桂林遊記 (下)

有話則長，無話則短。話咁快就到咗第二朝，喺一輪拍掌聲中驚醒。今日嘅行程係呢次旅行嘅戲肉，就係跟當地團，坐船漫遊漓江，欣賞沿岸景色，直達陽朔，然後乘車回程，中途會順路落車遊覽劉三姐大樹。

所謂桂林山水甲天下，陽朔山水甲桂林，單睇已經知道陽朔嘅風景幾咁靚。我哋想慳啲使，睇吓有冇啲零團費嘅團，不過欠奉，因為嗰陣時冇呢一類嘅團，加上沿途唔會停站，全程喺船上欣賞兩岸景色，又點去購物呢？

我哋上咗船之後，沿途風景優美，我哋見到有啲漁夫一路攞魚一路帶埋啲寵物雀喺架船度，又幾識嘆喎！點知個導遊話嗰啲唔係寵物雀，佢哋叫鷺鷥，佢哋捉魚好叻架，所以啲攞魚佬喺佢哋條頸度整條索帶，等佢哋捉到魚都吞唔到落肚。結果啲鷺鷥係咁捉魚，啲攞魚佬就係攞，好過去搶，咁嘅打魚方法，又幾過癮喎！不過對啲鷺鷥就唔係好公道，捉魚就有份，食就無份。

算喇！呢個世界不嬲都冇公道架啦！我相信好多人都有類似經歷，做就有份，至於升級就無份，原因好簡單，你咁做得嘢，升咗你級走鬼埋，未必會揾到一個好似你咁做得嘢嘅員工，所以老細點會升你級，俾你走。總之一句講晒，呢個世界冇公道嘅，無論你係人定禽畜！

講番我哋嘅行程先，沿途景色秀麗，山嘅形狀千奇百怪，有啲似貓，有啲似月亮，真係目不暇給，其中較為出名嘅有伏波山同埋叠彩山。兩岸風光明媚，非筆墨所能形容，沿岸群山氣勢磅薄，令人嘆為觀止。由於材疏學淺，唯有引書嚟形容漓江嘅景色：《望群山，始指異之。山勢岈然洼然，若垤若穴，尺寸千里，攢蹙累積，莫得遯隱；縈青繚白，外與天際，四望如一。然後知是山之特出，不與培塿為類。悠悠乎與灝氣俱，而莫得其涯；洋洋乎與造物者遊，而不知其所窮》，查實呢段係我加加減減老作嘅。

 

去到晏晝，漓江遊到達尾聲，我哋喺陽朔落船，然後上旅遊巴回程，嗰架旅遊巴士殘殘舊舊，喺香港可能已經劏咗。沿途景色雖然同漓江冇得比，之但係郊野景色睇極都唔會厭嘅，話雖如此，開頭睇有啲新鮮感，但睇吓睇吓隻眼開始有啲唔聽駛，加上架車又無冷氣，竟然喺不知不覺間瞓著咗。

唔知過咗幾耐，突然間聽到個司機話：到咗喇！吓？返到桂林市？都幾快喎！你發完夢未呀？突然聽到一把熟識嘅聲音，吓？阿黃你講嘢呀？梗係我啦！呢度唔係桂林市，喺另一個景點，劉三姐大樹，快啲落車啦！落車一睇，棵樹真係好大棵喎。不過我係喺新界大嘅，多見樹木少見人，話之你劉三姐抑或劉二姐大樹吖，問心嗰句，我對睇樹真係一啲興趣都冇。

逗留咗約二十分鐘就開始回程，我之前都講過架旅遊巴士好鬼殘舊，所謂好嘅唔靈醜嘅靈。架老爺巴士開咗約莫一個鐘頭，開始見到有啲煙喺車頭散出嚟，之後愈出愈多，成架車煙霧迷漫，司機大佬話架車水滾，唔可以再行，咁即係點？我哋一齊問個司機。只見個司機大佬掀開咗司機位傍邊嘅鉄板，望咗一陣間就同我哋講：等陣間散減啲熱，加番滿啲水，架車就可以開番架喇！

嗰陣時同依家唔同，有乜冬瓜豆腐，即刻打手提求救，嗰陣時冇手電，喺荒山野嶺死咗火，真係叫天不應，叫地不聞，除咗自求多福之外，我諗唔到有乜嘢可以做。只見司機拎咗個水桶落車，左望望，右望望，先至發覺架車周圍都係草原，距離最近嘅樹林都有幾百碼。司機向住左手面嘅樹林走去，我哋目送佢跑咗成十幾分鐘先至慢慢喺草原消失，成車人百無了賴，架車又熱，個個走晒落車等。

等咗差唔多四十分鐘，重未見司機返嚟，啲同車嘅遊客開始有啲擔心，司機係咪揾唔到水抑或有意外哩？如果到今晚都唔返？又點算呢？最慘就係嗰條路成個鐘頭都無架車經過。我哋問阿黃點算，阿黃安慰我哋話冇事嘅，請放心。咦？阿黃講得冇錯喎，話口未完，我哋望到遠處好似有人跑緊過嚟，過咗幾分鐘，証實真係司機大佬嚟嘅！大家開心到拍手掌歡呼。我見到個司機攞住桶水，大汗踏細汗，氣羅氣喘咁跑番嚟，真係戥佢辛苦！後尾聽個司機講，喺內地揸長途車必須識得修理汽車先至有人請。照咁睇，喺內地做司機都唔係咁簡單。

架老爺車加滿水之後，真係可以行番，司機話唔可以開咁快，驚架車再水滾就分分鐘玩完，遲到好過無到，大家都支持司機，最後安全返抵桂林市。

玩嘅時間過得特別快，眨下眼就踏進第四日，阿黃安排今日去遊象鼻山。食完早餐，跟住搭車去目的地。我哋見到有艇仔出租，諗吓喺漓江扒艇都唔錯喎，即刻租咗幾隻艇仔，換好泳衣，我同埋3個朋友扒一隻艇。近住岸邊啲艇多到你踫我，我撞你，點扒呀？我搲晒頭，點解啲人咁蠢，全部集中晒喺江嘅左邊扒，我望出離岸十幾米嘅湖面，揾隻艇睇吓都難。我同班朋友講，啲大陸人真係蠢，大把地方扒，但唔明佢哋點解鐘意廹埋一堆，我哋一於扒出去，然後再去象鼻山。

我哋扒咗冇幾耐，開始覺得有啲唔妥，點解隻艇去得咁快嘅？大鑊！依家知道點解冇人扒出去喇！原來出面水流湍急。我哋完全控制唔到隻艇，啲水流愈嚟愈急，斃傢伙，仲出現旋渦添！隻艇一路沖一路打轉，嗰陣時個心開始有啲慌，因為成隻艇得一個識遊水，其餘係屬於識少少，扮代表之流。話都冇咁快，我哋失去平衡跌哂落水，隻艇跟住翻轉埋。


我發覺水底生滿水草，既驚俾佢哋纏住對腳，又驚掹唔住隻艇邊，因為船邊滑脫脫，好難掹得緊．如果掹唔穏，分分鐘浸死。我哋死命執實船邊，好彩約五分鐘之後，水流開始冇咁急，我哋任隻艇漂，最後漂到條象鼻附近嘅位置，先至知道象鼻嘅位置好深水嘅，起碼有幾十呎。正舒一口氣之際，突然見到有個人喺我哋側邊嘅水底浮出嚟，佢仲揸住支魚槍，原來佢潛水射魚。嘩！有冇搞錯？有乜依郁，分分鐘俾佢射死！我哋愈諗愈驚，即刻用腳死撐過對面岸邊。結果用咗成二十分鐘先至上到岸，隻艇睇起上嚟唔係咁大隻，但一離開水之後就好鬼重，我哋幾個人合力拖都覺得好辛苦。

最後用咗成個半鐘頭先至拖番隻艇俾船家，呢次真係筋疲力盡，成個人散晒。跟住俾個租船佬鬧到隻狗咁，話幾乎俾我哋累死。原來佢哋唔可以租船俾外地遊客，有乜意外，佢哋會連牌都釘埋。我哋唯有向佢不斷《沙冧》。其餘嘅朋友就冇學我哋咁扒出去，佢哋話岸邊扒船唔知幾好玩，又安全，唔似得我哋幾個咁有冒險精神，仲話好遺憾體驗唔到我哋嗰種剌激添！真係俾佢哋吹脹！睇吓個錶差唔多十二點，我即刻話：講多無謂，再唔去食嘢個肚就真係濕濟！

食完飯之後，就喺象鼻山一帶遊玩，之前講過大陸人嘅衣著係冇乜色彩嘅，但當我哋遊覽緊嘅時候，突然間眼前一亮，竟然見到穿著比較色彩鮮明衣著嘅少女，同佢傾開先知道佢哋係嚟自廣洲嘅大學生，雖然唔係天姿國色，但勝在青春無敵。之後發覺背後有幾個人虎視眈眈，原來係同埋嗰個少女一齊嚟嘅朋友，幾個都虎背熊腰,好漢不吃眼前虧，我哋知難而退。除咗差啲浸死之外，嗰日都算好玩。

第二日一早，我哋由桂林乘飛機返廣州。預算喺廣州玩兩日就搭火車返香港。阿黃話返去架機靚過嚟嗰架，之前嗰架係《纙旋槳》而呢架係《三义擊》，乜嘢係《三义擊》呀？即係用噴射引擎，比《纙旋槳》更俱威力，速度快成倍，阿黃好正經咁回答我哋。有冇咁勁呀？我心諗。

去到機場，見到架飛機係醒神好多喎。入到飛機裡面，發覺啲坐椅真係新淨好多同埋寬濶好多。喺升空前嘅速度，感覺比《纙旋槳》飛機強勁。而冷氣亦唔似得先前嗰隻用風扇將乾冰吹出嚟，結果唔駛一個鐘頭就飛扺廣州白雲機場。

落咗飛機跟住就搭車去沙河，阿黃已經卜咗旅店。我哋問阿黃呢撻地方個名咁得意嘅？原來就係我哋成日食沙河粉嘅發源地。我哋去到嗰間旅店，發覺重＜屎＞過桂林嗰間。

辦完手續之後，有位同志帶我哋去房間，吓？原來佢帶我哋去咗一個大堂，樓底非常之高，嗰度擺咗三四十張床，每張床除咗有被舖之外，重掛有一堂蚊帳。我見到側邊啲窗，全部啲玻璃都五顏六色，一睇就知道由教會改裝成旅舘。床同床之間完全無間隔，亦無分男女，我覺得似集中營多啲。攪掂咗旅店之後，我哋就喺附近逛街，重特別試試當地嘅特產沙河粉，睇吓係咪好食啲。唔知係咪心理作用，真係幾好味喎！

第二朝一早，食過早餐，阿黃已經安排咗今日嘅行程：越秀公園一日遊。我哋搭公車去到門口，吓？乜要買飛架？先至發覺原來內地嘅公園係要收費嘅！我哋見到兩條隊，一邊寫住：本地居民；另一邊寫住：港澳同胞。入園費就唔係好貴，之不過就唔公道，當地居民平成大半。阿黃話算喇，人哋一個月揾幾十蚊咋。咁又係道理，唯有排番港澳同胞嗰條隊啦！

我哋嗰朝撻對拖鞋，著條短褲，成個街坊《碌》。去到窗口售票處，阿黃計好晒啲錢，跟住遞俾個同志，點知佢突然企起身，睥一睥我哋成班友，跟住大大聲喝我哋：呢度係港澳同胞排架！知唔知？你哋排番隔離條隊！跟住退番啲錢阿黃，我哋搲晒頭，唔知幾時做咗《阿燦》？諗深一層，先敬羅衣後敬人，一啲都冇錯！反正有著數，話之《阿燦》就《阿燦》啦！我哋即刻過隔離排隊。

越秀公園係廣洲著名嘅景點之一，公園係由主峰越井崗同埋周圍嘅桂花崗、木殼崗、鯉魚崗等七個山崗以及北秀、南秀、東秀三個人工湖組成，山水秀麗不在話下，最令人印象深刻嘅係文物古跡特別多，風景優美，其他公園難以相比。我哋梗係要影番啲相留念喇.

園內山水相依，風光自然，草木蔥蘢、鳥語花香，令人目不睱給。我哋第一次去到一個咁大嘅公園，嘆為觀止，唔認鄉下仔都唔得。公園裡面樹木繁密，竹林茂盛，鮮花綻放，真係行極都唔覺得攰。阿黃跟住帶我哋去遊覽《五羊石像》、《鎮海樓》、《明古城牆》、《四方炮台》、《中山紀念碑》、《七十二烈士紀念碑》等各個歷史時期的著名遺跡。

中午飯係喺公園內嘅一間食肆搞掂，始終係食在廣洲，比喺桂林食嘅正好多。而我哋嘅桂林遊亦去到尾聲，第二日就會搭火車返香港，但係喺嗰一刻，我竟然有一種依依不拾嘅感覺，可能係第一次同一班好朋友一齊去嘅旅行啩！

（完）