開PARTY

唔好意思,無新稿件,舊文都翻炒,頂住先!

講番我哋嗰個年代，我指係50-80年代，大部份人屋企都無電腦，唔似得依家啲人郁吓就用電腦同朋友傾計或者上網打機，佢哋可以成日唔出街都唔覺得悶因為有部電腦倍住佢哋。喺日本有位上網發燒友，日日喺屋企上網打機，佢日又打夜又打，竟然打到唔得閒出門口，結果成十年未踏出過門口一步。由於佢平日習慣用電腦嚟溝通，久而久之，結果連講說話嘅能力都退化埋，你話係咪好誇張哩。我哋嗰陣時屋企莫講話電腦，就算電話同埋電視亦唔喺咁普遍，你話留喺屋企做乜？所以我哋一有時間就會揾啲FRIEND玩吓HEA吓，而開PARTY就係當年其中一種最流行嘅娛樂。我相信喺嗰個年代出生嘅朋友，唔多唔少都開過PARTY。

嗰陣時除咗清明，七月十四同埋重陽節之外，差唔多所有節日都喺開PARTY嘅日子。如果有朋友生日，唔駛問阿貴，一定係攪PARTY慶祝架喇。但攪PARTY最緊要有埸地，同埋要有朋友幫手。一啲負責音响；一啲負責食物，食物通常離唔開薯片，菠蘿腸仔，花生同埋汽水等等。

PARTY通常選擇喺夜晚舉行，皆因日光日白會減低氣氛，就算喺夜晚，都要用黑色嘅卡紙貼住啲玻璃窗，務求做到一啲光線都冇。周末係最多人選擇開PARTY嘅日子，因為第二日唔駛番工，可以玩到通宵達旦。加上當時有齣好賣座嘅戲叫《周未狂熱》，直接將周末開PARTY推到最高峯。而負責音响嘅朋友應該係最辛苦，嗰陣時冇微型組合，啲音响好大件同埋好重，好似喇叭，擴音機，同埋唱機等等。攪掂音响之後，又要去借唱片，嗰陣時冇CD同埋LCD，只有黑膠唱片，東又借啲西又借啲，剩係揾齊心目中嘅唱片都嘥唔少時間。之後要將啲唱片整理好，如果攪亂咗還錯俾人，睇怕日後都唔好意思再開聲同人家借。我哋嗰陣時開PARTY全部係用英文歌，音樂分二類，第一類係好勁嘅，俾跳 SOLE用，另一類係情歌，俾跳四步用。

乜嘢叫做跳 SOLE呢？即係一個人亂鬼咁跳，手腳亂撐。唔好意思，我係指我自已咋，完全無意詆毀各位舞林高手。我有時睇番啲粵語殘片，睇到有關開PARTY嘅片段，就會感受到當年開PARTY既開心又熱鬧嘅氣氛。跳SOLE要用好強勁嘅背景音樂先至好玩，好似Deep Purple, Santana, Chicargo,Chic  同埋Eagles等等，佢哋係當時最受歡迎嘅樂隊，開PARTY播嘅音樂一定唔少得佢哋一份，例如：25 or 6 to 4, Le Freak,Evil Way, Black Magic Woman, Dancing on a Saturday night, Smoke on the water, Hotel California，Hot Stuff等等。到咗七十年代尾，Bee Gees嘅唱歌風格一轉，由慢歌變成好Rock 嘅Music,開親PARTY都會播佢哋嘅音樂，好似Night Fever, Tragedy, Grease 等等。而《揸住煲茶》同《奧利花經頓莊》合唱嘅Grease 更成為開PARTY 嘅必然正選歌曲。

至於四步，去過PARTY嘅朋友都知道要揾一個PARTNER一齊跳，亦都係我哋嗰個年代識女仔嘅少有渠道之一，唔同依家，上吓網玩吓飛士卜都可以認識唔少朋友。跳四步嘅音樂，主要係一啲舒情嘅情歌。好似人鬼情事未了嘅主題曲，Unchained Melody；Marial Cavey 嘅Without you; Engelbert Humperdinck 嘅Too beautiful to last； Herman’s Hermits 嘅My Sentimental friend； Bee Gees嘅How deep is your love； Romeo & Juliet 嘅電影主題曲What is a youth ?Michael Jackson嘅One day in your life，重有Patti Page嘅 Changing Partners同埋Bee Gees 嘅Melody fair等繪炙人口嘅歌曲，跳四步一定唔可以缺少。

如果要營造更加好嘅氣氛，喺佈置場地嘅時候，可以加多幾串燈泡。嗰陣時有種變壓器買，接駁咗之後，啲燈光會隨住BASS同埋鼓聲嘅輕重而閃動。鼓聲愈多愈強勁，燈光相應閃得愈頻密同埋愈光。強歌熱舞，配合超勁嘅音樂，加埋不停閃爍嘅燈光，所有嚟開PARTY嘅朋友，都陶醉喺呢種狂熱嘅氣氛之下，就算有乜嘢煩腦，話鬼知你啦！一於好少理，玩完先至算。所以嗰陣時點解咁多人鐘意開PARTY，呢個係其中一個原因。

我記得有次我個FRIEND問我有冇興趣去PARTY。吓？開PARTY？我唔識跳舞噃！點去？跳舞之碼，好鬼簡單，我個FRIEND同我講。如果跳SOLE嘅話，仲EASY，求其郁吓手郁吓腳咁就得架喇。如果想跳得好睇啲，可以加插一啲動作，你可以想像你用條毛巾擦背嘅動作，或者將隻手指指吓天篤吓地，又或者一路《UN》一路好似梳頭咁咪得囉！聽落又唔係好難喎，點知到練習嘅時候，郁極都唔似樣，所以跳舞呢家嘢，真係好講天份，不過我個FRIEND講，喺PARTY裡面，個個掛住跳舞，有鬼人理你跳得好睇定唔好睇咩！咁講法又有道理，跟住我問個FRIEND，四步又點跳呢？

我個FRIEND話依絲執，只要記住個口訣就乜都掂，吓？乜跳舞都有口訣？又幾過癮喎！佢話：落點上上，上點落落，我係指腳部嘅動作。首先將雙腳拍埋一齊，右腳向後《落》一步，然後腳尖向地點一《點》，跟住《上》番原來位置，再向前《上》一步，左腳跟住踏前一步，最後雙腳再次拍番埋一齊。然後輪到左腳《上》前一步，腳尖向地點一《點》，跟住《落》番原來位置，然後再後《落》一步，之後右腳跟住向後退一步，雙腳又再次柏埋一齊，重複咁做，就係咁簡單，當然要配合個PARTNER喇！佢移向左，你就左；佢移向右，你就右。 明唔明？我話聽就真係好簡單，不過要試吓先至知。跟住有個小學女同學話幫我排練，佢叫我右手揸住佢隻左手，左手就攬住佢條腰。老實講，我咁大個仔都未掂過女仔手，重話要攬住佢條腰添！我有啲猶疑，重感覺個臉有少少〈慶慶〉哋。點知個女同學重大方過我，跟住同我講：駛唔駛驚成咁呀你！我驚？喺呢個環境之下，就算死都唔可以衰俾人睇，一於死撐。跳咪跳！駛死呀！

就係咁，我嘅第一隻舞就奉獻咗俾個女同學。 起初，時間配合得唔好，成日踩親佢隻腳，我SORRY都嚟唔切。直至跳到我踩唔到佢隻腳嘅時候，我個FRIEND就同我講，恭喜你，可以下山架喇。吓？咁快就畢業架啦？我都幾有天份喎！心諗。呢啲叫做老鼠跌落天秤：自稱自讚。事實上喺咪真係識跳呢？心照喇，大家千祈唔好篤爆我。

過咗冇幾耐，我個FRIEND話有PARTY開，問我有冇興趣去玩吓？梗係有啦！我即刻答佢，學咗之後都想試吓究竟係咪真係識跳。不過，你估我真係想睇吓自己識唔識跳咩！梗係唔係喇！查實我想識女仔就真，不過呢句話我冇講出口，只係自己同自己講嘅啫。

嗰次係我第一次去PARTY，真係有少少緊張。呢個係聖誕PARTY，地點係古洞童軍營地。嗰度裡面有幾間營舍，而PARTY就喺其中最大嗰間舉行。我同班FRIEND齊齊抺靚架車，跟住向目的地進發。去到之後，發覺嗰度嘅聖誕氣氛非常濃厚，營地之內有棵好大嘅松樹，掛滿晒飾物同埋閃燈，我哋喺門口已經聽到悠揚嘅聖誕音樂，原來已經有好多年青人到咗。我嗰陣時仍未過氣，所以都係其中一位年青人。我哋成班FRIEND，女嘅梗係望吓有冇俊男；而男嘅當然揾吓有冇靚女。可能十八冇醜婦，我覺得大部份啲女仔都叫做順眼。

我哋入去之前，個PARTY已經開始咗。原先諗住霸番個好位，依家就唔駛諗喇！入去嗰陣時啱啱播緊25 or 6 to 4，如果大家聽過呢首歌，都知道啲音樂幾咁強勁，幾咁ROCK。當其時有成幾十人喺度擺動蛇腰，當然亦有水桶腰啦．燈光隨住強勁嘅鼓聲閃動。我哋喺閃動嘅燈光之下，幾經辛苦先至揾到個位坐低。我個FRIEND講得好啱，大部份人都係亂鬼咁跳，同時真係冇人得閒會留意你喎!

我坐咗喺度周圍望吓，睇睇有冇靚女先，可恨燈光太微弱同埋場地太大，睇得唔夠清楚，唯有喺側邊偷吓師，學吓人哋點樣跳舞先至好睇。有啲動作好細微，個人好似木咁企喺度UN吓UN吓；有啲就好誇張，跳到成個人好似識飛咁，唔知重以為師傅上身添；有啲動作望落去真係好似疏頭咁喎；至於指天篤地咁跳法嘅亦大有人在,成個裝錯摩打咁款。睇吓睇吓，又幾過癮！

第一首歌完咗之後，跟住播嗰首都好勁喎，係SANTANA 嘅EVIL WAY，我問個FRIEND，佢話呢首都係跳SOLE 用嘅，跟住佢叫我出去跳。我突然間周身唔自在，推話等多隻先，查實自已未克服心理障礙，重未有勇氣喺大庭廣眾之下輕歌慢舞。突然間，我發現遠處有個長頭髮嘅靚女，啲勇氣竟然間返晒嚟，之不過幾次想起身行出去想請佢跳舞，往往俾人截足先登。所以話好嘅嘢，如果唔積極爭取，真係蘇州過後冇艇搭，唔好話唔提醒你，否則後悔都嚟唔切。

唔知負責打碟嗰位朋友係咪唔抵得我哋有咁多機會親近啲女仔，所以佢跟住播親嘅都係跳 SOLE嘅勁歌 ，佢可能心諗：睇你哋班友仔跳得咁過癮吖嗱!死味! 跟住播成十幾隻都係勁歌,呢次大家都為咗一個共同利益，所以好鬼齊心,一齊報以噓聲，有人大嗌：有冇搞錯，想跳死人咩！結果，喺大眾壓力之下，嗰條友仔死死地氣咁播番多啲慢歌。

事實上，直到嗰個時候，我連一隻舞都未跳過。當心目中嘅靚女俾人請咗去跳舞嘅時候，我個心有少少失落。痛定思痛，呢次我醒目喇，當啲音樂未停嘅時候，我已經好似架跑車咁，入定個一波，俾大油門，一鬆《極力子》，架車就飊到去，咁都唔夠人爭就真係冇嘢好講啦。話咁快就到下一首歌，未開始播嘅時候，我已經想偷步衝出去。

音樂一响，我就好似隻馬咁即時彈出，反應凌厲，點知就喺呢一個時候，冷不提防有個四眼仔突然間攔住喺我面,原來想請我跳舞．我即刻同佢講：喂!老友記,我唔係女仔嚟架!唔該睇清楚！佢跟住同我講，SORRY！啲燈光太暗，而你啲頭髮又咁……長，我一時睇錯咗啫，唔好意思！你就唔好意思得過喇！個心真係想炳佢一鑊，呢次真係俾你累死！我自己同自己講。四眼仔一頭霧水，唔知我噏乜？我話冇嘢喇，唔該快啲閃開，麻煩晒同埋唔該晒。所謂謀事在人，成事在天，我再望已經唔見咗個靚女，唯有無奈坐番喺個位度。

同我一齊嚟嘅朋友，個個都走晒出去跳舞。我百無了賴，週圍望吓，睇吓見唔見個靚女先？點知喺人叢之中望咗好耐，發覺個女仔可能已經走咗，佢坐開個位亦都俾個肥仔《得》咗係度。我喺嗰個時候有些少失落，吓？唔通真係有一見鍾情嘅？但老老實實，我根本睇唔清佢個樣噃，只係見到佢有把長長嘅秀髮，直覺上佢係靚女，諗落似乎有啲斷估喎，再諗深一層，我會唔會好似個四眼仔咁睇錯咗呢？可能嗰個唔係女仔嚟嘅噃，諗到呢度，我突然間有少少阿Q精神，自己同自己講：咁重好，起碼可以留番一個美好嘅回憶。

雖然我最後都冇跳過一隻舞，但我覺得去PARTY都幾有氣氛同埋好好玩，跟住嗰一年，除咗七月十四，清明以及重陽之外，所有PARTY我都有參加。所謂日子有功，我嘅舞藝一日千里，雖然同米高積遜有少少距離，之但係郭富城如果同我比，都要行埋一便，而開親PARTY梗係有靚女請我跳舞，喺嗰個時候，我先至知道乜嘢叫做無敵係最寂寞。諗下諗下，真係好開心，突然間聽到班FRIEND嗌我：冇鬼用，一隻舞都唔敢跳，夠鐘走啦！唉！個夢發長啲都唔俾，你話呢班喺咪FRIEND嚟架？
（完）

如果想重温以下嘅歌曲，可CLICK入下面條LINK度聽吓！信我，幾好聽架，唔會介紹錯嘅！
25 or 6 to 4
http://www.youtube.com/watch?v=iUAYeN3Rp2E
Le Freak
http://www.youtube.com/watch?v=4KUL9-eNXzQ
Evil Way
http://www.youtube.com/watch?v=ztsFzknPBM8&feature=fvsr
Hot Stuff
http://www.youtube.com/watch?v=27-TM3q5-Cc
Too beautiful to last
http://www.youtube.com/watch?v=WA0-3-EgyLc
One day in your life
http://www.youtube.com/watch?v=44_qWFAdjqQ
Changing Partners
http://www.youtube.com/watch?v=pWQGUMROh4I
My sentimental friend
http://www.youtube.com/watch?v=5hXQpi2Cxy8
What is a youth

http://www.youtube.com/watch?v=6UfUd03qOxE

How deep is your love

http://www.youtube.com/watch?v=kJY9wYodL4Q

Smoke on the water
http://www.youtube.com/watch?v=2WX_4FNoto4
Dancing on a Saturday Night
http://www.youtube.com/watch?v=fHb60K2RLx0
Black magic woman
http://www.youtube.com/watch?v=eaKnRUfh_5I
Hotel California
http://www.youtube.com/watch?v=1ygI3BZxdCY
Melody Fair
http://www.youtube.com/watch?v=8s9WLWc7wZo
Unchained Melody
http://www.youtube.com/watch?v=t-idDbIfGvw
Tragedy
http://www.youtube.com/watch?v=MSVTOMkJdqs
Night Fever

http://www.youtube.com/watch?v=-ihs-vT9T3Q

Grease - summer night

http://www.youtube.com/watch?v=FpJUrt0O7uY

Grease (By Bee Gees)

http://www.youtube.com/watch?v=oxEtwtib7MM

without you

http://www.youtube.com/watch?v=dcmy6CLEmUo