危機四伏 (上)

上回講到我收完警告信之後，己經心中有數，知道喺呢個衙門繼續落去，無運行不特只，喺工作上重會吓吓俾人玩針對，雖然我唔怕佢哋呢啲小動作，但喺咁嘅環境下工作就無癮喇！



所以第一時間遞交跨衙門調職申請，但估唔到申請表俾當時嘅主管故意收起，結果遲咗整整兩個月先至去到總部人事科。但喺嗰個時候，京城總部落咗命令，我必須在一星期內調離原先工作嘅衙門，但跨衙門嘅調職安排，無一年半載，都唔駛旨意調得走。當其時,

8大巡理府先後表態，拒絕我嘅調任，唯獨沙田區嘅主管保持沉默，結果上頭將我調往該區巡理府。

到任後才知道，該主管跟五短高官沒有交情，


平日放工剩係識去進修，老闆攪嘅擦鞋吹水會永遠唔會見佢出現，呢啲獨行俠點會得老細好感？結果五短高官無將佢列為自己友。呢類進取型衙差，工餘時往進修增值,工作又賣力,進升指日可待。五短高官唔想見到呢種情況出現，因為若然呢條友升咗級,有乜公事想走吓後門都唔得!佢最後想出一個兩全其美之法，就係故意唔俾我走，將我呢個麻煩友塞俾佢，一舉兩得！佢以為我會將所有之前嘅怨恨，遷怒喺新老細身上，最後攪到佢雞毛鴨血，連級都無得升,咁就正中下懷。

所謂人言可畏，我相信未去履職之前,個底已經俾人起清。我如期到該巡理府報到，有一位羅先生接待我，他是該區的二主管。該巡理府共七層高，二樓係寫字樓，四樓設有另一個負責交通告票嘅部門，我安排管理該部門，有四個下屬。佢哋都知道我調任嘅原因，而梅蘭嗰件事，佢哋都略有所聞。

大主管梁書記跟住接見我，佢話知道我調嚟嘅原因，但就唔會理會我之前嘅傳聞。梁書記跟住套用咗鄧小平嘅白貓論，佢話無論黑貓定白貓，識捉老鼠就係好貓！

呢位主管同較早前俾警告信我嗰位差得遠喇！以前嗰位花名叫豬油包，行步路都慢過人。我記得初初調入呢個衙門時，成個月都見唔到呢位大主管，問同事佢係咪放大假？點知無人答到我！我有啲奇怪，佢無攞假，但又無返工，咁都得！呢個係乜衙門嚟架？

我返咗工成個幾月，先至係第一次見到佢！佢乜都唔駛做，平日行行企企，份人工真係好贃！佢當辦公室係無掩雞籠，鍾意就返嚟行吓，唔高興咩？就連人影都無！上頭打電話搵佢唔到，不過又無詐佢形！

佢有一次俾鬼佬大老爺省咗一餐，命令佢以後唔可以入內庭度坐！我問老爺書記，點解鬍鬚鬼佬咁大火氣？原來豬油包趁老爺開庭嘅時候，喺內庭睇老爺份西報，睇完之後又唔執番好，重沖老爺啲咖啡飲添！

有個好奇怪嘅現象，就係到咗月尾嘅時候，豬油包一定唔會坐番喺自己辦公室。喺呢一段時間，打俾佢嘅電話特別多！其他同事個個都咋聽唔到，無人幫佢接電話，等佢個電話响個不停。有次我唔抵得，入房幫佢接聽，對方乜都無講就大聲鬧：「仆街冚家剷！好還錢咯喎！」



我先至知道佢欠人周身債，而啲追數公司嘅電話，到月尾就會响過不停！

我之後跟其他同事講起，原來個個都知佢唔掂！有個同事重話曾經收過一間追數公司嘅信件，要求衙門核實佢目前嘅狀況，是否仍是一個在職衙差？好明顯，追數公司想將豬油包欠錢一事，披露俾部門首長知，藉此俾啲壓力佢！

好喇！唔再講豬油包喇！講返我去咗沙田之後，就喺4樓上班，平時見唔到其他部門嘅同事，返工無人理，收工走咗都無人知，雖然有被放逐嘅感覺，但我卻樂得清靜！我當時就係喺嗰一度，邊做邊等調走。

時間過得好快，不經不覺間，我喺沙田又做咗三個月，有一日，梁書記專程上四樓搵我傾偈，佢問我做得慣唔慣？重話好滿意我嘅表現，觀察咗幾個月，發覺我唔係傳言中嗰種人，重問我會唔會考慮撤銷跨部門調職申請？我考慮到同其他同事相處融洽，梁書記是個明白事理的人，我最後接納了他意見，撤銷調職申請。

我到步時，其他部門嘅同事對我存有介心，但相處過之後,他們知道我並不是一個故意跟老細對著幹的人，加上我之前嗰件事隨著時間而褪色。一年之後，我跟其他部門的同事已經稔熟，還經常跟他們一起吃午飯哩！

有話則長，無話則短。某日我見到內部電郵，知道大主管即將調 任，雖然相處時間非太長，但覺得梁書記是個盡心工作嘅好主管。他臨走前，同我傾咗好多說話，他認同我的工作能力，還說希望能夠再有機會合作哩！

......