端午節

一諗起端午節就諗起粽子，差啲唔記得重有屈原添！


細個讀書嘅時候，老師話屈原係楚國大臣，佢担屎唔偷食，忠心愛國，就 係咁過開罪咗啲利益集團，結果遭奸臣誣，流放江南，最後悲憤難平，喺農曆五月初五，投江自盡，以死為諫。後人為咗紀念呢個忠義之臣，唔想佢嘅屍身，被江中游魚啄食，喺佢投江之日，將大量粽子拋落江水餵魚。咁都重未算，驚住有啲魚唔鍾意食粽，咪白做？所以加埋扒龍船比賽，鼓聲震天，將啲游魚唔嚇死都嚇走！以前細個，對老師所講 ，深信不疑！

端午節又叫端陽節，五月初五係夏天陽光最猛烈嘅一日，故有此命名！我細個時祖母會將一束乾艾草掛喺門口，聽講嗰日係夏天最毒嘅一日，所以要掛啲艾草喺門前嘅牆璧上，據講艾草具有避邪去毒的效果！

喺端午節前幾日，祖母會去雜貨舖買定啲粽葉同埋咸水草返屋企，準備包粽。查實粽葉係來自箸葉，麻竹，月桃葉或者香蕉葉。包粽嘅材料主要係綠荳，咸蛋黃，五花腩，梗係要有糯米喇！

祖母首先將啲粽葉同咸水草用水烚一烚，然後浸番幾粒鐘。另一方面，將啲開邊嘅綠荳同糯米用水浸3個鐘，而五花腩則要用五香粉醃製備用，咸蛋黃成隻太偖侈，每隻開邊可以包兩隻粽。

包粽比做油角同煎堆簡單，但祖母就唔俾我地掂！話我哋唔識包，好容易整爛啲粽葉，所以我同大哥想過吓癮都唔得。 祖母話粽葉有分底同面，葉骨突出嘅係底，無葉骨嘅係面，首先將兩塊粽葉平放同部份重疊，咁先至唔會漏糯米。然後舖一層糯米，再舖一層開邊綠荳，然後放五花腩同咸蛋黃，跟住舖開邊綠荳，最後再舖糯米，咁就差唔多攪掂，最講技巧要算係將啲材料用粽葉包好，千祈唔好包太多饀，因為會整爆啲粽葉，而且用咸水草扎粽都好講技巧。如果包得太緊，啲粽整出嚟唔鬆化；包得太鬆嘅話，啲粽會漏饀。有時見到人哋包粽以為好易，查實都有技巧架！

我細個時無依家啲粽咁多花款，大部份都係用五花腩，咸蛋黃同綠荳做饀。如果想豐富啲，咪加多幾個粟子囉！食起上嚟別有風味架！除咗呢類咸肉粽之外，就只得梘水粽。梘水粽要用糖點嚟食，圍村啲婆仔包粽嘅時候會擺支香雞喺隻粽中間，觀感上會好睇啲！可能大家唔知乜野叫做香雞，當啲香燒完嘅時候，剩番染咗紅色嘅木叫香雞，我都唔知嗰啲染色物料有無毒，所以為咗食得安心，我會將染咗紅色嘅糯米搣晒先至食！

其後香港開始富有，啲人又諗到其他包種饀料，好似乾蟯柱，燕窩


甚至鮑魚，



再加埋金薄等等，有咁豪華得咁豪華！但豪華唔等於好食，我都係鍾意食傳統嘅粽子。嘻嘻！老老實實，我未食過鮑魚同燕窩包嘅粽喎！係咪真係唔好食呢? 我估架渣!如果食過呢類粽嘅朋友,不防向我糾正或者分享一吓食豪華粽嘅心得同經驗!

到食粽嘅時候,祖母叫我哋小心啲解開粽葉,原因係唔想整爛啲葉,洗番乾淨,又可以留番出年用過。 老一敞嘅人好慳儉同環保,唔似得依家也都話揼!


細個逢係過節都好開心，因為要過節先至有雞食，平時頂多都係豬肉。而端午節都唔錯，有假期，又有雞同粽食，重有就係龍舟競渡。嗰陣時一到諯午節，電台通常會播一啲應節音樂，好似賽龍奪錦，電台一日播到黑。

當年都有龍舟比賽，不過無依家搞得咁墟憾！國際龍舟請賽？嗰陣時邊有呢支歌仔唱呀！我記得喺屯門青山彎近老鼠洲海面有龍舟比賽，而大埔、元洲仔、西貢、香港仔、





同赤柱都有得睇！其他地方有無擧辦就無乜印象喇！

雖然端午節已經過咗，但一聽到呢隻賽龍奪錦，又會即時感受到賽龍舟時鼓聲震天嘅熱鬧塲面！

http://www.youtube.com/watch?v=40KTXcXb4GU