「童年啊！是夢中的真，是真中的夢，是回憶時含淚的微笑！」童年係每個人成長必經之路。對於童年時嘅生活，有啲人想盡量忘記，皆因佢哋嘅童年生活，過得唔開心，或者係家庭問題；又或者受到健康困擾。我覺得沒有快樂既童年，係人生一大憾事。童年應該喺人生中最開心既日子，因為當我哋細細個嘅時候，唔識為前途擔心；亦唔會有感情既煩腦。玩飽就食，食飽就瞓，唔知幾過癮！
我屋企嘅後邊住咗一家六口，最誇張係屋前嗰家人，住咗一家十三口。戶主曾先生，佢生咗十個女，第二第三同埋第七第八個係孖女，佢哋好聽話同埋好乖，見到我都會叫聲：哥哥！我見到佢哋沱住兩淌鼻涕，雖然睇住佢哋大，但都分唔出邊個係大孖？邊個係細孖？
曾生係潮洲人，佢鍾意仔多過女，最後如願以償生咗個仔。對於佢嗰種有前無後，打死罷就，勇往直前嘅精神，我都唔知佩服定戥佢辛苦。
佢呢種想法完全突顯咗中國人既傳統思想，乜都係假，最緊要有仔繼後香燈。嗰陣時無宗緩，佢哋都係靠自已拼手低足咁努力做野，凑大啲仔女，唔似得依家一啲人，郁吓就揾政府攞錢，俾慢啲都話投訴。除咗曾先生一家外，村口嘅周先生都一家八口。
我細個嗰陣時住既村叫南廰村,位於錦田吉慶圍側。雖然條村好細，但你計吓有幾細路仔同細路女? 就可以想像得到當年條村有幾熱鬧架啦！
我嘅屋企都有番咁上吓人數，七兄弟姐妹，連埋祖母，一家十口，加埋三隻狗七隻貓。
既熱鬧又混亂，尤其係喺食飯嘅時候，嗰幾隻狗成日為咗爭食而打交,唔夠打嗰隻就唯有走去搶啲貓飯食。結果造成貓狗大混戰。呢個兵荒馬亂嘅情況，幾乎無日無之，我已經見怪不怪。
我哋幾兄弟姐妹當然唔會為咗爭食而打交，之但係如果食得慢啲 ，餸就一定冇架啦，就算連汁都可能無得撈。久而久之，我食飯嘅速度愈嚟愈快，唔似得而家啲家庭得一個小朋友，又哄又氹先至肯食一兩啖。想當年，我既父母就啋你都儍，話知你唔食，皆因子女多，無咁衿貴。如果呢啲細路生係我哋嗰個年代，好快趣就學會搶食。所謂適者生存，完全唔駛老豆老母擔心。人性就係咁架啦，當你擁有嘅時候，你就唔曉得珍惜；相反，當你無既時候，你就會盡晒力量去爭取。
我讀緊小學三年班嘅時候，己經要同我大哥輪流買餸煮飯，除此以外，通常女仔做嘅担水工作都要做埋，
破柴係唔可以缺少嘅運動，唔好意思，寫錯咗，係工作至啱。
我住嗰條村裡面有口水井，都幾深架。我同大哥都唔識游水，如果唔小心跌咗落去肯定死硬。雖然諗番起上嚟都覺得有啲驚，但係就從來冇人跌過落井噃。
試過有一次打水，撈咗隻死老鼠上嚟，真係麻煩，累到我又要打過另一桶。
隨手掉咗隻老鼠。嘩！你有冇搞錯，啲水重飲得？你可能會咁問。不過，真係冇辨法，成條村既水都係靠呢口井供應，除非你唔飲啦！查實啲老鼠係識游水嘅，可能係唔舒服，食咗啲感冒葯，頭暈眼花之下跌落井浸死啫。所以有乜頭暈身熱，就
千祈唔好行近水井，因為好鬼危險。
如果啲老鼠識睇我個BLOG，呢種情況就唔會發生啦！講番轉頭，成條村嘅村民喺無選擇之下，都被逼用番啲水嚟煲水煮飯，不過食咗一樣無事，一啲影响都無。所謂賤命鬥窮人，你愈怕死呢就愈易死！唔信嘅話請睇吓街邊啲乞兒，雖然通街挪飯食，汚漕辣撻，你睇吓佢哋個個都重係龍精虎猛，雖然一把年紀，重响條街度摷野食。
查實打斧頭要有心思既，餸菜一定要夠份量。我首先買三毫子貓魚，毫半子荳腐。再買啲豬肉，多啲梅菜，加多舊咸魚，重唔夠嘅話？再整多兩斤菜！
四餸一湯。雖然肉少啲，但都算豐富。買餸要負責埋煮餸，餸菜既份量多少唔係大問題，最緊要手勢好。我首先將大條啲既貓魚揀出嚟，去腸洗乾淨哂，煎香嚟滾湯，滾咗之後，再落埋荳腐滾多幾分鐘，當啲湯變成奶白色既時候表示差唔多搞掂，跟住落啲胡椒粉僻吓啲腥味，再加啲鹽同埋莞茜，咁一個香噴噴嘅漁湯就大功告成。
細條既魚就煎俾貓大哥做餸，最後人同貓都唔詐形。所以打斧頭都唔係咁易架，因為要加埋識煮先至得！每次買完餸我都有一個幾毫落袋，算係咁啦！
話說我嗰個年代，係無彩色電視嘅，所有節目都係黑白制作，雖然係咁，大家都睇到津津有味。而家嘅亞洲電視，以前叫麗的呼聲，要俾錢先至可以舖條線入屋。所以有錢人家先至可以擁有電視。如果要睇嘅話，我可以去附近嘅舖頭，但係要入場費：斗零一個鐘。斗零即係伍仙。喺嗰個時候，可以食一碗白粥或一條油炸鬼。
我老豆嗰陣時睇開嗰份報叫「晶報」，依家已經執咗笠。嗰份報紙嘅副刋登咗好多寫得非常優美既散文，有唔少專欄作家喜歡係寫景，佢哋將啲景物形容得好細緻，可謂入木三分。我寫既文章，唔多唔少都受到佢哋勳陶。
....../
Philip 兄，你這篇寫得十分真實，就如一幕幕場景在我腦中閃動，因為實在有太多是與我的童年相似。
回覆刪除比如我家跟你家一樣，父母、祖母及七姊弟妹，鄰居大多都有很多孩子，有一家為追一個女兒，而生了七個男孩，另一家也為追多一個兒子（已有一長子）其後一直生了九個女孩才給追到。
家務我也常做，擔水、打水只落在當時唯一的男丁，即是我的身上，但跟你不同是不雖我們孩子做菜，洗米洗菜就有份，最多間中叫我買些雜貨，或幾角錢肉等等……
你說用井水，我住的地方不遠也有一口井，是私人的，起初附近的人會來打水，但後來就要收費……
而那擁有井的人很衛生，但凡水質混濁（可能打風過後給外面的汚髒泥水倒灌和其它垃圾），又或發現死老鼠或其它跌落井的畜牲，他們都會下井清洗，和盡可能將井水抽乾……
Shu 兄,相信我們出生的年代相距不遠,所以有很多共通點。我們那個年代，九成人的家境很類似，多兄弟姐妹，父母忙於搵食，照顧細佬妹的責任，就落在長兄或長姐身上了！
刪除以前村口的水井是公用的，如果汚染了，就大家合力將水井清洗。但沒有特定人負責，只靠大家自動自覺，故此，有時老鼠死了數天，才會清理，因為清理水井不是說說那麼容易。
我細細個已經懂得煮飯炒餸了，所以現時電視的什麼小厨神表演，我看後覺得很搞笑！
我細個都試過拎住斗零，係灣仔街邊食到白粥油炸鬼，啲人成日唔信我果陣咁平。
回覆刪除其實小三都應該睇到報紙架啦，當年我悶果陣，小二都會拎讀者文摘黎揭啦。
刪除嗰陣時得百零二百蚊一個月,斗零相對來說,也不是很便宜。我哋嗰個年代，因為無乜娛樂，報紙及讀者文摘都會看餐飽。
刪除