日前喺山東招遠麥記，發生因索取電話號碼不遂而斬人血案，一單雞毛蒜皮事，竟然導致人命喪生！我覺得呢種慘劇，完全可以避免！因為對方嘅要求，只係要電話號碼，係一件舉手之勞嘅事！假如有一日，當我喺內地麥記嘆緊豬柳蛋漢堡嘅時候，咁啱又有邪教信徒走埋嚟問我攞電話號碼，由於生命無take two，我會非常合作，逐一將電話號碼交俾佢哋。
第一個係凸首嘅電話號碼，等佢哋知道乜野叫語言偽術，無論問任何問題，聽完答覆之後，都好似搵唔到答案！
第二個係Tree Gun博士嘅電話，等佢哋聽聽乜野叫鍾式英文。不過就算唔明，都唔好斬人！不妨自我檢討一下 Are you dreaming on your office or you are not attended at your office？
第三個係顛狗嘅電話，等佢哋聽聽地道嘅港式粗口，我指嘅係港式粗口，唔係港式奶茶，教友唔好誤會，以為會好純同好滑！
第四個係長毛嘅電話，每個答案都噏成粒鐘，等邪教見識一下乜野叫港式拉布！唔好搞錯，絕對唔係港式拉麵！因為嚟嚟去去都係嗰三幅被，無厘味道係好正常，千祈唔好投訴！
第五個係保安局局長嘅電話，個個問題嘅答案都係一模一樣：本人對於呢件案件不作個別評論！連邪教徒都以為自己撞邪，點解聽嚟聽去都係同一答案！
第六個係澳門凸首催世安嘅電話，等佢哋見識一下澳式普通話，睇下同山東普通話有無分別！聽唔明唔緊要，起碼可以有餐笑！
如果重嫌唔夠嘅話，我俾多個網絡維修熱線電話過佢哋：廣東話請按一字，For English press two,刨冬瓜錢罌山！……好對唔住，依家嘅線路非常繁忙，請等一等，我哋嘅職員好快會接聽你嘅電話……好對唔住，依家嘅線路非常繁忙，請等一等，我哋嘅職員好快會接聽你嘅電話……好對唔住，依家嘅線路非常繁忙，請等一等，我哋嘅職員好快會接聽你嘅電話………
嗱!唔關我事,千祈唔好搵把刀隊住我！係你話想要電話號碼架渣!
你教精我喇！快！快的畀以上電話號碼我傍身喇！
回覆刪除火姐,重有好多電話可以考慮架,有時間不妨記低啲乜乜銀行物物財務或者廋身代言人嘅電話,以備不時之需 !
刪除有D人派卡片演野, 我就會話將佢既卡片比保險經紀.
回覆刪除哈哈!咁都得!
刪除Tree Gun 果邊d 英文出事，都唔係第一次。上次印咭片，已經出過一次大笑話。
回覆刪除所以他的學歷有可能是買回來的!在有準備之下,以及講數句英文都洋相大出,他仍能夠在立法局佔一席位,可以想像香港立法局的平均質素何等低落!
刪除你嗰6個電話號碼都叫做係比人聽Y！索取電話不遂打C人嗰幾件妖獸, 應該比以下呢個號碼佢搵唐生至啱＞＞http://youtu.be/LylC-6s0Y94
回覆刪除http://youtu.be/hlYNo7hve7M
刪除唐生：
做咩啫？你愛呀？你愛就要講, 你講啦··你愛就講啦···
CKK果然係無記嘅忠實擁躉! 連呢啲片段都搵到出嚟! 總之撞啱呢類狂人，就註定唔好彩喇！
刪除呢編嘢都可謂幽默夾抵死喇、十分過癮呀！
回覆刪除域兄,你都咪話呀! 呢啲野好鬼邪,有開就有架!
刪除你嘅做法好值得大家學習呀！
回覆刪除無辦法呀! 明哲保身嘛!
刪除最鬼憫憎就係第7個呀！
回覆刪除我一聽到廣東話按1字,就會即時咳線!
刪除〝第一個係凸首嘅電話號碼，等佢哋知道乜野叫語言偽術，無論問任何問題，聽完答覆之後，都好似搵唔到答案！〞...呢個最令人勞氣， 講咗等於無講，
回覆刪除可能激嬲D人...又多幾單斬人血案！
哈哈!點會呢,我估結局有兩個,1.俾凸首激死咗,2.自由行嚟搵特首算帳!
刪除