鬼節

想當年，我最鍾意就係過時過節，因為平時食飯想搵塊肉睇吓都難，但過時過節嘅時候就唔同，除咗劏雞之外，重會殺埋鴨。不過七月十四孟蘭節，俗稱鬼節就屬於另類，嗰日無大魚大肉做晚餐，兼且要食齋菜，所以我無當呢個係節日！

鬼我未見過，所以唔識驚，但棺材同過咗身嘅人就見過，都幾得人驚！我細個時屋企係喺新界圍村附近，啲圍村有個傳統習俗，如果有老人家過咗身，佢哋唔會去大酒店卜間靈堂，俾啲親朋戚友去膽仰遺容，而係喺圍門對出一塊空地，搭個帳蓬作為靈堂，成副棺材就擺正喺中央位置，俾啲親友嚟拜祭。大約擺放一個星期先至會送上附近山頭落葬，喺嗰段期間，每晚都有喃嘸佬喺度打齌頌經。

嗰笪空地係我放學返屋企嘅必經之路，想運路行都唔得! 我記得有一年冬天，我下晝6點鐘放學，冬天特別快黑，6點鐘差唔多黑齊，我一個人經過個帳幕，唔知係咪食飯時間，個帳幕裡面竟然一個人都無！咁都未算，最得人驚就係塊棺材板拎開咗，我離遠已經見到條屍瞓咗喺度，我細個都唔算細胆，但喺咁嘅環境之下唔驚就假。嗰副棺木深紫色，尤其顯得恐怖！我唯有深呼吸一下，然後飛奔返屋企，經過帳幕側邊時覺得陰風陣陣，唔知係咪心理作用，一路跑一路感覺俾條屍追住，直至跑到返村口，見到隔離鄰舍先至敢停抵，真係嚇都嚇餐死！

咁講番鬼節先，每年嘅七月十四，鬼門關就會大開，所有孤魂野鬼都會重返陽間，享受奉祀！查實個關卡去到七月尾先到關上，喺呢段時間24小時通關,非常方便,唔駛爭先恐後!由於所有鬼鬼怪怪嚟晒陽間,所以整個七月都係大事不宜，結婚一定唔可以!聽講喺呢個月結婚，分分娶隻鬼做老婆，問你驚唔驚？吓? 無有怕? 俗語話齋,鬼火咁靚? 嘻嘻!咁又係喎,咁你唔介意咪照結婚攞酒囉! 重有,裝修同搬遷等等，可免則免，係最多禁忌嘅一個月！

阿嫲喺嗰日會去紙扎舖買啲金銀衣紙，我記得重有一啲五顏六色嘅彩紙，紙扎嘅衫，原來有分男同女兩種，當然香燭唔可以少。咁買完衣紙都未得個喎，重要去街市買祭品，好似生果，芽菜，豆腐，花生等等。
我唔明點解要用豆腐嚟奉獻俾啲孤魂野鬼，唔通呢啲就叫呃鬼食豆腐？

我問阿嫲點解買花生，佢話如果啲食物太大件，會俾一兩隻鬼擸晒，其他啲鬼就無得食！所以要拜嘅時候，要將啲小食好似花生，生菓，飯菜等通街撒，儘量俾多啲鬼食！跟住阿嫲重唱咗啲斗零同毫子，話要派埋俾啲鬼咁講喎！

聽完阿嫲講先知道燒街衣嘅目的，主要係俾嗰啲無依嘅孤魂野鬼有衫著，又有野食，雖然一年先得一次，叫做好過無喇！

我老豆唔信呢啲野，所以無話禁止我嗰晚出夜街，不過阿嫲話嗰晚陰氣重，叫我哋唔好出去，因為分分鐘撞鬼！重嚇我話如果經過池塘邊，隨時會有水鬼走上嚟搵替身！我梗係唔信喇，嗰晚老虎都出去睇睇。我見到通街都有人燒衣紙，



咦？重撒埋銀仔添，咁就唔好客氣咯，我同班FRIRND四圍咁去執錢，唔知幾過癮！

隔離阿娘見到我哋四圍去執錢，佢就勸我哋唔好同啲鬼爭，因住俾啲野鬼住唔甩得身！有無誇張啲呀？我同班朋友啋佢都儍，繼續去執錢，最後執執埋埋都有成一蚊雞，算唔錯架喇，嗰個時候，白粥都係斗零一碗，所以叫做好好成績。

不過真係有啲邪門，之後連續幾晚都發相同嘅夢，喺夢裡面就係四圍去執錢，執極都執唔晒，唔知幾開心！結果第二日起身感到周身骨痛！連續幾晚發同一個夢咪話唔邪！諗吓諗吓，寧可信其有，不可信其無！我個心同鬼大哥講：有怪莫怪，小弟唔識世界，以後都唔敢同你爭錢喇！講你都唔信，跟住無再發咁嘅夢！自此以後，到咗鬼節我都唔敢出街執錢！  

孟蘭節

有好多地方做神功戲，



之前會做木偶戲，根據老人家講，木偶戲係做俾啲鬼睇嘅！諗唔到安排得都幾周到，啲遊魂野鬼除咗有野食，重有戲睇添！係戲棚裡面，會用紙扎咗個面目猙獰嘅鬼王......大士王爺，



聽講個鬼王主要用嚟睇住啲野鬼，等佢哋唔好出咗鬼門關時無王管亂咁嚟，搞搞震！

值得一提嘅，就係喺嗰日會有潮洲商會，買米贈俾啲老人家，不過都要排隊輪候. 等大家唔好話啲有心人大細超，剩係照顧晒啲遊魂野鬼！

(完)