小時候(完結篇)

玩厭「逼廹筒」之後，我哋就會去放紙鳶，我哋唔單只係將隻紙鳶放上天，重要用條紙鳶線將其他嘅紙鳶線野界斷先至夠威。
 
紙鳶線分有玻璃粉同無玻璃粉兩種，就算有蠟咗玻璃粉嗰隻紙鳶線我哋都唔會買，因為仍然唔夠利。我同個死黨會執啲爛咗嘅光管，將光管用石仔鑿到變成粉末，然後揾個鐵罐煲溶啲牛皮膠，再將啲玻璃粉溝落牛皮膠度，然後一路煮，一路攪，直至變成糊狀，就可以開始蠟線。
 
首先用二個線碌，將啲線由一個線碌捲去另一個線碌，再用塊紙皮將啲黐滿玻璃粉嘅糊狀牛皮膠擺喺兩個線碌中間，條線經過啲牛皮膠嘅時候，啲玻璃粉就會黐喺條線上面，跟住等啲線乾，就算大功告成。
 
查實啲玻璃線係好危險嘅，如果一唔小心，隨時界損手腳。聽講曾經有個女仔，喺踩單車嘅時候，唔小心有條紙鳶線橫跨路面，差啲介斷大動脈，幾乎連命都冇埋！

放紙鳶好講技巧嘅，紙鳶分兩種，一種有尾嘅，另一種係冇尾嘅。有尾嗰種好易放，因為放咗上天之後比較穩定，但係唔好嘅地方就係一啲挑戰性都無。對於我哋呢啲以為好醒嘅人 ，一定唔會放呢種低Ｂ紙鳶。

 

 
而無尾嗰種叫馬拉鳶，放咗上天之後無咁穩定，無咁易控制，但用嚟界線就非用馬拉鳶不可。由於無咗條尾作穩定作用，隻紙鳶會兩頭擺，我利用佢擺動嘅方向，用力拉拉條線，隻紙鳶就會向嗰個方向俯衝，但當你稍為放鬆條線，隻紙鳶突然無咗拉力，佢又試開始兩邊擺。
 
我利用以上嘅原理嚟控制隻紙鳶俯衝、急昇同埋轉彎。如果想界斷其他紙鳶線，一定要有好好控制隻紙鳶嘅技巧先至得。嗰陣時啲人覺得放有尾紙鳶係低層次啲，等於揸手波車而唔揸自動波車道理一樣。嗰陣時我同死黨組成界線二人組，所向披靡，戰績標炳，界親線都好少輸，真有打遍天下無敵手嘅感覺。 

講真嗰句，我同個死黨玩乜都啱。玩完紙鳶之後，最鐘意就係去射雀仔。所謂工欲善其事，必先利其器。首先要整個彈弓先，我先前講過，番石榴嘅樹枝係最硬淨嘅，所以我哋要揾棵番石榴樹，鋸個椏义出嚟，再去單車舖執啲唔要嘅單車呔內胆，然後將啲內胆剪成條狀，總共兩條，咁就可以做一個彈弓。




我個死黨射雀仔好鬼準，通常都會有收獲。依家諗番起，我哋都好殘忍。啲雀仔本來好地地咁出嚟揾嘢食，點知無端端俾人射死咗，永遠番唔到屋企，你話幾咁凄涼。我哋將自已嘅快樂，建築喺雀仔嘅痛苦身上，之不過當時完全唔覺得有問題，重唔知幾過癮 ！

我哋將啲雀仔毛掹晒，劏洗乾淨，用醬油醃一醃，然後落油炸到卜卜脆，好食過肯得基。
 
但有時唔到你唔信邪，聽上咗年紀嘅人話 ，燕子係觀音大士嘅衛兵，俗稱觀音兵，千祈唔好射殺佢哋 。如果唔係會有報應喎！我哋乜都唔信，但試咗幾次，喺好近距離都射佢哋唔中。有一次仲射到連椏义條膠都斷咗，彈到手臂都腫埋。唔通真係咁邪？我哋開始半信半疑，自此以後，我哋都唔敢再射燕子。

除咗射雀仔之外，重有一樣好好玩嘅野，就係捉田鼠。唔知大家有無見過瓜田？種瓜前首先要將每一行嘅泥土推高約一呎，變咗《行》同《行》之間嘅泥土相對低咗落去，由於種瓜同荳角需要較多水份，故此低咗落去嘅地方會浸滿晒水，方便灌溉。喺夏天，當嬌陽似火嘅時候，啲水被陽光猛烈照射，溫度不斷上昇。喺度瞓緊覺嘅田鼠俾啲水淥到扎扎跳 ，由地洞爬出嚟，游晒出水面透氣。你只要一手撈落水面，就可以夾住三四隻田鼠嘅尾巴，跟住捉佢哋上嚟。

 
我最高嘅紀錄係一次過捉八隻，左手四隻右手四隻。吓？唔駛驚，田鼠唔會咬人嘅。佢哋同老鼠有好大分別，田鼠個身肥嘟嘟，身長約兩吋，但係條尾就有成三吋長，佢哋個樣好得意好趣緻。我哋雖然乜都食，但係啲田鼠我哋唔會食咗佢哋，只不過捉嚟玩吓啫， 玩完之後會放番佢哋走。

同田鼠相反嘅就係狗毛蟲，佢哋個樣特別核突同埋乞我憎，佢哋有啲大到成二三吋長，如果唔小心俾佢哋躝過，啲肌肉會鬼死咁痕痒同埋腫痛，跟住仲會發炎添。

 試過有一次有條狗毛蟲由屋頂跌咗落我背脊度，我自然反應，一手就拍落去，條毛蟲俾我拍扁咗。呢次慘喇！佢嘅毛同埋身上邊嘅毒液，整到我背脊嘅肌肉紅腫同潰瀾，足足搞咗幾個星期先至好番晒。

自此以後，我對啲毛蟲恨之入骨 。重諗 咗一個好殘酷嘅方法對付佢哋，我首先點著枝蠟蠋，然後用啲蠟蠋油滴到條毛蟲周身都係，跟住用火點著佢啲毛。
 
毛蟲啲毛就好似蠟蠋嘅芯一樣， 啲火好快就蔓莚開去，唔駛一陣間，成條毛蟲 就著晒火，佢雖然不斷掙扎，之但係啲火愈燒愈烈，條毛蟲搏命喺地上典嚟典去，想整熄啲火，不過徒勞無功，終於《壯烈犧牲》。而毛蟲燒熟之後，發出一陣燒焦嘅氣味，嗰種氣味，同依家燒烤嘅味差唔多，所以我唔係好鐘意燒野食，因為一聞到啲氣味，我就諗到一條燒到硬晒嘅毛蟲，胃口都反埋。我當時完全唔覺得殘忍，重以諗到呢個對付毛蟲嘅方法為榮添！　

我嗰陣時讀過一本書， 叫《仲夏夜之夢》。而實際上，仲夏嘅夜色真係好迷人架。我鐘意走去啲田野玩，夜嗎嗎,有乜野好玩喎？咁你就錯啦。喺漆黑色嘅夜空，除咗繁星點點之外，重有成千上萬嘅營火蟲不斷飛舞，你話幾咁壯觀！

 
我同細佬通常會揾個蝴蝶網，跟住走落田基度，唔駛一陣間，就笠滿一大袋營火蟲，玩到攰晒先至番屋企。我哋放晒啲營火蟲入蚊帳裡面，一面瞓覺，一面欣賞，唔知幾咁過癮 。
 
唔講或者你唔知，除咗營火蟲會發光之外，重有一種會發光嘅蟲 。有一次夜晚，我經過路邊見到草叢中有點光，以為係營火蟲，即刻施展擒拿手，一嘢擸落去，重唔捉到你？營火蟲！我慢慢攤開隻手，用另一隻手捉住果點光，驚佢走甩，咦？點解咁得意嘅？乜呢隻營火蟲無翼架？一睇之下，原來喺我手裡面係一條肥嘟嘟嘅蟲仔，嚇到我一手將佢擯走，自此以後，我見到發光嘅野都唔敢亂摸。

嗰陣時嘅夏天好鬼熱，如果撞啱焗雨，重加辛苦。我細個嘅時候，莫講話冷氣，連風扇都欠奉。之不過就算有都無用，因為我住嗰條村無電力供應。到咗夜晚，啲氣溫仍然徘徊喺30度左右，間屋又細又焗，問你點瞓？
 
隔離鄰舍一樣個個都熱到唔會留喺自已間屋度。故此到咗夜晚，啲村民都坐晒出門口乘涼同埋吹水，好鬼熱鬧。我習慣揸住把葵扇，喺村口嘅大麻石上面露天而睡。隻手不斷撥扇，撥到攰就自自然會瞓著，唔駛好似依家啲人，吓吓都話要食安眠葯先至瞓得著覺。

 
記得有一晚，熱到飛起，撥扇撥咗好耐先至瞓得著。矇矇矓矓之間，突然感到好舒服，好涼爽喎，好似游緊水咁，正呀 ！以為發緊夢，原來係落緊大雨，拿拿聲走番入屋。呢啲咁嘅生活，只有我嗰個年代先至有，講得好聽啲，就叫做與大自然合而為一。
 
當年生活雖然艱苦，但就幾多彩多姿，如果有得選擇嘅話，俾我再揀多一次，我都係揀番以前嘅生活，如果唔係，想當年就冇嘢值得寫架啦！