小時候(二)

除咗睇報紙，我最鍾意就係聽收音機 。當時電台最興個人獨腳騷，乜野叫個人獨腳騷呢？簡單啲講，即由一個主持人，以不同既聲音，同時用不同既角色嚟講故事。
 
當中最繪炙人口既首推「鍾偉明」同埋「李我」。我到依家重記得由鍾偉明主持既「方世玉與洪熙官」，講到好鬼逼真。我每日一到中午十二點，就會「黐」喺個收音機傍邊聽古仔。
 
鍾先生形容得真係好鬼生猛，我直頭好似見到古仔裡面嘅人物，喺我前面飛嚟飛去，拳來腳往，好似現場一樣。所以鍾先生既離世，毫無疑問，係港人嘅損失。
 
而「李我」就專講一啲家庭倫理嘅古仔，例如扮演家婆或媳婦等婆婆媽媽嘅故事，喺嗰個時候嚟講，呢啲故事好有現實感，可以引起聽眾共鳴，所以成為一個長壽嘅節目。

除此以外，嗰陣時有啲節目好得意架，如果你有朋友生日或者結婚，你可以寫封信去電台，到時到候，節目主持人就會讀出你個大名，祝某某人生日快樂，年年有今日，歲歲有今朝；如果係結婚嘅話，就會代你祝對新人百年好合，永結同心。查實啲人我唔認識，之但係唔知點解我幾鐘意聽喎，可能係八掛戥人高興又或者當時冇乜娛樂啦！

 
除咗香港電台之外，我都有聽澳門綠川電台。但剩係鍾意聽其中一個節目，叫「地心探險記」。
 
唔知係咪聽得多，我細細個既時候真係以為地球中心有人居住架！

我老豆就鍾意聽商業電台既「大丈夫日記」。個節目主持人叫林彬，佢係右傾人士。嗰陣時香港啲人分左，右兩派，左派支持共產黨，而右派則支持國民黨。

 
每年十月十日以及十月一日，兩派人士都會為咗慶祝而磿擦，甚至大打出手。

林先生當年喺電台猛日日鬧啲左派人士，譴責佢哋嘅暴力行為，言詞好激烈，招致左派人士不滿，先後警告咗佢幾次，但林先生卻變本加厲，重猛咁左仔前，左仔後，無恥無良，低能辣撻，下流賤格等極盡詆毀既詞語嚟形容左派，最後佢喺上班途中，被人淋電油連人帶車活活燒死。

 
對於近日林先生被形容為捍衛言論自由而犧牲嘅烈士嘅言論，咁就真係見仁見智喇。

如果冇記錯，事件係由天星小輪提出加價五仙所引起，時間係一九六七年。加價事件引發市民不滿，初期剩係上街示吓威，最後演變成暴動。

 
每日報紙嘅圖片，唔係啲防暴隊同埋示威人士既對峙局面，就係啲示威人士頭破血流，燒車呔雜物以及施放催淚彈嘅場面。雖然係黑白照，之但係都幾震撼，睇完之後覺得和平嘅可貴。

嗰陣時有啲激進嘅示威者就四圍放「菠蘿」，千祈唔好誤會，呢啲「菠蘿」唔食得嘅，係土製炸彈嘅專稱。聽講嗰陣時英國佬睇見勢色唔對，喺啟德機場擺咗隻飛機，隨時準備走佬添！

 
我住喺錦田，試過有「菠蘿」爆炸。至於有冇炸親人就無乜印象。我只係記得政府出動埋英軍，帶埋啲搜索犬係我屋企附近四圍咁揾，睇吓有冇可疑人物，見到啲紅鬚綠眼嘅鬼佬士兵，我當時真係好鬼驚。
 
政府見到情況完全沒有好轉，重有少少失控添，最後要實施宵禁。嗰陣時人心惶惶，更有傳言話四人幫準備即刻收番香港，有錢佬聽到就驚到鼻哥窿都冇肉，即刻嗱嗱聲走人，離開香港。
 
啲豪宅同舖位鑑平鑑賤賣，當年喺官塘一個舖位（依家租咗俾屈臣氏）只係賣萬零二萬蚊咋！如果你當時有啲錢加埋夠胆色的話，依家真係印印腳唔駛做。
 
最後經過幾個月既騷亂，加上傳出當時嘅總理周恩來，力拒喺嗰個時候收番香港，市面開始恢復平靜。呢件係我細個嗰陣時發生既重大事件之一。

除咗「大丈夫日記」之外，重有一個真係可以稱得上長壽嘅節目，就係「十八樓C座」，呢個諷剌時敝既節目，由我細細個聽到依家，估唔到播咗幾十年，到依家仍然重咁受歡迎。
 
喺眾多節目之中，我最鍾意聽嗰個節目叫「香江夜話」，一星期播出一次。呢個節目歡迎聽眾投稿，不限題目，隨意發揮，一經獲選，除咗可以喺電台讀出閣下嘅大作之外，重有三十蚊稿費。
 
三十蚊之碼？緊緊夠食餐飯，有乜巴閉？咁你就錯啦！我而家講緊嘅係六七十年代，我姑丈做郵差，月入唔夠兩百蚊。所以三十元唔算小數目。

話說有一晚，當我入晒神咁聽緊個節目既時候，突然聽到主持人讀出一個熟悉既名字，跟住讀埋佢個住址出嚟，噫！唔係咁啱啩，乜咁熟嘅？唓！梗係熟啦！之唔係我屋企囉！
 
原來我大哥靜雞雞咁走去投稿, 見到佢唔知幾開心。咁又係嘅，篇稿獲選中咗喎！佢就好啦，有三十蚊稿費。嗰陣時聽收音機係大部份人嘅唯一娛樂 ，當時住喺附近既村民同埋朋友都聽到我大哥個名，佢哋重讚我大哥好野添！你話幾咁威水！
 
我依家重記得我大哥果篇作品叫「閒時執拾舊書記」，內容大概係話佢執拾舊書既時候，攰過頭瞓著咗，跟住發咗個夢，响歷史洪流中穿梭，藉此帶出佢喺唔同既朝代所見所聞。我個陣時唔知幾咁羡慕，我大哥鬼死咁孤寒，到依家重記得佢話留番啲錢買書，所以唔會請我食野喎！

做人最緊要有自知之明，我知自已唔係一個讀書嘅材料，但為咗嗰三十蚊，我都絞盡腦汁想寫番篇文章，名係次要，真金白銀始終係最吸引。
 
我終於喺讀緊FORM 1既時候，正式投咗第一篇稿。叫做「我的童年」，我以鄉間四季唔同既景色做背景，襯托出多彩多姿的童年生活。所謂四時之景不同，而樂亦無窮也！稿件寄出後，我到時到候就坐定定，第一個禮拜，聽唔到我個名，梗係啦，邊有咁快吖？我自已安慰自已。到咗第二個禮拜，重係冇我個名噃？有少少失望。到第三個禮拜，乜重係冇我個名嘅？我開始醒覺，可能我篇文章經已落選咗。
 
到咗第四個禮拜，我如常扭開收音機，就喺我冇乜期望嘅時候，突然聽到主持人讀出我個名，嗰種開心嘅程度，真係難以形容。

酬勞係次要，最重要嘅就係俾啲顏色大哥睇，因為每當我唔識功課問佢嘅時候，佢第一時間就話我死蠢，佢篇文章同我篇文章都被選中，如果我係死蠢，咁佢都叻得去邊啫！

 
諗到呢度，不禁發出會心嘅微笑。食過返尋味，過咗一個月，啲錢用晒咗，正想寫多篇揾多三十蚊，點知就喺呢個時候，傳嚟一個壞消息，就係嗰個節目宣布暫停，有冇搞錯？我心諗，個節目好地地，點解要停播喎！明知呢個係事實，但我內心仍一廂情願咁等，期待住呢個節目會恢復播出。結果月復月，年復年，最後呢個節目都冇再恢復播出。　

我細細個已經好鍾意聽英文歌，而最令我難忘嘅，就係由UNCLE RAY主持既英文歌曲點譒節目。我識唱好多英文歌，都係拜呢個節目所賜。

 
嗰陣時啲人，普遍嚟講，英文程度係好過而家既小朋友，除咗上課要講英語外，聽得英文歌多亦係其中一個原因。其中Bee Gees, Beatles, Joni Mitchell, Peter Paul & Mary, Simon & Garfunkel & Cliff Richard等等，係我最鍾意嘅歌手。

除咗聽收音機外，我幾鍾意睇戲架。我附近有間戲院，叫錦田大戲院。最平嗰種飛要七毫字，分前座，中座同埋後座。中座好似一蚊，而後座要個二。
 
我試過坐最前排嘅右手面睇戲，由於要打側個身坐，銀幕上嘅人物，個個塊面都拉長晒，睇完戲之後，條頸都梗埋。前座雖然平，由於距離銀幕太近，望完銀幕左上角又要望銀幕右下角，個頭擰嚟擰去，真係苦過梁天來。

我試過買咗前座，情願唔坐，走去後面企喺度睇，點知啲帶位又阿芝阿咗，話唔俾企，之但係對住啲公仔人（紋身），佢哋就唉都唔敢唉，分明恰細路！

 
嗰陣時分早，午，晚三個時段入埸，黃昏七點鐘映頭場，九點半映夜埸，如果喺新年或者一啲猛片，會加推午夜埸。

每晚一食完飯，我就會「裝」吓老豆去唔去街，佢一走時我又走。我會企喺戲院大堂度等機會，見到啲「一條冷」去睇戲嘅人，即刻跟貼佢，揾隻手掂住佢件衫尾入埸，咁就可以唔駛錢買飛都可以睇戲，呢啲俗稱叫「掹衫尾」。

戲院有時會大贈送，買一張飛就可以一次過睇晒上下集，由七點睇到十一點，認真扺到爛。

 
我果陣時最鍾意睇就係黃飛鴻嘅影片，關德興飾演黃飛鴻係忠既，而石堅係演奸角。可能睇得太多，講野都慢咗半拍，好似關德興咁，睩大隻眼，講話逐個字逐個字咁「櫈」出嚟，我後尾都唔敢睇咁多，驚講野「螺螺脷」。

我起初睇嘅都係黑白片，好似「如來神掌」，「武林聖火令」，「仙鶴神針」，「怪俠一枝梅」，「碧血長天」等等。到七十年代初係武打片嘅天下，亦係彩色片開始面世既時候。

 
當時較有知名度嘅導演首推張徹，佢拍啲片以充滿血腥為特色，啲茄汁亂鬼咁「唧」，好似「大决鬥」，「馬永貞」等等。
 
當時以姜大徫，狄龍，王羽，陳觀泰等武打明星嘅知名度較高。同一時間崛起嘅重有天皇巨星李小龍，佢第一套戲「唐山大兄」更將武打片推上高峯。

嗰陣時既電映業如日方中，百花齊放，為全盛時期。之後有許冠文及許冠傑嘅寫實攪笑片。而西片方面則有奇連伊士活嘅獨行俠片集，畢史賓沙及泰倫斯希路以「老虎」命名嘅笑片。

 
除此以外，重有一啲由大陸拍嘅愛國片，好似「白毛女」「甲午風雲」「朵朵紅花向太陽」等等。

我老豆好鬼嚴，無佢批准，我哋幾兄弟係唔可以去睇戲，所以每次睇戲都要靜靜雞。試過有一次俾老豆喺戲院撞見，扣咗我一個禮拜零用錢，認真凄涼！ 

........./