石崗農展會

工展會我相信好多人朋友都聽過，咁農展會你又聽 過未呢？就算喺我嗰個年代出生嘅朋友，都未必個個知道有一個咁嘅展會。農展會顧名思義係展示香港本地種植嘅農作物。當時喺新界居住嘅居民，大部份唔係耕菜園就係開農場養豬，養牛，養雞或者養鴨。

 

農展會每四年舉辦一次,主要推廣農業發展。為期四天，地點係喺錦田石崗機場平坦嘅跑道上

面。


主辦單位預先用軍部帳篷，


喺草地上搭建三至四十個攤位，有大有小。啲帳蓬比我哋去露營嘅大好多，每個可以容納幾十人。除咗展覽農產品之外，有部份用作攤位遊戲之用，好似氣槍射擊，擲藍球等等。亦有一啲售賣尼泊爾工藝紀念品，好似呢個係用木整嘅信箱


最多人買嘅係居加刀，


因為無開過鋒，所以唔屬於違例。

喺場裡面除咗展覽農產品之外，就係軍事用品，好似坦克車，大型軍車，


軍用吉普車，


高射炮同埋軍用直升飛機等等。嗰陣時最大嘅坦克叫百夫長，

我細個時覺得揸坦克都唔錯喎，起碼一般子彈都唔可以射穿架車身，咁喺裡面係咪安全好多呀！比做步兵好得多，唔駛好天曬，落雨淋，打仗唔死都行餐死！

喺展覽期間可以爬入架坦克車裡面參觀喎！呢啲機會真係唔多，我又點會執輸呢！第一時間捐入架坦克車裡面，發覺內籠唔係我想像咁正，又細，又焗促，成架車都係得一兩個窗口仔，用嚟開槍射擊敵人，裡面最多可以容納3位士兵。現場有個軍官介紹話一個負責駕駛；一個負責開槍殺敵，最後一個負責入炮彈同開炮。最攞命嘅係無冷氣設備，成架坦克係用金屬鑄造嘅，你諗吓喺太陽直曬之下，架坦克裡面有幾熱喇！如果體質啲差嘅話，分分鐘喺架坦克裡面中暑而死而唔係俾敵人打死！

玩完坦克之後，梗係玩高射炮喇！

支炮管係手動式，即係用手攪嚟調節開炮嘅角度，話時話都幾嘥力架！再過少少就有重機槍展覽，


啲子彈有成4-5吋長，一排一排咁擺放喺個鐵箱裡面。我發覺粒子彈又尖又大，就算唔爆，拮埋嚟都可以殺人。咁多樣野 ，我都係鐘意坐直升機，講清楚啲，真係喺個SEAT位《得》吓架渣，想飛番個圈就諗都唔駛諗喇！

大會安排農產品俾市民參觀之餘，同時進行比賽，由包心生菜，蕃茄，荳角以至牛，羊豬等禽畜，邊樣最大就成為冠軍。目的係想獎勵對農業作出貢獻嘅農 民。

我最有印象就係冠軍嗰隻大水牛，


隻牛角有成兩呎長，唔知係咪人多唔適應，抑或俾人綁住唔習慣，隻牛個鼻猛咁噴氣之外，重不停咁用隻腳打後蹄。黃牛相對嚟講就斯文得多喇，用嚟參展嘅黃牛，通常啲毛色立立令，呈現金黃色，惹人好感。至於啲蕃茄，包蕊菜，荳角，木瓜

等等，都比我平日喺街市見嘅大得多。嗰陣時無咁多激素，啲優良品種純粹係農民嘅心血結晶。

農展會嘅重頭戲擺喺最後嗰日，完成晒所有頒獎之後，會有表演作為結束。我一共去過3次，頭2次年紀太細，我話有印象你都唔好信，不過喺最後嗰次，印象就好深刻。何解? 睇埋你就知架喇!

記得四十幾年前,老豆帶住我哋三兄弟响最後嗰日先去參觀。睇完頒獎之後，我哋即刻走去表演場地。嗰度已經預先用竹枝搭建咗個臨時看台，大約有4層樓咁高。我哋嗱嗱聲拾級而上,搵番個有利位置，唔駛問梗係行高啲著數啲，因為可以睇遠啲。

表演由傍晚4點開始，首先由蘇格蘭軍笛樂隊演奏，啲風笛手清一色係男性，全部身穿鮮紅色格花裙，

頭戴羽毛小帽，一路奏樂一路進行步操， 氣氛熱鬧，好多人起身拍掌！

軍笛隊表演完之後，接踵而嚟嘅就係軍犬表演，查實軍犬同警犬都係狼狗，之不過服役嘅單位唔同。最先表演嘅係跳火圈，之後測試隻狗嘅服從性，好似用口號命令隻狗SIT，HAND，RUN 等等。我嗰陣時同自己講，隻狗唔知識唔識聽廣東話呢？如果我話坐，手，走。隻狗可能會側起個頭望住我，


唔知我噏乜！因為訓練員都係鬼佬。表演完服從性之後，就示範點樣制服可疑人物，一個著到爛身爛勢嘅鬼佬突然出現，假裝想襲擊個領狗員，不過喺領狗員一聲號令之下，隻狗咬住個疑犯死都唔放，直至個領 狗員命令下至肯放開口。

跟住出場嘅係一隊穿著棕黃色軍服，頭戴氈帽，騎住戰馬嘅英兵。佢哋首先策騎繞場一周，然後再排成一小隊，每人手持一枝長茅，喺遠處列陣，一聲號令下，有次序咁一個個策馬由遠處衝向表演台前，然後俯身用長茅向預先擺喺草地上嘅木方塊拮起，各有各人嘅目標方塊，喺咁高速底下可以成功將木塊拮起，確實唔簡單，大家都拍爛手掌！重未完，跟住見到工作人員搬咗幾個用鐵扎成，有成3至4米高嘅大圈，隔10米左右放一個，大約放咗8個，排成一直線，同一時間點著晒所有嘅鐵圈，霎時間火光紅紅，場面震撼，原來鐵圈外圍預早用沾滿火水嘅威士繞住。啲戰馬面對住紅紅嘅烈光，喺佢哋烏卒卒堅定嘅眼中反射出嚟，


好似話俾我知，跳火圈之碼，濕濕碎喇！跟住啲騎兵大喝一聲，高速策騎穿過晒啲火圈，搏得觀眾如雷嘅掌聲。

之後輪到壓軸好戲上演，就係一場模疑戰爭，由兩軍對疊。工作人員立即將啲燒過嘅火圈同草地嘅木方塊拎走，然後搬咗好多扎成方塊嘅稻草，木箱等等，好快趣就搭成一個喺戰地上面嘅堡疊。有十幾個士兵，全部用顏料油到烏口烏面，

跟住進駐喺堡疊裡面，然後各人佔據有利位置。我見到其中兩個士兵重架咗部重型機關槍喺一個木箱上面,準備殺敵。

一切部署妥當，雖然係做戲咁做，但觀眾都好緊張，屏息以待！突然間見到有十幾個士兵，唔知幾時已經喺黑暗嘅草地上面匍匐而行，向住堡疊步步進廹。個個都手持AK47自動步槍。突然有士兵擲咗十幾個煙霧彈出嚟，有黃色同紅色，霎時間戰場彌漫住一大片煙霧。佢哋利用煙幕作為掩護，大舉進攻堡疊裡面嘅敵兵。一時槍聲卜卜，



前排進攻嘅士兵有多人中彈，跟住見到士兵出動埋手榴彈，火箭炮等等。爆炸聲此起彼落，地動山搖，場面震憾，


戰況慘烈。

明知係假嘅，但我當時都睇到掌心冒汗。喺敵兵重用重機槍狂掃之下，進攻士兵被廹向後退！突然間聽到直升機聲，見到有兩架軍用直升機飛到戰場上空，有十幾個軍人游繩而下，


加入戰團。直升機上有士兵用輕機槍向堡疊敵兵掃射，形勢大逆轉，喺堡疊頑強扺抗嘅士兵，非死即傷，指揮官見大勢已去，唯有揮動白旗投降！

查實表演已經接近尾聲，但太過精彩，當時仍有好多市民，想睇得更加清楚，不惜拼命湧上用竹搭成嘅看台，企圖進佔高一啲嘅位置。結果看台不勝負荷，有綁住竹枝嘅繩索首先折斷，我老豆當過兵，警覺性高，發覺唔對路，即刻帶我哋幾兄弟廹番落看台，幾經辛苦，剛剛移到最後嗰級，俟住右手邊嘅看台首先倒塌，當時情況混亂，市民爭相走避，我嗰陣時好細個，剩係記得老豆叫我哋快啲離開看台！我望番轉頭，見到連中間嘅竹棚都塌埋，有好多觀眾被竹棚埋住，而多部軍部救傷車綠續趕到現場,


展開救援。一場開開心心嘅軍事表演，最後竟因意外導致死傷而結終，大家都始料不及。

第日聽新聞，知道有幾個觀眾死亡，幾十人傷。由於當時太細個，唔記得清係邊一年，應該係屆乎1961-1969年呢段期間發生。唔知係咪由於嗰一次嘅意外，自此以後都無再舉辦農展會。

（完）