2015

為了懷念小時候過年炮仗聲此起彼落嘅情景，我在年二十九啟程回鄉。美其名話回鄉感受有燒炮仗氣氛嘅農曆新年，實際上我係接到令命要返鄉下執吓間屋，打掃一吓園內枯葉，貼貼揮春，掛番副大紅燈籠喺屋前嘅「萬紫千紅」度，同埋買番啲大咭同年花應應節。

依家內地城巿，已經嚴禁燒炮仗同煙花，如有違法，即時行政拘留十五天，所以無巿民夠胆以身正法！幸好鄉下地方，不在此限。

我原本都想買番串炮仗應應景，但見到啲炮仗捲到成個面盤咁大綑，竟然有啲猶疑，估唔到人年紀大咗，胆量卻變細咗。俾著以前，呢啲炮仗啱晒我胃口，結果今年無買炮仗燒！

買妥新年掛飾同年花之後，睇見時間不早，連忙趕快返屋企。我轉完入屋企條路之後，竟然發現成條街只係泊得幾部車！平日想揾個位睇吓都幾難，今日居然通街都係停車位。

查實每一住戶屋前都可以停一部小車,但有啲住戶就好自私，佢哋唔止有一部車，結果要泊到人家門口！我屋企門口對出,通常俾對面標哥泊咗。我呢啲順得人，唔會為呢啲雞毛蒜皮事，同隔離隣舍面阻阻。但嗰日竟然喺我意料之外，唔通未到羊年就開始有運行 ? 唔好諗咁多, 我拿拿聲泊返喺門口側邊。

我唔係喺度唱高調，屋真係唔需要太大，尤其係好似我哋呢啲無錢請工人，下下要自己落手落腳做清潔嘅住戶!

結果我做咗成兩粒鐘先至清潔好，跟住開始掛大紅燈籠，然後貼番幅對聯，擺好啲桃花同年咭，聖誔花夠晒搶眼，所以買咗幾盤擺喺門口度，話時話，喺內地買花一啲都唔貴，所以我都買咗幾盤返香港。

擺番幾盤年花確實有過年氣氛。





   未掛飾物的桃花。

人靠衣裝，佛靠金裝! 估唔到花都一樣，加咗飾物嘅桃花,尤如著咗件新衫,真係醒神好多!

到咗晚上大約十二點左右，住响隔離個外省佬走過嚟拍門，話要燒炮仗，叫我將架車駛開，咁都得!呢啲情況真係只國內先至有，我出門口睇睇，見佢串炮仗成十幾呎長，由二樓垂到落地下，位置正正喺我車尾，我心諗，佢將串炮仗移過少少唔得嘅! 不過新正頭，唔想同佢有拗撬，我唯有將架車駛開，我喺嗰個時候先至知道點解無人將架車泊正喺門口！

話咁快到咗夜晚十二點，呢次真正感受到鞭炮嘅威力，可以用震耳欲聾嚟形容。炮竹聲，煙花爆炸聲，整晚連綿不絕，氣氛真係好濃厚，不過就難以安睡。

年初一我由鄉下返番嚟香港，順便帶咗幾盤花落嚟，增添一下過年氣氛。平均每盤十蚊人仔，桃花68蚊，抵唔抵就見仁見智，但喺香港用咁嘅價錢肯定買唔到。




棵桃花雖然唔係好大棵，但勝在外形均衡!


















 各位網友請記住，喺內地返香港係可以帶花以及生果入境，但倒返轉頭就唔得!

在此祝各位網友羊年快樂，身體健康，心想事成! 遲來的祝福,祈望各位不要見怪!