畫油畫

我記得細細個嘅時候，有一次俾老師叫咗入校務處，跟住問我：點解咁懶？搵大佬幫手做功課？我嗰陣時讀緊小學三年班，嗰位老師花名叫《肥婆陳》，我估佢有成二百幾磅，單係佢寵大嘅身軀，己經嚇到我腳都震埋 ，加上我見到佢揸住條籐條，點敢講大話吖！我口震震咁同老師講：啲字係我自己抄架！真係冇搵大佬幫手喎！老師話：我唔係話啲字，我係話啲圖畫！

我諗要係呢度交代一吓我做嘅係乜嘢功課。我細個讀嘅聖經，左邊係插畫，右邊係簡單嘅耶穌故事。所以我嘅功課除咗杪字之外，重包括埋插圖。我畫嘅畫靚就唔講得，不過較其他同學有心機，因為我都幾鐘意畫嘢，各位千祈唔好記錯，係《畫》嘢，唔係《玩》嘢。我誓估唔到老師嘅taste咁差 ，我畫嗰啲畫佢都覺得靚。最慘係我大佬根本唔鐘意畫畫，我啲畫已經一般，佢啲畫就……… 老實講，我真係未見過我大佬畫過畫喎！

我同老師講，啲畫係我畫嘅 ，點知老師話我講大話，跟住抽咗我十幾籐。重認唔認？老師登大隻眼再問我。我嗰陣時知道乜嘢叫苦打成招，我喺無選擇之下，唯有含住淚說我知錯喇!我相信老師當時覺得自己好英明神武，個心裡面會咁諗：我教咗幾十年書，你條友仔圪吓條尾，我都知你做乜喇！跟住教訓我，做錯事要勇於承認，下次再係咁，記你小過！

見過鬼重唔怕黑咩，自此以後，為求自保，我唯有亂鬼咁畫，畫到《孭零孭秤》，事後諗番起都有啲驚 ，何解？如果你睇過畢加索啲抽象畫就知架喇！好彩老師冇咁高品味啫！如果唔係，我分分鐘會被記小過。我啲IQ都算高，最終迎合咗老師對小學三年級同學畫畫嘅要求。老師到咗學期尾同我講：嗱！咁就啱喇！以後要自己做功課，如果唔係，就學唔到嘢架喇！《知道！多謝老師！》我揞住個良心講,之後趁佢擰轉背,我作狀喺佢後面撐咗一腳。

魚翅食得多都會厭,何況踩單車呢? 心諗係時候搵番一啲自己興趣嘅野做吓。既然細個都鐘意畫公仔，不如去學吓畫油畫, 過吓日神都幾好呀 ！不過周圍無乜FRIEND識畫油畫個喎，點算？係噃，睇吓報紙廣告咪得囉！終於俾我搵到一段招收油畫學生嘅廣告，我有兩個FRIEND聽見又話去學，咁都好，起碼有個伴。

老師姓彭，佢話自己唔係畫家，只不過係畫匠。吓?個名稱好新鮮喎!我都係第一次聽見呢個名詞架咋。佢話佢畫行貨畫，即係一次過畫幾百甚至幾千幅相同嘅畫。佢收學生主要嘅目的，係想訓練佢哋幫輕佢手，因為啲行貨畫好搶手，佢好多時每日要畫成十幾二十幅。所以佢希望我哋快啲學識，可以減輕佢嘅工作。咦?幾多錢一幅呀?我好奇咁問老師。老師話佢嗰啲呎半乘3呎嘅畫賣90蚊一幅,細嘅10吋乘6吋就10蚊一幅。我計吓條數,一日畫十幾幅,師傅咪搵成千幾銀一日!嗰陣時工資都係一千蚊鬆啲架渣,估唔到畫油畫都咁發達!

第一日去到畫室，即係老師屋企，我以為可以開始畫畫，點知老師話未得住，首先要學整理啲畫筆先。啲畫筆買番嚟唔可以即刻用，要先用水浸淋，然後將支畫筆溹滿顏料，等候風乾。約莫個幾星期後，就可以開始修剪，但修剪前要再用水浸番軟少少，方便裁剪。修剪完畢，嗰啲新筆變成好似個掃把同埋扇形嘅形狀，總之你睇見就唔開胃，之但係畫開油畫嘅朋友，就知呢啲先至係靚嘅畫筆,以下呢種係畫底色用嘅。
搞掂啲畫筆之後，開始學溝顏料。師傅話畫油畫切忌用鮮艷嘅顏色，好似青綠，鮮紅等等，如果唔係，就算你畫得幾咁好都冇用。尤其係佢啲行貨風景油畫，買家要求啲畫睇起上嚟有一種陳舊嘅感覺。 我有時行街，經過啲油畫舖，都會入去睇吓。見到一啲類似我以前畫嘅風景畫，但部份畫嘅顏色太鮮艷，如果以師傅所講嘅標準 ，嗰啲油畫算做唔合格，我都覺得唔係好《襟》睇。

經過咗幾堂溝顏料同埋整理畫筆之後，就正式學畫畫。師傅首先示範畫俾我哋睇，佢拎住枝好似油掃嘅畫筆，蘸吓顏料，掃吓掃吓，好隨意咁就喺畫布上面畫好咗個天同埋啲雲，然後用深色嘅顏料撻喺布嘅左右兩邊，跟住用類似掃把嘅筆喺深色嘅地方向週圍印開去，開始我都唔知畫乜，之後畫好先知道係遠景嘅樹葉。師父左畫畫右畫畫，好快趣就完成一幅畫，師父問我畫成點？佢想考吓我，雖然我唔識畫，但我都識睇嘅。我話唔夠立體感，因為爭少少層次，師父話我都幾醒目。只見師父逐一加些少白色落啲顏料度，喺樹頂同埋向光嘅地方輕輕點上去，再用一個好細個類似批盪用嘅《灰池》將啲白色拭上啲樹幹邊，霎時間成幅畫變得立體感。

咦！都唔係好難啫，我心諗。但當我開始畫嘅時候，先至知道我嘅諗法係完全錯誤，好多嘢如果唔落手落腳做，根本唔知難處喺邊。師傅一陣間就畫好個天同埋啲雲，我一畫落去先至發覺啲顏料嘅色澤調得唔準確，又要重新調過 。嗰次用咗成二個幾鐘，點知都仲係畫極都唔似。師傅話開頭畫算係咁架喇。

畫畫好講天份，我就屬於柴娃娃，乜都想試吓嗰類，嚴格嚟講，點學都唔會成大器。我成功畫到一幅叫做係畫嘅時候，已經係半年之後嘅事，我睇咗幾次，覺得以我有限嘅天資畫出嚟嘅畫，算係咁架喇。

所謂有話則長，無話則短， 眨吓眼已經過咗三年，我一個禮拜只係畫一日，喺嗰三年裡面，我實則練習咗唔係好多時間，所以自已同自已講，畫得唔好係應份嘅，唉！我嘅陋習又試出現，啲嘢做得唔好就猛咁搵藉口。之不過我睇番嗰三年之內畫過嘅畫，發覺一幅比一幅好，確實有進步。我有啲朋友見到啲畫，問我可唔可以揀幾張，難得有人幫我清圾垃，我求知不得。佢哋嚟親我屋企都會攞一兩張，俾到七七八八嘅時候，我覺得自已有必要留番二三張紀念，假若日後有老人痴呆，起碼睇番起都知道自己曾經畫過畫吖!

我問最後攞我啲畫嗰位朋友：老老實實話俾我聽，究竟我啲畫畫成點？佢答我話：好好喎，我個女學咗四年都冇你畫得咁靚！我有啲飄飄然,跟住問佢：你個女今年幾多歲？佢答我：差唔多七歲喇！哦…………聽完之後，我無乜嘢想補充 。
雖然畫功一般,不過我都將之前提過嗰三幅畫,POST上嚟俾大家睇睇。

雖然接近三十年，啲畫除咗有少少發毛之外，啲顏色都冇乜點變。

先此聲明，我啲畫只屬於幼稚園程度，如果想睇大師級嘅油畫，你可以去 Mattisse個Blog度欣賞吓佢啲大作 。