，變成中褸，金色鈕門，中間束腰帶。我哋拎書包，佢就拎占士邦喼，唔好話女子,連我哋班小和尚都覺得佢真係好有型！老師踫啱佢都幽佢一默：你依家返學定上班呀?

有型又有錢，梗係有吸引力喇！一落堂就有成十個同學黐住佢，食飯都一齊！我記得嗰陣時上水有間飯店叫關溢記，嗰度啲碟頭飯唔錯架,整得幾好味添!我哋好多同學同老師都鍾意幫襯.阿JACK同成班傍友日日都去嗰度落腳,佢哋成圍枱就威猛喇,

阿JACK唔食碟頭飯咁CHEAP,通常會嗌幾個小菜,再加支大啤!

.老師喺隔離枱都係嗌碟頭飯喳!

光棍佬教仔:便宜莫貪!呢句話說真係無講錯. 我讀慌溫時,教我地理嘅老師姓潘, 花名潘仔。有日放學, 佢走埋嚟問我係咪住响元朗? 我話無錯！潘仔話除咗我之外，重有無住元朗嘅同學哩？我就指吓隔離嗰位同學阿添，話佢都係住喺元朗喎! 潘仔即時話: 咁就啱喇! 我一陣間去元朗,順路車埋你哋兩個！ 吓? 咁筍有順風車搭？正喎！我心諗! 咁就要攬住阿蛇喇!



我當時一啲都無懷疑過潘仔嘅目的，加上佢駕嗰架係鮮紅色嘅HONDA跑車，平時見到都想上去坐下, 今次無端端有得坐喎， 重唔即刻<NUR>飯應咩!

潘仔架車真係正,唔駛問都

好過去廹巴士喇!潘仔開車離開校園轉出大路,然後轉右,我好奇怪？問潘仔去元朗應該轉左喎! 潘仔話佢要返一返屋企拎啲野先至去元朗。 哦! 原來係咁! 佢將架車一直駛去上水圍， 原來佢喺嗰度租咗間屋方便返學教書。佢落咗車之後, 返咗入屋無耐，就拎咗個大膠桶同二舊海棉出嚟

,

重有罐臘水添!



佢同我哋講:麻煩你哋幫幫手, 我要去沖個涼先,唔夠時間抺車! 

講完就即閃返入屋。頂你個肺！我同阿添一路抺車一路口噏噏! 結果嗰日比平時遲咗成粒鐘返屋企。隔咗個幾月,有日放學又見到潘仔走埋嚟,未等佢開聲我即講:潘蛇,我留喺學校打波，未走住！後尾同其他同學講起，先至知道原來好多住喺元朗嘅同學都中過招，個個都知道呢個阿蛇幾咁縮骨！

我讀慌吐時，換咗個老校，因為Brother Felix夠期調走。嚟咗個老校叫Brother Alphonsus。佢一上場就嚴格規定所有學生必須穿著整齊校服番學。唔可以再出現有呔無校章；有校章又無白裇衫咁嘅情況出現。佢個頭比較細，雙耳尖尖，你一睇見佢個樣就會諗起啲老鼠，所以我哋叫佢做老鼠頭。佢嚟咗之後，一得閒就四圍巡，大佬呀，你係老鼠渣，點解好似貓咁四圍巡架！我哋由嗰陣時開始無咗咁放肆，書包上面DOWN WITH KMB嘅英文字擦番走晒，費事郁吓就俾佢召入校長室照肺。

我讀書嗰陣，香港正處於足球狂熱。香港隊嘅實力喺東南亞數一數二，香港代表隊曾經殺入喺1973年在漢城舉行嘅世界盃亞洲區外圍賽嘅準決賽。嗰陣時重未有英超，亦無好似依家C朗，卡卡

卡斯拿斯同美斯等偶像球星。
我哋擁戴嘅大部份係土產球星，好似李惠堂

何祥友，葉尚華，胡國雄，，朱柏和，姚卓然
張子岱

張子慧，鄭潤如等等。而球隊則有九巴，愉園，消防，南華，星島，精工，荃灣等等。

當時賭波重未合法化,如果要賭嘅話,只有買外圍。有個書友仔好有遠見， 即刻開咗個檔口俾同學買波，當然無依家馬會咁專業喇！得主同客買，打和就退錢，賠率由佢定。原來好賭係人嘅天性, 開咗無幾耐,已經有好多同學幫襯過佢，唔夠一個月就贃到盆滿砵滿 。所謂瘦田無人耕，耕開有人爭，唔夠兩個月隔離班班都開咗兩三檔。

最記得有次榜首南華大戰榜尾荃灣，全天下都睇好南華話無得輸，就好似幾年前嘅唐唐同震英，結果南華就1蚊賠個1，而荃灣就1蚊賠3蚊，甚至4蚊，買得少無肉食，嗰次啲同學買得好大，結果爆大冷，九成九輸到連阿媽都唔認得！跟倒錢落海真係無乜分別!

爆完大冷之後，啲書友仔變咗仙都唔仙，個個同學都諗起一首歌嘅歌詞:落街無錢買麵包!所以俗語話齋:幾時會見到賭仔有錢肥買田?呢句說話講得一啲都無錯!



頭幾日檔檔都無晒生意，但係過咗唔夠一個禮拜，啲人嘅賭性又返番嚟，班同學又再賭到飛沙走石！有一朝，班同學又試趁住老師喺黑板寫緊問題嘅時候，傳紙仔落波欖，點知無提防老鼠頭喺度巡緊課室，我哋嘅課室分前後門，上課時全部門都打開，除咗最後排同學有可能會見到老校之外，多數同學都唔會察覺。老鼠頭見到同學喺度傳一張紙，覺得好奇，即衝入班房同埋擸走咗張紙，佢無出聲就沿住後門出番去，連老師都係事後先至知老校入過嚟！

落咗堂之後先至知道,原來老鼠頭喺隔離班房唔係擸咗張波欖紙咁簡單，而係波欖簿，紀錄哂之前買過波嘅書友仔個名，大家都知道呢次肯定好大劑，曾經幫襯過嘅書友仔人人自危！

到咗下晝二點，喺上堂之前，班房個咪又試响起，身有屎嘅同學都好緊張，睇吓老校點處理呢件事。呢次由副校長宣讀，意思話學校發現有同學賭博，學校唔會容忍呢種風氣，一經查明，會嚴肅處理。嚴重違規同學會被踼出校！最慘我都無乜印像有無喺嗰檔買過波，如果有嘅話真係好大鑊！副校繼續講，校方已經掌握咗一份參與賭博同學嘅名單，由下星期一開始，每日老師會喺班房側邊嘅細黑板寫2個同學姓名，如果見到自己個名嘅同學，會被暫停學藉，同埋要即時離開學校，校方稍後會通知該學生家長，到學校與校長會面。而懲罰則視乎各學生參與程度再作決定。如果斷正,分分鐘無書讀,你話呢次大唔大鑊喇!

我都唔知呢啲係咪叫白色恐佈，你話我哋重邊有心機上課呀！之後嗰幾日返學都誠惶誠恐！

周一係第一日開始寫名單嘅日子，老師一入班房就喺黑板度寫咗suspend 同expel兩個字,跟住喺suspend嗰欄之下寫咗兩個同學姓名。當時有個有趣嘅現像，全班只係得幾個同學擺低個書包，即係話無參與賭波嘅同學廖廖可數！其餘嘅就攬住個書包，見到自己個名就唔駛嘥時間，可以即時走人。我睇完黑板之後，好彩榜上無名,鬆一口氣！

至於見到自己個名嗰兩位同學，好無奈咁離開課室，我哋初時都唔知點解老校唔一次過寫晒啲名出嚟，要逐個逐個咁寫，後來先知原來本波欖簿寫咗同學嘅花名，學校要花時間查証嗰啲同學嘅姓名！好似肥仔，大牛，屎坑蟲等等花名，老師點知係邊個呀！結果喺嗰次事件，總共有7個同學要見家長先至可以復課，有2個踢出校。

我讀緊慌吐嗰陣時啲天氣認真麻麻，由暑假開始到咗十月份，差唔多無一日好天，好多時都落滂沱大雨.



個鬼佬老校通常喺星期五差唔多12點9放學前，透過班房個咪宣佈：Your attention please, no school this afternoon! 我都唔知點解?平日就算落狗屎都無得早走,唯獨係星期五例外。個天都算唔話得架喇，跟住成二個月嘅星期五都落雨，我哋一到星期五見到落雨就鬼咁開心，預先睇吓邊間戲院有好戲上演,而上水行樂，

粉嶺聯和


同元朗嘅同樂係我哋常去嘅地方.

有一次又係落大雨唔駛上課,我同幾個同學去上水睇戲,喺新豐路去緊戲院途中,突然有個交通警<唧>一聲停低架鐵馬,

跟住問我哋去邊? 我好寸咁話:乜睇戲犯法咩?阿蛇!點知個阿蛇皺晒眉頭咁話:我依家唔係問你,係問緊我個仔!原來佢係其中一個同學嘅老豆!

唔知大家對爭取中文成為法定語文呢個運動有無印象? 香港嗰陣時係英國植民地, 官方語言同文件都係以英文為主。自1967年暴動之後, 民族意識提高咗, 有人問點解中國人聚居嘅地方,唔可以用華語呢? 由嗰一刻開始,整個華人社會,為咗爭取中文成為法定語文不時舉行集會, 重作咗首歌添,歌詞我重依稀記得:

香港華人四百萬,
中文沒落百多年,
為什麼?
五千年文化傳統捨棄了?
華人不能用華語!
成什麼體統!
成什麼體統!
我們要團結!
我們要奮鬥!
爭取中文成為法定語文!

為咗响應爭取中文成為法定語文運動,學校嘅Head prefect喺每一班搵咗個代表,然後召集各班同學,喺學校操場集會以示支持。由嗰陣時開始，同學首次接觸校園以外嘅社會運動，聲援及爭取市民應當享有嘅權益。呢次運動，對同學有深遠影响，對於一啲唔合理嘅措施，原來可以透過大家齊心爭取！

學校每年十月會舉行運動會，而運動會之後會放假一天。我讀慌溫同慌吐嘅時候都係咁安排，但自從經過支持中文成為法定語文集會之後，同學爭取合理權益嘅意識提高咗，呢種意識有好有唔好，因為同學嘅判斷力只係環繞住個人利益，認為合理嘅權益未必正確。

就喺我讀緊慌three嗰一年，各班選咗個代表見校長，要求運動會舉行之後放兩日假。之前已經講過老鼠頭並唔係一個易話圍嘅校長，佢未聽完已經將我哋呢個要求否決，重話學校對不合理嘅要求唔會讓步咁話，最後不歡而散。

我哋之後開會，透過代表向老鼠頭反映，如果校方一意孤行嘅話，我哋所有同學將會杯葛呢次校運會。點知老鼠頭十分強硬，警告如果報咗名嘅同學又唔去參賽，加上又無合理解釋嘅話，有機會踢出校！嘩！搞到咁大劑，好多同學都唔敢玩野，但條氣又唔順，點解救呢？我哋為咗宣洩不滿,投票後決定進行靜坐示威集會,


老師警告,任何形式嘅抗議活動只可以喺課餘時間進行!我唔知當時如果華人當校長,會唔會俾我哋咁做!但當年我哋已經體驗乜野叫民主。喺集會上,大家高叫: We want holidays! 幸好最後集會都係喺和平同理性底下進行,並無不愉快事件發生!

面對強硬嘅校方,我哋終於諗到條絕世好蕎！到咗運動會嗰一日，


所有報咗名嘅同學依時齊集起跑點，不過就齊齊以慢動作完成賽事，跑一百公尺用咗成十九秒，最有趣嘅係5個選手一齊衝線；而1500公尺用咗30分鐘，大家貫徹團隊精神，一齊衝線；鉛球最遠嗰個推咗3公尺。

老鼠頭俾我哋激到紥紥跳，但又搵唔到郁我哋嘅藉口，結果嗰一年嘅學運成績,係歷年最差。到頒獎牌嘅時候，因為每個賽事都有平頭冠軍，最後連獎牌都唔夠用。當年邀請了陳日新太平紳士負責頒獎,我相信當時場面相當尷尬！

呢次事件有無令到喇沙會上層震怒呢?就不得而知! 但老鼠頭喺運動會之後黯然被調任離開！而經過呢幾年嘅校園風風雨雨之後，同學變得成熟，開始正式投入番書本裡面！我哋嗰陣時雖然反斗，但成績唔會比同區學校差。我之前提過嘅Raymond同九叔，投身社會之後,雖然工作不同,但竟然再有接觸，你話係咪有緣喇!前者係一個著名大狀，而九叔退休前係高級警司!

依家望返轉頭, 覺得讀書讀得好定唔好, 主要都係靠自己。個別同學將個責任俾咗學校,但佢哋有無諗過點解有部份同學又會咁叻呢? 我之前提過嗰個細路仔,校方特別批准佢有幾科可以豁免上課, 自己一個喺圖書館溫習。佢報考9科,其中一科係自修報考,結果都攞到好成績,之後入咗中大。不過依家搵錢最多嘅同學,並唔係考試成績最好嘅前列份子, 好明顯讀書同搵錢中間並無等號。

雖然依家學校淪落到BAND FIVE，但好多有成就嘅校友,都無話學校淪落到BAND FIVE而唔敢講自己係喺嗰度畢業。好似前運輸署署長黃志光被問到喺邊一間中學畢業嘅時候，佢話喇沙，跟住補充多一句，係校園暴力嗰一間！而曾繁光醫生,鄭汝汾教授同蔡潮盛教授等等有成就嘅校友, 雖然離校多年,仍有關注學校嘅發展,實屬難能可貴。近年學校招收埋女生,和尚寺對於母校而言,正式劃上句號。

(完)