小時候(四)

我哋嗰陣時嘅娛樂，無依家啲細路咁多采多姿 ，最流行嘅係拍公仔紙同埋打波子 。公仔紙係一張張咁買嘅，每張公仔紙有唔同嘅圖案。

 

我鐘意買一啲關於戰爭嘅公仔紙，有飛機，坦克車，士兵，大炮等等。買完之後要逐張剪出嚟，每張大約２吋乘１吋。

 

公仔紙有幾種玩法，第一種係拎張公仔紙擺喺右手掌中間，然後用同對方右手對拍，跟住鬆開手，兩張公仔紙會跌落地，反轉嗰張就算輸；

 

另一種玩法就係喺幅牆度畫一條線，然後輪流用手將公仔紙按貼喺條線嘅位置，跟住鬆手，張公仔紙就會跌落地上，咁啱跌中其中一張，即係表示你可以嬴得嗰一張。

 

重有另一種玩法，係將公仔紙放喺枱上或者地上，輪流用雙手拍一下，利用拍手掌產生嘅風力，將對方嘅公仔紙反轉，咁就算贏。

 

至於打波子就好簡單，係泥地上面畫一條線，距離大約１5呎左右再畫一個圈。二個人玩又得，多個二個玩都得。

 

首先大家擺相同數目嘅波子喺個圈裡面，然後喺條線嘅位置開始,輪流將粒波子向個圈方向碌過去,最接近個圈嘅打先。大家儘量將個圈裡面嘅波子彈出嚟,彈中嘅話，嗰粒波子就係你嘅,同埋可以繼續玩落去,直到彈失為止,先至輪到下一位。

 

如果眼界好，可以一次過清晒啲波子，倒返轉頭，如果唔夠技術，自己粒波子入咗個圈度，咁就會罰唔俾再打,即係輸晒。

 

另一種玩法係喺泥地挖個大約直徑3 吋嘅窿,然後將對方嘅波子彈落個窿度,咁就算嬴。

波子分兩種，第一種透明，另一種唔透明，俗稱石雞。我嗰陣時好鐘意收集唔同類型嘅波子，得閒就拎出嚟欣賞吓，唔知幾過癮！

 

除咗拍公仔紙同埋打波子之外，就鐘意就係整椏义射雀仔。重記得細個嗰果陣時，四圍都係菓樹，好似龍眼，荔枝，黃皮同埋杧菓等等，最常見嘅就係蕃石榴，因為好粗生。

 

咁多種樹，最危險同埋最難爬嘅首推龍眼樹。你唔好睇佢啲樹幹大大枝，查實係非常脆弱，好容易斷架！而蕃石榴樹係最硬淨嘅，佢哋啲樹枝雖然鬼咁幼，但係好有彈力！屈極都唔會斷,所以我哋鐘意揾蕃石榴樹嘅樹枝嚟做椏。

 

至於本地出產嘅荔枝有好多種，但大部份都係帶啲酸！雖然話一個荔枝三把火，但我都話之佢，食咗至算。對啲荔枝虎視眈眈嘅，唔單只係我哋班友仔，重有了哥，黃蜂及臭屁蟲。

 

試過有一次，我同幾個friend潛入附近個菓園度，靜雞雞爬咗上棵荔枝樹，睇吓有冇正野食，點知就喺嗰個時候，有隻黃蜂飛埋嚟，一啲警告都冇，就一野咭埋嚟。痛到我飛起，班friend猛咁「殊」我，吓？真係好鬼痛呀！「嗔」吓都唔得？

 

係喎，差啲唔記得咗嗰陣時係偷緊野食添！個園主可能聽到有聲，攞住椂棍出嚟巡視。好彩樹葉又多又密，佢望極都睇我哋唔到，如果俾佢睇到，肯定腳都被佢摳破。佢企咗成幾分鐘先至走，真係俾佢吹脹。嗰次俾隻黃蜂針到條頸，腫咗少少，算係不幸中之大幸。

講到食蕃石榴，我可以話係專家，皆因為食得多，累積咗一定嘅經驗，邊種好食？邊種爽脆？邊種清甜？我一眼就睇得出。最唔好食就係圓碌碌，深綠色嗰種 ，啲肉又硬又淡，加上核又多，真係貼錢都唔會食。

 

而燈胆型，啲皮青綠色嗰種好鬼爽甜；最正就係燈胆型，啲皮帶嫣脂紅色嗰隻。啲肉又厚又甜又多汁，好食到飛起。

 

之不過，菓蠅係蕃石榴殺手，佢哋十分識食，專揀呢種蕃石榴落手，就喺佢哋開花嘅時候，將蟲卵注入花粉度，當菓實結出嘅時候，啲蟲卵一路隨住菓肉生長，開始成蟲的時候，就當啲菓肉係自已間屋一樣，老實不客氣，一路長大一路有野食，唔知幾爽。

 

我記得有一次，我一口氣食咗六七隻蕃石榴落肚，忽然見到其中一隻蕃石榴嘅表皮有一啲黑色野，我大力擠咗一下，咦？有啲汁流出嚟喎！跟住嗰點黑色嘢重同我點頭添！唔通眼花？吓 ？唔係啩！原來係條蟲仔個頭嚟嘅！

 

我搣開個蕃石榴睇真啲先？唔睇尤自可,睇咗真係大吃一惊，只見啲菓肉裡面，萬頭鑽動，好多蟲仔喺度郁吓郁吓！諗起都有啲反胃。之後我發覺大部份蕃石榴都有蟲，由嗰陣時開始，我唔敢再食蕃石榴啦！

話時話吖,我細個嗰陣時冇錢買零食，好彩喺鄉下地方好易揾到嘢食。由塘中游魚，黃蜂田螺至到荔枝龍眼等等，應有盡有。諗諗吓，爭啲唔記得咗，重有一樣昆蟲叫桂花蟬，啲桂花蟬都幾大隻架，有成三至四吋長，個樣同啲蟬冇分別，只不過大隻好多。

 

唔知點解，有啲人好驚佢哋，唔敢落手捉，因為佢哋個樣都幾核突。之不過佢哋唔好彩，踫啱我哋，結果連條命都冇埋。

 

啲桂花蟬通常唔會無呈呈咁喺條街出現嘅，只有氣壓轉變，有風雨嚟之前，佢哋先至會飛出嚟，我到依家都唔明，佢哋會不斷撲向啲街燈，結果撞到頭暈眼花，跟住跌晒落地，所以好易捉。

 

我哋就揾個袋執晒番屋企，洗都慳番，用啲粗鹽將佢哋醃幾個禮拜，原汁原味，之後就可以用嚟煲粥，雖然佢哋個賣相唔多好，不過啲粥又幾鮮甜。我相信依家啲小朋友見到都唔敢食，但係喺我哋個陣時就當係寳嚟架，聽講食咗可以清熱消滯，延年益壽喎

 

睇咗咁耐，你係咪覺得我細個時嘅好過癮哩！玩玩吓又過一日，真係他條。查實我重未寫我做嘢嗰種辛酸法。

 

我嗰個年代比石器時代先進少少，細個嗰陣時無電，無自來水，更加無媒氣或石油氣用。我除咗要担水之外，重要幫手推柴。每個星期日朝早，我同大哥，細佬加埋阿媽，用二部木頭車，到附近木廠買柴燒。

 

啲柴係做傢俬用剩嘅頭頭尾尾，擺到成個山仔咁高。有大有細，有長有短，有厚有薄。雖然係執柴咁簡單，但都要用吓腦嘅。首先要執啲差唔多大細嘅木塊，如果唔係嘅話，要綁穩喺架鐵車度都唔係咁容易。其次要挑選啲掂紋嘅木塊，因為容易劈開。

 

執柴要小心啲刺，好易拮親手腳，而木塊與木塊之間分分鐘會有蜈蚣喺度休息，俾佢哋咬親真係邊度都唔駛去。通常要用成二個鐘頭先至完成工作。返到屋企，要輪住嚟破柴。一般嚟講，我嗰個年代嘅生活都幾艱苦，所以好少肥仔肥妹。講都冇人信，禮拜日對我嚟講，係成個星期最辛苦嘅一日！

劈完柴之後嘅節目就 係穿膠花，嗰陣時有啲貨車專程由工廠區，例如荃灣同埋葵涌等地，將啲塑膠葉同埋塑膠花，運嚟新界俾啲村民穿。

 

架車一到，啲村民就會揾架手推車，將啲膠花推返屋企。每個客戶都會開本薄仔記數。果啲膠花，一批批唔同，有啲好易穿，啲葉一搣就甩，有啲由於啤得唔好，穿到手都痛埋，都係贃得雞碎咁多，揾食艱難 。

我隔幾間屋住咗一位蘇先生，佢請咗二個伙記，專做藤椅及藤屏風買俾啲西餐廳用，佢哋首先將啲粗藤浸淋，然後用火將需要屈曲嘅地方加熱，佢哋利用呢個方法，屈吓屈吓，話咁快就屈好一張藤椅架出嚟。

 

當然睇就容易，事實上好考技巧，少啲氣力都唔得。屈完個架之後，要用啲浸過水嘅薄藤嚟織，先至可以拎出去買。我得閒就踎係度睇佢哋做野，蘇生見我咁有興趣，就問我想唔想學織藤椅，織一張三十蚊。

 

我數吓手指，穿成個禮拜膠花都係得嗰十蚊八蚊，如果兩日織一張都幾好揾。我同蘇生講唔知學唔學得掂！蘇生話我咁醒目，好快趣就會學識。

 

我開始學織藤椅時讀緊小學六年班，至於啲膠花就留番俾細佬妹做。實說實話，叫我讀書真係冇咁上心，之但係學埋啲古靈精怪野，真係幾快手架。

 

學咗個零星期我已經識得點織，當然起初織得唔快，但過咗兩三個月就已經熟晒手。一至兩日已經織好一張椅，如果放假，我試過一日織好一張藤椅，連蘇生都讚我快手。我喺嗰個時候，揾到唔少錢架！

除咗聽收音機，睇戲，捉魚同埋偷生菓食之外，我哋嗰陣時重有好多野玩架！我哋最鐘意捉啲「金絲貓」玩。查實「金絲貓」唔係貓嚟嘅，佢哋有個花名叫豹虎，屬於蜘蛛一族，類似蠄蟧 ，佢哋有個特性就 係好勇鬥狠，一踫頭就會打餐死。

 

佢哋住喺樹葉之間，通常將兩塊樹葉用啲絲黐住，就成為佢哋嘅豪宅。諗吓真係做昆蟲好過做人，鍾意住邊度就住邊度，加上又唔駛交租。

 

有幾種「金絲貓」好好打嘅，好似紅孩兒，燦眼就等等，好少會打輸。我哋用一種植物叫「豹虎勒」嘅樹葉嚟做竇俾啲「金絲貓」住，得閒就捉佢哋出嚟打吓交，都幾過癮！


玩完「金絲貓」之後， 無乜細藝，就整啲「逼廹筒」嚟玩，乜嘢叫「逼廹筒」呢？相信依家好多人莫講話見，連聽都末聽過。「逼廹筒」主要係利用氣壓原理，將啲荳激射出嚟。首先揾一節竹枝，直徑約1cm濶，長度約莫6吋，緊記一邊一定要有竹節，簡單啲嚟講，果枝竹一邊係密封，另一邊就係通窿嘅。

 

另外再揾一條硬淨嘅竹枝，嗰枝竹嘅《嘥屎》最好同竹筒中間嘅空位大細差唔多就最好。首先將竹枝按1對5嘅比例鋸開，結果長嘅嗰一截變成一條竹管，兩頭通，試想想單車泵嘅原理你就會明白，然後將枝竹芯插入喺短嘅竹枝度，咁就完工啦。然後要測試一吓，用枝竹芯套入竹筒度，睇吓暢唔暢順，如果啱啱好嘅話，由「逼廹筒」射出嚟嘅荳就會好勁。

 

嗰陣時有一種樹，開完花之後，會結好多荳，俗稱荳樹。我哋會摘啲荳，用兩粒荳將竹管嘅一頭一尾塞住，然後用竹芯將其中一邊嘅荳推向另一邊，當然要快手，如果唔係，壓力就唔夠，啲荳就射唔得遠。如果「逼廹筒」做得好，可以喺二十呎嘅距離，將一張紙射穿。

.............