小時候(三)

好喇!話題一轉,講番天氣先,啲人成日話溫室效應，天氣愈嚟愈熱，究竟係真唔係？我覺得呢個講法不無道理。我細個嗰陣時啲天氣真係好鬼涷，喺冬天通常只有攝氏4-5度。
 
有一次天文台預報有冷鋒到，發出霜涷警告，高地將會出現結霜現狀。聽到之後，我唔知幾開心，果晚興奮到瞓唔著，查實係涷瞓唔著至真。

 

 
第二朝一早就約埋班friend，搭26號巴士上大帽山，喺農林站落車，跟住行上去雷達站，果度係大帽山最高嘅地方。我著咗件爛鬼外套，沿住山脊一路上斜，條路一棵樹都冇，啲草全部被啲冰套住瞓低晒，我重記得啲風好鬼大，吹到我頭都痛埋，重好似把刀仔咁將我啲肉逐忽割開，涷到入心入肺。

沿途見到有人著棉衲，唔知幾鬼羡慕，因為喺嗰個時候，身邊有個銅錢嘅人先至可以買棉衲著。我哋行咗大約四十五分鐘，終於捱到上山頂，喺雷達站門口有個温度計，嘩！係攝氏零下4度。而包圍住雷達站啲鐵絲網全部被冰封實晒，望唔到入裡面，而長短不一嘅冰柱，則一枝枝咁，環遶住屋簷邊倒掛住，

估唔到呢啲北國風景會响香港出現。嗰次係我第一次喺戶外體驗到攝氏零下4度嘅滋味。雖然涷到到飛起，但我同班friend都好鬼與奮！

我細個嘅時候都算百厭，除咗聽收音機，睇報紙同埋睇戲之外，我最鍾意就係去附近既田野玩。因為有好多野食，何解？唔怕靜雞雞話你知，家吓錦田西鐵站喺三十幾年前係一大片農田嚟嘅，有好多水氹，重有條好清嘅小溪添。
 
啲田種咗好多野，有蕃茄，蕃薯，蓮藕啦同埋馬蹄等等。你話係咪好多野食吖？咁多樣野，我最鍾意就係食蕃茄，專揀啲紅色熟透嘅嚟食，多汁又新鮮。吓？駛唔駛用水洗？梗係唔駛洗啦，揾件衫揩吓就食得架啦！
 
除咗蕃茄，最清甜嘅就係啲蓮子，我相信唔係好多人食過新鮮蓮籽。首先摘個蓮蓬，一個蓮蓬大約有十幾粒蓮籽，啲蓮籽好似粒欖咁嘅形狀，有層綠色嘅厚皮包住，搣開層皮，就會見到淡黃色嘅肉，嗒落真係好清甜架。不過記住掹咗條芯先至食，如果唔係，食落會有少少苦味。
 
記得有一次落雨，我哋幾個朋友除咗摘咗啲蓮蓬外，重順手掹埋塊蓮葉嚟擋吓雨。

我哋一路行一路食，唔知幾過癮，點知有個阿叔迎面行緊過嚟，二話不說，就摑咗前面行緊個friend一巴，跟住大嗌：你班死仔，偷野食！打死你班死仔至得！

 
嚇到我哋走夾唔唞！呢個故事教訓我哋，以後……唔係唔好偷野，不過，偷咗野之後，千祈唔好大模私樣，招搖過市。
 
一年四季，我最鍾意秋天，因為秋高氣爽，係煨蕃薯嘅好時節。首先將啲蕃薯連埋泥一齊掘出嚟，連洗都慳番，再將啲蕃薯喺啲濕泥漿度「碌幾碌」，然後揾啲樹枝「透」過火，燒到個火夠哂猛嘅時候，然後將啲「黐」滿泥漿啲蕃薯揼落去啲火堆度，唔好理佢，等佢一路燒，一路燒，直至啲柴燒完之為止。
 
喂！唔好心急，咁快就伸手去攞嚟食先至得架！我都未講完。雖然啲蕃薯真係好鬼香，之但係各位千祈唔好咁喉急，咁快就攞啲蕃薯出嚟，俾少少耐性，焗多十零二十分鐘，等啲火熄晒先，然後將啲蕃薯揾支竹仔喺火堆裡面摷番出嚟，包住蕃薯啲泥已經烘乾晒，變成黑色，唔好唔開胃噃，啲蕃薯皮「黐」住啲乾泥，一搣就甩，而金黃色同埋香噴噴嘅蕃薯肉就會呈現眼前，依家諗番起，重猛咁吞口水！

 除此以外，執田螺同埋捉啲「和味龍」，即係龍蝨嚟食都幾過癮。

田螺剩係喺水稻田先至有架，執咗返嚟唔好即刻食，要用清水養幾日，等啲田螺噴晒啲泥出嚟先，如果唔係就有陣泥味。

烹調方式因人而異，我喜歡白灼或者用蒜頭豆豉炒，入口鮮甜，真係無得頂！而「和味龍」係黑色甲蟲嚟嘅，約莫吋零長，腹部有條剌，要用水灼一灼，等佢哋放咗啲尿先至可以煮食，我唔係咁鍾意食，所以唔識教你哋點樣煮。

查實喺田野間重有好多好玩嘅野，我同班friend最鍾意喺啲水池「杜」魚。首先買啲魚藤，用水浸幾個鐘，等啲魚藤淋淋哋，然後用舊石係咁鑿，係咁鑿，一路鑿一路加水，你會見到有啲奶白色嘅液體流出嚟，我哋將啲液體收集然後放入個桶度，再加少少水，咁就大功告成。

 
查實嗰啲液體係有輕微毒性嘅，我哋揾個細啲嘅池塘，將啲魚藤水倒落去，你會見到啲水慢慢變成淡白色，過咗冇幾耐，就會見到啲魚開始不斷掙扎，浮晒上水面，嗰陣時任你捉 。有時「杜」啱啲「塘虱竇」，分分鐘有過百條塘虱，認真和味。

除咗塘虱之外，有時連水蛇同埋黃鱔都「杜」埋出嚟，所謂有殺錯，無放過。水蛇可以煲湯，黃鱔可以炒燈籠椒。之不過劏黃鱔係要有相當技巧嘅，咪話我唔預早通知，呢個場面係好血腥架！如果係小朋友，必須有家長陪同先至可以睇架！

 
首先揾個「銳」同一個木砧板，然後將條黃鱔個頭擺喺砧板上面，用個「銳」一野插落去，會有啲血標出嚟，小心唔好整汚漕件衫。條黃鱔個頭就會固定喺個砧板上面，條黃鱔會痛到典嚟典去，你就一手捉住佢條尾，然後將條黃鱔用手拉直，再喺佢個背脊骨度用介刀介開，最後成條背脊骨連埋個頭 就會離開啲肌肉,跟住用力一扯，就會骨肉分離。呢個時候，你可以用刀打斜嚟切，如果唔係，啲肉炒熟之後，會縮到好細粒。
 
洗乾淨之後，用少少生粉同埋生抽加啲油醃一醃，就可以落鑊炒。大家有時間可以試試，好有滿足感架！至於「塘虱」則用豉汁蒸，正呀！

查實重有一樣野好好味嘅，就係黃蜂虫。即係黃蜂未成長時嘅幼虫。

捉黃蜂幼虫係要冒好大嘅風險。通常我會同我細佬一齊出馬，揾一枝長竹，將啲爛布碎綁喺竹嘅一邊，然後索滿火水，跟住用條大毛巾包住個頭，再加個透明膠袋笠住，咁樣既可以睇到野，又可以唔怕俾啲黃蜂針親。
 
假如唔做足安全措施，分分鐘俾啲黃蜂針到變豬頭。開始嘅時候，首先點著啲布碎，跟住將啲火「隊」 住個黃蜂竇，啲黃蜂翼一掂到火就自動摺埋，黃蜂無咗對翼，就惡唔得出樣。其他嘅黃蜂知道火嘅利害，重唔雞飛狗走咩！最後個黃蜂竇手到拿來。

 
我同我細佬即刻掹啲黃蜂虫出嚟擺入個口度，啲黃蜂虫喺個口裡頭郁嚟郁去，好鬼得意，我一啖咬落去，感覺到條虫爆咗，啲野流出嚟甜甜哋，腥腥哋，好有口感。如果你嫌核突，可以用豉椒爆香嚟食，好有益架！

試過有一次，我細佬發現咗個好大嘅黃蜂竇，我係咁意睄吓，都嚇咗一跳，呢個真係超級大，比平日見到嘅起碼大成倍。望真啲，嗰個唔係黃蜂竇，而係「奀」蜂竇嚟嘅。

「奀蜂」又叫鬼頭蜂，比黃蜂大成個碼，黑橙色相間，唔信你睇吓個樣都已經嚇你一跳。呢隻蜂比較難對付。嗰次我用咗二條毛巾包實個頭，再用一個大啲嘅膠袋笠住，以為萬無一失。跟住照板煮碗，點著啲布碎，一於用火攻，心諗幾分鐘後又有一餐美食。點知呢次認真大鑊，啲奀蜂連火都唔驚，搏命衝埋嚟向住我哋狂針，啲針連毛巾都穿過，我個頭被佢哋拮咗幾針，痛到飛起，我細佬一樣中招。

我哋兼顧唔到個蜂竇，即刻奪命狂奔，啲奀蜂追到一半，見到我哋落荒而逃，先至鳴金收兵。嗰次我中咗五針，細佬中咗三針，我同細佬個頭都脹到豬頭咁大，雙眼變咗二條線，幾乎乜都睇唔到，個頭重不斷咁赤赤痛不突止，重俾老豆炳餐飽，話我哋唔扺可憐。

嗰晚痛到飯都無心機食，成個幾禮拜先至開始復原，以後見到啲奀蜂竇都要運路走。

....../