踩單車 (上)

唔知大家有冇聽過《客家佬》同埋《鳳凰牌》呢兩隻牌字呢？ 佢哋係我細個嗰陣時最出名嘅單車嚟嘅。《客家佬》係屬於單車中嘅重量級，車尾裝上一個鐵架，以方便載運貨物。不過唔好會錯意，客家佬唔係客家人做，相反，喺英國貨嚟嘅 ，《客家佬》只不過係譯音，Hercules先至係佢真正嘅名。

我細個嗰陣時，如果開米舖或者耕菜園，都會買番部嚟運貨。以前買米唔係去超市而係去米舖，嗰時啲米唔係八斤或者十斤裝，而係五十或者一百斤裝，通常用麻包袋裝住，唔好話叫你拎，就算拉都拉唔郁。所以嗰陣時啲米舖有句宣傳口號：買米有人送。你落咗柯打之後，米舖老闆就會踩住架客家佬，將啲米送到你屋企。  

至於《鳳凰牌》係另一款單車，純粹為代步用。


我屋企都係用《客家佬》，所以好細個我就攞老豆部單車嚟玩。呢部單車對於我嚟講屬於龐然大物，我學踩單車嗰陣時大約十歲左右，我根本唔夠高坐上個SEAT位度。我唯有將隻右腳穿過單車中間嘅三角形，跟住踩上去右邊嘅腳踏，我只有用隻右腳《圪》吓《圪》吓，點知架單車又大又重，一唔夠力就會失去平衝，結果就撻到攤攤腰，好彩架單車夠硬淨，跌極都冇事，如果唔係，俾老豆知道我拎佢架單車嚟教飛，肯定劏咗我都似。我就係喺跌吓，撻吓嘅情況之下學識踩單車架喇。

啱啱學識嘅時候，都唔知幾大癮，老豆一走開我就攞佢架單車嚟舞。日子有功，我踩單車嘅技術一日千里，就算架客家佬咁大架我都可以放手揸，而轉彎只要將個身順住個勢擺側，就可以片住個彎位去。嗰陣時我無有識死，專登一路踩，一路蹺埋雙手放係心口度，唔知幾鬼招積！

所謂樂極生悲，記得有一日老豆臨番工前叫我寄兩個郵包返大陸。嗰朝啱啱落過雨，我踩住老豆架客家佬，左手托一個郵包，右手托另一個，重專登托到鬼咁高，驚死人哋睇唔到我放手踩單車嘅超卓技術。我沿住錦田大馬路一路踩一路吹口哨，向住郵局方向踩去。啲司機大佬見到我踩得咁鬼牙煙，沿途猛咁《砵》，經過身邊嘅時候重大嗌：想死呀，靚仔！吹咩！我心諗，夠胆就撞過嚟。點知去到警崗附近，有個阿伯明明喺條行人路行緊，點知突然轉身踏出馬路，我冷不提防，俾佢一撞，成個人四手四腳咁飛咗成仗遠，躂咗喺馬路中間，兩個膝頭跌到損晒，而郵包都彈開幾呎遠。好彩當時兩邊都冇車，如果唔係，睇怕今日都冇機會喺呢度同大家吹水。後生嗰陣真係唔知個死字點寫，痛完之後，乜都唔記得晒，之後又試喺馬路上放手飛車。

我有幾個FRIEND好鍾意踩單車，我一聽到門口有《鈴鈴聲》，就知佢哋嚟搵我一齊去遊車河。我個FRIEND話：你架《貨》車又大又重，睇吓我架波車幾型，換過另一架喇！咁又係喎，我老豆架客家佬真係好鬼重，平時唔多覺，之但係踩遠啲就知道味道。 我哋嗰陣時好鐘意踩去上村公園玩，查實上村距離錦田唔係好遠，大約五至六公里左右，但我就踩到好辛苦先至跟到大隊。

我大哥嗰陣時做見習護士，我見佢出咗糧，加上我大哥都鍾意踩單車，我就游說佢買部有波嘅單車。出乎我意料之外，大哥好爽快就答應咗，嗰陣時以捷克出產嘅單車為最靚，車架用鈦合金鑄造，得八磅重，夠晒輕便，最適合飛車，我梗係想大佬買喇，不過價錢就貴啲。大佬左諗右諗之後，覺得唔係好化算，結果買咗部台彎出產嘅單車，價錢就真係蚊脾同牛脾。雖然同捷克貨冇得《揮》，但比部《客家佬》有型得多。我大佬住宿舍，平時好少返屋企，咁就正晒，架單車變成我嘅私家車，你話係咪好正吖！

我差唔多每日一放學就同三個FRIEND踩上去大帽山，然後經過石崗戲院，右轉入甲農，沿住麥理浩徑，經白潭，清潭然後直衝落馬鞍崗，跟住轉出錦上路，然後返錦田。


講真條路都唔近架，不過嗰陣時後生，踩極都唔覺攰。

星期六唔駛番學，我同幾個朋友一早就踩單車呢度去嗰度去，我嗰陣時最鐘意聽一首英文歌，叫Come Saturday Morning，面嘅歌詞好似講緊我同埋班朋友咁，踩住架單車四圍去。其中一節係咁講嘅：Come Saturday morning, I’m going away with my friends. We’ll Saturday-spend till the end of the day. Just I and my friend, we travel for miles in our Saturday smile and then we’ll move on but we still remember long after Saturday’s gone.http://www.youtube.com/watch?v=Kg0-a4zlwNM

我哋真係好似啲歌詞咁講，由朝頭早踩到晏晝。

最記得有次冬天清早，嗰朝都幾涷架，大約11度，我哋3個剩係著住件T裇，由錦田向上村進發，跟住上林錦公路，呢條路好斜，我相信一般人未必能夠一口氣踩晒成段路，但我哋一日踩到黑，兼且踩慣踩熟，呢條斜路對我哋嚟講濕濕碎，我哋幾個都可以一口氣踩晒成條路。

我哋經過嘉多理農場，沿住林錦路出大埔公路，一路踩，一路踩，冇幾耐到達大埔墟，左轉入汀角路，途經洞梓，右轉去淡水湖主壩，


嗰度無遮無掩，寒風剌骨，人影都冇隻，成個世界好似剩係得我哋三個人，你話幾咁FREE喇！不過太涷，最後嗱嗱聲兜番出大路。


迎住大斜路上新娘潭路，嗰陣時踩咗有成二個幾鐘，真係有啲餓寒交廹，見到路邊有間舖仔，即刻停低埋去睇下有冇糧草充饑，喺嗰個時候摸吓個褲袋，數一數睇下有幾多神沙，先知道我哋3個夾埋都唔夠三蚊雞，唯有用1蚊買咗6個西樵大餅，


以上嗰幅只不過係參考圖片,唔係我哋當時食嗰啲。嗰陣時蒸溜水重未面世，我哋又唔捨得買維他奶，唯有乾啃。嗰間舖頭位置偏僻，平時應該冇乜人幫襯，嗰幾個大餅都唔知擺咗幾耐，硬到真係連狗都擲得死。唔怪得知我入舖仔之前，原本有兩隻狗踎咗喺門口度烏吓烏吓，佢哋見到我哋買完大餅之後，就急急腳咁行開咗去喇。

當你餓到手騰腳震嘅時候，你唔會諗咁多，第一時間將個大餅塞入個咀裡面，原來乾啃係好辛苦嘅！我就幾乎吞到窒息，我望吓2個朋友，佢哋同我差唔多，個個都俾啲大餅啃到臉紅紅。

啃完大餅之後，個肚好似重有好多空位，可能無水發漲啲麵包啩，不過好過未食嗰陣時。我哋繼續旅程，食咗少少嘢落肚確係唔同，依家先至有心機留意沿途嘅風景，由於條路沿住水塘修建，風景怡人。踩咗冇幾耐，我哋見到個路牌，原來已經去到鹿頸路，嗰段路較為平坦，我哋沿途你追我逐，依家諗起都開心。

過咗約莫一個鐘頭，我哋已經轉出沙頭角道，經過聯和墟嘅時候，

開始覺得有少少腳軟，喺涷嘅天氣之下，體力消耗得特別快，再唔進食番啲熱嘢，分分鐘跪低。我哋見到熱辣辣嘅雲吞麵，啲口水流到成件衫都濕晒。但我哋全副身家都係得個零銀錢，剩係夠買一碗剩麵，分三份嚟食，最後連湯都飲晒，麵檔老細嘅面口當然唔多好睇，以為我哋孤寒，唔捨得食，點知我哋實在仙都唔仙。

有啲暖嘢落肚零舍唔同，雖然雞碎咁多，到喉唔到肺，但總好過冇，對腳開始有番啲力。我哋繼續旅程，先去上水，跟住沿住青山公路（元朗段），新田公路，經過泰園漁村，


再由坳頭折返錦田，全程用咗成6個鐘頭。

(待續)