郊遊樂

 

上一次已經提過，我哋後生嘅時候屋企乜嘢設施都冇，唔好講到電腦咁先進，連電話同電視都係有啲錢嘅家庭先至會有。既然喺屋企咁鬼悶，所以我好少留喺屋企，一得閒就會約埋成班朋友去WET，除咗開PARTY之外，郊遊燒野食就係我哋最鐘意嘅娛樂。

我去過幾次屬於《虛冚》嘅旅行，乜嘢叫做《虛冚》呢？有成百幾二百人參加嘅旅行就屬於呢一類，呢啲咁大型嘅旅行通常係由團體或者工廠舉辦。對於呢類旅行，我覺得冇咁好玩，因為除咗你嘅朋友之外，其他人你一概唔認識，玩起上嚟都無咁投入。之但係如果你有其他目的，好似想識女仔或者男仔嘅話，另作別論。

人多自然亂，有一次，我同埋成班朋友參加呢類旅行，目的地係粉嶺鶴藪，嗰陣時喺荃彎大會堂前嘅空地係熱門嘅集合地

點。一到假日，沿住大河道嘅路邊會泊滿晒旅遊巴士



大大話話同一時間有成十幾二十部。我嗰團有四架旅遊巴士，我坐嗰架車負責保管同埋運送食物，好似雞翼，豬扒，牛扒同埋魚丸牛丸等，裝滿四大膠桶，真係幾誇張架，我嗰架車最後出發。去到目的地已經見到有啲團友喺度《透爐》預備燒野食，最奇怪嘅就係見到部份團友竟然已經用义义起雞翼同豬扒，冇理由喎？我心諗，所有嘅食物都重喺車上面，佢哋點會有雞翼豬扒呢？最後發覺有位團友喺路邊見到有桶食物，以為係我哋嘅，一個唔該拎埋上車。唔知邊團人咁唔好彩，當佢哋去到目的地,發覺冇咗成桶雞翼，負責拎雞翼嗰位大哥肯定俾人炳到暈,我諗佢哋呢世都唔會忘記嗰次無嘢食燒嘅旅行！

講番我哋自己搞旅行，通常都係十幾二十個FRIEND一齊去。首先要確立目的地，日子同埋出發時間，跟住搵吓邊位朋友負責收錢，邊位買食物同埋燒烤用具等等。我哋最初嗰陣時重係讀緊書，個個都係無車階級，咁就要約埋喺邊一度等。嗰陣時無手提電話，如果唔得閒去就要預早打電話通知，如果唔係，會累大家都會係度白等。所以大家必須準時同埋有交帶，話時話喎,我哋從未試過甩底。

我出嚟做嘢嘅時候，差唔多每個禮拜都會搞旅行，嗰陣時嘅夏天成日都落雨，原本好鬼掃興，但每當諗到會同班朋友聚埋一齊嘅時候，心情會變得開朗，所以就算落狗屎，都無損大家嘅興緻。記得有一次去沙田紅梅谷旅行，嗰朝落雨唔在講，重行雷閃電添，我都有啲猶疑，究竟去定唔去好呢？但諗起啲朋友可能已經出發咗，我點可以爽約？我嗰次負責拎炭，嗰陣時唔興用膠袋載野，啲炭裝咗喺個雞皮紙袋度，我幾經辛苦先至搵到個大膠袋笠住啲炭，攞住把遮攬住包炭就即刻出發。嗰陣時心態唔同，有年青人嘅衝勁。俾著依家，我啋你都儍，落狗屎咁大雨，我情願留喺個被竇大覺瞓好過！

去到火車站，所有朋友都到齊，不過嗰日雨勢好大，我雖然有担遮但係要顧住包炭，唔好俾水整濕，顧此失彼，所以差唔多成身濕晒，我啲朋友都好唔得我好多，尤其係帶卡式錄音機同埋結他嗰兩位朋友,大家都變成落湯雞。講番我哋嗰陣時，去親旅行，結他同卡式錄音機係唔可以缺少嘅，


當然唔係帶咁多部卡式機,不過俾大家參考啫!



因為冇咗呢兩樣嘢，個旅行會失色好多。

歌書都唔可以少架!



燒嘢食期間開大個卡式機，一面燒嘢食一面聽歌，真係人生幾何！

嗰陣時最鐘意聽英文民歌，好似Donna Donna, House of the rising sun, Blowing in the wind, Five hundred miles, Green field, What is a youth? 等等，而有啲中文歌都唔錯喎!好似許冠傑嘅雙星情歌，羅文嘅幾許風雨，張國榮嘅風繼續吹，陳伯強嘅鼓舞等等。最開心嘅時刻就係大家圍埋一齊,彈吓結他唱吓歌。

好喇，講番嗰次旅行先。我哋跟住上火車出發，嗰陣時重係用緊柴油火車，嗰啲窗好有特色，係用木框鑲住塊玻璃，如果想開窗，就用力向上推；窗框向下嘅木框中間釘咗一條約莫一吋濶，十二吋長嘅帆布，如果想關窗,只要你向下拉，個窗就會關好。由於啲窗框用木造,啲雨水如果太大,就會滲入車廂裡面。嗰日好大雨,所以裡面啲坐位好多都濕晒。我就冇乜所謂照坐，因為反正條褲都濕晒囉。大家喺火車上面，由於啲鞋襪濕到淋晒,鬼咁唔舒服,我哋唯有剝晒出嚟，等啲風吹乾吓,好過焗到雙腳臭晒！雖然天不造美，大家變成落湯雞，但我哋都好開心，喺火車上面大家七咀八舌，講過不亦樂乎！開心嘅時間過得特別快,話咁快火車就經過馬料水,

 

好快趣就會到達目的地。

去到沙田，啲雨落得重大，大家開始覺得要諗吓係唔係應該取消呢次嘅燒嘢食。嗰陣時沙田剛剛開始發展，


火車站對出正在填海,即係依家嘅新城市廣場，沙田中心，好運中心，瀝源邨，禾輋邨，遠至馬場一帶。如果喺依家遇到咁嘅天氣就唔駛點諗喇，一於行商場或者去睇戲。

其中有個同學，佢話有個朋友喺紅梅谷附近開咗個雞埸，不過已經無再養雞，嗰度地方都幾大，我哋可以喺度燒嘢食。嗰陣時無手電，我哋唯有搭車去踫踫運氣，如果見唔到佢個朋友，就各人分番自己嗰份食物，跟住解散返屋企自己煮嚟食。

我哋搭車去到紅梅谷，落咗車重要行一段路先至去到目的地,當時大雷大雨，


我揸住把遮都冇用，成身濕晒，裝住炭嘅雞皮紙袋被水整濕咗，我一路行啲炭一路跌出嚟，認真論儘。冇計！唯有攬住喺心口。我哋經過菜田嘅小路，再行咗十幾分鐘，終於到達目的地，嗰度有一間好細嘅石屋同埋側邊有幾間鐵皮棚屋。我個朋友行前去敲門，好彩有人應門，我同學嘅朋友因為落雨冇地方去，留咗喺屋企，所謂風雨故人來,佢見到我哋都唔知幾開心。由於嗰間石屋好細間，容納唔到咁多人，佢帶我哋去咗其中一間比較企理嘅棚屋，佢話嗰度原本養雞嘅，但幾年前由於發雞瘟，好多雞死晒，佢最後血本無歸，之後冇再養喇！唔怪得知個雞棚冇雞屎味喇，重幾乾爽添！望真吓，個棚屋都幾大，如果大家有朋友經營過雞埸嘅話，會知道棚屋嘅<嘥屎>,大約有成三四千呎，所以喺度燒嘢食都唔覺廹狹。

唔知係咪整濕咗個身，有啲饑寒交廹嘅感覺，我哋即刻《透爐》。啲炭濕晒不在話下，連啲炭精都濕到淋，真係唔知點《透》火喇！好彩屋主話有火水，淋完火水之後，一《透》就著晒，間棚屋嘅屋頂好高，加上係由鐵做，所以啲火大大都無有怕。

雖然係夏天，但由於落大雨，加上啲衫褲又濕晒，所以大家都有啲寒寒哋，當圍住個火爐嘅時候，真係有溫暖嘅感覺！間雞屋雖然唔係好新淨，但勝在保養得都唔錯，出面婆沱大雨都冇乜點漏水。燒熟咗嘅雞翼,豬扒同埋牛扒,散發出烤肉嘅香味,充斥喺雞棚裡面每一個角落,令人垂涎三尺。嗰次狂風暴雨雞屋中燒嘢食好有特色，我相信好多人未試過，雖然事隔超過三十年，我仍舊記憶猶新。

我同班朋友個個禮拜日都去旅行，新界咁多地方同離島我哋都差唔多去過晒，好似大嶼山嘅銀鑛彎、梅窩、長沙、大澳、塔門、海下、蚺蛇尖、浪茄、滘西洲、龍蝦彎、南椏島、橋咀島、馬屎洲、吉澳、鶴藪、船彎淡水湖、新娘潭、城門水塘、梧桐寨、沙螺洞、清潭、白潭、同埋大欖效野公園沿途嘅燒烤場地等等,真係甩咗唔少腳毛喺呢以上所講嘅地方。

攝於馬屎洲
 

大霧山喺我同班朋友去得最多嘅地方
 

  粉嶺鶴藪。

咁多個地方我印像最深刻嘅就係馬屎洲，嗰陣時香港嘅海水好乾淨清澈，馬屎洲係一個石灘，當我去到目的地嘅時候，碰啱水退，整個石灘滿佈海星同埋海胆，啲海星嘅觸鬚最長嘅有成8吋，而海胆嘅刺都有6-7吋長。


我哋嗰陣時唔知乜嘢叫保育，重拎啲海星同埋海胆嚟玩添！結果有好多海星同海胆慘遭毒手，佢哋喺香港水域消失嘅原因，除咗環境汚染之外，我同班朋友都可能有啲責任。

我同啲FRIEND去燒嘢食分兩段時期，前期係讀緊書嘅時候，嗰陣時大家都冇收入，去親旅行唔係搭巴士就係搭火車；後期係出咗嚟做嘢,買咗架二手車,由嗰陣時開始，我同班FRIEND幾乎冇再去離島旅行，因為大家都有車，鐘意選擇一啲可以揸車直達嘅燒烤場地，咁就唔駛舟車勞頓咁辛苦。由於大霧山郊野公園可以揸車直去，加上風景優美,自不然成為我哋首選嘅燒烤埸地。我哋好誇張，通常二十幾個朋友去燒烤，會揸成十幾架車去，就算順路都唔會搭朋友部車，嗰陣時覺得成隊車隊一齊去燒烤威好多！

效遊燒烤喺60至80年代非常流行，直至卡拉OK興起，我哋先至將郊遊燒烤劃上句號。依家嘅燒烤基本上變咗質，好多人唔係去郊外燒嘢食，而係改去燒烤埸，

基本上乜嘢都唔駛預備，好似食物同埋燒烤用具等等，只須購票入埸，就可以由朝頭早燒到夜晚，乾手淨腳。落雨都唔駛驚 ，因為部份燒烤埸係有瓦遮頭嘅。我哋嗰陣時就唱歌跳舞，依家就一路燒一路打麻雀。而燒烤場最搶手嘅唔係牛扒豬扒，而係麻雀租賃，手快有，手慢冇。究竟啲人去燒野食定打麻雀呢？真係考起喇！我幾年前曾經去過燒烤場燒野食， 一心想重拾以往嘅回憶，不過我好失望，以前郊外燒野食嗰種風味同埋特色，依家已經盪然無存！ （完）